ಷೋಡಷಿ : ಕರೆಯುವನು ಬಾರೆ, ಸಖಿ!

ಕರೆಯುವನು ಬಾರೆ, ಸಖಿ, ಗೋಪ ಸುರುಚಿರ,
ಹರುಷದಿ ನಲಿಯುತ ಒಲುಮೆಯ ತೋರುತ!

ಗಹನ ಕುಸುಮ ಸರವ ಧರಿಸಿ ಲೀಲೆ ತೋರುತ
ಇಹಪರಗಳನಾಲಿಂಗಿಸುತೊಂದೆ ಕರದಲಿ!

ಎಲರು ಕುಸುಮಗಳಲಿ ನಲಿವ ತೆರದಿ ಎನ್ನ ಹೃದಯದಿ
ನಲಿಯುತಿಹನು, ನಲಿಯುತಿಹನು, ನಲಿಯುತಿರುವನು!

ನೀಲಗಗನಹಾಸದಿಂದ ಮೋಹಿಸಿರುವೆನು;
ಪೋಗುವೆನು, ಪೋಗುವೆನು, ಪೋಗುವೆನು ನಾ!

ಮೇಘರಹಿತ ನೀಲನಭದ ದಿವ್ಯಪಥದಲಿ
ನಲಿನಲಿದು ತೇಲಿಬಹ ಸೋಮನಂದದಿ!

ಮೃತ್ಯುತಾಳದಿಂದ ನಲಿವ ಜನ್ಮಗಾನ ಹಾಡುತ
ಸಾಂತತೆಗೆ ನಾಂತತೆಯನಿರದೆ ಮೋಹಪಡಿಸುತ!