ಕಲಾಸರಸ್ವತಿಯ ಕೃಪೆಯಿಂದ ಒಬ್ಬ ಕಲಾವಿದ ಹುಟ್ಟಿಬರುವುದೇ ಒಂದು ಅಪರೂಪದ ಸಂಗತಿ ಎಂದು ಪರಿಗಣಿಸುವಾಗ ಒಂದೇ ಕುಟುಂಬದಲ್ಲಿ ೩-೪ ಕಲಾವಿದರು ಹುಟ್ಟುವುದಂತೂ ಅಚ್ಚರಿಯ  ವಿಷಯವೇ ಸರಿ. ಇದು ಆಗಿರುವುದು ಅಷ್ಟೇನೂ ಸಾಂಸ್ಕೃತಿಕ ಹಿನ್ನಲೆಯಿರದಿರುವ ಭಟ್ಕಳ ಎಂಬ ಚಿಕ್ಕ ಊರಿನಲ್ಲಿ. ಈ ಕಲಾ ಗುಚ್ಛದಲ್ಲಿ ಒಂದು ಹೂವಾಗಿ ೧೫.೪.೧೯೨೨ರಲ್ಲಿ ಜನಿಸಿದವರು ಶ್ರೀ ಎಂ. ಪ್ರಭಾಕರ್ ರವರು. ತಂದೆ ಎಂ. ರಂಗರಾವ್‌ ಅವರು ಸಂಗೀತ, ಸಾಹಿತ್ಯ, ಅಭಿನಯ ಹಾಗೂ ಚಿತ್ರಕಲೆಯಲ್ಲಿ ಅಭಿರುಚಿ ಉಳ್ಳವರಾಗಿದ್ದರೂ, ಒಂದು ಭದ್ರನೆಲೆ ಕಾಣದೆ ೧೦ ಮಕ್ಕಳ ದೊಡ್ಡ ಸಂಸಾರದ ಹೊರೆ ಶಾಲಾ ಶಿಕ್ಷಕಿಯಾಗಿದ್ದ ತಾಯಿ ಕಾವೇರಿಬಾಯಿಯವರ ಮೇಲೆ ಬಿದ್ದಿತ್ತು. ಹೀಗೆ ಬಾಲ್ಯವನ್ನು ಪ್ರಭಾಕರ್ ರವರು ಕಷ್ಟಕೋಟಲೆಗಳ  ನಡುವೆ ಕಳೆದರು. ನಾಲ್ಕನೇ ತರಗತಿಯಲ್ಲೇ ವಿದ್ಯಾಭ್ಯಾಸಕ್ಕೆ ವಿದಾಯ ಹೇಳಿ ತಂದೆ ಮತ್ತು ಅಣ್ಣ ವಿಮಲಾನಂದದಾಸ್‌ ಜೊತೆ ಊರಿಗೆ ಬಂದನಾಟಕ ಮಂಡಲಿಯಲ್ಲಿ ಕೆಲಸ ಮಾಡಲು ಪ್ರಾರಂಭಿಸಿದರು. ಹಾಡುವ ಗೀಳು, ಸಂಗೀತದಲ್ಲಿ ಆಸಕ್ತಿ ಹುಟ್ಟಿನಿಂದಲೇ ಬಂದಿತ್ತು ಎನ್ನುತ್ತಾರೆ. ನಾಟಕಗಳಲ್ಲಿ ಅಣ್ಣನಿಗೆ ಹಾರ್ಮೋನಿಯಂ ನುಡಿಸುವುದು, ಹಾಡಾವುದು ಪರಿಪಾಠವಾಯಿತು.

ಪ್ರಭಾಕರ್ ರವರ ಹಿರಿಯ ಅಣ್ಣ ವಿಮಲಾನಂದದಾಸರು ಪ್ರಖ್ಯಾತ ಕೀರ್ತನಕಾರರು. ಮತ್ತೊಬ್ಬ ಅಣ್ಣ ಜಗನ್ನಾಥರಾವ್‌ ಅವರು ಹಾರ್ಮೋನಿಯಂ ತಯಾರಕರು. ಈಗಲೂ ಪ್ರಭಾಕರ್ ರವರ ಹತ್ತಿರ ಎಪ್ಪತ್ತು ವರ್ಷದ ಹಳೆಯ ಹಾರ್ಮೋನಿಯಂ ಇದೆ. ಇಬ್ಬರು  ಸಹೋದರಿಯರು ಶ್ರೀಮತಿ ಪಂಡರಿಬಾಯಿ ಹಾಗೂ ಮೈನಾವತಿಯವರು  ಚಿತ್ರಲೋಕದ ತಾರೆಯರಾಗಿ ಮೆರೆದರು. ಹೀಗೆ ಕಲೆಯಲ್ಲಿ ಬಹಳ ಶ್ರೀಮಂತವಾದ ಕುಟುಂಬ ಇವರದು.

ನಾಟಕ ಮಂಡಲಿಯಲ್ಲಿ ಶ್ರೀ ಕಾಳಿಂಗರಾಯರು ಸ್ತ್ರೀ ಪಾತ್ರಧಾರಿಯಾಗಿ ಹಾಡುಗಳನ್ನು  ಹಾಡುತ್ತಿದ್ದರು. ಪ್ರಭಾಕರ್ ರವರಿಗೆ ಅವರ ಜೊತೆ ಸ್ನೇಹ ಬೆಳೆದು ಮುಂದೆ ಸುಗಮಸಂಗೀತ ಹಾಡುವಲ್ಲಿ ಈ ಅನುಭವಗಳು ಬಹಳ ಉಪಯುಕ್ತವಾಯಿತು. ನಾಟಕ ಮಂಡಲಿಯ ಜೊತೆ ರಾಜ್ಯದೆಲ್ಲೆಡೆ ಪ್ರಯಾಣ ಮಾಡಿ ರಂಗಗೀತೆಗಳು, ದೇವರನಾಮಗಳು ಹಾಗೂ ಕೀರ್ತನೆಗಳನ್ನು ಹಾಡಿ ಜನಮೆಚ್ಚುಗೆ ಪಡೆದರು. ತಿರುಗಾಟ ಬೇಸರ ತಂದಿತು. ಹಾಗೆಯೇ ಸಂಗೀತವನ್ನು ಗುರುವಿನ ಮಾರ್ಗದರ್ಶನದಲ್ಲಿ ಕಲಿಯಬೇಕೆಂಬ ಹಂಬಲದಿಂದ ಶಿವಮೊಗ್ಗೆಗೆ ಬಂದರು.

ಸಂಗೀತ ವಿದ್ವಾನ್‌ ಬಿ.ಎಸ್‌. ರಾಮಯ್ಯನವರಲ್ಲಿ ಪ್ರಾರಂಭಿಕ ಶಿಕ್ಷಣ ಪಡೆದು ನಂತರ ಬೆಂಗಳೂರಿನ ವಿದ್ವಾನ್‌ ಎಲ್‌.ಎಸ್‌. ನಾರಾಯಣ ಸ್ವಾಮಿ ಭಾಗವತರಲ್ಲಿ ಪ್ರೌಢ ಶಿಕ್ಷಣ ಪಡೆದರು. ಪ್ರಭಾಕರ್ ಅವರ ಆಸ್ತಿ ಅವರ ಸಿರಿಕಂಠ ಮತ್ತು ಭಾವಪೂರ್ಣ ಹಾಡುಗಾರಿಕೆ. ತಾವು ಭಾವಪರವಶರಾಗಿ ಹಾಡುತ್ತಿದ್ದಾಗ ಕಣ್ಣೀರಿಡುತ್ತಿದ್ದ ಸಭಿಕರು, ಪಿಟೀಲನ್ನು ಕೆಳಗಿಟ್ಟು ಕಣ್ಣೊರೆಸಿಕೊಳ್ಳುತ್ತಿದ್ದ ಪಕ್ಕವಾದ್ಯದವರನ್ನು ಅಭಿಮಾನದಿಂದ ನೆನೆಯುತ್ತಾರೆ. ಕಲಿತಿದ್ದ ಸಂಗೀತವನ್ನು ಜೀವನಾಧಾರವಾಗಿಸಿಕೊಂಡು ಶಿಷ್ಯರಿಗೆ ಧಾರೆಯೆರೆಯಲು ಪ್ರಾರಂಭಿಸಿದರು.  ‘ಹಿಂದುಸ್ತಾನಿ ಶೈಲಿಯಲ್ಲಿ ಆಸಕ್ತಿ ಮೂಡಿ ಬೊಂಬಾಯಿಗೆ ಪ್ರಯಾಣ ಬೆಳೆಸಿದರು. ಸಂಗೀತ ಪಾಠಗಳನ್ನು  ಮಾಡಿ ಜೀವನ ಸಾಗಿಸಿದರು. ಒಬ್ಬ ಪ್ರಸಿದ್ಧ ಗವಾಯಿಗಳ ಬಳಿ ಕಲಿಯಲು ವಿಚಾರಿಸಿದಾಗ ಪಾಠಕ್ಕೆ ೩೦ ರೂಪಾಯಿಗಳು ಎಂದಾಗ ಜೀವನವೇ ಕಷ್ಟಕರವಾಗಿದ್ದಾಗ ಅದು ಬಹಳ ದುಬಾರಿ ಎನಿಸಿ ಆ ಕನಸನ್ನು ಅಲ್ಲಿಯೇ ಬಿಟ್ಟು ಹಿಂದಿರುಗಿದರು. ಈಗಲೂ ನನಸಾಗದ ಆ ಕನಸನ್ನು ನೆನೆದು ಕೊರಗುತ್ತಾರೆ. ನಂತರ ತಾವೇ ಪುಸ್ತಕಗಳನ್ನು ಕೊಂಡು ಕೀರ್ತನೆಗಳನ್ನು, ವರ್ಣಗಳನ್ನು ಕಲಿತರು. ಸಂಗೀತ ಪಾಠವನ್ನು ವೃತ್ತಿಯನ್ನಾಗಿ ಸ್ವೀಕರಿಸಿದ್ದಾರೆ. ಕಲಿಯುವಿಕೆಗಿಂತ ಯಾವುದೊ ಸಂಸ್ಕಾರ ನನ್ನನ್ನು ಹಾಡಲು ಪ್ರೇರೇಪಿಸಿದೆ ಎಂದೆನ್ನುತ್ತಾರೆ.

ಆಕಾಶವಾಣಿ ಪ್ರಾರಂಭವಾದ ದಿನಗಳಲ್ಲಿ ಪ್ರಭಾಕರ್ ರವರು ಕೀರ್ತನೆಗಳು  ಹಾಗೂ ದೇವರನಾಮಗಳನ್ನು  ಹಾಡುತ್ತಿದ್ದರು. ರಾಜ್ಯದೆಲ್ಲೆಡೆ ಹಾಗೂ ಮುಂಬಯಿ, ಚೆನ್ನೈ, ಆಂಧ್ರಪ್ರದೇಶ, ಕೇರಳ ಎಲ್ಲ ಕಡೆ ಅನೇಕ ಬಾರಿ ಸಂಚರಿಸಿ ಕಾರ್ಯಕ್ರಮಗಳನ್ನು ನೀಡಿದ್ದಾರೆ. ಆಗ ಗೋಟುವಾದ್ಯ ಕಲಾವಿದರಾಗಿದ್ದ ಶ್ರೀ ವರಾಹಸ್ವಾಮಿ ಅವರು ‘ನಿನ್ನ ಶಾರೀರ ಬಹಳ ಚೆನ್ನಾಗಿದೆ ಬಹಳ ಅನುಭವಿಸಿ ಹಾಡುತ್ತೀಯ ಕನ್ನಡ ಗೀತೆಗಳನ್ನು ಹಾಡು, ಎಂದು ಪ್ರೇರೇಪಿಸಿದರು. ಹೀಗೆ ಸುಗಮ ಸಂಗೀತ ಹಾಡಲು ಪ್ರಾರಂಭಿಸಿದ ಇವರು ದೊರೆಸ್ವಾಮಿ ಅಯ್ಯಂಗಾರ್, ಎಂ.ಡಿ. ಪಾರ್ಥಸಾರಥಿ, ಎ.ವಿ.ಕೃಷ್ಣಮಾಚಾರ್, ಎಚ್‌.ಆರ್. ಲೀಲಾವತಿ ಮುಂತಾದವರ ಸಂಗೀತ ನಿರ್ದೇಶನದಲ್ಲಿ ಕನ್ನಡಗೀತೆಗಳನ್ನು ಹಾಡಿದ್ದಾರೆರ. ಹಾಗೆಯೇ ಸ್ವತಃ ರಾಗಸಂಯೋಜನೆ ಮಾಡಹತ್ತಿದರು . ಕುವೆಂಪು ಅವರ ಗೀತೆಗಳು ಇವರಿಗೆ ಬಹಳ ಅಚ್ಚುಮೆಚ್ಚು. ಹೀಗೆ ಇವರ ಕಂಠಶ್ರೀಯಿಂದ ಹೊರಹೊಮ್ಮಿದ ಹಾಡುಗಳಿಗೆ ಲೆಕ್ಕವಿಲ್ಲ. ಅವರು ಅದರ ಎಣಿಕೆಯನ್ನು ಇಟ್ಟಿಲ್ಲ. ‘ನೂರು ಸಲ ಜುಮ್ಮೆನುವುದೀ ಮನ’, ‘ನೀ ಬರುವ ದಾರಿಯಲಿ’, ‘ಅಧರದಿ ನಸುನಗೆ’, ‘ಪಡುವಣ ಬಾನಿನ ನೀಲಿಯ ಹಣೆಯಲಿ’, ಶುಭನುಡಿಯೆ ಶಕುನದ ಹಕ್ಕಿ’, ‘ಹಾಡು ಹಳೆಯದಾದರೇನು ಭಾವ ನವನವೀನ’, ‘ನಗುನಗುತ ಹಗುರವಾಗು’, ‘ಕವಿದ ಕತ್ತಲೆಯಲ್ಲಿ ಕೈಹಿಡಿದು ನಡೆಸಯ್ಯ’ ಹೀಗೆ ಇವರ ಕಂಠ ಸಿರಿಯಿಂದ ಹೊಮ್ಮಿದ ಹಾಡುಗಳ ಪಟ್ಟಿ ಬೆಳೆಯುತ್ತಾ ಹೋಗುತ್ತದೆ. ಶ್ರೀಮತಿ ಹೆಚ್‌.ಆರ್. ಲೀಲಾವತಿಯವರೊಂದಿಗೆ ಎನ್‌.ಕೆ. ಕುಲಕರ್ಣಿ ಅವರ ಕವನಗಳನ್ನಾಧರಿಸಿದ ‘ನವತಾರಾ ಮಂಡಲ’ ಎಂಬ ಸಂಗೀತ ರೂಪಕದಲ್ಲಿ ಹಾಡಿದ್ದರೆ. ಮಂಗಳೂರು ಆಕಾಶವಾಣಿಯಿಂದ ಬಿತ್ತರಗೊಂಡ ‘ವರ್ಷ ವೈಭವ’ ಎಂಬ ಸಂಗೀತ ರೂಪಕದಲ್ಲಿ ಎಚ್‌.ಆರ್. ಲೀಲಾವತಿಯವರ ಸಂಗೀತ ನಿರ್ದೇಶನದಲ್ಲಿ ಹಾಡಿ ಜನಮನ್ನಣೆಯನ್ನು ಪಡೆದಿದ್ದಾರೆ. ಪ್ರಭಾಕರ್ ಅವರ ಕಂಠದ ವಿಶೇಷತೆಯೆಂದರೆ ಅದು ಎಷ್ಟು ಗಂಭೀರತೆಯಿಂದ ಹೊರಹೊಮ್ಮುತ್ತದೆಯೋ ಅಷ್ಟೇ ನವುರಾದ ನುಡಿಕಾರಗಳನ್ನು ಸ್ಫುರಿಸುತ್ತದೆ. ಇದು ಸುಗಮಸಂಗೀತ ಗಾಯನಕ್ಕೆ ಬಹಳ ಸೂಕ್ತವಾದ ಶಾರೀರ. ಈ ಸಾಲು ನನಗೆ ಬಹಳ ಪ್ರಿಯ ಎಂದು ಪ್ರಭಾಕರ್ ರವರು ಡಿ.ಎಸ್‌.ಕರ್ಕಿ ಅವರ ಕವನವನ್ನು ಇಂಪಾಗಿ ಹಾಡಿದರು-‘ಎಲ್ಲಿಹುದೆನಲೇಕೆ ಜೇನು? ನೀ ಪಾನಗೈಯಲು ಬಲ್ಲೆಯಾದರೆ ಜಾಣ ಎಲ್ಲೆಲ್ಲೂ ಇಹುದದು ತಾನು ಈಗಲೂ ಕವನವನ್ನು ಒಮ್ಮೆ ಓದಿ ಅದರ ಸಾರವನ್ನು ಆಸ್ವಾದಿಸುತ್ತಾ ಹಾಡಲು ಪ್ರಾರಂಭಿಸಿದರೆ ಕವನದ ಸೊಬಗು ಇಮ್ಮಡಿಯಾಗುತ್ತದೆ.

ಪ್ರಭಾಕರ್ ಅವರ ರಾಗಸಂಯೋಜನೆಯಲ್ಲಿ ಶಾಸ್ತ್ರೀಯ ಸಂಗೀತದ ಸೊಗಡು ಎದ್ದು ಕಾಣುತ್ತದೆ. ಸಾಮಾನ್ಯವಾಗಿ ಒಂದು ಹಾಡು ಒಂದೇ ರಾಗವನ್ನು ಅವಲಂಬಿಸಿರುತ್ತದೆ. ಹಿಂದುಸ್ತಾನಿ ರಾಗಗಳು ಕೂಡ ಅಲ್ಲೊಮ್ಮೆ, ಇಲ್ಲೊಮ್ಮೆ ಕಾಣಸಿಗುತ್ತದೆ. ಸಾಹಿತ್ಯ ಮತ್ತು ಭಾವಪೂರ್ಣ ಹಾಡುಗಾರಿಕೆ ಸುಗಮಸಂಗೀತದ ಮುಖ್ಯ ಅಂಶಗಳು. ಉನ್ನತ ಮಟ್ಟದ ಸಾಹಿತ್ಯ ಜನರ ಮನಸ್ಸಿನಲ್ಲಿ ಹೆಚ್ಚು ಕಾಲ ಉಳಿಯುತ್ತದೆ. ಸಾಹಿತ್ಯವನ್ನು ಚೆನ್ನಾಗಿ ಅರ್ಥೈಸಿಕೊಂಡು ನಿಧಾನವಾಗಿ ಮೆಲುಕು ಹಾಕಿದಾಗ ಸಂಗೀತ ತಂತಾನೇ ಹೊರಬರುತ್ತದೆ. ಭಾವವಿಲ್ಲದ ಹಾಡು ಹಾಡಲ್ಲ ಎನ್ನುತ್ತಾರೆ.

ಪರಿಸರವನ್ನು ಮರೆತು ಅಂತರ್ಮುಖಿಯಾಗಿ ಹೃದಯದಾಳದಿಂದ ಹರಿದು ಬರುವ ಸ್ಫೂರ್ತಿಯಿಂದ ಹಾಡುವವರು ಶ್ರೇಷ್ಠಗಾಯಕರೆನಿಸುತ್ತಾರೆ. ಈ ವರ್ಗಕ್ಕೆ ಸೇರಿದವರು ಪ್ರಭಾಕರ್ ರವರು. ನೋಡಿ ಈ ಸಾಹಿತ್ಯ ಎಷ್ಟು ಚೆನ್ನಾಗಿದೆ ಎಂದು ಡಿ.ಎಸ್‌. ಕರ್ಕಿ ಅವರ ‘ತಾಳಲಯದಲಿ ಬಾಳ ನಡೆಸುದೇವ’ ಕವನವನ್ನು ಓದಿ ನಂತರ ಸುಶ್ರಾವ್ಯವಾಗಿ ಹಾಡಿ ತೋರಿಸಿದರು. ಇದು ಅವರ ಅಚ್ಚುಮೆಚ್ಚಿನ ಹಾಡುಗಳಲ್ಲೊಂದು.

ಸುಮರು ೪೦-೪೫ ವರ್ಷಗಳಿಂದ ಸುಗಮ ಸಂಗೀತವನ್ನು ಹಾಡುತ್ತಾ ಬಂದರಾದರೂ ಯಾವುದಕ್ಕೂ ಸರಿಯಾದ ಅಂಕಿ ಅಂಶಗಳನ್ನು ಅವರು ಇಟ್ಟಿಲ್ಲ. ಅವನ್ನು ಇಡಬೇಕು ಎಂದೆನಿಸಲಿಲ್ಲ. ನಾನೇನು ಮಹಾ ಸಾಧನೆ ಮಾಡಿಲ್ಲ ಎಂಬ ಕಾರಣ ಒಂದೆಡೆಯಾದರೆ, ಬಾಲ್ಯದಿಂದಲೂ ಅವರನ್ನು ಕಾಡುವ ಮರೆವು ಇನ್ನೊಂದೆಡೆ. ಇದು ನನಗೊಂದು ‘ಶಾಪ’ ಎನ್ನುತ್ತಾರೆ. ಒಮ್ಮೆ ಸಂಗೀತ ಪರೀಕ್ಷೆಯಲ್ಲಿ ‘ನೀಲಾಂಬರಿ’ ರಾಗದ ವರ್ಣವನ್ನು ಹಾಡಲು ಹೇಳಿದರು. ಹಾಡುತ್ತಾ ಮಧ್ಯದಲ್ಲಿ ಸಾಲುಗಳು ಮರೆತು ಹೋದವು. ಹಾಡುವುದನ್ನು ನಿಲ್ಲಿಸದೇ ಸ್ವಂತ೦ ಸ್ವರಗಳನ್ನು ಸೇರಿಸಿ ಹಾಡು  ಮುಗಿಸಿದರು. ಇದು ಅಂದು ಪರೀಕ್ಷಕರಾಗಿ ಬಂದಿದ್ದ ವಿದ್ವಾನ್‌ ಬಿ. ದೇವೇಂದ್ರಪ್ಪನವರಿಗೂ ಗೊತ್ತಾಗಲಿಲ್ಲ. ಹೀಗೆ ಅನೇಕ ಪ್ರಸಂಗಗಳಲ್ಲಿ ಸ್ಮರಣಶಕ್ತಿ ಅವರ ಕೈ ಬಿಟ್ಟಿರುವುದನ್ನು ನೆನಪಿಸಿಕೊಳ್ಳುವ ಅವರು ಪುಸ್ತಕವಿಲ್ಲದೆ ಹಾಡುವ ಸಾಹಸ ಮಾಡಲಾರೆ ಎನ್ನುತ್ತಾರೆ.

ಒಬ್ಬ ಕಲಾವಿದ ಪರಿಪೂರ್ಣನಾಗಬೇಕಾದರೆ ಪ್ರತಿಭೆ ಒಂದೇ ಸಾಲದು. ಜೀವನದಲ್ಲಿ ಭದ್ರ ನೆಲೆ, ಅವಕಾಶ, ಪ್ರೋತ್ಸಾಹ, ಅದೃಷ್ಟ ದೇವಿಯ ಕೃಪೆ ಹೀಗೆ ಎಲ್ಲವೂ ಒಲಿದು ಬರಬೇಕು. ಅಪಾರ ಪ್ರತಿಭೆಯನ್ನು ಹೊಂದಿರುವ ಪ್ರಭಾಕರ್ ರವರಿಗೆ ಇವೆಲ್ಲವೂ ದೊರೆತಿದ್ದರೆ ಪ್ರಾಯಶಃ ಒಬ್ಬ ಕಲಾವಿದನಾಗಿ ಇನ್ನೂ ಬಹಳಷ್ಟು ಸಾಧಿಸಬಹುದಿತ್ತೇನೋ. ಆ ಕೊರಗು ಅವರಿಗಿದೆ. ನಾನು ಯಾವ ಸಾಧನೆಯನ್ನೂ ಮಾಡಿಲ್ಲ ಎಂದು ಮುಗ್ಧತೆಯಿಂದ ನುಡಿಯುವ ಸರಳ, ಸಾತ್ವಿಕ ಜೀವಿಯಾದ ಪ್ರಭಾಕರ್ ರವರಿಗೆ ಪ್ರಶಸ್ತಿ. ಪುರಸ್ಕಾರಗಳು ತಾವಾಗಿಯೇ ಅರಸಿಕೊಂಡು ಬಂದಿವೆ. ಸುಗಮಸಂಗೀತ ಹಾಗೂ ಶಾಸ್ತ್ರೀಯ ಸಂಗೀತ ಎರಡೂ ಕ್ಷೇತ್ರಗಳಲ್ಲಿ ಅನೇಕ ಪ್ರಶಸ್ತಿಗಳು ಸಂದಿವೆ. ಅವುಗಳಲ್ಲಿ ಪ್ರಮುಖವಾಗಿ ೧೯೮೦ರಲ್ಲಿ ಮೈಸೂರಿನಲ್ಲಿ ದಿ.ಡಾ.ಬಿ. ದೇವೇಂದ್ರಪ್ಪನವರು ಪ್ರಭಾಕರ್ ರವರಿಗೆ ಗಾಯಕ ರತ್ನ ಎಂಬ ಬಿರುದನ್ನು ನೀಡಿ ಆಶೀರ್ವದಿಸಿದ್ದಾರೆ.

೧೯೮೬ ರಲ್ಲಿ ಕರ್ನಾಟಕ ಗಾನಕಲಾ ಪರಿಷತ್ತು ಶಿವಮೊಗ್ಗೆಯಲ್ಲಿ ನಡೆದ ಸಂಗೀತ ವಿದ್ವಾಂಸರ ೧೬ನೇ ಸಮ್ಮೇಳನದಲ್ಲಿ ಗೌರವಿಸಿ ಸನ್ಮಾನಿಸಿದೆ.

೧೯೮೮-೮೯ರಲ್ಲಿ ಸಂಗೀತ ನೃತ್ಯಹ ಅಕಾಡೆಮಿಯ ಕರ್ನಾಟಕ ಕಲಾ ತಿಲಕ ಪ್ರಶಸ್ತಿ ಹಾಗೂ

೨೦೦೧ನೇ ಸಾಲಿನ ಸುಗಮಸಂಗೀತದ ಅತ್ಯುನ್ನತ ಪ್ರಶಸ್ತಿಯಾದ ಸಂತ ಶಿಶುನಾಳ ಶರೀಫ್ ಪ್ರಶಸ್ತಿಗಳೇ ಅಲ್ಲದೆ ಅನೇಕ ಸ್ಥಳೀಯ ಸಂಘ ಸಂಸ್ಥೆಗಳು ಬಿರುದು ಬಾವಲಿಗಳನ್ನು ನೀಡಿ ಗೌರವಿಸಿದೆ. ಯಾವ ಆಡಂಬರಕ್ಕೂ, ಪ್ರಚಾರಕ್ಕೂ ಹಾತೊರೆಯದ ಇವರು ಎಲೆಮರೆಯ ಕಾಯಿಯಾಗೇ ಉಳಿಯಬಯಸುತ್ತಾರೆ.

ದೀರ್ಘಾವಧಿಯ ಸಂಗೀತ ಶಿಕ್ಷಕ ವೃತ್ತಿಯಿಂದಾಗಿ ನೂರಾರು ಜನ ಶಿಷ್ಯರನ್ನು ತಯಾಸಿರುವ ಇವರು ಆಸಕ್ತಿ ಉಳ್ಳವರಿಗೆ ಹಾಗೂ ಚೆನ್ನಾಗಿ ಹಾಡುವವರಿಗೆ ಈಗಲೂ ಪಾಠವನ್ನು ಹೇಳಿಕೊಡುತ್ತಾರೆ.  ಸುಗಮ ಸಂಗೀತದಲ್ಲಿ ಪ್ರಮುಖ ಶಿಷ್ಯರೆಂದರೆ ಬಿ.ಕೆ. ಸುಮಿತ್ರ, ಆರ್. ರಮಾದೇವಿ, ಕಸ್ತೂರಿ ಶಂಕರ್ ಹಾಗೂ ಶಿವಮೊಗ್ಗ ಸುಬ್ಬಣ್ಣ. ಈಗಿನ ಮಕ್ಕಳು ಆತ್ಮಸ್ಥೈರ್ಯದಿಂದ ಹಾಗೂ ಲೀಲಾಜಾಲವಾಗಿ ಹಾಡುವುದನ್ನು ಕೇಳಿರುವ ಇವರು ಇಂದು ಪ್ರತಿಭೆಗೇನೂ ಕೊರತೆ ಇಲ್ಲ ಎನ್ನುತ್ತಾ ಸುಗಮ ಸಂಗೀತಕ್ಕೆ ಉತ್ತಮ ಭವಿಷ್ಯವಿದೆ ಎಂದು ಅಭಿಪ್ರಾಯ ಪಡುತ್ತಾರೆ.  ಮೈಸೂರು ಅನಂತಸ್ವಾಮಿಯವರ ರಾಗಸಂಯೋಜನೆ ಸುಗಮಸಂಗೀತ ಹೆಚ್ಚು ಜನಪ್ರಿಯವಾಗಲು ಸಹಾಯಕವಾಯಿತು ಎಂದು ವೈಯುಕ್ತಿಕವಾಗಿ ಭಾವಿಸುತ್ತಾರೆ. ಈಗಿನ ಕೀಬೋರ್ಡ್‌ಗಿಂತ ‘ಹಾರ್ಮೋನಿಯಂ’ನ ನಾದವೇ ನನಗೆ ಬಹಳ ಪ್ರಿಯ ಎನ್ನುವ ಪ್ರಭಾಕರ್ ರವರು ಈಗಲೂ ಸುಶ್ರಾವ್ಯವಾಗಿ ಹಾಡುತ್ತಾರೆ. ಆಕಾಶವಾಣಿ ಹಾಗೂ ಇನ್ನಿತರ ಸಭೆಗಳಲು ಹಾಡಲೂ ಆಮಂತ್ರಿಸಿದರೆ ಒಲ್ಲೆಯೆನ್ನುತ್ತಾರೆ. ಕಾರಣ ಮುಂಚಿನಂತೆ ಈಗ ಹಾಡಲಾರೆನೆಂದು. ಹೀಗೆ ನಿಗರ್ವಿಯಾದ ಇವರು ಜೀವನ ಒಡ್ಡಿದ ಕಠಿಣ ಸವಾಲುಗಳನ್ನು ದಾರ್ಶನಿಕ ದೃಷ್ಟಿಯಿಂದ ಸ್ವೀಕರಿಸಿ ಲಘುಹಾಸ್ಯದೊಂದಿಗೆ ತೆಲುಗಿನಲ್ಲಿರುವ ಸಾಲನ್ನು ನೆನಪಿಸಿಕೊಳ್ಳುತ್ತಾರೆ. ‘ವಿರಿಕಿ ವಿದ್ಯಮು ಲೇದು ಗರ್ವಮು ಲೇದು’( ಈ ಶಿಕ್ಷಕನಿಗೆ ವಿದ್ಯೆಯೂ ಇಲ್ಲ, ಗರ್ವವೂ ಇಲ್ಲ’). ಇದು ಪ್ರಭಾಕರ್ ರವರ ಮೇರು ವ್ಯಕ್ತಿತ್ವವನ್ನು ಪ್ರತಿಬಿಂಬಿಸುತ್ತದೆ.

ಮಧುರ ಗಾನ ಪ್ರವೀಣ ಎಂಬ ಬಿರುದಿಗೆ ಪಾತ್ರರಾದ ಗಾಯಕರಾಗಿ ರಾಗಸಂಯೋಜಕರಾಗಿ ಹಾಗೂ ಶಿಕ್ಷಕರಾಗಿ ಎಲ್ಲದಕ್ಕೂ ಮಿಗಿಲಾಗಿ ಒಬ್ಬ ಸಹೃದಯಿ ಮಾನವರಾಗಿ ಸುಗಮಸಂಗೀತ ಕ್ಷೇತ್ರದ ಅಗ್ರಗಣ್ಯ ಕಲಾವಿದರಲ್ಲಿ ಒಬ್ಬರಾದ ಪ್ರಭಾಕರ್ ರವರು ಒಬ್ಬ ಪರಿಪೂರ್ಣ ಕಲಾವಿದರೆನಿಸಿದ್ದಾರೆ.