ನಮ್ಮ ವಿಶ್ವವಿದ್ಯಾಲಯದ ಪ್ರಥಮ ಘಟಿಕೋತ್ಸವಕ್ಕೆ ತಮ್ಮನ್ನು ತೆರೆದ ಹೃದಯದಿಂದ ಸ್ವಾಗಸತಿಸುತ್ತೇನೆ. ಕನ್ನಡ ವಿಶ್ವವಿದ್ಯಾಲಯದ ಇತಿಹಾಸದಲ್ಲಿ ಇಂದು ಚಿರಸ್ಮರಣೀಯವಾದ ದಿನ. ಹಂಪಿಯ ನಿರ್ಜನ ಪರಿಸರದಲ್ಲಿ ಒಂದು ಹೊಸ ‘ಜನಸ್ಥಾನ’ ಈಗ ತಲೆ ಎತ್ತಿದೆ. ವಿದ್ಯೆಯ ಹೊಸ ಕನಸುಗಳನ್ನು ಈ ಪ್ರದೇಶ ಕಾಣತೊಡಗಿದೆ. ಒಂದು ದೊಡ್ಡ ಸಾಮ್ರಾಜ್ಯವನ್ನು ನುಂಗಿ ನೀರು ಕುಡಿದ ಈ ನೆಲ ಈಗ ಮತ್ತೆ ಒಂದು ಹೊಸ ತಿಳುವಳಿಕೆಯ ಪರಿಸರವನ್ನು ಸೃಷ್ಟಿಸುತ್ತಿದೆ. ಮೈ ಹೊರಳಿಸಿದ ಕಾಲದ ಇನ್ನೊಂದು ಮಗ್ಗುಲು ಕಾಣತೊಡಗಿದೆ.

ಕರ್ನಾಟಕ ಸರ್ಕಾರ ಕೊಡಮಾಡಿರುವ ಈ ವಿಸ್ತಾರವಾದ ನಿವೇಶನದಲ್ಲಿ ಈಗ ವಿಶ್ವವಿದ್ಯಾಲಯದ ಕಟ್ಟಡಗಳು ತಲೆ ಎತ್ತಿವೆ. ತ್ರಿಪದಿ, ಕೂಡಲಸಂಗಮ, ತುಂಗ, ಭದ್ರಾ, ಕವಿರಾಜಮಾರ್ಗ, ದೇಸೀಮಾರ್ಗದಂಥ ಹಳೆಯ ಹೆಸರುಗಳು ಹೊಸ ಅರ್ಥವಂತಿಕೆಯನ್ನು ಪಡೆದುಕೊಳ್ಳುತ್ತಿವೆ. ಕಟ್ಟಡಗಳ ವಿನ್ಯಾಸವು ವಿಜಯನಗರದ ವಾಸ್ತುಶಿಲ್ಪಕ್ಕೆ ವಿಸಂಗತವಾಗುವಂತೆ ನೋಡಿಕೊಳ್ಳಲಾಗಿದೆ. ವಿದ್ಯಾನಗರವಾಗಿದ್ದದ್ದು ಸಾಮ್ರಾಜ್ಯ ವಿಸ್ತಾರದಿಂದ ವಿಜಯನಗರವಾಗಿ, ಈಗ ವಿದ್ಯಾರಣ್ಯವಾಗಿ ಚಿಗುರುತ್ತಿದೆ. ಬೇರೆ ಬೆಟ್ಟಗಳಲ್ಲಿ ಗಿಡ ಮರ ಬೆಳೆದರೆ ಈ ಅರಣ್ಯದಲ್ಲಿ ಕಲ್ಲುಬಂಡೆ ಬೆಳೆಯುತ್ತವೆ. ಮೂರ್ತಿ ಇಲ್ಲವೆ ಮಂದಿರವಾಗುವ ಸುಪ್ತ ಕನಸಿನ ಈ ಕಲ್ಲು ಬಂಡೆಗಳ ಅಡಿಯಲ್ಲಿ ಈಗ ಹಸಿರು ಹುಲ್ಲು ಬೆಳೆಯುತ್ತಿದೆ. ಬಿರುಬೇಸಿಗೆಯಲ್ಲೂ ಹುಲ್ಲಿಗೆ ನೀಡುಣಿಸುವ ತಾಯಿ ತುಂಗಭದ್ರೆಗೆ ನಮಸ್ಕರಿಸೋಣ.

ಕಳೆದ ಎರಡು ವರ್ಷಗಳಿಂದ ಕನ್ನಡ ವಿಶ್ವವಿದ್ಯಾಲಯ ‘ನುಡಿಹಬ್ಬ’ವನ್ನು ಆಚರಿಸುತ್ತ ಬಂದಿದೆ. ವಿಶೇಷವೆಂದರೆ ಈ ಸಲದ ನುಡಿಹಬ್ಬ ನಮ್ಮದೇ ಆವರಣದಲ್ಲಿ, ನಮ್ಮ ಕಟ್ಟಡಗಳಲ್ಲಿಯೇ ನಡೆಯುತ್ತಿರುವುದು. ನಿಮಗೆಲ್ಲ ತಿಳಿದಿರುವಂತೆ ನಮ್ಮ ವಿಶ್ವವಿದ್ಯಾಲಯದಲ್ಲಿ ಶಿಕ್ಷಣಕ್ಕಿಂತ ಸಂಶೋಧನೆಗೇ ಮಹತ್ವ ಹೆಚ್ಚು. ನಾವು ಎಂ.ಫಿಲ್ ಮತ್ತು ಪಿಎಚ್‌.ಡಿ. ಪದವಿಗಳನ್ನು ಮಾತ್ರ ನೀಡುತ್ತೇವೆ. ಈ ಎರಡೂ ಪದವಿಗಳ ಪದವೀಧರರ ಪ್ರಥಮ ತಂಡ ಹೊರಬರುತ್ತಿರುವುದು ಈ ಸಲದ ನುಡಿಹಬ್ಬದ ವಿಶೇಷ. ಈ ವರ್ಷದ ಘಟಿಕೋತ್ಸವ ನಮ್ಮ ವಿಶ್ವವಿದ್ಯಾಲಯ ಮೊದಲ ಘಟಿಕೋತ್ಸವವಾಗಿದೆ. ಶ್ರೀ ಕೃಷ್ಣ ಕಟ್ಟಿಯವರು ಸಿದ್ಧಪಡಿಸಿದ ‘ಬೇಂದ್ರೆ ಹಾಗೂ ಕನ್ನಡ ಭಾವಗೀತದ ಸ್ವರೂಪ’ ಎಂಬ ಮಹಾಪ್ರಬಂಧಕ್ಕೆ ಪಿಎಚ್.ಡಿ. ಪದವಿಯನ್ನು ಕೊಡಲಾಗುತ್ತಿದೆ. ಈ ಮಹಾಪ್ರಬಂಧ ಮೊದಲನೆಯದಾದ್ದರಿಂದ ಮತ್ತು ಅದರ ಪರೀಕ್ಷಕರು ನಾಡಿನ ಶ್ರೇಷ್ಠ ವಿದ್ವಾಂಸರಾಗಿರುವುದರಿಂದ ಅದೊಂದು ಮಾದರಿಯಾಗಬೇಕೆಂದು ನಮ್ಮೆಲ್ಲರ ಆಸೆಯಾಗಿದೆ. ಶ್ರೀ ಕಟ್ಟಿಯವರೊಂದಿಗೆ ಇನ್ನೂ ಆರು ಜನ ವಿದ್ಯಾರ್ಥಿಗಳು ಎಂ.ಫಿಲ್. ಪದವಿ ಪಡೆಯುತ್ತಿದ್ದಾರೆ. ನಮ್ಮದಿನ್ನೂ ಶೈಶವಾವಸ್ಥೆಯಲ್ಲಿರುವ ವಿಶ್ವವಿದ್ಯಾಲಯವಾಗಿರುವುದರಿಂದ ಅದರ ತಳಹದಿ ಗಟ್ಟಿಯಾಗಿರಬೇಕೆಂದು ನಾವೆಲ್ಲ ಶ್ರಮಿಸುತ್ತಿದ್ದೇವೆ. ಬೆಳೆದ ಮೇಲೆ ಕೂಡ ಶಿಕ್ಷಣದ ಗುಣಮಟ್ಟದಲ್ಲಿ ಯಾವುದೇ ಬಗೆಯ ರಾಜಿಗೆ ಇಲ್ಲಿ ಅವಕಾಶವಿರಬಾರದು.

ಈ ಪದವಿಗಳಲ್ಲದೆ ‘ನಾಡೋಜ’ ಎಂಬ ಗೌರವ ಪದವಿಯನ್ನೂ ನಾವು ಈ ವರ್ಷ ನೀಡುತ್ತಿದ್ದೇವೆ. ಯಾವುದೇ ಕ್ಷೇತ್ರದಲ್ಲಿ ಅತ್ಯುನ್ನತವಾದ ಸೇವೆ ಸಲ್ಲಿಸಿದವರಿಗೆ ಈ ಗೌರವ ಪದವಿಯನ್ನು ನೀಡಲಾಗುತ್ತಿದೆ. ಈ ಸಲ ರಾಷ್ಟ್ರಕವಿ ಡಾ. ಕುವೆಂಪು ಅವರು, ಸನ್ಮಾನ್ಯ ನಿಜಲಿಂಗಪ್ಪನವರು ಮತ್ತು ಶ್ರೀಮತಿ ಗಂಗೂಬಾಯಿ ಹಾನಗಲ್ ಇವರಿಗೆ ಈ ಪದವಿ ಸಲ್ಲುತ್ತಿದೆ.

ಕನ್ನಡ ವಿಶ್ವವಿದ್ಯಾಲಯ ಗುರಿ ಎಂದರೆ ಕನ್ನಡ ಸರ್ವತೋಮುಖವಾದ ಬೆಳವಣಿಗೆಯಾಗಿದೆ: ಆದರೆ ಇಂಗ್ಲಿಷ್ ಮಾಧ್ಯಮದ ಭರಾಟೆಯಲ್ಲಿ ಕನ್ನಡದ ಬೆಳೆವಣಿಗೆ ಯಾವುದಕ್ಕೂ ಸಾಲದೆನ್ನುವುದನ್ನು ಬೇರೆ ಹೇಳಬೇಕಾಗಿಲ್ಲ. ಸಮಾಜ ನಮ್ಮ ಕಣ್ಣಿಗೆ ಕಾಣದಂತೆ ಬದಲಾವಣೆ ಹೊಂದುತ್ತಿರುತ್ತದೆ. ಈ ಶತಮಾನದ ಪ್ರಾರಂಭದಲ್ಲಿ ಒಮ್ಮೆಲೆ ನಮ್ಮ ದೇಶ ಬದಲಾಗತೊಡಗಿತು. ಇದಕ್ಕೆ ಬ್ರಿಟಿಷರ ಆಗಮನವೇ ಕಾರಣವೆನ್ನುವುದು ಸ್ಪಷ್ಟವಾಗಿದೆ. ಬ್ರಿಟಿಷರಿಗಿಂತ ಮುಂಚೆ ಗ್ರೀಕರು, ಮುಸಲ್ಮಾನರು ನಮ್ಮಲ್ಲಿಗೆ ಬಂದಿದ್ದರು; ಬದಲಾವಣೆ ತಂದಿದ್ದರು. ಆದರೆ ಈ ಬದಲಾವಣೆಯ ಗತಿ ಇಷ್ಟು ತೀವ್ರವಾಗಿರಲಿಲ್ಲ. ಬ್ರಿಟಿಷರ ರಾಜಸತ್ತೆಯ ಪರಿಣಾಮವೇ ಬೇರೆ. ಅವರು ಬೇರೊಂದು ಸಂಸ್ಕೃತಿಯನ್ನು ತಂದರು. ಬೇರೊಂದು ರೀತಿಯ ರಾಜ್ಯವ್ಯವಸ್ಥೆಯನ್ನು ತಂದರು. ಎಲ್ಲಕ್ಕಿಂತ ಹೆಚ್ಚಾಗಿ ನಮಗೆ ಇಂಗ್ಲಿಷ್ ಭಾಷೆಯನ್ನು ಕಲಿಸಿದರು.

ಇಂಗ್ಲಿಷ್ ಭಾಷೆ ಅನೇಕ ಪ್ರಲೋಭನೆಗಳನ್ನು ಒಡ್ಡಿದ ಭಾಷೆ. ಇಂದಿಗೂ ಆ ಭಾಷೆ ಕಲಿಯದವನು ವಿದ್ಯಾವಂತನೇ ಅಲ್ಲ. ಯಾವುದೇ ಭಾಷೆ ಮನುಸ್ಯನ ತಿಳುವಳಿಕೆಯನ್ನು ತನ್ನ ರೀತಿಯಲ್ಲಿ ತಿದ್ದುತ್ತದೆ. ಇಂಗ್ಲಿಷ್ ಹಾಗೇ ಮಾಡಿತು. ಈಗ ನಮ್ಮ ಚಿಂತನೆ ಅದು ಕನ್ನಡದಲ್ಲಿ ಅಭಿವ್ಯಕ್ತಿ ಪಡೆದರೂ ನಡೆಯುವುದು ಮಾತ್ರ ಇಂಗ್ಲಿಷ್ ಭಾಷೆಯ ಮೂಲಕವಾಗಿ. ನಮ್ಮ ಶಿಕಷಣದ ಮಾಧ್ಯಮ ಮೊದಲು ಇಂಗ್ಲಿಷ್ ಇದ್ದುದ್ದು ಈಗ ಕನ್ನಡವಾಗುತ್ತಿದೆ. ಆದರೆ ಕನ್ನಡ ಮಾಧ್ಯಮ ಕೂಡ ಇಂಗ್ಲಿಷ್ ಮಾಧ್ಯಮದ ಅನುವಾದವಾಗಿದೆ. ನಮ್ಮ ಸಮಾಜ ತ್ವರಿತಗತಿಯಲ್ಲಿ ಬದಲಾವಣೆ ಹೊಂದುತ್ತಿರುವುದಕ್ಕೆ ಈ ಮಾಧ್ಯಮ ಕಾರಣವಾಗಿದೆ. ಇಂಗ್ಲಿಷ್ ಕಲಿತ ಮೇಲೆ ನಾವು ನಮ್ಮ ಇತಿಹಾಸದ ಕಲ್ಪನೆಯನ್ನು ರೂಪಿಸಿಕೊಂಡೆವು. ಈ ಐತಿಹಾಸಿಕ ಪ್ರಜ್ಞೆಯಿಂದ ನಮ್ಮ ಹಳೆಯ ಜ್ಞಾನಶಾಸ್ತ್ರವನ್ನು ರೂಪಿಸಿಕೊಂಡೆವು. ನಮ್ಮಲ್ಲಿರುವ ತರತಮ ಭಾವನೆಗಳಿಗೆ, ಮೌಲ್ಯಗಳಿಗೆ, ಕೀಳರಿಮೆಗೆ, ಸರಿತಪ್ಪುಗಳ ಕಲ್ಪನೆಗಳಿಗೆ ಈ ಭಾಷೆಯೇ ಕಾರನವೆಂದರೂ ತಪ್ಪಿಲ್ಲ. ಇದರ ಪರಿಣಾಮವಾಗಿ ನಮ್ಮಲ್ಲಿದ್ದ ವಿಜ್ಞಾನಗಳೆಲ್ಲ ಗೊಡ್ಡು ಪುರಾಣಗಳಾದವು. ಆಯುರ್ವೇದದಂಥ ವಿಜ್ಞಾನ, ದೇವಸ್ಥಾನ ರಚನೆಯಂಥ ನಮ್ಮ ಇಂಜಿನಿಯರಿಂಗ್ ಕೂಡ ಗೊಡ್ಡು ಪುರಾಣಗಳಾಗಿ ವಿಶ್ವಾಸ ಕಳೆದುಕೊಂಡವು. ನೆಲ, ಹೊಲ ಕನ್ನಡವಾಗಿದ್ದರೂ ಕೃಷಿಶಾಸ್ತ್ರ ಕೂಡ ಇಂಗ್ಲಿಷಿನಲ್ಲಿ ರೂಪಗೊಳ್ಳುತ್ತಿರುವ ವಿಪರ್ಯಾಸ ನಮ್ಮದಾಗಿದೆ.

ಈ ವಿಪರ್ಯಾಸವನ್ನು ತಡೆಗಟ್ಟುವುದು ಕನ್ನಡ ವಿಶ್ವವಿದ್ಯಾಲಯದ ಗುರಿಯಾಗಿದೆ. ಕನ್ನಡಕ್ಕೆ ತನ್ನದೇ ಆದ ಅಭಿಜಾತತೆ ಇದೆ. ಈ ಮೂರೂ ನಿಟ್ಟುಗಳಲ್ಲಿ ಬೆಳವಣಿಗೆ ಪಡೆದ ಭಾಷೆಯನ್ನು ಸರಿಯಾಗಿ ದುಡಿಸಿಕೊಳ್ಳುವ ಉಪಕ್ರಮ ಇಲ್ಲಿ ನಡೆಯುತ್ತಿದೆ. ಇದಕ್ಕಾಗಿ ಸಂಶೋಧನೆಯ ಕಲ್ಪನೆ ಹಾಗೂ ಉದ್ದೇಶಗಳನ್ನು ಬದಲಿಸಿಕೊಳ್ಳಬೇಕಾಗಿದೆ.

ಪಿಎಚ್.ಡಿ. ಅಥವಾ ಅನ್ಯತ್ರ ಮಾಡಿದ ಸಂಶೋಧನೆಗಳು ಸಂಶೋಧನೆ ಮಾಡಿದವರಿಗೇ ಜೀವನದಲ್ಲಿ ಒಂದು ಬಾರಿಯೂ ಉಪಯೋಗವಾಗದಿದ್ದಲ್ಲಿ ಅಂಥ ಸಂಶೋಧನೆಯಿಂದ ಏನು ಪ್ರಯೋಜನ? ಸಂಶೋಧನೆಗಾಗ ಸಂಶೋಧನೆ ಆಗಬಾರದು. ಆದ್ದರಿಂದಲೇ ಅದು ಕೊನೇಪಕ್ಷ ಕನ್ನಡದ ಅ) ಸಾಮಾನ್ಯ ಜನ ಆ) ವಿದ್ಯಾರ್ಥಿಗಳು ಹಾಗೂ ಇ) ಬುದ್ಧಿವಂತರು ಈ ಮೂವರಲ್ಲಿ ಒಬ್ಬರಿಗಾದರೂ ಉಪಯೋಗವಾಗಬೇಕೆಂದು ಕನ್ನಡ ವಿಶ್ವವಿದ್ಯಾಲಯ ಬಯಸುತ್ತದೆ. ಜನಸಾಮಾನ್ಯರಿಗೆ ಈ ಸಲ ೧೧೦ ಪುಸ್ತಕಗಳನ್ನು ನಾವು ಪ್ರಕಟಿಸಿದ್ದೇವೆ. ಕೃಷಿ ಪದ ನಿಘಂಟು, ಜನಪದಕಲೆಗಳ ವಿಶ್ವಕೋಶಗಳು ಆಗಲೇ ಸಿದ್ಧವಾಗಿವೆ. ಕನ್ನಡಿಗರ ಮನೆಮನೆಗಳಲ್ಲಿರಬೇಕಾದ ವೈದ್ಯಕೋಶ ಅಚ್ಚಿನ ಮುಕ್ತಾಯದ ಹಂತದಲ್ಲಿದೆ. ಹಾಗೆಯೇ ಆಯಗಾರರೇ ಮುಂತಾದವರ ವೃತ್ತಿ ಪದಕೋಶಗಳು ತಯಾರಿಕೆಯ ಹಂತದಲ್ಲಿವೆ.

ಸಾಹಿತ್ಯ ಮತ್ತು ಮಾನವಿಕ ಶಾಸ್ತ್ರಗಳಲ್ಲಿ ನಡೆದ ಸಂಶೋಧನೆ ಬೆಲೆಯುಳ್ಳದ್ದಾಗಿದೆ. ಆದರೆ ವಿಜ್ಞಾನದ ಕ್ಷೇತ್ರದಲ್ಲಿ ನಾವು ನಿರೀಕ್ಷಿಸಿದಷ್ಟು ಪ್ರಗತಿ ಆಗಿಲ್ಲ. ವೈಜ್ಞಾನಿಕ ತಿಳುವಳಿಕೆ ಇದ್ದರೂ ವೈಜ್ಞಾನಿಕ ವಿಂತನೆ ನಮಗೆ ಇನ್ನೂ ಸಾಧಿಸಿಲ್ಲ. ಆದರೂ ಈ ದಿಕ್ಕಿನಲ್ಲಿ ನಮ್ಮ ಪ್ರಯತ್ನ ನಡೆದೇ ಇದೆ. ನಮ್ಮ ವಿಶ್ವವಿದ್ಯಾಲಯ ಪ್ರಕಟಿಸುತ್ತಿರುವ ‘ವಿಜ್ಞಾನ ಸಂಗಾತಿ’ಗೆ ಈ ಗುರಿಯಿದೆ. ಅಲ್ಲದೆ ಕನ್ನಡದಲ್ಲಿ ವಿಜ್ಞಾನ ಬೋಧನೆಯ ಪಠ್ಯಗಳನ್ನು ನಿರ್ಮಿಸುತ್ತಿದ್ದೇವೆ. ನಮ್ಮ ಕನ್ನಡ ಕಾವ್ಯ, ಶೈಲಿ ಕೈಪಿಡಿಗಳು ಆಗಲೇ ಸಿದ್ಧವಾಗಿದೆ. ಈವರೆಗೆ ಲಭ್ಯವಿದ್ದ ಕರ್ನಾಟಕವನ್ನು ಕನ್ನಡಿಗರಿಗೆ ಪರಿಚಯಿಸುವ ಕರ್ನಾಟಕದ ಸಮಗ್ರ ಇತಿಹಾಸ ಏಳು ಸಂಪುಟಗಳಲ್ಲಿ ಸಿದ್ಧಗೊಳ್ಳುತ್ತಿದೆ. ಕರ್ನಾಟಕದ ಬಗೆಗಿನ ಯಾವುದೇ ಮಾಹಿತಿ ಒದಗಿಸುವ ಮಾಹಿತಿ ಕೇಂದ್ರ ದಿನೇ ದಿನೇ ವೃದ್ಧಿಗೊಳ್ಳುತ್ತಿದೆ.

ಕನ್ನಡ ಚಿಂತನೆಗಳು ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಚರ್ಚೆಗೊಳಗಾಗಬೇಕೆಂಬ ಉದ್ದೇಶದಿಂದ ಭಾಷಾಂತರ ವಿಭಾಗವನ್ನು ಚುರುಕುಗೊಳಿಸಿದ್ದೇವೆ. ಆ ವಿಭಾಗದ ಪುರಾಣಕೋಶ ಆಗಲೇ ಸಿದ್ಧವಾಗಿದೆ. ತುಂಬ ಮಹತ್ವಾಕಾಂಕ್ಷೆಯ ಮತ್ತು ಭಾರತದ ಯಾವ ವಿಶ್ವವಿದ್ಯಾಲಯವೂ ಪ್ರಯತ್ನಿಸಲಾಗದ ಒಂದು ವಿನೂತನ ಯೋಜನೆ ‘ನಮ್ಮ ಕನ್ನಡ’. ಕನ್ನಡದಲ್ಲಿ ದಿನನಿತ್ಯ ಸೃಷ್ಟಿಯಾಗುತ್ತಿರುವ ಶಬ್ದಗಳನ್ನು ಆಯಾ ತಿಂಗಳು ದಾಖಲಿಸಿ ರೂಪನಿರ್ಣಯ ಮಾಡುವುದು ಮತ್ತು ಆ ಮೂಲಕ ಕನ್ನಡದ ಬೆಳವಣಿಗೆಗೆ ನಿರ್ದೇಶನಗಳನ್ನು ಕೊಡುವುದು ಈ ಯೋಜನೆಯ ಉದ್ದೇಶ. ಇದು ಭಾರತದ ಯಾವ ಭಾಷೆಯಲ್ಲೂ ನಡೆದಿಲ್ಲ ಎನ್ನುವುದನ್ನು ಒತ್ತಿ ಹೇಳಬಯಸುತ್ತೇನೆ.

ಕನ್ನಡ ವಿಶ್ವವಿದ್ಯಾಲಯ ಈಗ ಮುಗಿಸಿರುವ ಯೋಜನೆಗಳಲ್ಲದೆ ಇನ್ನೂ ಅನೇಕ ಯೋಜನೆಗಳನ್ನು ಕೈಗೊಳ್ಳಬೇಕಿದೆ. ನಮ್ಮ ಬೇರೆ ಬೇರೆ ಭೌಗೋಳಿಕ ಪ್ರದೇಶಗಳು, ಇತಿಹಾಸದ ಬೇರೆ ಬೇರೆ ಮಗ್ಗುಲುಗಳು, ನಮ್ಮ ಸಾಹಿತ್ಯ, ಕಲೆಗಳು ಮುಟ್ಟಿದ ಎತ್ತರದ ಆಳವಾದ ಅರಿವು ನಮಗೆ ಆಗಬೇಕಾಗಿದೆ. ನಮ್ಮಲ್ಲಿ ಹೊಸದಾಗಿ ಹುಟ್ಟಿರುವ ‘ಕಾವ್ಯಕೇಂದ್ರ’ಕ್ಕೆ ಹಲವಾರು ಕನಸುಗಳಿವೆ. ಕನ್ನಡದ ಶಕ್ತಿ ಇರುವುದು ಅದರ ಸಾಹಿತ್ಯದಲ್ಲಿ. ನಮ್ಮದು ಕಾವ್ಯ ನಾಟಕಗಳಿಗೆ ಹೇಳಿ ಮಾಡಿಸಿದ ಭಾಷೆ. ಅದಕ್ಕಾಗಿ ಸಾಹಿತ್ಯವನ್ನು ಕುರಿತು ಅನೇಕ ಚಿಂತನೆಯ ಕ್ರಮಗಳು ಹುಟ್ಟಿ ಬಂದರೆ ಆಶ್ವರ್ಯವಿಲ್ಲ.

ಇಷ್ಟಾಗಿ ನಮ್ಮ ಮುಂದೆ ಅನೇಕ ಕನಸುಗಳು ಸುಳಿದಡುತ್ತಿವೆ, ಸಾಹಿತ್ಯದ ಏಕಮೇವ ಮಾಧ್ಯಮವಾಗಿರುವ ಕನ್ನಡ ಭಾಷೆ ಇನ್ನು ಮುಂದೆ ಎಲ್ಲ ಶಾಸ್ತ್ರಗಳಿಗೂ ಮಾಧ್ಯಮವಾಗಬೇಕಾಗಿದೆ. ಸಾಹಿತ್ಯವನ್ನು ಹೊರತುಪಡಿಸಿ ಕನ್ನಡ ಭಾಷೆ ಇದೀಗ ಬೇರೆ ಚಿಂತನೆಯ ಕ್ರಮಗಳನ್ನು ಕಲಿಯತೊಡಗಿದೆ. ಮಾನವಶಾಸ್ತ್ರ ಹಾಗೂ ಭೌತಿಕಶಾಸ್ತ್ರಗಳು ಕನ್ನಡ ಭಾಷೆಯಲ್ಲಿ ಮೈದಾಳಲು ಕಾದು ನಿಂತಿವೆ. ಒಟ್ಟಿನಲ್ಲಿ ಹೊಸ ಶಿಕ್ಷಶಾಸ್ತ್ರ ಇಲ್ಲಿಂದ ಹುಟ್ಟಬೇಕೆಂಬುದು ನಮ್ಮ ಆಸೆ. ಮಹತ್ವಾಕಾಂಕ್ಷೆಯ ಇಂಥ ಗುರಿ ಸಾಧಿಸಲು ಸರಕಾರದ ಉದಾರ ನೆರವು ಬೇಕು. ನಿಮ್ಮೆಲ್ಲರ ಸಹಕಾರ ಬೇಕು.

ತಮ್ಮ ಘನವಾದ ಸಾಕ್ಷಿಯಲ್ಲಿ ನಡೆಯುತ್ತಿರುವ, ಪ್ರಥಮ ಘಟಿಕೋತ್ಸವದ ಈ ದಿನ ಹೀಗೆ ಹಾರೈಸುತ್ತೇನೆ. ಮೂಡುಮಲೆಯ ಸೂರ್ಯನಾರಾಯಣ ಸ್ವಾಮಿ, ಪಡುಮಲೆಯ ಚಂದ್ರಾಮ ಸ್ವಾಮಿ ಇರುವ ತನಕ ಇಲ್ಲಿ ನಿತ್ಯ ನಿರಂತರವಗಿ ವಿದ್ಯೆಯ ಸೃಷ್ಟಿ ನಡೆಯುತ್ತಿರಲೆಂದು ಪಂಪಾಂಬಿಕೆ ಸಮೇತ ವಿರೂಪಾಕ್ಷನ ಸನ್ನಿಧಿಯಲ್ಲಿ ಪ್ರಾರ್ಥಿಸುತ್ತೇನೆ.

ನಮ್ಮ ವಿಶ್ವವಿದ್ಯಾಲಯವು ಈ ವರ್ಷ ನೀಡುತ್ತಿರುವ ‘ನಾಡೋಜ’ ಗೌರವ ಪದವಿಯನ್ನು ಈಗ ಕುಲಾಧಿಪತಿಗಳು ಶ್ರೀ ಕುವೆಂಪು, ಶ್ರೀ ಎಸ್. ನಿಜಲಿಂಗಪ್ಪ ಮತ್ತು ಶ್ರೀಮತಿ ಗಂಗೂಬಾಯಿ ಹಾನಗಲ್ ಅವರಿಗೆ ಪ್ರಧಾನ ಮಾಡಬೇಕೆಂದು ಕೋರುತ್ತೇನೆ. ಆದರೆ ರಾಷ್ಟ್ರಕವಿ ಡಾ. ಕುವೆಂಪು ಅವರು ಈಗ ನಮ್ಮ ಮಧ್ಯದಲ್ಲಿ ಇಲ್ಲ. ಆದರೆ ಅವರು ಬಿಟ್ಟು ಹೋಗಿರುವ ಕಾವ್ಯವಿದೆ. ಕತೆ, ಕಾದಂಬರಿಗಳಿವೆ, ರಸ ವಿಮರ್ಶೆಯಿದೆ. ಸಹ್ಯಾದ್ರಿಯ ಮಡಿಲಲ್ಲಿ ಚೇತೋಹಾರಿಯಾದ ವನರಾಜಿಯ ಮಧ್ಯದಲ್ಲಿ ಹುಟ್ಟಿ ಬೆಳೆದ ಈ ಕವಿಯ ಕಾವ್ಯಚಿಂತನದೊಂದಿಗೆ ಕನ್ನಡದ ಧಾನವೂ ಮಿಳಿತವಾಗಿತ್ತು. ಅಥವಾ ಅವೆರಡೂ ಅಭಿನ್ನವಾಗಿದ್ದವು. ನಮ್ಮ ಕವಿಗಳಲ್ಲಿ ಕರ್ನಾಟಕದ ನಿತ್ಯಸಚಿವಮಂಡಳವನ್ನು ಕಂಡ ಕುವೆಂಪು ಜೀವನ ಮೌಲ್ಯಗಳಿಗಾಗಿ ಬಾಳಿದರು. ಅವರದು ನವೋದಯ ಕಾವ್ಯದ ತಿರುಳಾದ ಪ್ರತಿಭೆ. ಅವರ ಮಹಾಕಾವ್ಯ ಮತ್ತು ಕಾದಂಬರಿಗಳು ಈ ಯುಗದ ಮಹತ್ವದ ಕೊಡುಗೆಗಳಾಗಿವೆ. ಅಂಥ ಅಪ್ರತಿಮ ಪ್ರತಿಭೆಗೆ ನಮನ ಪೂರ್ವಕವಾಗಿ ನಮ್ಮ ಗೌರವಪದವಿ ‘ನಾಡೋಜ’ವನ್ನು ಅರ್ಪಿಸುತ್ತಿದ್ದೇವೆ.

ಸನ್ಮಾನ್ಯ ನಿಜಲಿಂಗಪ್ಪನವರ ವ್ಯಕ್ತಿತ್ವವೆಂದರೆ ನಮ್ಮ ಸ್ವಾತಂತ್ರ್ಯಪೂರ್ವದ ಮತ್ತು ಸ್ವಾತಂತ್ರ್ಯೋತ್ತರದ ರಾಷ್ಟ್ರೀಯ ಇತಿಹಾಸವಾಗಿದೆ. ಈಗ ಅವರು ರಾಜಕೀಯದಿಂದ ನಿವೃತ್ತರಾಗಿರಬಹುದು. ಆದರೆ ನಮ್ಮ ರಾಜಕೀಯದ ಒಳಿತು ಕೆಡುಕುಗಳಿಗೆ, ನೀತಿ ಸಂಹಿತೆಗೆ, ಶಕ್ತಿ ದೌರ್ಬಲ್ಯಗಳಿಗೆ ಅವರು ಪ್ರಮಾಣಪುರುಷರಾಗಿದ್ದಾರೆ. ಅವರು ನಂಬಿಕೊಂಡು ಬಂದಿರುವ ರಾಜಕೀಯ ಮಾರ್ಗದಿಂದ ದೇಶ ಇಂದು ವಿಮುಖವಾಗಿದ್ದರೂ ಅದನ್ನು ಬಿಟ್ಟರೆ ಬೇರೆ ಮಾರ್ಗವಿಲ್ಲವೆನ್ನುವುದಕ್ಕೆ ನಿಜಲಿಂಗಪ್ಪನವರೇ ಸಾಕ್ಷಿಯಾಗಿದ್ದಾರೆ. ರಾಜಕೀಯದ ಜೊತೆಗೆ ಸಾಹಿತ್ಯಾಸಕ್ತಿಯೂ ಸೇರಿಕೊಂಡು ಅವರ ವ್ಯಕ್ತಿತ್ವವನ್ನು ಇನ್ನೂ ಶ್ರೀಮಂತವಾಗಿಸಿವೆ. ಅವರ ವ್ಯಕ್ತಿತ್ವದಿಂದ ನಾಡು ಕಲಿತುಕೊಳ್ಳುವುದು ಬೇಕಾದಷ್ಟಿದೆ. ರಾಜಕೀಯದ ಆಚಾರ ಸಂಹಿತೆಗೆ ಉದಾಹರಣೆಯಾಗಿರುವ ಅವರು ಇಡೀ ನಾಡಿನ ಗುರು, ‘ನಾಡೋಜ’.

ಶ್ರೀಮತಿ ಗಂಗೂಬಾಯಿ ಹಾನಗಲ್ ಅವರು ನಮ್ಮವರು. ನಮ್ಮ ವಿಶ್ವವಿದ್ಯಾಲಯದ ಜೊತೆಗೆ ನಿಕಟವಾದ ಸಂಬಂಧವನ್ನಿಟ್ಟುಕೊಂಡವರು. ಇಲ್ಲಿಯ ಶೈಕ್ಷಣಿಕ ಚಟುವಟಿಕೆಗಳನ್ನು ಆಸಕ್ತಿಯಿಂದ ನಿರೀಕ್ಷಿಸಿ ತಮ್ಮ ಅಮುಲ್ಯವಾದ ಸಲಹೆ ಸಹಕಾರ ನೀಡಿದವರು. ಸಂಗೀತ ಕ್ಷೇತ್ರದಲ್ಲಿ ಈಗ ಕರ್ನಾಟಕದಲ್ಲಿ ಇವರ ಸರಿದೊರೆಯಾಗತಕ್ಕವರು ಯಾರೂ ಇಲ್ಲ. ಇವರ ಸಂಗೀತದ ದೀರ್ಘವಾದ ಸೇವೆಯನ್ನು ಗಮನಿಸಿ ಇವರಿಗೆ ಈ ಪದವಿಯನ್ನು ನೀಡುತ್ತಿದ್ದೇವೆ. ಕನ್ನಡ ವಿಶ್ವವಿದ್ಯಾಲಯ ವಿದ್ವಾಂಸರನ್ನು ಗುರುತಿಸುವ ಮೊದಲು ನಾಡಿನ ಶ್ರೇಷ್ಠ ವಿದ್ವಾಂಸರು ವಿಶ್ವವಿದ್ಯಾಲಯವನ್ನು ಗುರುತಿಸಬೇಕಾಗಿದೆ. ಗೌರವ ಪದವಿ ಎಂದರೆ ಇದೇ. ಗಂಗೂಬಾಯಿಯಂಥವರ ವೈದುಷ್ಯವನ್ನು ನಾವು ಗುರುತಿಸಬೇಕಾಗಿಲ್ಲ. ಅದಕ್ಕೆ ಮೊದಲೇ ಅವರು ‘ನಾಡೋಜ’ರಾಗಿದ್ದಾರೆ. ಅವರ ಸಂಗೀತವನ್ನು ನಾಡಿನ ಹಿರಿಯ ಗಾಯಕರೆಲ್ಲ ಗುರುತಿಸಿದ್ದಾರೆ. ಅವರು ನಮ್ಮ ವಿಶ್ವವಿದ್ಯಾಲಯದ ಈ ಪದವಿ ಸ್ವೀಕರಿಸಬೇಕಾಗಿ ಕೇಳಿಕೊಳ್ಳುತ್ತಿದ್ದೇನೆ.

* * *


* ಮೊದಲನೆಯ ಘಟಿಕೋತ್ಸವ ಸ್ವಾಗತ ಭಾಷಣ