‘Halt and Proceed’
ನಿಂತು ಹೊರಡು, ನಿಂತು ಹೊರಡೋ ಅಣ್ಣ
ನಿಂತು ಹೊರಡು.
ವಿಸ್ತಾರವಾಗಿದೆ ರಸ್ತೆ, ಆದರಿದು ನಿನಗೊಬ್ಬನಿಗೆ
ಮೀಸಲಾಗಿಲ್ಲ. ನಿನ್ನಂತೆ ಸಾವಿರ ಮಂದಿ
ನಡೆಸುತಿದ್ದಾರೆ ವಾಹನಗಳನು;
ಹೊಸಕುದುರೆ, ಬಿಗಿಹಿಡಿಯುವುದು ಬಲುಕಷ್ಟ;
ಅಶ್ವಮೇಧಕ್ಕೆ ಹೊರಟವನಲ್ಲ ನೀನು; ಇದು
ನಗರದೊಳಗಿನ ರಸ್ತೆ, ಸರಿಯಾಗಿರಬೇಕು
ಒಳಗಿನ ವ್ಯವಸ್ಥೆ.

‘Halt and Proceed’-
ನೋಡಿದೆಯ, ಏನು ಬರೆದಿದೆ ಇಲ್ಲಿ,
ಹೆಬ್ಬೆಟ್ಟನೂ ಒತ್ತಲು ಬರದ ಜನವಿರುವ
ಈ ದೇಶದಲ್ಲಿ, ಅದೂ ಪರಭಾಷೆಯಲ್ಲಿ!
ಆದರೂ ಅಭ್ಯಾಸ ಬಲದಿಂದ ಅರ್ಥಗೊತ್ತಿದೆ ನಿನಗೆ:
‘ನಿಂತು ಹೊರಡೋ ಅಣ್ಣ, ನಿಂತು ಹೊರಡೋ.’

ನಿನಗೆ ಗೊತ್ತೇನು ಇಂಥ ಹಲಗೆಯ ಕೆಳಗೆ
ಸ್ಥಳಪುರಾಣ?
ನಿಂತು ನಡೆಯದೆಯೆ ಹೇಗೋ ನುಗ್ಗಿ
ಯಾರ‍್ಯಾರೊ ಬಡಪಾಯಿಗಳು ಇಲ್ಲಿ ಬಿಟ್ಟರೊ ಪ್ರಾಣ.
ಅವರ ಪಾಡೆಲ್ಲವೂ ದಾಖಲಾಗಿರಬಹುದು
ಪೋಲೀಸು ಖಾತೆಯಲಿ, ಮತ್ತೆ ಆಸ್ಪತ್ರೆಯಲಿ.

ಅಪಘಾತದಿಂದಾದ ರಕ್ತದ ಕಲೆಯ ಮಳೆ ತೊಳೆದು
ಬಿಸಿಲು ಒಣಗಿಸಿದನಂತರ ಬಂತು ಈ ಸ್ಥಳದಲ್ಲಿ
ಹಲಗೆ: Halt and Proceed.
ನಿನಗೆ ಮಾತ್ರವೆ ಅಲ್ಲ, ಅವರಿವರ ಸಲುವಾಗಿಯಾದರೂ
ನೆನಪಿರಲಿ ಎಲ್ಲ ಕಡೆಯೂ ನಿನಗೆ ಈ
ನಗರ ಸೂಕ್ತ: Halt and Proceed.