ಗಿಡಿಕೆರೆ ರಾಮಕ್ಕ ಮುಗ್ಗೇರ್ತಿ ಕಟ್ಟಿದ ಸಿರಿ ಪಾಡ್ದನ: ರಾಮಕ್ಕ ಮುಗ್ಗೇರ್ತಿ ಕಟ್ಟಿದ ಸಿರಿ ಪಾಡ್ದನ (೯)

ಕಲ್ಲ ಕಲೆಂಬಿದ ಮೇಲ್‌ಡ್ಡ್‌ಅಜ್ಜೇರ್ ದಡ್ಡಪ್ಪ ಮಗುರ್ಯೇರ್‌ಗೆನಾ ಇನಿ ಕಾಯ ಬುಡು ಕೈಲಾಸೊಗು ಸಂದಿಯೆರ್ ಅಜ್ಜೇರೋ…

ಪಾಡೀ ರಾಸಿಗುಗೆನಾ ದೀಯಿ ಕಾನಿಗೆನ್ ತೋಜಿದ್ ಬರ್ಪುಂಡುಗೆನಾ
ಬೆರಮಣೆ ಪನ್ಪೇರ್‌ಗೆನಾ
ಇನಿ ಕುಮಾರೆ ಪುಟ್ಟುದಿನ ಯೇಲ್ಯ ಗಲಿಗೆ ಅಜ್ಜೇರೆ ಕೇಣಿದರಗೆನ
ಸರ್ವಾಲಚ್ಚನ ಕೊಂಡು ಪುಟ್ಟಿನ ಮಗೆ ಆಯಗ್‌ಗೆನ
ಕುಮಾರಂದೇ ಪುದಾರ್ ಪುರಪ್ಪು ಅಜ್ಜೇರೇ ಏ… ಏ… ಓ…
ಬಟ್ಟೇರೋ… ಗೆರಂತ ಬಾರಿ ಬಟ್ಟೇರೋ…

ಇನಿ ಅಂಡಲಗೆನ ಇನಿ ಎಡ್ಡೆ ಏಲ್ಯ ಗಲಿಗೆಡ್‌ಗೆನ
ಕುಮಾರೆ ಇನಿ ಭೂಮಿಗ್ ಜನನ ಆತೇ ಕೇಣಿದರಗೆನ
ಆಂಡ ಅಜ್ಜೇರೆ ಈರ್ ಕುಮಾರನ ಮೋಣೆ ತೂಂಡಾ ಅಜ್ಜೇರೆ ಕೇಣ್‌ಲೆ
ಇರೆಗ್ ಮರಣಾಂದೇ ಉಂಡೂಂದೇರೋ ಓ… ಗೆರಂತ ಬಾರಿ ಬಟ್ಟೇರ್… ಓ…

ಇನಿ ನಾರಾಯಿಣ ಅಜ್ಜೇರೆ ಕುಮಾರೆ ಪುಟ್ಟಿ ರಾಸಿಡ್‌ಗೆನಾ
ತನ ಅಪ್ಪೇರೆಗ್ ಸತ್ಯಮಾಲೋಕಂದ ಸಿರಿಗ್‌ಗೆನಾ
ಇನಿ ದಿಕ್ಕ್ ಬುಡು ದೇಸಾಂತರ ಪೋಪಿನ ಕಾಲ ಬರ್ಪುಂಡುಗೆನಾ
ಕುಮಾರೆ ಪುಟ್ಟಿನ ರಾಸೀನೇ ತೆರಿಪ್ಪುವೆರೋ ಬಟ್ಟೆರೋ
ಗೆರಂತ ಬಾರೀ ಬಟ್ಟೇರೋ… ಓ ಓ… ಓ… ಓ… ನಾರಾಯಿಣ ಬಟ್ಟೇರೋ…

ಇನಿ ಲಾತ್ ಪಾತೆರ ಬಟ್ಟೇರ್ ಪಣ್ಣಾಗ ಅಜ್ಜೇರ್ ಪಣ್ಪೇರ್‌ಗೆನಾ
ಇನಿಯಾಂಡಲ ಈರ್ ರಾಸಿ ಮಡಿಪುಲೆ ಕಾನಿಗೆ ದೆಪ್ಪುಲೆಗೆನಾ
ಇನಿ ಯೆಂಕ್ ಏಲ್ಯ ಪೋಪುಂಡುಪ್ಪ ಕೇಣಿದರ ಬಟ್ಟೇರೇ
ಯೆಂಕ್ ತಟ್ಟ್ ತವಿಯಲಾ ಆಪುಂಡೂಂದೇರೋ
ಬೆರಮ್ಮು ಮಾಲವೇರೋ ಓ ಓ… ಸತ್ಯನಾಪುರದ ಅಜ್ಜೇರೋ

ಇನಿ ಯಾನ್ ಪೋಪೆ ಬರ್ಪೇಂದ್ ಪಂಡೇರ್‌ಗೆನ
ಇನಿ ಅಜ್ಜೇರಾಂಡಲಗೆನ ಬಟ್ಟೇರೆರಮನೆ ಜತ್ತೋನುದುಗೆನ
ಸಾದಿ ಪತ್ತೋನುದು ಬೀದಿ ನಿರೆವೊನುದು ಬತ್ತ್ ಬರುವೇರೋ
ಸತ್ಯನಾಪುರದಲಾರಿಯ ಬನ್ನಾರ್ ಬೆರ್ಮು ಮಾಲವೇರೋ ಓ ಓ ಓ… ಓ…

ಇನಿ ಒಂಜಿ ಗುಡ್ಡೆ ಬೈಲ್ ದಾಂಟಿಯ್ಯೇರ್‌ಗೆನಾ
ಅಜ್ಜೇರಾಂಡಲ ಏಲಜ್ಜೆ ಎಲದುಂಬು ಬತ್ತ್ ಬರ್ಪೇರ್‌ಗೆನಾ
ಸತ್ಯನಾಪುರದ ಕಂಬುಲದ ಕಟ್ಟಪುಣಿಯೆ ಪತ್ತ್‌ದೇರ್ ಓ ಓ
ಬೆರ್ಮು ಮಾಲವೇರೋ ಓ ಓ ಆ ಆ… ಸತ್ಯನಾಪುರದಜ್ಜೇರೋ…

ಸುತ್ತು ಮದ್‌ಲ್ ದಾಂಟಿಯ್ಯೇರ್‌ಗೆನಾ
ಅಜ್ಜೇರ್‌ ಗೆನಾ ಇನಿ ಆನೆ ಬಾಕಿಲ್ ಅಮರಪ್ಪ ಪೊಗ್ಗುವೇರುಗೆನಾ
ಸಾಲರಿ ಚಾವಡಿ ಮೇಲಾರಿಯೆರುಗೆನಾ
ಸೂಂಕಣಂದ ಉಜ್ಜಾಲ್‌ಡ್‌ ಅಜ್ಜೇರ್ ಕುಲ್ಲುವೇರ್‌ಗೆನಾ
ನಾರಾಯಣಾ ನಾರಾಯಣಾ ಓ ಕಾಟು ಕೈಯಂಗೇಲ್ ದಾರೂಂದೂ
ಲೆಪ್ಪುವೇರತ್ತೋ ಓ ಓ ದಾರೋ ಆಲ್… ಚಾಕಿರಿದ ಪೊಣ್ಣು ಆಲ್…

ಇನಿ ಒಂಜಿ ಲೆಪ್ಪುಗು ಎರಡು ಓಕೊನುದುಗೆನ
ಕಾಟ್ ಕಯ್ಯಂಗೇಲ್ ದಾರು ಬರ್ಪೊಲು ಸಾಲರಿ ಚಾವಡಿಗ್
ಅಜ್ಜೇರ್ ಪಣ್ಣೇರುಗೆನಾ ಇನಿ ನಾರಾಯಣ ಮಗ ದಾರೋ
ಅಸರ್ ಅಂಗದನೆಡ್ ಮಗಾ ಸಂಕಸೊಲೆ ಬೇದ್ಯುಂಡುಗೆನಾ
ಯೆಂಕ್ ಒಂಜಿ ಕೊಂಡೆ ಪೇರ್ ಕೊಂಡು ಬಲ್ಲಾಂದೇರೋ…
ಓ ಬೆರ್ಮು ಮಾಲವೇರೋ ಆ… ಆ… ಸತ್ಯನಾಪುರದ ಅಜ್ಜೇರೋ ಓ… ಓ…

ಇನಿ ದಾರು ಆಂಡಲಾ ಬೋಜನಂದ ಸಾಲೆಗ್ ಪಕ್ಕ ದಿಕ್ಕ ಪೋಪೊಲುಗೆನಾ
ಪಿಂಗಣದ ಪೇರ್ ಗಿಂಡೆದ ನೀರ್ ಪತ್ತೊನುದುಗೆನಾ
ಸಾಲರಿ ಚಾವಡಿಗ್ ಸೂಂಕಣಂದ ಉಜ್ಜಾಲ್‌ಗ್‌ ಬರ್ಪೋಲುಗೆನಾ
ಅಜ್ಜೇರೆ ಕೈರ್ಯೇದ್ ಪೇರಾನೀರಾ ಕೊರ್ಪೊಲುಗೆನಾ
ದಾರೋ ಕೇನೊಡೋ ಓ ಓ… ಕಾಟ್‌ ಕಯ್ಯಂಗೇಲ್ ಸಗ್ಮಾಲ್ ಪೊಣ್ಣು ದಾರು ಆಲ್‌…

ದಾರು ಕೊರ್ನಗಗೆನಾ ಇನಿ ಅಜ್ಜೇರಾಂಡಲಗೆನಾ
ನೀರ್ ಪತ್‌ ದೇರ್‌ಗೆನಾ ಬೆಸರ ಕಲೆಯೇರ್‌ಗೆನಾ
ಪೇರ್ ದೆತೊಂಡೆರ್‌ ಗೆನಾ ಅಸರ್ ತಗ್ಗಾಯೆರ್‌ಗೆನಾ
ಇನಿ ಆರಿಯ ಬನ್ನಾರ್ ಬೆರ್ಮು ಮಾಲವೇರೋ… ಸತ್ಯನಾಪುರದಜ್ಜೇರೋ ಓ ಓ…

ಆವ ಕಾಟ್ ಕಯ್ಯಂಗೇಲ್ ಸಗುಮ್ಮಾಲ್ ಪೊಣ್ಣುದಾರು ಆಂಡಲಗೆನಾ
ಅರಿವಾಣ ನಿಲಿಕೆ ಕಾಯಿಪೂಲು ಪಾಡಿನಿಗೆನ
ಅಜ್ಜೇರೆಗ್ ಕೈಯೇರಿ ಕೊರುನಗ
ಇನಿ ಕೊರಿ ಕಾಯಿದರಿವಾಣೊ ಪತ್ತುವೇರತ್ತೋ ಓ ಓ…
ಅಜ್ಜೇರೋ ಕೇನೊಡತ್ತಾ ಆ… ಆ… ಸತ್ಯನಾಪುರದಜ್ಜೇರೋ…

ಇನಿ ದಾರು ಕೇಣುವ್ವೇರುಗೆನಾ ಅಜ್ಜೇರ್ ಕಾಯಿ ತಿಂದ್ ಕಪೂರ ಆಪುನಿಗೆನ
ಕುಮಾರನ ಪುಟಿರಾಸಿ ಕೇಂಡಾರ ಇನಿ
ದಾನೆ ತೋಜಿಂಡಜ್ಜೇರೇ ದಾನೆ ಈರ್ ಕೇಂಡಠಾರ್ ಪಣ್‌ಲೆ
ದಾರೂ ಕೇಂಡಾಲ್ ಸಗುಮ್ಮಾಲ್ ಪೊಣ್ಣು ದಾರುಗೆನಾ ಓ ಓ… ಓ… ಓ…

ಸರ್ವಾ ಲಚ್ಚನೊಡುಗೆನಾ ಕೊನುದು ಪುಟ್ಟಿಯೆಗೆ ಮಗಾ
ಇನಿ ಕುಮಾರೆನ್ಪಿನ ಪುದರ್ ಪುರಪ್ಪುದ ವಾಕ್ಯಾ ಕೊರಿಯ್ಯೇರ್‌ಗೆನಾ
ನಾರಾಯಣ ಮಗಾ ದಾರೋ ಕೇಣಿದನಗೆನಾ
ಪುತ್ರಾಡಿ ಸಂತಾನ ಯೆಂಕ್ ದೇವೆರ್ ಬೆರ್ಮೆರ್ ಕೊರಿಯ್ಯೆರ್‌ಗೆನಾ
ಆಂಡ ಯೆನ್ನ ಪುಲ್ಲಿನ ಮೋನೆನ್ ಯೆಂಕ್ ತೂವ್ವಾರೇ ಇಜ್ಜತ್ತಾ ಮಗಾಂದೋ
ಅಜ್ಜೇರ್ ಪಂಡೇರತ್ತೋ ಆ ಆ ಓ… ಓ… ಕಡೆಕಣ್ಣ್‌ಡ್‌ ಕೊಡಿದುಕ್ಕೊ ಬುಡ್ಪೇರತ್ತೋ…

ಇನಿ ಕುಮಾರೆ ಪುಟ್ಟಿನ ರಾಸಿಡ್‌ಮಗಾ ದಾರೋ
ಕುಮಾರನ ಮೋಣೆನ್‌ ತೂಂಡಾ ಮಗಾ ಯೆಂಕ್‌ ಮರಣ ಕಡೆಸುಂಡುಗೆನಾ
ಯೆನ್ನ ಮೋವ ಮೋಕೆಂದ ಮಗಲೆಗ್‌ಮಗಾ
ಕುಮಾರೆ ಪುಟ್ಟಿ ದೋಸೊಡುಗೆನಾ
ದಿಕ್ಕ್‌ಬುಡು ದೇಸಾಂತ್ರ ಪೋಪಿ ಕಾಲಂದೇ ತೋಜಿದ್‌ ಬತ್ತ್ಂಡತ್ತಾ ಮಗಾಂದ್‌ದ್‌
ಅಜ್ಜೇರ್‌ ಪಣ್ಪೇರತ್ತೋ ಓ… ಕಣ್ಣ್‌ಡ್‌ಗೆಂಡ ಗೆಂಡ ಕಣನೀರ್‌ ದೊರಿಪುವೆರತ್ತೋ
ಅಜ್ಜೇರೋ ಸತ್ಯನಾಪುರದ ಅಜ್ಜೇರೋ

ಇನಿ ಆಪಿನ ಆವು ಮಗಾ ದಾರೋ ಪೋಪಿನ ಪೋವು ಮಗಾ
ಇನಿ ಸತ್ಯಮಾಲೋಕಂದ ಸಿರಿನ ಬಾಲೆನಗೆನಾ
ಇನಿ ಪೊರ್ಲು ಪೋಲ್ಯೊಡು ಸಾಂಕೊಡು ಸಲಗೊಡುಂದುದ್‌
ಅಜ್ಜೇರ್‌ ಪಣ್ಪೇರ್‌ಗೆನಾ ಸತ್ಯನಾಪುರದಜ್ಜೇರ್ ಓ ಬೆರ್ಮು ಮಾಲವೇರ್‌ ಓ ಓ…  ಆ ಆ

ದಿನೊಡ್ದು ದಿನ ಕರಿಯುಂಡುಗೆನ
ಸಿರಿಗಾಂಡಲಗೆನ ನಾಲೆಡ್‌ ನಾಲೆನಮೆ
ಐನೆಡ್‌ ಐನನಮೆಗೆನಾ ಆಜೆಡ್‌ ಆಜೆನಮೆ ಕರಿಪ್ಪಾವೆರ್‌
ಏಲೆಡ್‌ಏಲನಮೆಗೆನಾ ಕರಿದ್‌ಂಡ್
ಒರ್‌ಂಬೊಡ್‌ ಒರ್‌ಂಬೇನಮೆಂದೇ ಕರಿಪ್ಪಾವುನುಲ್ಲೇರೋ
ಬೆರ್ಮು ಮಾಲವೇರೋ  ಓ… ಓ…  ಆ…  ಆ…  ಸತ್ಯನಾಪುರದ ಅಜ್ಜೇರ್‌…

ಒರ್‌ಂಬೆಡ್ ಒರ್‌ಂಬೇನಮೆ ಕರಿಪ್ಪಾನಗಗೆನಾ
ಇನಿಯಾಂಡಲ ಬಸಲೂರುದೆರಮನೆಡ್‌ ಗೆನಾ
ಬಾಲೆ ಕಾಂತನಲ್ವೆಗೆನಾ ಕೈಪತ್ತೀ ಕೈದಾರೆದ ಮದಿಮ್ಮಾಯೆ
ಕಣ್ಣ್‌ಡ್‌ ತೂವೆರೆ ಬತ್ತ್‌ಜ್ಜೇರ್‌ಗೆನಾ
ಮಾಮಿನಾರ್‌ ಸಂಕಾರು ಪೂಂಜೆದಿಲಾ ಬತ್ತಿನಿಜ್ಜಿಗೆನಾ
ಪದ್ನಾಜೆಡ್‌ ಪದ್‌ ನಾಜನಮೆ ಪಿಲೆ ಕರಿಪ್ಪಾವೊನು ಉಳ್ಳೇರೋ
ಸತ್ಯನಾಪುರದ ಅಜ್ಜೇರೋ…  ಓ…  ಓ… ಆರಿಯ ಬನ್ನಾರ್ ಬೆರ್ಮು ಮಾಲವೇರೋ…

ಪದಿನಾಜೆಡ್‌ ಪದ್ನಾಜನಮೆ ಕರಿಪ್ಪುನಗಾ
ಅಜ್ಜೇರ್‌ಗೆನ ನಾಲ್‌ ಇಲ್ಲಾಡೆ ಪಣ್ಪಾವೆರ್‌ಗೆನಾ
ನಾಲ್‌ ಇಲ್ಲ ಪೊಂಜೋವುಲಾ ನಾಲ್‌ ಕನ್ಯಾವು ಬಾಲೆಲೆನ್‌ ಕೂಡಾವೆರ್‌ಗೆನಾ
ಬಲ್ಲ್‌ ಪತ್ತಿ ಬೊಲ್ಲಿ ಮಾಡೊಡುಗೆನಾ
ಇನಿ ಅಮುರ್ತ ಗಲಿಗೆಡ್‌ ತೊಟ್ಟಿಲ್ ಗೋಪಾರವೆರತ್ತೋ
ಬೆರ್ಮು ಮಾಲವೇರೋ ಓ…  ಓ… ಸತ್ಯನಾಪುರದ ಅಜ್ಜೇರೋ ಆರ್‌… ಓ…

ಮುತ್ತೀ ಕುಂದನಂದ ತೊಟ್ಟೀಲ್‌ ಪಾಡಾದೆರ್‌ಗೆನಾ
ಆರಿಯ ಬನ್ನಾರ್‌ ಬೆರ್ಮು ಮಾಲವೇರ್‌ಗೆನಾ
ಮುತ್ತೀ ಕುಂದನಂದ ತೊಟ್ಟಿಲ್‌ಡ್‌ ಕುಮಾರನ್‌ ಮಲ್ಪಾವೆರತ್ತೋ
ಪಂಚಾಮುರುತಂದಟ್ಟೀಲ್ ಅರಗಣೆ ಬಲಸ್ಸಾವೆರಜ್ಜೇರೋ
ನಾಲ್‌ ಕನ್ಯಾವು ಪೊಂಜೇವುಗುಲಾ ಓ ಓ…  ಆ…  ಆ…
ಆರಿಯ ಬನ್ನಾರ್‌ಬೆ ರ್ಮು ಮಾಲವೇರೋ … …  ತನ ಸತ್ಯನಾಪುರದ ಎರಮಾನೆಡ್‌…

ಉಂಡೀ ಮಡೆಕಾಂಡಲಗೆನ ಅಜ್ಜೇರ್‌ ಕಾಯಿಪೂಲು ಕೊರ್ಪಾವೇರ್‌
ಉಂಡೀ ಮಡೆಕಾಂಡಲ ಅಜ್ಜೇರ್‌ ಗದರ್‌ಗ್‌ ಕಾಯಿ ತಿಂದೇರ್‌ಗೆನಾ
ಅಜ್ಜೇರೋ ಯೆಂಕುಲು ಬತ್ತೀನಕಲು ಜತ್ತ್‌ ಬರ್ಪಾಂದೇರ್‌ಗೆನಾ
ನಾಲ್‌ ಇಲ್ಲ ಪೊಂಜೋವುಲು ಜೋಕುಲೆಗೋ ಓ…  ಓ…
ಸತ್ಯನಾಪುರದ ಪೊಂಜೋವುಲು ಆ…  ಆ…

ಸತ್ಯನಾಪುರದ ಎರಮನೆಡ್‌ ಗೆನಾ ಆನಿದ ದಿನಕರಿಯೊನುದುಗೆನಾ
ಮಗುರ್‌ ದಿನಮಾನ ಬನ್ನಾಗಗೆನಾ
ಬಲ್ಲೂ ಪತ್ತಿ ಬೊಲ್ಲಿ ಮಾಡೊಡುಗೆನಾ
ನಾರಾಯಣ ಸೊರಣ ಪಾಡೂ ಬಾಲೇನೆ ಮಾನಾವೊನುಲ್ಲಾಲ್‌ ದಾರೂಗೆ
ಓ ದಾರೂ ಆಲ್‌ಕೇನೊಡೋ ಓ… ಓ…  ಕಾಟ್‌ ಕೈಯಂಗೇಲ್‌ಸಗ್ಮಾಲ್ ಪೊಣ್ಣುದಾರೂ…

ಇನಿ ಬಾಲೆಗಾ ಸಿರಿಗಾಂಡಲಗೆನಾ ಪೆದ್ದ್‌ದ್ ನಲ್ಪ ದಿನ ಆನಗಗೆನಾ
ಸತ್ಯನಾಪುರದ ಎರಮೆನಡ್‌ ತಿಂಗೋಲು ಮಲ್ಪಾವೆರ್‌ಗೆನಾ
ಪೆದ್ಮೆದಿ ಸಿರಿಗ್‌ ಗುವೆಲ್‌ಮುಟ್ಟಾವ್ವೇರುಗೆನಾ
ಪೆದ್ಮೆದಿ ಸಿರಿನಾ ಬಾಲೆ ಕುಮಾರೆಲಾ ಬಾರೊನು ಬದುಕೋನು ಉಲ್ಲೇರತ್ತೋ
ಸತ್ಯನಾಪುರೊಡು ಸತ್ಯಮಾಲೋಕಂದ ಸಿರಿಯ್ಯಾರೋ …  ಓ… ಓ… ಆ… ಆ..

ಒಂಜಿ ಪುಲ್ಯಕಾಂಡೆ ಬಾಲೆ ಕುಮಾರನುಗೆನಾ ಇನಿ ಮೀಪಾದ್‌ಗೆನಾ
ಚಂಡಿಗಟ್ಟಿದ್‌ ಗೆನ ಮುತ್ತಿ ಕುಂದನಂದ ತೊಟ್ಟಿಲ್‌ಡ್‌ ಮಲ್ದೇರ್‌ಗೆನ
ಸಿರಿಯಾಂಡಲಗೆನ ನಾರಾಯಣ ಸೊರಣ ಪಾಡೂ ಬಾಲೆನ್‌ಮಾನಾವೇರ್‌ಗೆನಾ
ಸಿರಿಯ್ಯಾರ್‌ ಓ ಓ ಸತ್ಯನಾಪುರದ ಎರಮನೆಡ್‌s…  ಓ… ಓ…
ಸತ್ಯಮಾಲೋಕಂದ ಬಾಲೆಕ್ಕೆ ಸಿರಿಗೆನಾ

ಅಜ್ಜೇರ್‌ಲಾ ಮಗಲ್‌ ಸಿರಿಲಾ ಸುಕದುಕ್ಕ ಪಾತೆರ್‌ದ್‌ ಮದಿಪುವೆರ್‌
ಅಜ್ಜೇರ್‌ ಪಣ್ಪೇರ್‌ಗೆನಾ ನಾರಾಯಣ ಮಗ ಸಿರಿಯೇ ಕೇಣಿದನಗೆನಾ
ಬಸಲೂರುದ ಎರಮನೆಡ್‌ ಬಯಕೆ ಪಾಡ್ಡ್‌ಲೆತ್ತ್‌ ಕೊನೊದೆ ನಿನಾನ್‌ಮಗಾ
ಬಸಲೂರುದ ಬಾಲೆ ಕಾಂತನಲ್ವಗ್‌ ಪೆದ್ದಿನ ಈಯಾಂಡಲ ಸುದ್ದಿ ವರ್ತಮಾನ ಕೊರಿಯಾಗೆನಾ
ನಿನ್ನ ಕೈಪತ್ತೀ ಕೈದಾರೆದ ಮದಿಯಾಯೆ ಇನಿಗ್‌ಲಾ ಬತ್ತೀನೆ ಇಜ್ಜಾದ್‌ ಪೋಂಡತ್ತೋಂದ್‌ದ್‌
ಅಜ್ಜೇರ್‌ ಪಣ್ಪೇರ್‌ ದೇ ಓ ಸಿರಿಯಾರೋ ಓ…  ಓ…  ಸತ್ಯನಾಪುರದ ಅಜ್ಜೇರೋ…

ಇನಿ ಸಂಕರು ಪೂಂಜೆದಿ ಆನಿಗ್‌ಪಣ್ತಿ ಪಾತೆರಗೆನಾ
ಕಾಲ್ತೆಡ್‌ ಯಾನ್‌ ಬತ್ತೆಡಗೆನಾ
ಮಾಲ್ತೆಡ್‌ಯೆನ್ನ ಮಗನ್‌ ಕಡಾವೆ ಅಜ್ಜೇರೆಂದ್‌ ಪಣ್ತಾಲ್‌ಗೆನಾ
ಇನಿ ಕಣ್ಣ್‌ಕೊಂಡು ತೂವರೇ ಇನಿಗ್‌ ಬತ್ತ್‌ಜ್ಜೇರೋ ಓ… ಓ
ಅಜ್ಜೇರೊ ಪಣ್ಪೇರೋ ಓ… ಓ…  ಆ…  ಆ…  ಆರಿಯ ಬನ್ನಾರ್‌
ಬೆರ್ಮು ಮಾಲವೇರೋ … ..ಸತ್ಯನಾಪುರದೆರಮಾನೆಡ್‌…

ಇನಿ ಬತ್ತೇಜ್ಜೇರ್‌ಡಲಾ ಮಗಾ ಸಿರಿಯೇ ಕೇಣಿದನಗೆನಾ
ನಿನ್ನಲ ಪುಣ್ಯೊಡುಗೆನಾ ಯೆನ್ನರುಣೊಟು ಇತ್ತಿಲೆಕ ಆವು ಪೋವು ಮಗಾಂದ್‌ದ್‌ ಗೆನಾ
ಇನಿ ಪಾತೆರ ಮದಿತ್ತೋನು ಸತ್ಯನಾಪುರೊಡು ಉಲ್ಲೇರತ್ತೋ
ಸಿರಿಲಾ ಆರಿಯ ಬನ್ನಾರ್‌ ಓ ಬೆರ್ಮು ಮಾಲವೇರೋ  ಓ. ಓ…  ಆ…  ಆ…