ಮುಂಬೈ ಆವೃತ್ತಿಯ ‘ದಿ ಹಿಂದೂ’ ಆಂಗ್ಲ ದಿನಪತ್ರಿಕೆಯಲ್ಲಿ ಉಪಸಂಪಾದಕರಾಗಿ ಕಾರ್ಯನಿರ್ವಹಿಸುತ್ತಿರುವ ಬೆಂಗಳೂರು ಮೂಲದ ಪತ್ರಿಕೋದ್ಯಮಿ ಶ್ರೀಮತಿ ಕಲ್ಪನಾ ಶರ್ಮ ಅವರು.
೧೯೪೭ರಲ್ಲಿ ಜನಿಸಿದ ಶ್ರೀಮತಿ ಕಲ್ಪನಾ ಶರ್ಮ ೩೩ ವರ್ಷಗಳ ಕಾಲ ಪತ್ರಿಕೋದ್ಯಮದಲ್ಲಿ ಸೇವೆ ಸಲ್ಲಿಸಿದ್ದಾರೆ. ಸಂಪಾದಕೀಯ, ವಿಶೇಷ ವರದಿಗಳು ಹಾಗೂ ಮಹಿಳಾ ಕೇಂದ್ರೀಕೃತ ಭಾನುವಾರದ ‘ದಿ ಅದರ್ ಹಾಫ್’ ಅಂಕಣಕಾರರಾಗಿ ಸೇವೆ ಸಲ್ಲಿಸುತ್ತಿರುವವರು ಶ್ರೀಮತಿ ಕಲ್ಪನಾ ಶರ್ಮ.
ಮುಂಬೈ ಆವೃತ್ತಿಯ ದಿ ಟೈಮ್ಸ್ ಆಫ್ ಇಂಡಿಯಾ ದಿನಪತ್ರಿಕೆಯಲ್ಲಿ ಹಿರಿಯ ಸಹಾಯಕ ಸಂಪಾದಕಿಯಾಗಿ, ದೆಹಲಿ ಹಾಗೂ ಮುಂಬೈ ಆವೃತ್ತಿಗಳಲ್ಲಿ ದಿ ಇಂಡಿಯನ್ ಎಕ್ಸ್ಪ್ರೆಸ್ ದಿನಪತ್ರಿಕೆಯ ಸಹಾಯಕ ಸಂಪಾದಕರಾಗಿ ಹಾಗೂ ಹಿಮ್ಮತ್ ವೀಕ್ಲಿ ಆಂಗ್ಲ ವಾರಪತ್ರಿಕೆಯಲ್ಲಿ ಸೇವೆ ಸಲ್ಲಿಸಿದ್ದಾರೆ. ಅಮೆರಿಕ ಸಂಯುಕ್ತ ಸಂಸ್ಥಾನದ ಮೂಲಕ ಸ್ಟಾನ್ ಫೋರ್ಡ್ ವಿಶ್ವವಿದ್ಯಾನಿಲಯದಿಂದ ವೃತ್ತಿಪತ್ರಿಕೋದ್ಯಮದ ಫೆಲೋಶಿಪ್ ಪಡೆದಿರುವ ಶ್ರೀಮತಿ ಕಲ್ಪನಾ ಶರ್ಮ ಅವರು ಹಲವಾರು ಸಂಘ ಸಂಸ್ಥೆಗಳ ಸಲಹಾ ಸದಸ್ಯರಾಗಿ, ಪ್ರವರ್ತಕಿಯಾಗಿ, ಕೌನ್ಸಿಲರಾಗಿ, ಕಾರ್ಯನಿರ್ವಾಹಕ ಸದಸ್ಯರಾಗಿ ಸೇವೆ ಸಲ್ಲಿಸಿದ್ದಾರೆ.
ಉತ್ತಮ ವರದಿಗಳನ್ನು ನೀಡಿ ಸಮಾಜದ ಅನ್ಯಾಯಗಳನ್ನು ಬಯಲಿಗೆಳೆಯುತ್ತಿರುವ ಪತ್ರಿಕೋದ್ಯಮಿ ಶ್ರೀಮತಿ ಕಲ್ಪನಾ ಶರ್ಮ ಅವರು.
Categories
