ಚಿತ್ರಾ ವೇಣುಗೋಪಾಲ್

ಕರ್ನಾಟಕದ ಅಗ್ರಮಾನ್ಯ ಕಥಕ್ ನರ್ತಕಿಯರಲ್ಲಿ ಒಬ್ಬರಾದ ಚಿತ್ರಾ ವೇಣುಗೋಪಾಲ್ ಹೆಸರಾಂತ ಕಥಕ್ ನೃತ್ಯಪಟು ಮಾಯಾರಾವ್ ಅವರಿಂದ ಶಿಕ್ಷಣ ಪಡೆವರು. ನಾಟ್ಯ ಸರಸ್ವತಿ ನೃತ್ಯಶಾಲೆಯಲ್ಲಿ ಶಿಕ್ಷಕಿಯಾಗಿದ್ದ ಚಿತ್ರಾ ಅವರು ಶಂಭು ಮಹಾರಾಜರಿಂದ ಕಥಕ್ ನೃತ್ಯದಲ್ಲಿ ಹೆಚ್ಚಿನ ತರಬೇತಿ ಪಡೆದರಲ್ಲದೆ ಡಾಗರ್ ಸಹೋದರರಿಂದ ಸಂಗೀತಾಭ್ಯಾಸವನ್ನೂ ಮಾಡಿದರು.
ಕಥಕ್ ನೃತ್ಯ ಕಾರ್ಯಕ್ರಮಗಳನ್ನು ದೇಶ ವಿದೇಶಗಳಲ್ಲಿ ನೀಡಿರುವ ಚಿತ್ರಾ ವೇಣುಗೋಪಾಲ್ ಅವರಿಗೆ ಸಂಗೀತ ನೃತ್ಯ ಅಕಾಡೆಮಿಯ ಪ್ರಶಸ್ತಿಯೂ ಸೇರಿದಂತೆ ಹಲವು ಗೌರವ ಪುರಸ್ಕಾರಗಳು ಲಭಿಸಿವೆ.