ಶಾಲಾ ದಿನಗಳಲ್ಲಿಯೇ ನೃತ್ಯ ಶಿಕ್ಷಣವನ್ನು ಆರಂಭಿಸಿ ನಂತರ ಭರತನಾಟ್ಯದಲ್ಲಿ ಉನ್ನತ ಶಿಕ್ಷಣವನ್ನೂ ಪಡೆದ ಉಲ್ಲಾಳ ಮೋಹನಕುಮಾರ್ ನೃತ್ಯಕ್ಕಾಗಿಯೇ ಕಟ್ಟಿದ ಸಂಸ್ಥೆಯೊಂದರ ಸಕ್ರಿಯ ಸದಸ್ಯರಾಗಿ ನೃತ್ಯ ಕಲಿಸುವ ಕಾಯಕದಲ್ಲಿ ತೊಡಗಿದರು.ಇವರ ಶಿಷ್ಯವೃಂದ ದೇಶವಿದೇಶಗಳಲ್ಲಿ ನೆಲೆಸಿದ್ದು ನೃತ್ಯ ಪ್ರಸಾರದಲ್ಲಿ ನಿರತರಾಗಿದ್ದಾರೆ.
ಅನೇಕ ಪೌರಾಣಿಕ ಹಾಗೂ ಧಾರ್ಮಿಕ ನೃತ್ಯ ರೂಪಕಗಳನ್ನು ನಿರ್ದೇಶಿಸಿರುವ ಮೋಹನಕುಮಾರ್ ಅವರು ತುಳು ಭಾಷೆಯಲ್ಲಿಯೂ ನೃತ್ಯ ರೂಪಕ ಸಂಯೋಜಿಸಿ ಹೊಸ ಪ್ರಯೋಗಕ್ಕೆ ನಾಂದಿ ಹಾಡಿದ್ದಾರೆ. ರಾಜ್ಯಮಟ್ಟದ ನೃತ್ಯ ಪರೀಕ್ಷೆಗಳಿಗೆ ಪರೀಕ್ಷಕರಾಗಿ ಇದ್ದ ಮೋಹನಕುಮಾರ್ ಅವರು ಸಾಕ್ಷ್ಯಚಿತ್ರಗಳಿಗೆ ನಾಟ್ಯ ಸಂಯೋಜನೆ ಮಾಡಿದ್ದಾರೆ. ಇವರಿಗೆ ಪ್ರತಿಷ್ಟಿತ ನಾಟ್ಯರಾಣಿ ಶಾಂತಲಾ ಪ್ರಶಸ್ತಿಯೂ ಸೇರಿದಂತೆ ಹಲವು ಪ್ರಶಸ್ತಿಗಳು ಲಭಿಸಿವೆ.
