ಶ್ರೀ ನರಸಿಂಹಯ್ಯ

ನಿವೃತ್ತ ಪೊಲೀಸ್ ಇನ್ಸ್ಪೆಕ್ಟರ್ ನರಸಿಂಹಯ್ಯ ಅವರು ಪೊಲೀಸ್ ಕ್ರೀಡಾಪಟುವಾಗಿ ಸೇವೆಸಲ್ಲಿಸಿದವರು. ಕ್ರೀಡಾಂಗಣದಲ್ಲಿ ಇಲಾಖೆಯ ಗೌರವ ಹೆಚ್ಚಿಸಿದವರು.
ಬೆಂಗಳೂರಿನವರಾದ ನರಸಿಂಹಯ್ಯ ಅವರಿಗೆ ಬಾಲ್ಯದಿಂದಲೂ ಕ್ರೀಡಾಸಕ್ತಿ ಅಪಾರ. ೧೯೬೮ರಲ್ಲಿ ರಾಜ್ಯ ಪೊಲೀಸ್ ಇಲಾಖೆಗೆ ಸೇರ್ಪಡೆಗೊಂಡ ಮೇಲೆ ನೂರ್ಮಡಿಗೊಂಡ ಕ್ರೀಡಾಪ್ರೇಮ. ಇಲಾಖೆಯಲ್ಲಿ ಸೇವೆ ಸಲ್ಲಿಸುತ್ತಲೇ ಇಲಾಖಾ ಕ್ರೀಡಾಚಟುವಟಿಕೆಗಳಲ್ಲಿ ತೊಡಗಿಕೊಂಡವರು. ಪೊಲೀಸ್ ಇಲಾಖೆಯ ರಾಜ್ಯ ಮತ್ತು ಅಂತಾರಾಜ್ಯ ಅಥ್ಲೆಟಿಕ್ಸ್ ವಿಭಾಗದಲ್ಲಿ ೩೪ ಬಾರಿ ಪ್ರಥಮ ಸ್ಥಾನ, ೧೧ ಬಾರಿ ದ್ವಿತೀಯ ಸ್ಥಾನ, ೮ ವರ್ಷಗಳ ಕಾಲ ವೈಯಕ್ತಿಕ ಚಾಂಪಿಯನ್, ಹತ್ತು ವರ್ಷಗಳ ಕಾಲ ಆಲ್ ಇಂಡಿಯಾ ಪೊಲೀಸ್ ಸ್ಪೋಟ್ಸ್ಗೆ ಆಯ್ಕೆ ಮುಂತಾದ ಮಹತ್ವದ ಸಾಧನೆಗೈದವರು, ಇಲಾಖಾ ಸೇವೆ ಮತ್ತು ಕ್ರೀಡಾಸಾಧನೆಗೆ ಮುಖ್ಯಮಂತ್ರಿಗಳ ಪದಕ, ರಾಷ್ಟ್ರಪತಿಗಳ ಶ್ಲಾಘನೀಯ ಸೇವಾಪದಕ ಪಡೆದವರು, ನಾಡಪ್ರಭು ಕೆಂಪೇಗೌಡ ಪ್ರಶಸ್ತಿಗೂ ಭಾಜನರು.