ಪ್ರೊ. ಡಿ.ಎ. ಶಂಕರ್

Home/Birthday/ಪ್ರೊ. ಡಿ.ಎ. ಶಂಕರ್
Loading Events

೧೫.೦೫.೧೯೩೭ ಕನ್ನಡ ಸಾಹಿತ್ಯಕ್ಷೇತ್ರದಲ್ಲಿ ವಿಮರ್ಶಕರಾಗಿ, ಕವಿಯಾಗಿ, ನಾಟಕಕಾರರಾಗಿ, ಇಂಗ್ಲಿಷ್‌ನಿಂದ ಕನ್ನಡಕ್ಕೆ ಕನ್ನಡದಿಂದ ಇಂಗ್ಲಿಷ್‌ಗೆ ಅನುವಾದಕರಾಗಿ ಪ್ರಸಿದ್ಧರಾಗಿರುವ ಶಂಕರ್‌ರವರು ಹುಟ್ಟಿದ್ದು ಶಿವಮೊಗ್ಗ ಜಿಲ್ಲೆಯ ತೀರ್ಥಹಳ್ಳಿಯಲ್ಲಿ. ತಂದೆ ಡಿ. ಆಶ್ವತ್ಥ ನಾರಾಯಣರಾವ್, ತಾಯಿ ಲಕ್ಷ್ಮೀದೇವಮ್ಮ  ಸದ್ವಿದ್ಯಾ ಪಾಠಶಾಲೆ, ಶಾರದಾ ವಿಲಾಸ ಹೈಸ್ಕೂಲು, ಮಹಾರಾಜ ಕಾಲೇಜು ಮುಂತಾದೆಡೆಗಳಲ್ಲಿ ವಿದ್ಯಾಭ್ಯಾಸ. ಮೈಸೂರು ವಿಶ್ವವಿದ್ಯಾಲಯದಿಂದ ಎಂ.ಎ. (ಇಂಗ್ಲಿಷ್), ಇಂಗ್ಲೆಂಡ್‌ನ ಷೆಫೀಲ್ಡ್ ವಿಶ್ವವಿದ್ಯಾಲಯಕ್ಕೆ ಸಂಶೋಧನ ಪ್ರಬಂಧ ಮಂಡಿಸಿ ಎಂ.ಎ ಪದವಿ ಹಾಗೂ ಮೈಸೂರು ವಿಶ್ವವಿದ್ಯಾಲಯಕ್ಕೆ ‘ಅಮೆರಿಕನ್‌ ಇಂಗ್ಲಿಷ್ ಸಾಹಿತ್ಯ’ ಪ್ರೌಢ ಪ್ರಬಂಧ ಮಂಡಿಸಿ ಪಡೆದ ಪಿಎಚ್.ಡಿ. ಪದವಿ. ಮೈಸೂರು ವಿಶ್ವವಿದ್ಯಾಲಯದಲ್ಲಿನ ಇಂಗ್ಲಿಷ್ ವಿಭಾಗದ ಸ್ನಾತಕೋತ್ತರ ತರಗತಿಗಳ ಪ್ರಾಧ್ಯಾಪಕರಾಗಿ ನಿವೃತ್ತಿ. ನಿವೃತ್ತಿಯ ನಂತರ ಇಂಗ್ಲಿಷ್ ವಿಭಾಗದ ಮೊಟ್ಟಮೊದಲ ಎಮರಿಟಸ್ ಪ್ರೊಫೆಸರ್ ಆಗಿ ನೇಮಕ. ನಂತರ ಮಂಗಳೂರು ವಿಶ್ವವಿದ್ಯಾಲಯ ಮತ್ತು ಪಾಂಡಿಚೆರಿ ವಿಶ್ವವಿದ್ಯಾಲಯಗಳ ಸಂದರ್ಶಕ ಪ್ರಾಧ್ಯಾಪಕರಾಗಿ ಕೆಲಕಾಲ. ಇವಲ್ಲದೆ ಯು.ಜಿ.ಸಿ ರಿಸರ್ಚ್‌ಫೆಲೊ ಆಗಿ, ಬ್ರಿಟಿಷ್ ಕೌನ್ಸಿಲ್ ಸ್ಕಾಲರ್ ಆಗಿ, ಸ್ಕಾಲರ್ – ಇನ್ – ರೆಸಿಡೆನ್ಸ್ ಹೈದರಾಬಾದ್ (ಎರಡು ಬಾರಿ), ಕೆನೆಡದ ಬ್ರಿಟಿಷ್ ಕೊಲಂಬಿಯಾದ ವಿಶ್ವವಿದ್ಯಾಲಯದ ಶಾಸ್ತ್ರಿ ಇಂಡೋ ಕೆನೆಡಿಯನ್ ಫೆಲೊ, ಬ್ರಿಟಿಷ್ ಕೌನ್ಸಿಲ್ ವಿಸಿಟರ್, ಸಿಮ್ಲಾದ ಇಂಡಿಯನ್ ಇನಸ್ಟಿಟ್ಯೂಟ್ ಆಫ್ ಅಡ್ವಾನ್ಸ್‌ಡ್ ಸ್ಟಡೀಸ್ ಫೆಲೊ ಆಗಿ ನಿರ್ವಹಿಸಿದ ಕಾರ‍್ಯ ಗೌರವಗಳು. ವೃತ್ತಿಯಿಂದ ಪ್ರಾಧ್ಯಾಪಕರಾದರೂ ಪ್ರವೃತ್ತಿಯಿಂದ ಕವಿಯಾಗಿ, ನಾಟಕಕಾರಾಗಿ, ವಿಮರ್ಶಕರಾಗಿ, ಭಾಷಾಂತರಕಾರರಾಗಿ ಹಲವಾರು ಕೃತಿಗಳನ್ನು ರಚಿಸಿದ್ದಾರೆ. ಸಾಹಿತ್ಯಾರಾಧನೆ ತಂದೆಯಿಂದ ಬಂದ ಬಳುವಳಿ. ತಂದೆಯು ಪುಸ್ತಕ ಪ್ರೇಮಿಯಾಗಿದ್ದು ಅವರ ಇಂಗ್ಲಿಷ್ – ಸಂಸ್ಕೃತ ಭಾಷಾ ಪ್ರೌಢಿಮೆಯಿಂದ ಪಡೆದ ಪ್ರೇರಣೆ. ಇವರ ಪ್ರಮುಖ ಕಾವ್ಯ ಕೃತಿಗಳೆಂದರೆ ‘ನಿಮ್ಮಲ್ಲೊಬ್ಬ’, ‘ಪವಾಡ’, ಹಾಗೂ ‘ಬೆಳಕಿನ ಮರ’. ಮಹತ್ವದ ವಿಷಯಗಳನ್ನು ತವಕವಿರದೆ ನಿರೂಪಿಸುವ, ಕ್ರಿಯಾಶೀಲ,  ಅರ್ಥಪೂರ್ಣ ಕವನಗಳು ಶಾಂತತೆಯ ಒಡಲಿನಿಂದ ಹೊಮ್ಮಿ ಬಂದಿರುವುದೇ ‘ನಿಮ್ಮಲ್ಲೊಬ್ಬ’ ಕವನ ಸಂಕಲನದ ವಿಶೇಷತೆ. ನಾಟಕ ರಚನೆಯಲ್ಲಿಯೂ ಅತಿ ಪ್ರಮುಖವಾದವುಗಳೆಂದರೆ ಕರಿಭಂಟ ಮತ್ತು ಇತರ ನಾಟಕಗಳು; ಮುದ್ದುರಾಜರುಗಳ ಪ್ರಸಂಗ ಎಂಬ ಪ್ರಹಸನವು; ಹೈದರಾಲಿ, ಟಿಪ್ಪುಸುಲ್ತಾನ್, ಕಾರುಣ್ಯ ಮೂರ್ತಿ ಭಗವಾನ್ ಬುದ್ಧ ಮುಂತಾದವುಗಳು. ದಕ್ಷಿಣ ಕನ್ನಡ ಜಿಲ್ಲೆಯ ಯಕ್ಷಗಾನ ಪ್ರಸಂಗ ಒಂದನ್ನು ಐತಿಹಾಸಿಕ ವ್ಯಕ್ತಿಯಾಗಿ ಚಿತ್ರಿಸಿ ಜಾನಪದ ಚೌಕಟ್ಟಿನಿಂದ ಆಧುನಿಕ ರಂಗಭೂಮಿಗೆ ಹೊಂದಿಸಿ ಬರೆದ ನಾಟಕ ‘ಕರಿಭಂಟ’. ಹೈದರಾಲಿಯು ಮೈಸೂರು ಸೈನ್ಯಸೇರಿದಾಗ ಅರಸರಾಗಿದ್ದ ಇಮ್ಮಡಿ ಕೃಷ್ಣರಾಜ ಒಡೆಯರ ದಳವಾಯಿಯಾಗಿದ್ದ ನಂಜರಾಜಯ್ಯನು ಸರ್ವಾಧಿಕಾರಿಯಾಗಿ ಮೆರೆಯುತ್ತಿದ್ದುದನ್ನು ಕಡೆಗಾಣಿಸಲು ಹೈದರಾಲಿಯು ನಡೆಸುವ ತಂತ್ರ – ಪತಿತಂತ್ರ, ಒತ್ತಡ – ಪ್ರತಿಒತ್ತಡ, ಕುಟಿಲ ಕಾರ‍್ಯಾಸ್ಥಾನಗಳನ್ನು ಬಯಲಿಗೆಳೆಯುವ ನಾಟಕ ‘ಹೈದರಾಲಿ’. ಕೈತಪ್ಪಿ ಹೋಗಿದ್ದ ಮೈಸೂರು ರಾಜ್ಯವನ್ನು ಮರಳಿ ಪಡೆಯಲು ಮಹಾರಾಣಿ ಲಕ್ಷ್ಮಮ್ಮಣ್ಣಿಯವರ ಪ್ರಯತ್ನ, ಫ್ರೆಂಚರ ನೆರವಿನಿಂದ ಇಂಗ್ಲಿಷರನ್ನು ಓಡಿಸುವ ಹುನ್ನಾರ ನಡೆಸುವ ಟಿಪ್ಪು, ಚತುರ ವ್ಯವಹಾರಿ ದಿವಾನ್ ಪೂರ್ಣಯ್ಯ ಮುಂತಾದವರುಗಳ ಅಮೋಘ ಪಾತ್ರ ಚಿತ್ರಣದ ‘ಟಿಪ್ಪೂಸುಲ್ತಾನ್’ ವಿಶಿಷ್ಟ ನಾಟಕ. ಸೃಜನ ಶೀಲತೆಯಷ್ಟೇ ಭಾಷಾಂತರದಲ್ಲೂ ಪರಿಣತಿ ಪಡೆದಿರುವ ಶಂಕರ್‌ರವರು ತೇಜಸ್ವಿಯವರ ಕರ್ವಾಲೊ (CARVALHO), ಕುಬಿ ಮತ್ತು ಇಯಾಲ (KUBI AND IYALA SELECTED SHORT STORIES, Ed. G.S.AMUR), ಯು.ಆರ್. ಅನಂತಮೂರ್ತಿಯವರ  ಆಕಾಶ ಮತ್ತು ಬೆಕ್ಕು (THE SKY AND THE CAT) ಮತ್ತು ಕ್ಲಿಪ್ ಜಾಯಿಂಟ್,  ಎಸ. ಎಲ್. ಭೈರಪ್ಪನವರ ಸಾಕ್ಷಿ (THE WITNESS),  ಚದುರಂಗರವರ ವೈಶಾಖ (UNDER THE TROPICAL SUN), ವೈದೇಹಿಯವರ  SOLILOQUIES OF SAUGANDHI IN CONTEMPORARY INDIAN SHORT STORIES (Ed. SHANTINATH DESAI), ಕನಕದಾಸರ ಆಯ್ದ ಕೃತಿಗಳನ್ನು (ರಾಮಧಾನ್ಯ ಚರಿತೆ, ಕೀರ್ತನೆಗಳು, ನಳ ಚರಿತ್ರೆ) ‘ಗೋಲ್ಡನ್ ಫ್ಲಾಶ್’ ಎಂಬ ಹೆಸರಿನಿಂದ ಅನುವಾದಿಸಿ ಪಾಶ್ಚಾತ್ಯರಿಗೆ ಕನ್ನಡ ಸಾಹಿತ್ಯವನ್ನು ಪರಿಚಯಿಸಿದ್ದಾರೆ. ಇಂಗ್ಲಿಷ್‌ನಿಂದ ಕನ್ನಡಕ್ಕೆ ತಂದವುಗಳಲ್ಲಿ ಆಲ್ಬರ‍್ಟ ಕಾಮುನ ದಿ ಜಾಬ್ ಸೈಡರ್ ‘ಅನ್ಯ’ ಆಗಿ, ಮುಲ್ಕರಾಜ್ ಆನಂದರ ಅನ್ಟಚಬಲ್ ‘ಅಸ್ಪೃಶ್ಯ’ ಆಗಿ ಫ್ರೆಂಚ್ ಲೇಖಕ ವಾಲ್ಟೇರ್‌ನ ಪ್ರಸಿದ್ಧ ಕಾದಂಬರಿ ‘ಕಾಂಡೀಡ್’, ಕಾಮುನ ಕಾಲಿಗುಲ ಅಂಡ್ ಕ್ರಾಸ್ ಪರ‍್ಪಸ್ ಕೃತಿಯು ‘ಕಾಲಿಗುಲ ಮತ್ತು ತಪ್ಪಿದ ಎಳೆ’ ಯಾಗಿ ಕನ್ನಡಕ್ಕೆ ಭಾಷಾಂತರಗೊಂಡ ಪ್ರಮುಖ ಕೃತಿಗಳಾಗಿವೆ. ಇವಲ್ಲದೆ ‘ಪುರುಷ ಪರೀಕ್ಷೆ’, ‘ಜೈನ ಕಥಾಕೋಶ’, ‘ಕೂಲಿ’ ಮುಂತಾದವುಗಳನ್ನು ಕನ್ನಡಕ್ಕೆ ಅನುವಾದಿಸಿದ್ದಾರೆ. ಅಡಿಗರ ಉದ್ವಿಗ್ನ ಗದ್ಯ ಕುರಿತು, ಭೈರಪ್ಪನವರ ‘ದಾಟು’, ಕೃಷ್ಣ ಆಲನಹಳ್ಳಿಯವರ ‘ತಪ್ತ’, ಅನಂತಮೂರ್ತಿಯವರ ‘ಭಾರತೀಪುರ’ ಮುಂತಾದ ಕೃತಿಗಳ ಮೇಲೆ ಮಾಡಿದ ವಿಮರ್ಶೆಗಳು ವಾದ- ವಿವಾದ – ಸಂವಾದಗಳನ್ನು ಸೃಷ್ಟಿಸಿದ್ದರ ಫಲವಾಗಿ ರಚಿತವಾದ ವಿಮರ್ಶಾ ಕೃತಿಗಳು ನಿರ್ವಹಣೆ (೧೯೭೬), ವಸ್ತುವಿನ್ಯಾಸ (೧೯೮೪) ಮತ್ತು ಅನುಕ್ರಮ (೨೦೦೭) ಮುಂತಾದವುಗಳು. ರಮಣ ಮಹರ್ಷಿಗಳ ತಾತ್ವಿಕ ಚಿಂತನೆಗಳು ಪಂಡಿತ ಪಾಮರರಿಗೆ ಅರ್ಥವಾಗುವಂತೆ ರಚಿಸಿರುವ ಕೃತಿ ‘ಭಗವಾನ್ ಶ್ರೀ ರಮಣ ವಚನಾಮೃತ’. ಇವರ ಸಮರ್ಥ ಭಾಷಾಂತರ, ಸೃಜನಶಿಲತೆಯನ್ನು ಪರಿಗಣಿಸಿ ‘ಗೋಲ್ಡನ್ ಫ್ಲಾಕ್’ ಗಾಗಿ ಅನುವಾದ ಸಾಹಿತ್ಯ ಅಕಾಡಮಿ ಪ್ರಶಸ್ತಿ (೨೦೦೮), ದಲಿತರ ಚಿತ್ರಣದ ಬದುಕಿನ ‘ಕೂಲಿ’ಗಾಗಿ ಕರ್ನಾಟಕ ಸಾಹಿತ್ಯ ಅಕಾಡಮಿ ಪುಸ್ತಕ ಬಹುಮಾನ, ಟಿಪ್ಪೂಸುಲ್ತಾನ್ ನಾಟಕಕ್ಕೆ ನಾಟಕ ಅಕಾಡಮಿ ಪುರಸ್ಕಾರ (೨೦೧೧), ಕರ್ನಾಟಕ ರಾಜ್ಯ ಪ್ರಶಸ್ತಿ (೨೦೧೦) ಮತ್ತು ಜೀವಮಾನದ ಸಾಧನೆಗಾಗಿ ಕಾಂತಾವರ ಸಾಹಿತ್ಯ ಪುರಸ್ಕಾರ (೨೦೧೨) ಮುಂತಾದ ಗೌರವಗಳು ದೊರೆತಿವೆ.

ಸಂಪರ್ಕ ಮಾಹಿತಿ

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ
ಇ-ಕನ್ನಡ ವಿಭಾಗ
ಮೊದಲನೆಯ ಮಹಡಿ, ಕನ್ನಡ ಭವನ
ಜಯಚಾಮರಾಜೇಂದ್ರ ಒಡೆಯರ್ ರಸ್ತೆ
ಬೆಂಗಳೂರು- ೫೬೦ ೦೦೨

Phone: ೦೮೦-೨೨೨೨೭೪೭೮

Fax: ೦೮೦-೨೨೨೧೪೩೭೯

Web: http://www.kanaja.karnataka.gov.in

ಕಣಜ – ಅಂತರಜಾಲ ಕನ್ನಡ ಜ್ಞಾನಕೋಶ

ಕಣಜವು ಕರ್ನಾಟಕ ಸರ್ಕಾರದ ಕರ್ನಾಟಕ ಜ್ಞಾನ ಆಯೋಗದ ಪರಿಕಲ್ಪನೆಯಂತೆ ರೂಪಿಸಿ, ಪ್ರಸಕ್ತ ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಜಾರಿಗೊಳಿಸುತ್ತಿರುವ ಅಂತರಜಾಲ ಕನ್ನಡ ಜ್ಞಾನಕೋಶವಾಗಿದೆ. ಎಲ್ಲ ಬಗೆಯ ಜ್ಞಾನ ಸಾಹಿತ್ಯವನ್ನೂ ಕಲಿಕೆಗಾಗಿ ಕನ್ನಡದಲ್ಲಿ ಸಾರ್ವಜನಿಕರಿಗೆ ನೀಡುವುದು ಯೋಜನೆಯ ಉದ್ದೇಶವಾಗಿದೆ.
‘ಕಣಜದಲ್ಲಿ ನೀವೂ ಬರೆಯಬಹುದು. ಈ ಲೇಖನಗಳ ಹಕ್ಕುಸ್ವಾಮ್ಯದ ವಿವರಕ್ಕಾಗಿ ಈ ಕೊಂಡಿಗೆ ಬನ್ನಿ.

ಇತ್ತೀಚಿನ ಕೃತಿಗಳು

Go to Top