ವೈಜ್ಞಾನಿಕ ಹೆಸರು: ಆಲ್ಬೀಜಿಯಾ ಖೈನೆನ್ಸಿಸ್‌ (Syn: ಸ್ಟಿಪುಲೇಟ)
ಕುಟುಂಬ: ಫೇಬೇಸಿ
ಇದು ಸುಂದರವಾದ ಬೇಗ ಬೆಳೆಯುವ ದೊಡ್ಡ ಮರ. ಸಾಧಾರಣವಾಗಿ ಇದರ ಎತ್ತರ ೧೮-೩೦ ಮೀ. ಮತ್ತು ಘೇರಿ ೧.೮-೨.೦ ಮೀ. ಇದನ್ನು ಪಶ್ಚಿಮ ಘಟ್ಟದ ನಿತ್ಯಹಸುರು ಕಾಡುಗಳಲ್ಲಿ ಕಾಣಬಹುದು. ಇದು ಎಲೆ ಉದುರುವ ಮರ.
ಇದು ದ್ವಿಗರಿಯ ಸಂಯುಕ್ತ ಎಲೆಗಳನ್ನು ಹೊಂದಿರುತ್ತದೆ. ಇದರ ಹೂಗಳು ಸುವಾಸನೆಯವು. ಆದರೆ ತೊಟ್ಟಿಲ್ಲದವು. ಹೂಗಳ ಬಣ್ಣ ಹಳದಿ-ಬಿಳುಪು, ಸ್ವಲ್ಪ ಕೆಂಪು ಛಾಯೆಯನ್ನು ಹೊಂದಿರುತ್ತವೆ. ಹೂಗಳನ್ನು ಏಪ್ರಿಲ್‌ನಿಂದ ಜೂನ್‌ವರೆಗೂ, ಫಲಗಳನ್ನ ಉ ನವೆಂಬರಿಂದ ಜನವರಿವರೆಗೂ ಕಾಣಬಹುದು. ಜನವರಿ ತಿಂಗಳಲ್ಲಿ ಫಲಗಳನ್ನು ಮರದಿಂದ ಕಿತ್ತು ಒಣಗಿಸಿ ಬೀಜಗಳನ್ನು ಪಡೆಯಬಹುದು. ಅವುಗಳನ್ನು ಎರಡು ದಿನಗಳು ಬಿಸಿಲಿನಲ್ಲಿ ಒಣಗಿಸಿ ಸುಮಾರು ಒಂದು ವರ್ಷದವರೆಗೆ ಉಗ್ರಾಣದಲ್ಲಿ ಕೆಡದೆ ಇಡಬಹುದು.
ಪುನರುತ್ಪತ್ತಿ: ಈ ಮರವನ್ನು ಈ ಕೆಳಗಿನ ಮೂರು ವಿಧಾನಗಳಿಂದ ಬೆಳೆಸಬಹುದು:
೧. ಬೀಜ ಬಿತ್ತುವುದರಿಂದ.
೨. ಸಸಿಗಳನ್ನು ನೆಡುವುದರಿಂದ.
೩. ಎರಡು ವರ್ಷದ ಸಸಿಗಳಲಿಂದ ತಯಾರಿಸಿದ ಸ್ಟಂಪುಗಳನ್ನು ನೆಡುವುದರಿಂದ.
ಉಪಯೋಗಗಳು: ಇದರ ದಾರುವಿನಿಂದ ಬಾಚಣಿಗೆ, ಸೌಟು, ಪೆಟ್ಟಿಗೆ, ರೈತರ ಮುಟ್ಟುಗಳು, ಪೀಠೋಪಕರಣಗಳನ್ನು ತಯಾರಿಸುತ್ತಾರೆ. ಇದರ ಎಲೆಗಳು ಜಾನುವಾರುಗಳ ಮೇವು. ಈ ಮರವನ್ನು ಚಹಾ ತೋಟಗಳಲ್ಲಿ ನೆರಳಿಗಾಗಿ ಕೆಲವರು ಬೆಳಸುತ್ತಾರೆ. ಮರಗಳ ಮತ್ತು ಕೆಲವು ಪೊದರುಗಳ ಕೆಳಗೆ ಪುರಲೆಗಳು ಆಗಾಗ್ಗೆ ಬೀಳುತ್ತಿರುತ್ತವೆ. ಅವುಗಳನ್ನು ಸಂಗ್ರಹಿಸಿ ಪುರಲೆ ಸೌದೆಯಾಗಿ ಉಪಯೋಗಿಸುತ್ತಾರೆ. ಅಷ್ಟೇ ಅಲ್ಲದೆ ಮರಗಳು ಮತ್ತು ಕೆಲವು ಹೊದರುಗಳು ಒಣಗಿ ಸತ್ತಮೇಲೆ ದಪ್ಪ ಸೌದೆಯೂ ಸಿಗುತ್ತದೆ.
ಟಿಪ್ಪಣಿ ಮಾಡಿ