ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ವಹಿವಾಟು ಹೆಚ್ಚುತ್ತಿದ್ದಂತೆ ಈ ಕ್ಷೇತ್ರದಲ್ಲಿ ಒದಗಿಸಲಾಗುತ್ತಿರುವ ಸೇವೆಯ ಗುಣಮಟ್ಟದ ಬಗೆಗೆ ನೀಡಲಾಗುತ್ತಿರುವ ಮಹತ್ವ ವ್ಯಾಪಕವಾಗಿ ಹೆಚ್ಚುತ್ತಿದೆ. ಇದರಿಂದಾಗಿ ಐಟಿ ಸೇವೆ ಒದಗಿಸುವ ಸಂಸ್ಥೆಗಳು ತಮ್ಮ ಸೇವೆಗಳನ್ನು ಹೇಗೆ ವ್ಯವಸ್ಥಿತವಾಗಿ ನಿಭಾಯಿಸಬೇಕು ಎನ್ನುವುದೇ ಇದೀಗ ಒಂದು ಪ್ರತ್ಯೇಕ ಕ್ಷೇತ್ರವಾಗಿ ಬೆಳೆದು ನಿಂತಿದೆ. ಈ ಕ್ಷೇತ್ರವೇ ಐಟಿ ಸರ್ವಿಸ್ ಮ್ಯಾನೇಜ್‌ಮೆಂಟ್ ಅಥವಾ ’ಐಟಿಎಸ್‌ಎಂ’.

ಐಟಿ ಸೇವೆಗಳನ್ನು ನಿಭಾಯಿಸುವಲ್ಲಿ ವಿಶ್ವದಾದ್ಯಂತ ಪ್ರಯೋಗಿಸಿ ಯಶಸ್ವಿಯಾಗಿರುವ ಉತ್ತಮ ಅಭ್ಯಾಸಗಳು (ಬೆಸ್ಟ್ ಪ್ರಾಕ್ಟೀಸ್) ಹಾಗೂ ಪ್ರಾಸೆಸ್ ಮ್ಯಾನೇಜ್‌ಮೆಂಟ್‌ನಂತಹ ತಂತ್ರಗಳನ್ನು ಉತ್ತಮ ಗುಣಮಟ್ಟದ ಸೇವೆ ನೀಡುವಲ್ಲಿ ಬಳಸಿಕೊಳ್ಳುವುದೇ ಐಟಿ ಸರ್ವಿಸ್ ಮ್ಯಾನೇಜ್‌ಮೆಂಟ್‌ನ ಧ್ಯೇಯ. ಈ ಮೂಲಕ ಸೇವಾಮಟ್ಟ ಒಪ್ಪಂದದ (ಸರ್ವಿಸ್ ಲೆವೆಲ್ ಅಗ್ರಿಮೆಂಟ್) ನಿಬಂಧನೆಗಳಿಗೆ ಒಳ ಪಟ್ಟಂತೆ ಗ್ರಾಹಕರ ಅಗತ್ಯಗಳಿಗೆ ತಕ್ಕ ಸೇವೆಯನ್ನು ನೀಡಲು ಐಟಿ ಸಂಸ್ಥೆಗಳಿಗೆ ಐಟಿಎಸ್‌ಎಂ ನೆರವಾಗುತ್ತದೆ.

ಐಟಿಎಸ್‌ಎಂ ಕ್ಷೇತ್ರದಲ್ಲಿ ಇತ್ತೀಚೆಗೆ ಕೇಳಿಬರುತ್ತಿರುವ ಹೊಸ ಹೆಸರು ಐಟಿಐಎಲ್ ಅಥವಾ ಐಟಿ ಇನ್‌ಫ್ರಾಸ್ಟ್ರಕ್ಚರ್ ಲೈಬ್ರರಿಯದು. ಐಟಿ ಸೇವಾ ಕ್ಷೇತ್ರದಲ್ಲಿ ಸಾಮಾನ್ಯವಾಗಿ ಕೇಳಿಬರುವ ತೊಂದರೆಗಳು (ಇನ್‌ಸಿಡೆಂಟ್ ಅಥವಾ ಪ್ರಾಬ್ಲಂ), ಬದಲಾವಣೆಗಳು (ಚೇಂಜ್), ಹೊಸ ಬಿಡುಗಡೆಗಳು (ರಿಲೀಸ್) ಮೊದಲಾದವುಗಳನ್ನು ವ್ಯವಸ್ಥಿತ ವಾಗಿ ನಿಭಾಯಿಸುವಲ್ಲಿ ಐಟಿಐಎಲ್ ನೆರವಾಗುತ್ತದೆ.

ಮಾಹಿತಿ ತಂತ್ರಜ್ಞಾನ ಸೇವೆಗಳನ್ನು ನಿಭಾಯಿಸುವಲ್ಲಿ ವಿಶ್ವದಾದ್ಯಂತ ವ್ಯಾಪಕವಾಗಿ ಬಳಕೆಯಾಗುತ್ತಿರುವ ಕಾರ್ಯತಂತ್ರಗಳಲ್ಲಿ ಐಟಿಐಎಲ್ ಅಗ್ರಗಣ್ಯವಾಗಿ ಬೆಳೆದುನಿಂತಿದೆ. ಇನ್‌ಸಿಡೆಂಟ್ ಮ್ಯಾನೇಜ್‌ಮೆಂಟ್, ಪ್ರಾಬ್ಲಂ ಮ್ಯಾನೇಜ್‌ಮೆಂಟ್, ಚೇಂಜ್ ಮ್ಯಾನೇಜ್‌ಮೆಂಟ್, ರಿಲೀಸ್ ಮ್ಯಾನೇಜ್‌ಮೆಂಟ್ ಹಾಗೂ ಸರ್ವಿಸ್ ಡೆಸ್ಕ್ ಸೇವೆಗಳಿಗೆ ಸಂಬಂಧಿಸಿ ದಂತೆ ಬಳಸಬಹುದಾದ ಅತ್ಯುತ್ತಮ ಅಭ್ಯಾಸಗಳ ಬಗೆಗೆ (ಬೆಸ್ಟ್ ಪ್ರಾಕ್ಟೀಸ್) ಐಟಿಐಎಲ್ ನಿರ್ದೇಶನಗಳನ್ನು ಒದಗಿಸುತ್ತದೆ.

ಇದೀಗ ವಿಶ್ವವಿಖ್ಯಾತವಾಗಿ ಬೆಳೆದಿರುವ ಐಟಿಐಎಲ್ ಅನ್ನು ಮೊತ್ತಮೊದಲ ಬಾರಿಗೆ ಬಳಕೆಗೆ ತಂದದ್ದು ಬ್ರಿಟಿಷ್ ಸರ್ಕಾರದ ಆಫೀಸ್ ಆಫ್ ಗವರ್ನಮೆಂಟ್ ಕಾಮರ್ಸ್ (www.itil.co.uk). ಆದರೆ ಈಗ ಐಟಿಐಎಲ್ ವಿಶ್ವದೆಲ್ಲೆಡೆಯ ಐಟಿ ಸೇವಾ ಸಂಸ್ಥೆಗಳ ಪಾಲಿಗೆ ಆದರ್ಶವಾಗಿಬಿಟ್ಟಿದೆ.

ಐಟಿಎಸ್‌ಎಂ ಹಾಗೂ ಐಟಿಐಎಲ್‌ನಲ್ಲಿ ಪ್ರಾವೀಣ್ಯತೆ ಉಳ್ಳವರು ಐಟಿ ಸೇವಾ ಕ್ಷೇತ್ರದಲ್ಲಿ ಉದ್ಯೋಗ ಅರಸಬಹುದು. ಮಾಹಿತಿ ತಂತ್ರಜ್ಞಾನ ಕ್ಷೇತ್ರಕ್ಕೆ ಸಂಬಂಧಿಸಿದ ಬಹುತೇಕ ಎಲ್ಲ ಬಿಪಿಒ ಉದ್ದಿಮೆಗಳಲ್ಲಿ ಐಟಿಎಸ್‌ಎಂಗೆ ಸಂಬಂಧಪಟ್ಟ ಉದ್ಯೋಗಗಳಿರುತ್ತವೆ.

ಬೇರೆಲ್ಲ ಕ್ಷೇತ್ರಗಳಂತೆ ಇಲ್ಲಿ ಕೂಡ ಸರ್ಟಿಫಿಕೇಷನ್‌ಗಳಿಗೆ ಮಾನ್ಯತೆ ಹೆಚ್ಚು. ‘ಇಂಟರ್‌ಪ್ರಾಮ್ ಯುಎಸ್‌ಎ’ಯಂತಹ (www.inter promusa.com) ಅನೇಕ ಸಂಸ್ಥೆಗಳು ಈ ಕ್ಷೇತ್ರದಲ್ಲಿ ಸರ್ಟಿ ಫಿಕೇಷನ್ ಪರೀಕ್ಷೆಗಳನ್ನು ನಡೆಸುತ್ತವೆ. ಈ ಕ್ಷೇತ್ರದಲ್ಲಿ ಕೆಲಸ ಮಾಡುವ ಸಂಸ್ಥೆಗಳೇ ತಮ್ಮ ಉದ್ಯೋಗಿಗಳಿಗೆ ತರಬೇತಿ ನೀಡುವ ಅಭ್ಯಾಸ ಕೂಡ ಇದೆ.

ಐಟಿಎಸ್‌ಎಂ ಹಾಗೂ ಐಟಿಐಎಲ್‌ಗಳಿಗೆ ಸಂಬಂಧಪಟ್ಟ ಹೆಚ್ಚಿನ ಮಾಹಿತಿಗಾಗಿ www.itil-itsm-world.comಗೆ ಭೇಟಿನೀಡಬಹುದು. ಸರ್ಚ್ ಇಂಜನ್‌ಗಳಲ್ಲಿ ಹುಡುಕಾಟ ನಡೆಸುವುದು ಕೂಡ ಒಳ್ಳೆಯ ಆಯ್ಕೆಯೇ!

(ಸೆಪ್ಟೆಂಬರ್ ೨೦೦೬)