ಜನಪದ ಪರಂಪರೆಯಲ್ಲಿ ವೀರಗತಿಯ ಪ್ರದರ್ಶನ ನೀಡುವ ಜಾನಪದ ಪ್ರದರ್ಶನ ಕಲೆ ವೀರಗಾಸೆ, ರುದ್ರ ಭಯಂಕರವಾಗಿ ತಮ್ಮ ವೇಷಭೂಷಣ ಮತ್ತು ನೃತ್ಯದ ಮೂಲಕ ಜನರ ಗಮನ ಸೆಳೆದವರು ಮಾನಪ್ಪ ಈರಪ್ಪ ಲೋಹಾರ.
ಕಳೆದ ನಾಲ್ಕೂವರೆ ದಶಕಗಳಿಂದ ವೀರಗಾಸೆಯಲ್ಲಿ ತಮ್ಮ ಪ್ರದರ್ಶನ ನೀಡುತ್ತ ಬಂದಿರುವ ಮಾನಪ್ಪ ಈರಪ್ಪ ಲೋಹಾರ ಅವರು ಬಾಗಲಕೋಟೆ ಜಿಲ್ಲೆಯ ಅನೇಕ ಊರುಗಳಲ್ಲಿ ಮೂರ್ತಿಗಳನ್ನು ಸಿದ್ಧಪಡಿಸಿ ಬಣ್ಣ ಹಚ್ಚುವುದರಲ್ಲಿ ನಿಪುಣರು.
ಮುಧೋಳ, ಜಮಖಂಡಿ ತಾಲೂಕುಗಳಲ್ಲಿ ನಿರಂತರವಾಗಿ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ತಮ್ಮ ವಿಶಿಷ್ಟ ಬಗೆಯ ವೀರಗಾಸೆ ನೃತ್ಯವನ್ನು ಪ್ರದರ್ಶಿಸುತ್ತ ಬಂದಿರುವ ಇವರು ಈ ಜಾನಪದ ನೃತ್ಯ ಪರಂಪರೆಯಲ್ಲಿ ಆಸಕ್ತ ಯುವಕರಿಗೆ ತರಬೇತಿಯನ್ನು ಸಹ ನೀಡುತ್ತ ಬಂದಿದ್ದಾರೆ.
ಹಂಪಿ ಉತ್ಸವ, ನವರಸಪುರ ಮೊದಲಾದ ಸಾಂಸ್ಕೃತಿಕ ಉತ್ಸವಗಳಲ್ಲಿ ಪ್ರದರ್ಶನ ನೀಡುತ್ತ ಬಂದಿರುವ ಮಾನಪ್ಪ ಈರಪ್ಪ ಲೋಹಾರ ಅವರಿಗೆ ಜಿಲ್ಲಾಡಳಿತ ಪ್ರಶಸ್ತಿ ಸೇರಿದಂತೆ ಹಲವು ಸಂಘ- ಸಂಸ್ಥೆಗಳು ಗೌರವಿಸಿವೆ
