ಕಾಖಂಡಕಿ ಶ್ರೀಕೃಷ್ಣದಾಸರು – Page 2 – ಸಮಗ್ರ ದಾಸ ಸಾಹಿತ್ಯ

೧೬೧
ಎಂದು ಕಾಂಬೆನೆ ಯದುವರನಾ|
ತಂದು ಲೋಲಿಸೆ ಸಖಿಜಿತ ರೂಪಸ್ಮರನಾ ಪ
ಶಿರಿದೇವಿ ಪ್ರೀಯನ ಶರಣಾಶ್ರಯನಾ|
ಸರಸಿಜ ಭವ ಭವ ಮುಖರೊಡೆಯನಾ ೧
ವಿಮಲೆ ಚರಣನಾ ಕಮಲೇಕ್ಷಣನಾ|
ಶಮಿತ ದುರಿತ ಕುಲದೀನೋದ್ಧರನಾ ೨
ಹೇಮಾಂಬರನಾ ಶಾಮಸುಂದರನಾ|
ಕಾಮಿತಾರ್ಥವ ನೀವ ಕರುಣಾ ಸಾಗರನಾ ೩
ತಂದೆ ಮಹಿಪತಿಯಾ ನಂದನ ಸಾರಥಿಯಾ|
ಹೊಂದಿದವ ಕಾಂಬಾನಂದ ಮೂರಿತಿಯಾ೪

೫೨೩
ಎಚ್ಚರ ಹಿಡಿ ಮನವೇ |
ನಿಚ್ಚದಿ ಮೆಚ್ಚಿನ ಅಚ್ಚುತನಂಘ್ರಿ ಪ
ಹಾಡುತಾ ನೋಡುತಾ ನೀಡದೊಳಾಡುತಾ
ನಡೆ ನುಡಿಯೊಳು ಬಿಡ ದಡಿ ಗಡಿಗೊಮ್ಮೆ ೧
ಹೇಳುತ ಕೇಳುತ ಮೇಳದಿ ಬಾಳುತ |
ಕಳವಳದಳುಕಿನ ಡಳಮಳದೊಳಗೆ ೨
ಬಂದದ ಛಂದವಿಂದೇ ಹೊಂದು ಮುಕುಂದನೆಂದು |
ತಂದೆ ಮಹೀಪತಿ ಕಂದಗ ಬೋಧಿಸಿದ ೩

೬೮
ಎದ್ದಳೀಗಿದಕೋ ಶ್ರೀರಮಣಿ || ಎದ್ದಳೀಗಿದಕೋ ಪ
ಮುದ್ದು ಶ್ರೀ ಹರಿಯಾ ತೋಳ ತೆಕ್ಕೆಯಾನುಸಳಿ
ಶುದ್ಧ ರಾತ್ರಿಲಿ ಹರಿ ರತಿಯೊಳು ಮಲಗಿ ಅ.ಪ.
ಸರಸಿಜ ಸಖನ ಮುಂಬೆಳಗವ ಹರಿಯಲು |
ಭರದಲಿ ಹಕ್ಕಿಯು ಕಲಕಲವೆನಲು ೧
ನಾರದ ತುಂಬುರ ಮಾಡುವ ಪ್ರಾತ:|
ಸ್ಮರಣೆಯ ಗಾಯನ ಧ್ವನಿಯನು ಕೇಳಿ ೨
ಕರತಳದಲಿಯವಿಗಳನು – ವರೆಸುತಲಿ |
ತೆರೆವುತ ಮುಚ್ಚುತ ಅರೆಗಣ್ಣ ನೋಟದಿ ೩
ಬಾಯೊಳಗಿನ ತಂಬುಲವ ನುಗುಳುತ |
ಬಾಹ್ಯ ಅಧರ ವಕೆಂಪವ ನಡಗಿಸುತ ೪
ಕಿರಿಬೆಮರವ ಕೊನೆ ಯುಗುರದಿ ಹಾರಿಸಿ |
ಕುರುಳು ಗೂದಲು ಬೈತಲು ನೀಟಾಮಾಡುವ೫
ಸಡಲಿದ ಅಲರ ಮುಡಿಯಾತಿದ್ದಿ ಬಿಗಿವುತಾ |
ಒಡನೆ ಕೊರಳಾ ಭರಣವ ತಿರುಹುತಲಿ ೬
ಎಡಬಲ ಕೊಲದ ವಡ್ಯಾಣ ಸರಿಸಿ ಉಟ್ಟಾ |
ಉಡಿಗಿಯಾ ನಿರಯಾ ಮುಂದಕ ಸ್ಸಾಂವರಿಸುತ೭
ಪ್ರಕಟದಿದೋರ್ವ ಕುಚದ ನಖಕ್ಷತಗಳ |
ಯುಕುತಿಲಿ ಅಡಗಿಸಿ ಪುಟವನು ಬಿಗಿವುತ ೮
ತನ್ನನಂಬಿದ ಬಾಲರ ಹೊರಿಯಲುದಯ |
ವನ್ನು ಬೀರುತಾ ಕಮಠ ನ್ಯಾಯದಲಿ೯
ಈರೇಳು ಜಗದ ಜೀವನ ಪಡೆದ ಜನನಿ |
ಗುರುಮಹಿ ಪತಿಸುತ ಪ್ರಭುವಿನ ಅರಸಿ೧೦

೧೪೭
ಎನಗ ನೀ ಕಾಯಲಾಗದೇ|ಆಗದೇ ದೇವಾಪ
ದಶ ಜನುಮ ವಂಗೀಕರಿಸಿ ಭಕ್ತ ಅಂಬ|
ರೀಷನ ಶಾಪ ಹರಿದೆ ದೇವಾ ೧
ಗಣಿಕಾ ಅಜಮಿಳ ಶಬರಿ ಮುಖ್ಯರಾಗಿಹಾ|
ಗಣಿತರನು ಪೊರೆದೆ ದೇವಾ ೨
ಗುರುವರ ಮಹಿಪತಿ ಸುತ ಪ್ರಭು ಯನ್ನನು|
ದ್ದರಿಸುವದನರಿದ ಅರಿದೇ ದೇವಾ ೩

೪೪೫
ಎನಗಿನ್ಯಾತರ ಹಂಗೇನು |
ಘನ ಗುರು ತಾನಾದ ಶ್ರಯಧೇನು ಪ
ಸುರಲೋಕ ಪದವಿಯ ಸುಖದಿಚ್ಛೆಯಾತಕ |
ಪರಗತಿ ದಾಯಕ ದೊರಕಿರಲಿಕ್ಕೆ ೧
ರಿದ್ದಿ ಶಿದ್ದಿಗಳೆಂಬ ಮಾತಿನ ಗೊಡವಿಲ್ಲಾ |
ಸಾಧ್ಯವಾಗಿರೆ ಗುರು ಶ್ರೀ ಪಾದ ಕಮಲಾ ೨
ಹಂಬಲಿಸೆನು ಯೋಗ ಭೋಗ ಮುಕ್ತಿಯ ನಾಲಕು |
ಅಂಬುಜಾಕ್ಷನ ಸೇವೆಲಿರುವುದೇ ಸಾಕು ೩
ತಂದೆ ಮಹೀಪತಿ ಪ್ರಭು ದಯದಿಂದಲಿ |
ಕಂದಗ ವಿಶ್ರಾಂತಿ ಇದಿರಿಟ್ಟಿರಲಿ ೪

೧೪೯
ಎನ್ನ ಪಾಲಿಸೋ ಕರುಣಾಕರಾ|
ಪನ್ನಗಶಯನ ಗದಾಧರಾ ಪ
ವಸುದೇವ ನಂದನ ಹರಿಮಧುಸೂದನ|
ಅಸುರಾಂತಕ ಮುರಲೀಧರ,
ಬಿಸರುಹನಾಭ ಸರ್ವೇಶನೆ ಮುನಿ|ಮಾ
ನಸ ಸಂಚಾರ ರಮಾಧವಾ ೧
ಪರಮ ಪುರುಷ ಉರಗಾಸನ ವಾಹನಾ|
ಕರುಣಾರ್ಣವ ವಡವಾನಳಾ||
ಸರಸಿಜಭವ ಗಿರಿಜಾವಲ್ಲಭನುತ|
ವರಸುಜನಾವಳಿ ಪಾಲನಾ ೨
ಕಾವನ ಪಿತ ಮುಚಕುಂದ ವರದ ರಾ|
ಜೀವ ನಯನ ನಾರಾಯಣಾ|
ಶ್ರೀವತ್ಸಲಾಂಛನ ಗುರುಮಹೀಪತಿ ಸುತ
ಜೀವನ ಸಖ ಶ್ರೀ ಕೃಷ್ಣನೆ೩

೧೦೬
ಎನ್ನ ಪ್ರಿಯನಾ ನೀ ತಂದು ತೋರೇ ಸುಜ್ಞಾನೇ ಪ
ಕನಸಿನೊಳಗ ಕಂಡ ಪರಿಯಾರೂಪದ ದೋರಿ
ದಾವ ತೇಜಮುಸುಕಿತು ಧರಿಯೇ | ತ್ರೈ ಭುವನವ ರಕ್ಷಿಸ
ಬಂದಾ ಹರಿಯೇ | ಮುಜ್ಜೆಮರಿಯೇ ೩
ಮುಟ್ಟಿಲೀ ತಗಧನುಏಳಲಿ ಝಮ್ಮೆನೇ
ನಾವು ನೆಟ್ಟನೆಪೂಜಿಪೆವು ಗೌರಮ್ಮನೇ ಎಂದು
ಬಿಟ್ಟ ಮಗಳು ಬೇಡಿಕೊಂಡರು ಸುಮ್ಮನೇ
ಅಡಿಯಿಟ್ಟುನಲಿದು ಬರುವ ರಾಮೋ ಘಮ್ಮನೇ ಪರಬೊಮ್ಮನೆ೪
ಬಂದು ನೋಡಿಬಿಲ್ಲನೆತ್ತಿದ್ದಾಚಕ್ಕನೇ
ಅರುವಿಂದ ಲೋಚನೆ ಮಾಲಿ ಹಾಕಲು ಘಕ್ಕನೇ
ವೃಂದ ಕಾಣುತ ಹೆದರಿತುಧಕ್ಕನೇ
ನಮ್ಮ ತಂದೆ ಮಹಿಪತಿ ನಂದನ ಪ್ರಭು ಠಕ್ಕನೇ ಪಾಲಕ್ಕುನೇ ೫

೧೫೨
ಎನ್ನ ಸಲಹೋ ಚರಣವನ್ನು ದೋರಿ ಪರಮ|
ನಿನ್ನ ಕಿಂಕರನೆಂದು ಘನ್ನದಯವನು ಬೀರಿ ಎನ್ನಾ ಪ
ಶರಣ ಜನ ಮಾನ ರಕ್ಷಕನೇ
ವರಕಮಲ ಕರಕಮಲ ಪದವಿಮಲ ಮಹಿಮನೇ
ಸಕಲ ಗುಣಧಾಮ ಘನಶ್ಯಾಮ ಸುರ ರಿಪು ಮಥನ|
ಗೋಕುಲರಿ ಸೋದರಾನಂತ ಗುಣಾ ಶ್ರೀ ಹರಿ
ಭಕ್ತರ ವಸರಕೊದಗುವೆ ನೀ ಪರೋಪರಿ|
ಸುಕಲ್ಪತರು ದನುಜ ಕುಲಸಂಹಾರ
ಸರ್ವದುರಿತ ನಿವಾರಾ ೧
ಅಖಿಳ ಶೃತಿ ಸ್ರ‍ಮತಿ ನಿಕರಲಿಂದ ನುತಿಸಿಕೊಂಬೆ|
ವಿಕಸಿತನುಪಮ ವದನಬ್ಜ ಕುಲ ಅಬ್ಜರವಿ
ಪ್ರಕಟದೊಳೊದಗಿ ಬಂದೆ
ಸರಸೀರುಹ ನಯನ ಜಗದ ತಂದೇ|
ಸಿರಿನಂದ ನಂದನ ಪರಮುದಾರೇ|
ಸುರವೃಂದ ರಕ್ಷಕ ವರ ಮುರಾರೇ ೨
ಶರಣಾಗತ ಜನರ ಪಾಲಾ|
ಸಿರಿ ಉರಗಾರಿಗಮನ ಸೂರಾರಿ ಸಿಬಿಕುಲ|
ವೈರಿ ಶಯನ ಶೌರಿ ನರಸಹಕಾರಿ ಗಿರಿಧರನೇ|
ಕರುಣಾಕರ ತ್ರಯದಿ ಸ್ಮರಣ ಮಾಳ್ಪರ ಭಯವ|
ಹರಣ ಶರಣ ಕೌಸ್ತುಭಾಭರಣ ನೀಲವರಣಾನಂದ೩
ವರ ಶ್ರೀರಮಣ ದೇವ ಜಗಜೀವ ಮಹಿಪತಿ ನಂದ ನೊಡಿಯ|
ಪರಮಾನಂದ ಜೀವದೊರಿಯೇ|
ಸರಸೀರುಹ ಭವ ವಿನುತ ಮತಿ ಚರಿತಾ ಸಿಂಧೂರ|
ವರದ ನವನೀತ ಚೋರ ಜಗದೀಶ ಹರಿಯೇ೪

೧೫೦
ಎನ್ನ ಸಲಹೋ ನೀ ದಯಾಂಬುಧಿ|
ಘನಶಾಮಾ ರಾಮಾ ಪ
ವಸುದಿಜ ಲೋಲ ಸುರಮುನಿ ಪಾಲಾ|
ದಶರಥ ತನಯ ಕೃಪಾಲ೧
ದೀನೋದ್ಧಾರ ದುರಿತ ನಿವಾರಾ|
ದಾನವಕುಲ ಸಂಹಾರಾ ೨
ಸರಸಿಜನಯನಾ ಸದ್ಗುಣ ಸದಾನೆ
ಗುರು ಮಹಿಪತಿ ಸುತ ಜೀವನಾ ೩

೫೨೫
ಎನ್ನಮನವ ನಿಲಿಸೋ ಇಂದಿರೆ ಪತಿ
ಭಂಗಬಡುವ ವಿಷಯಂಗಳಿಗೆರಗದೇ
ರಂಗ ನಿನ್ನಯ ಮಂಗಳಂಗುಟರ್ಚಿಸುವಂತೆ ೧
ಉದರ ಪೋಷಣೆಗಾಗಿ ಸದೆಬಡಿಗನಾಗದೇ
ಸದಮಲ ನಿನ್ನೂಳಿಗದವನಾಗುಳಿವಂತೆ ೨
ಶರೀರ ಸಂಬಂಧಿಗಳಲ್ಲಿರುವ ಪ್ರೇಮವ ತಂದು
ಗುರು ಮಹಿಪತಿ ಪ್ರಭು ಸ್ಮರಣೆಯೊಳಿರುವಂತೆ೩

೧೫೪
ಎಮ್ಮಳವೇ ಪೊಗಳಲಮ್ಮಮ್ಮಾ
ಬೊಮ್ಮನರಿಯ ನಿಮ್ಮ ಮಹಿಮಾ ಪ
ಭೂತಳದೊಳರವು ಸಕಲ ಉಂಟೆಂದು
ಖ್ಯಾತಿಯಿಂದ ನಾನಾತೆರದಿ ಸ್ತುತಿಸೆ
ಮಾತಿಗೆ ವಿಗತ ಕಗತ ವಾಗೆ ಶೃತಿಗಳು
ನೇತಿ ನೇತಿ ತಿರುಗಿದ ಬಳಿಕಾ ೧
ಕುಸುಮನಾಭೇನನ ಸಾಮೀಪೆಂಬಾ ತವಕದಿ
ಅಸಮ ತೆರದಿ ಪೊಗಳಲು ಚರಿತಾ
ದ್ವಿಸಹಸ್ರ ಜಿವ್ಹಕ ಮೀರಿ ಪೊಗಳುತ ಅತಿ
ಕುಶಿದು ತಲೆವಾಗಿ ತಾ ನಾಚಿದ ಬಳಿಕ೨
ತರಣಿ ಕೋಟಿತೇಜ ಸ್ವರೂಪ ಜ್ಯೋತಿಯ ಅನ
ವರತ ಹೃದಯ ಮಂದಿರದೊಳಿರಿಸಿ
ಮೆರವುತ ನಿನಗತಿ ಬ್ರಯರಾದಾ ಭಕುತರಾ
ಸ್ಮರಣೆ ಯೋಗ್ಯವಲ್ಲದೆ ಮಹಿಪತಿಸುತ ಪ್ರಿಯಾ೩

೫೨೮
ಎಲ್ಲಿ ಶ್ರೀ ಗುರುವಿನ ದಯದೊಲವಿಹುದು |
ಅಲ್ಲಿ ದುರಿತ ಭಯ ಮುಟ್ಟ ಲರಿಯದು ೧
ದಿವಸಾಧಿಪನಾ ಮಂಡಲವನು ಸಾರಿಹಗ |
ಜವದಿ ಕತ್ತಲೆಯು ಮುಸುಕುವದೇನವಗ ೨
ಸಕಲ ಗಜಗಳು ಮುದದಲಿ ಒಂದಾಗಿ |
ಶಕ್ತಿ ಸಿಂಹನ ಮುಂದೆ ನಿಲ್ಲುವವೇ ಪೋಗಿ ೩
ಪ್ರತ್ಯಕ್ಷದಲಿ ಅನಳನಿಹು ಸ್ಥಳದಲಿ |
ಮತ್ತೆದೋರುದೇ ಮುಖ ಹಿಮವು ಇದಿರಲಿ ೪
ಕಂದನ ಪ್ರಿಯ ಮಹಿಪತಿಯ | ಸ್ಮರಿಸದೇ |
ಅಂಧಕನಂತೆ ಬಾಳುತಿಹಾವರಿಗಲ್ಲದೇ ೫

೪೨೮
ಏನ ಪೇಳುವೆನು ನಿನ್ನ ಮಹಿಮೆಯ
ಘನ ಶ್ರೀ ಗುರು ಅವಧೂತನೇ ಪ
ಅನಂತ ರೂಪವ ದೋರುವೆ ದತ್ತಾತ್ರೇಯ
ಸುರ ಮುನಿ ಸುತನೇಅ.ಪ
ಅಸುರನ ಕೊಂದು ವೇದವನುಳುಹಿದ ಶ್ರೀ ಮತ್ಸ್ಯನು
ನೀನೇ ಸ್ವಾಮಿ
ಅಸಮದ ಗಿರಿಯನು ಬೆನ್ನಿಲೆ ತಾಳಿದನಾ
ಕೂರ್ಮನು ನೀನೇ
ವಸುಧಿಯ ಭಯವ ನಿವಾರಣ ಮಾಡಿದನಾ
ವರಹನು ನೀನೇ
ಶಿಸುವಿನ ಗೋಸುಗ ಸ್ತಂಭದಿ ಮೂಡಿದ
ನರಸಿಂಹನು ನೀನೇ ೧
ಬಲಿಚಕ್ರನ ಮನಿ ಮುಂದಲಿ ಸುಳಿದು ನಿಂದ ವಾಮನ ನೀನೇ
ಕಲಿತನದಲಿ ಕ್ಷತ್ರೇರ ಸಂಹರಿಸಿದ ಪರಶುಧರನು ನೀನೇ
ಇಳೆಯ ಭಾರಕರಾದ ರಾವಣಾದಿಕರಾ ತರಿದ ರಾಮನು ನೀನೇ
ಫಲಗುಣನಾ ರಥ ಸಾರಥಿಯಾದಾ ಶ್ರೀ ಕೃಷ್ಣನು ನೀನೇ ೨
ತ್ರಿಪುರಕ ಹೋಗಿ ಸ್ತ್ರೀಯರ ವ್ರತವಳಿದನು ಬೌದ್ಧ
ರೂಪನು ನೀನೇ
ಚಪಲತರದ ಹಯವೇರಿ ಮೆರೆದನು ಕಲ್ಕ್ಯಾವತಾರ ನೀನೇ
ತಪನ ಶತಕೋಟಿ ಪ್ರಕಾಶವೆನಿಸುತಿಹ ಪರಬೊಮ್ಮನು ನೀನೇ
ಕೃಪೆಯಿಂದಲಿ ಸಲಹುವ ಮಹಿಪತಿ ನಂದನ ಪ್ರಭು ನೀನೇ ೩

೫೨೬
ಏನಾದರೇನು ಗುರು ಪಡದನಕಾ |
ತಾನೊಲಿಯನು ಹರಿ ಕಾವನ ಜನಕಾ ಪ
ಪರಿಪರಿಸಾಧನದಲಿ ಬಳಲುವರೆ |
ಪರಸ ಮುಟ್ಟದೆ ಲೋಹವಾಗುವದೇ ಕನಕಾ೧
ಪತಿತೋದ್ಧಾರಗುರು ಸ್ವಸುಖದಾನಿ |
ವೃತ ತಪಸಿದ್ಧಿಯ ಬಹು ಸುಖ ಕ್ಷಣಿಕಾ೨
ಗುರು ಮಹಿಪತಿಪ್ರಭು ಜ್ಞಾನಾಂಜ ನಿಡದೇ |
ಧರೆಯೊಳಾಹನೇ ನರ ಚಿದ್ಘನ ಧನಿಕಾ ೩

೧೫೩
ಏನಾದರೇನು ಗುರುದಯ ಪಡದನಕಾ|
ತಾನೊಲಿಯನು ಹರಿ ಕಾವನ ಜನಕಾ ಪ
ಪರಿ ಪರಿ ಸಾಧನದಲಿ ಬಳಲುವರೇ|
ಪರಸ ಮುಟ್ಟದ ಲೋಹವಾಗುವದೇ ಕನಕಾ ೧
ಪತೀತೋದ್ದರ ಗುರು ಸ್ವಸುಖದಾನಿ|
ವೃತ ತಪದಿ ಸಿದ್ದಿಯ ಬಹ ಸುಖ ಕ್ಷಣಿಕಾ೨
ಗುರು ಮಹಿಪತಿ ಪ್ರಭು ಜ್ಞಾನಾಂಜನಿಡದೇ|
ಧರಿಯೊಳಾಹನೇ ನರ ಚಿದ್ಬನ ಧನಿಕಾ೩

೫೨೯
ಏನಾರಿಸುವಿ ಹರಿಯೇ ಎನ್ನವಗುಣಾ
ಅನಂತಾನಂತ ತಪ್ಪು ಮಾಡಿದ ಪಾಮರೊಳೇನಾ ಪ
ಉದಯ ಉದ್ಯೋಗನೆನುವೆ ಮಧ್ಯಾಹ್ನಕ
ಕ್ಷುಧೆ ತೃಷೆಯಲ್ಲಿ ದಣಿವೆ ಇರುಳಿಗಿನ್ನು
ವದಗಿ ನಿದ್ರೆ ಯನುವೆ
ಇದರೊಳು ನಿನ್ನ ನಾಮನೆನೆಯದೆ ದಿನಗಳೆದೇನಾ ೧
ನಿನ್ನ ಕಥೆಯಾ ಕೇಳದೇ ಮಂಗಳಂಗುಟ
ಕಣ್ಣಿನೊಳಿಟ್ಟು ನೋಡದೇ ಸರ್ವಾಂಗದಿ
ಚೆನ್ನಾಗಿ ಮಾಡದೇ
ಎನ್ನ ಕಾಯವು ಸತಿಸುತರಿಗೆ ಮಾರಿದೇನಾ ೨
ಹರಿ ಭಕ್ತಿ ಮುದ್ರೆ ಧರಿಸೀ ಹೆಮ್ಮಿಲಿ
ದುರಾಚರಣೆ ಮಾಡಿದ ಕ್ಷಮಿಸೀ ಸತ್ಸಂಗದಿ
ಅರಿವಿಗೆ ಮನನೀಲಿಸೀ ಹೊರೆವದು
ಗುರು ಮಹಿಪತಿಸ್ವಾಮಿ ಕರುಣಿಸಿ ಎನ್ನಾ ೩

೧೦೩
ಏನು ಕಾರಣ ವೆನ್ನ ಮನೆಗಿಂದು ಬಾರನು |
ಮಾನಿನಿತಂದು ತೋರಮ್ಮಾ ರಂಗನ ಪ
ದೀನ ವತ್ಸಲನೆಂಬ ನಾನ್ನುಡಿ ಮಾತಿಗೆ |
ನಾನೆರೆ ಮರುಳಾದೆನಮ್ಮಾ ರಂಗಗೆ ೧
ಬಂಧು ಬಳಗದಾಶೆ ಇಂದು ಜರಿದು ತನ್ನ|
ಹೊಂದಿದೆ ಚರಣ ನೋಡಮ್ಮಾ ರಂಗನೆ ೨
ತಾನೆ ದಯಾಂಬುಧಿ ನಾನೆವೆ ಅಪರಾಧಿ |
ನ್ಯೂನಾರಿಸುವ – ರೇನಮ್ಮಾ ರಂಗನು ೩
ತನ್ನ ಹಂಬಲಿಸುವ ಕಣ್ಣಿಗೆ ಮೈದೋರಿ |
ಧನ್ಯಳ ಮಾಡನೇನಮ್ಮಾ ರಂಗನು ೪
ತಂದೆ ಮಹಿಪತಿ ನಂದನ ಸಾರಥಿ |
ಒಂದು ನೆರದಪುಣ್ಯಲೆಮ್ಮಾ ರಂಗನು೫

೧೬೩
ಏನು ಕಾರಣವಿಲ್ಲೆ ನಿಂದೇ ಅಶ್ವತ್ಥ
ಶ್ರೀ ನಾರಸಿಂಹೆನಿಸಿ ಅಜಭವರ ತಂದೇ ಪ
ಹೊರೆಯ ಲೈತರಲು ಹಂಬಲಿಪ ಪ್ರಲ್ಹಾದಿಲ್ಲ |
ದುರಿತ ಪರಿಹರಿಸಲಿಕೆ ಹಿರಣ್ಯ ಕಾಸುರನಿಲ್ಲ |
ಸುರರಿಗುಪಟಳವೇನು ಇಲ್ಲ ಸ್ತಂಭ |
ಬಿರಿದು ದೋರುವ ಅಹೋಬಲದ ಸ್ಥಳವಲ್ಲ ೧
ಸಿರಿಯ ಮೋಹನ ನಿಮ್ಮ ರೂಪವನೆ ಆವರಿಸಿ |
ಮರದ ಪೇರ್ಗಳೆಪಾದ ಕೊಂಬುಗಳ ಕರಧರಿಸಿ |
ಸಿರಸಾಗ್ರ ಮಧ್ಯುದರ ವೆರಸೀ ಪರ್ಣ|
ದಿರುವ ಅವಯವ ಮಾಡಿ ಪಾದರ್ಪೆದ್ರನಿಸೀ೨
ಧರೆಗಧಿಕ ಸುಕ್ಷೇತ್ರ ಶೂರ್ಪಾಲಯವೆ ನೋಡಿ |
ಮೆರೆಯುತಿಹ ಕೃಷ್ಣ ವೇಣಿಯ ತೀರದಲಿ ಮೂಡಿ |
ಹರಗರುಡ ಗಣಪರೋಡಗೂಡಿ ನಲಿವ |
ಗುರುಮಹಿಪತಿ ಸ್ವಾಮಿ ಕಾಯೋದಯ ಮಾಡಿ೩

೫೩೦
ಏನು ನಿನ್ನ ಹಿತವಾ ಪಡೆದ್ಕೋ ಯಲೆ ಜೀವವೇ |
ಶ್ರೀನಾಥನಂಘ್ರಿ ನಂಬಿ ಸುಖಿಸಲಾರೆಯಾ ಪ
ಶ್ವಾನ ಸೂಕರಾದಾ ನಾನಾ ಯೋನಿಯಲ್ಲಿ ತೊಳಲಿ ಬಂದು |
ಮಾನವ ಜನ್ಮ ಪುಣ್ಯದಿಂದ ಬಂದುದಾ |
ಸಾನುರಾಗದಿಂದ ಸಂತರಾನುಗ್ರಹ ಪಡೆದು ಭವ |
ಕಾನನದ ಮಾರ್ಗವನು ಜರೆಯಲಾಪೆಯಾ ೧
ಕಾಮ ಕ್ರೋಧ ಲೋಭವೆಂಬಾ ತಾಮಸದ ಬಲಿಗೆ ಸಿಲುಕಿ |
ನೇಮಗೆಟ್ಟಾ ವ್ಯರ್ಥನಾದೆ ಹರಿಯ ನಾಮವಾ |
ಪ್ರೇಮದಿಂದ ಸ್ಮರಿಸಿ ಭಕ್ತಿ ಸೀಮೆಯೊಳು ಪಡೆದು ಮುಕ್ತಿ |
ಸಾಮರಾಜ್ಯ ಪದವಿಯನು ಸಾರಲಾಪೆಯಾ ೨
ಮರದು ತನ್ನ ನಿದ್ರೆಯೊಳು ಅರಸು ರಂಕನಾಗಿವಂತೆ |
ಶರೀರ ತಾನೆಂಬ ವಿದ್ಯಾವಳಿದು ಜಾಗಿಸೀ |
ಗುರು ಮಹಿಪತಿಸ್ವಾಮಿ ಕಿರಣವೆಲ್ಲರೊಳು ಕಂಡು |
ಶರಣರಾ ವೃತ್ತಿಯೊಳು ಬರಸಲಾಪೆಯಾ ೩

*
ಏನು ಪುಣ್ಯವ ಮಾಡಿದೆನೋ ಮುನ್ನೆ |
ಧನ್ಯಗೈಸಿದ ಗುರು ಮಹೀಪತಿ ತಾನು ಪ
ವಿಜಯಗ್ಹೇಳಿದ ಹರಿ ಗೀತೆಯಲಿ |
ಸುಜನ ಸಂತರೊಳು ದುರ್ಲಭನೆನಲಿ ೧
ಎನ್ನಯ ಸಿರದಲಿ ಅಭಯಕರವಿಟ್ಟು |
ಚೆನ್ನಾಗಿ ಹೇಳಿದ ಸುಜ್ಞಾನ ಗುಟ್ಟು ೨
ಕಣ್ಣುದೆರೆಸಿ ಭಕ್ತಿ ಮಾರ್ಗದಲಿ |
ಸಣ್ಣವನೆಂದು ಚಿದ್ಭನದೋರಿಸಲಿ ೩
ಇನ್ನೊಬ್ಬರಾಶೆ ಏತಕೆ ಎನಗಿನ್ನು |
ಎನ್ನ ಹಂಬಲಿಸಿದಾಶೆಯ ಕಾಮಧೇನು ೪
ತಂದೆ ತಾಯಿ ಗುರು ಬಂಧು ಬಳಗಾಗಿ |
ಕಂದಗೊಲಿದ ನಿಂದು ತನ್ನಯ ಹೊಣೆಯಾಗಿ ೫

೫೩೧
ಏನು ಮಾಡಲಿಯನ್ನ ಮನಸಿನಟ್ಟುಳಿ ಘನ |
ನೀನೆ ನಿಲಿಸೋ ಹರಿಯೇ ದೊರೆಯೆ ಪ
ಪರಮ ಪಾವನ ನಿನ್ನ ಚರಿತವ ಕೇಳದು |
ಬರಡ ಮಾತಿಗೆ ಪ್ರೇಮಾ ನೇಮಾ ೧
ಸಿರಿವರ ಮೂರ್ತಿಯನು ನೋಡಲೊಲ್ಲದು |
ಸತಿಯರ ರೂಪಕೆಳಸುವದು ಹರಿದು ೨
ಸಂತರ ಚರಣಕೆರಗಿ ಬಿಗಿದಪ್ಪದು |
ಭ್ರಾಂತ ಜನರೊಳಗೆ ಸಂಗಾ ೩
ಹರಿಯಂದೊದರಲು ನಾಲಿಗೆ ಬಾರದು |
ಪರನಿಂದೆ ಜಪಿಸುವದು ಸರಿದು ೪
ಸಿರಿ ಚರಣಾರ್ಪಿತ ತುಲಸಿಯ ಸೇರದು |
ಪರಿಮಳದಲಿ ಬೋಗಿಲಿ ಸಾಗಿ ೫
ಗುರು ಮಹಿಪತಿ ಪ್ರಭು ನಿನ್ನೆಚ್ಚರಿದಿ ಮನ |
ವಿರಿಸಿಯನ್ನನುಳಹೋ ಸಲಹೋ ೬

೫೮೦
ಏನು ಮಾಡಿದರೇನು ನಾನಾ ಸಾಧನೆಗಳನು |
ಜ್ಞಾನಿಗಳ ಕೂಡದನಕಾ ಮರುಳೇ ಪ
ಸಕಲ ಸಾಮಗ್ರಿಯನು ತಂದಿರಲೇನು ಪಾ |
ಕಕೆ ವಹ್ನಿ ಇಲ್ಲದನಕಾ ಮರುಳಾ ೧
ಪ್ರಕಟವಾಗಿರಲು ನಯನಾದಿಂದ್ರಿಯಗಳಿಗೆ ಐಂ |
ದ್ರಿಕ ಬೆಳಗವಿಲ್ಲದನಕಾ ಮರುಳೇ ೨
ಹಸನ ಭೂಮಿಯ ಮಾಡಿ ಬೀಜ ಉಡಿಗಟ್ಟಿರಲು |
ವಸೆದು ಮಳೆಯಾಗದನಕಾ ಮರುಳೇ ೩
ಪ್ರಕಟಿಸಿದ ಅನ್ನ ಭಕ್ಷದಿ ಶಾಖಗಳಿರಲು |
ಯಶವಾಜ್ಯ ಬಡಿಸದನಕಾ ಮರುಳೇ ೪
ತುಂಬಿ ಕುಳಿತೇನು ದೊಡ್ಡವರೆಲ್ಲಾ ನಾವಿಯೊಳು |
ಅಂಬಿಗನು ಬಾರದನಕಾ ಮರುಳೇ ೫
ನಂಬಿ ಗುರು ಮಹಿಪತಿಸುತಸ್ವಾಮಿ ಶ್ರೀಚರಣ |
ದಿಂಬವನು ಪಡೆಯದನಕಾ ಮರುಳೇ ೬

೫೩೨
ಏನು ಹೇಳಿದರೇನು ಪಾಮರ ಜ್ಞಾನಿಯಾಗಬಲ್ಲನೇ |
ದಾನವಾರಿಯ ನಂಬಲರಿಯದೆ ಹೀನ ವೃತ್ತಿಲಿ
ನಡೆವ ಮನುಜಗೆ ಪ
ಎತ್ತಿಗುತ್ತಮ ಲಿಂಗ ಮುದ್ರೆಯನ್ನೊತ್ತಿದ್ದರೆ ಬಸವನೆಂಬರು |
ಕತ್ತೆಯನು ಹಿಡಿ ತಂದು ವತ್ತಲು ಕತ್ತೆಯಲ್ಲದೆ ಬಸವನಪ್ಪುದೆ ೧
ಚಿನ್ನ ಬಿಳುಪಿರೆ ಪುಟವನಿಕ್ಕಲು ಬಣ್ಣ ಹೆಚ್ಚುತ ಬಾಹುದು |
ಇನ್ನು ಕರಗಿ ಹಿತ್ತಾಳೆ ನೋಡಲು ತನ್ನ ನಿಜವನ್ನು
ಬಿಟ್ಟುದೋರುದೆ ೨
ಸ್ವಾತಿ ಜಲಬಿಂದುದುರೆ ಸಿಂಪಿನೊಳಿಂತು ಮೌಕ್ತಿಕವಾಹುದು |
ಅಂತ ಘಲ್ಲಿಯೊಳಹದೆ ಜಗದೋಳು ತಾತ ಮಹಿಪತಿ
ಕಂದ ಸಾರಿದ ೩

೫೮೩
ಏನು ಹೇಳಿದರೇನು ಹೀನ ಮನಕ |
ತಾನು ಎಚ್ಚರ ಹಿಡಿಯ ದನಕಾ ಪ
ಬೂದಿಯೊಳಗ ಹೋಮ ಮಾಡಿದಂತೆ |
ಬೋಧಾನುಗೃಹ ಕಳವದು ಮರೆತಕೆ ೧
ಹರಿ ಕೀರ್ತನೆ ಇರಲಿಲ್ಲಾ |
ಬರಡು ಮಾತಿಗೆ ಸುಖ ಪಡುದಲ್ಲಾ ೨
ಒಮ್ಮೆಯಾದರೂ ಹರಿ ಹರಿಯಂದು |
ಝಮ್ಮೆನೆವೆ ಪಶ್ಚಾತಾಪ ಬಾರದೆಂದು ೩
ಗಾಳಿಯಂತೆ ಓಡಾಡುವದು ನೋಡಿ |
ಕಾಲೂರಿ ನಿಲ್ಲದು ಮತಿಗೇಡಿ ೪
ತಂದೆ ಮಹಿಪತಿ ದಯವಾಗದನಕ |
ಒಂದು ಹಿಡಿಯದು ಸ್ವಹಿತ ವಿವೇಕಾ ೫

೪೫೧
ಏನುತ್ತೀರ್ಣಾಗುವೆನು | ಗುರುವಿಗೆ ಪ
ಜನಿತು ಪನಿತನು ವಿದ್ಯದಾಯಕನು |
ಉಣಲುಡಲೀವನು ಭಯವ ನಿವಾರಿಪನು ೧
ತನ್ನ ತಾನೊಲಿದಾ ಕರುಣವಗರದಾ |
ಚಿನುಮಯ ಸುಖದಾ ದಾರಿಯ ದೋರಿಸಿದಾ ೨
ತಂದೆ ಮಹಿಪತಿ ಸ್ವಾನಂದ ಮೂರ್ತಿಕಂದನ ಸಾರ್ಥಿ ಆಗಿಹ ಘನಕೀರ್ತಿ ೩

೧೬೪
ಏನೆಂದು ಬಣ್ಣಿಪೆ ಶ್ರೀನಾಥ ನಿನ್ನಯ
ಆನಂದ ಮಹಿಮೆಗಳಾ ಸ್ವಾಮಿ
ಆ ನಾಕು ಶೃತಿಗಳು ಮೌನವ ಹಿಡಿದವು
ಅನಿರ್ವಚನೀಯಗಳಾ ಸ್ವಾಮಿ ೧
ವಾರಿಧಿ ಪಾತ್ರೆಯು ನೀರನೆ ಮಸಿ ಮಾಡಿ
ಧಾರುಣಿ ಹಲಗೆಯಲಿ ಸ್ವಾಮಿ
ಮೇರು ಲೇಖಣಿಯಿಂದ ಶಾರದೆ ಬರೆಯಲು
ಪಾರ ಗಾಣಲಿಲ್ಲೋ ಸ್ವಾಮಿ ೨
ಉರಗೇಂದ್ರ ಸಾಸಿರ ವೆರಡ ನಾಲಿಗೆಯಿಂದ
ತೆರವಿಲ್ಲ ಹೊಗಳಲಿಕ್ಕೇ ಸ್ವಾಮಿ
ಗುರುಮಹೀಪತಿ ಸುತ ಸಾರಥಿ ನಿನ್ನದಾ
ಸರಸ್ತುತಿರತಿ ನೀಡೋಸ್ವಾಮಿ ೩

೯
ಏನೆಂದು ಬಣ್ಣಿಸುವೆನೊ ನಾನು |
ಶ್ರೀನಾಥ ಪ್ರಿಯಳಾದ ಶ್ರೀ ತುಳಸಿ ಮಹಿಮೆಯನು ಪ
ಜಲದಿ ಮಥನದಿ ಅಮೃತ ಕಲಶ ಬರೆಕಂಡು ಅತಿ |
ಜಲಜಾಂಬಕನ ಪ್ರೇಮಾಂಜಲ ಉದರಲು |
ಇಳಯೊಳದಿರಿಂದುದಿಸಿ ಬೆಳೆದು ನಿಂದಿರೆ ನೋಡಿ |
ಒಲಿದು ಕೋಮಲ ಮುಗುಳು ತಳೆದ ಶ್ರೀಹರಿ ತಾನು ೧
ಹರಿಯು ಧರಿಸಿದ ಕಂಡು ಸುರರೆಲ್ಲ ವಂದಿಸುತ |
ಶಿರದಲಾಂತರು ಪರಮ ಹರುಷದಿಂದ |
ಸಿರಿಸರಸ್ವತಿ ಗಿರಜೆ ನಿರುತ ನಿನ್ನಯ ವ್ರತದಿ |
ಧರೆಯೊಳಗೆ ತಮ್ಮ ತಮ್ಮ ಅರಸರೊಲಿಸಿದರೆಂದು ೨
ನೋಡಿದರೆ ದುರಿತ ಕುಲ ಓಡುವವು ತನುವ ನೀ
ಡಾಡಿ ಜಲನೀಡಿ ಕೊಂಡಾಡಿ ನಿಂದು |
ಕೂಡೆ ಮೃತ್ತಿಕೆ ಫಣಿಗೆ ತೀಡಿದರೆ ಭಕುತಿಯಲಿ |
ಬೇಡಿದಿಷ್ಟಾರ್ಥ ಕೈಗೂಡಬಹುದಿಳೆಯೊಳಗೆ ೩
ತುಲಸಿ ಭಕುತಿಲ್ಲದವ ಕಲಿವಂಶದನುಜನವ |
ತುಲಸಿ ಧರಿಸಿದ ತನುವು ಸಲೆಮುಕ್ತಿ ಮಂಟಪವು |
ತುಲಸಿ ಬೆಳೆಹದಿ ಮನೆಯು ಬಲಿದ ಪುಣ್ಯದ ಖಣಿಯು |
ತುಲಸಿ ಇಲ್ಲದ ಗೇಹ ಕಲುಷಾಲಯ ೪
ಮೂಲದಲಿ ಬ್ರಹ್ಮ ತಾ ನೀಲಕಂಠನು ನಡುವೆ |
ಮೇಲುತುದಿಯಲಿ ವಿಷ್ಣು ಲೋಲಾಡುವಾ |
ಸಾಲಕೊಂಬೆಗಳಲಿ ವಿಶಾಲದೇವತೆಗಳಿಹರು |
ತಾಳಿ ಪ್ರೇಮವನು ಮಹೀಪತಿ ನಂದನಾಜ್ಞೆಯಲಿ೫

೭
ಏಳಯ್ಯಾ ಏಳು ಕಂದಾ | ಏಳು ಪರಮಾನಂದಾ |
ಏಳು ಈರೇಳು ಜಗದೊಡೆಯ ಶ್ರೀಮುಕುಂದಾ ಪ
ಮೊರೆವದೊಂದೇಗಾಲಿ | ಪರಿವಹರಿವೇಗಮಂ |
ಜರಿದು ಯೇಳು ಕುದುರೆಂಗಳದರಾ |
ಪೋರವರುಣನಿಂದ ಭೋರ್ಗರೆವ ಸ್ಯಂದನದೊಳಗ |
ಮೆರೆವ ದಿನಕರ ಉದಯವಾದ ಪೂರ್ವಾದ್ರಿಯಲಿ ೧
ಬಿರಿಯೆ ಕಮಲದ ಮೋಗ್ಗೆ ಕರಿಯೆ ಗೋವತ್ಸಗಳು |
ಪರಿಯೆ ನಕ್ಷತ್ರಗಳು ಗಗನದೊಳಗ ||
ಸರಿಯೆ ಚೋರ್ವಿರಹಿಗಳು ವರಿಯದಂತಾಲಯಕೆ |
ದೆರಿಯ ಕಣ್ಣೆವಿಯಗಳು ನಿದ್ರೆಗೈದಿದ ಜನರು ೨
ಓಡುತಿದೆ ಕತ್ತಲೆಯು ಬಾಡುತಿದೆ ಕುಮುದ ಮುಖ |
ಕೂಡುತಿವೆ ಚಕ್ರವಾಕಂಗಳೀಗ |
ಆಡುತೆಳೆದುಂಬಿ ಚಲ್ಯಾಡುತಿದೆ ಮಧುರನವ |
ಪಾಡುತಿದೆ ಮಹೀಪತಿ ಸುತನಾಮ ಕೀರ್ತಿಯನು ೩

೪
ಏಳುತಲಿ ಎದ್ದು ಎಚ್ಚರಿಸುತ ನೀ ನೆನೆಯೊ |
ಪಾಲಿಸುವ ಮೂಲೋಕ ಪರಮಾತ್ಮನಾ ಪ
ಮೂರೊಂದು ಪದರದ ಚೀಲದೊಳು ಥಳಥಳಸಿ
ದೋರುತಿಹ ರತ್ನ ಪರಿಚಿದ್ರೂಪನಾ |
ಅರಿಗಳ ವಡೆದ ಘನ ತ್ರಿವೇಣಿ ತೀರದಲಿಹ |
ಧೀರಯೋಗಿಯ ಕಂಗಳಾನಂದನ ೧
ಬೇರು ಮೇಲಾಗಿ ಕೊಂಬುಗಳು ಕೆಳಗಾದ ಸಂ |
ಸಾರ ವೃಕ್ಷವ ತ್ರಿಗುಣಮಯದಿಂದಲಿ ||
ವಾರಿಜಭವಾಂಡ ಪಿಂಡಾಂಡಗಳ ಪರಿಪರಿಯ |
ತೋರಿ ತೋರದಲಿಪ್ಪ ನಿರ್ಲಿಪ್ತನಾ೨
ನೋಡಿಸುವ ಕೇಳಿಸುವ ವಾಸಿಸುವ ಪರಿಮಳವ |
ಆಡಿಸುವ ಕರಚರಣ ನುಡಿನುಡಿಸುವ |
ರೂಢಿಯೊಳು ಸೂತ್ರಧಾರಕನಾಗಿ ಅಷ್ಟದಳದ |
ಲಾಡುತಿಹ ಮಹೀಪತಿ ಸುತಪ್ರಭು ಭಕುತಿಯಲಿ೩

ಜಗನ್ನಾಥ ದಾಸರು ಹಂಸನಾಮಕ
೮
ಏಳೈಯ್ಯಾ ಆತ್ಮರಾಮಾ | ಯತಿ ಮುನಿಜನ ಪ್ರೇಮಾ |
ಏಳೆಯ್ಯ ಘನಶಾಮಾ | ಎನ್ನಪಾಲಿಸೈ ಗುಣಧಾಮಾ ಪ
ಗುರು ಕರುಣೋದಯದಲ್ಲಿ ಬೋಧ ಸುರ್ಯನು ಬರಲಿ |
ಮರವಿನ ಕತ್ತಲೆ ತೆರಳಿ | ಬೆಳಗಾಯಿತು ಮನದಲ್ಲಿ ೧
ವಾದತಾರೆಗಳಡಗಿ | ವಿಕಸಿತ ಹೃತ್ಕಮಲಾಗಿ |
ಸಾಧನ ಪಕ್ಷಿಗಳೊದಗಿ | ಕಲಕಲಿಸುತಿವೇ ಬಹುವಾಗಿ ೨
ವಿವೇಕಾದ ಭರತಾ || ವೈರಾಗ್ಯ ಶತೃಘ್ನ ತಾ |
ಸಾವಧ ಲಕ್ಷ್ಮಣ ನಿರುತಾ ಪದಸೇವೆಗೆ ನಿಂತರು ತ್ವರಿತಾ ೩
ಶಮದಮವೇ ನಿಸ್ಸೀಮಾ | ವಿಭೀಷಣ ಸುಗ್ರೀವ ನೇಮಾ |
ಸುಮತಿ ಶೃದ್ಧಾಪರಮಾ | ಇದೋ ಬಂದರು
ಜಾಂಬವ ಹನುಮಾ೪
ಶಾಂತಿ ಸೀತೆಯು ವಲಿದು ನಿಂತಿಹಳೈ ಕೈಮುಗಿದು |
ಚಿಂತಿತಾರ್ಥವನೇ ಕೊಡು | ಮಹಿಪತಿ ಸುತಗೊಲಿದು ೫

೧೬೭
ಓಂ ನಮೋ ರಾಘವೇಂದ್ರಾ ಪ
ಓಂ ನಮೋ ರಾಘವೇಂದ್ರಾ ಘನದಯ ದಾಸಾಂದ್ರಾ
ನಿನ್ನ ಭಕ್ತಜನರೆಂಬಾ ವಾರಿಧಿ ಪೂರ್ಣಚಂದ್ರಾ೧
ಶ್ರೀರಾಮ ಜಯರಾಮ ಸ್ವಾಮಿ ಜಯಜಯ ರಾಮಾ
ಈರೀತಿ ಸ್ರ‍ಮತಿಸಲಿಕೆ ಕೊಡುವಿ ವೈಕುಂಠ ಧಾಮಾ೨
ಉಗ್ರ ವೃತ ತಪದಿಂದಾ ಜಪ ಅನುಷ್ಠಾನದಿಂದಾ
ಶ್ರೀಘ್ರದಿಂದ ಪಡಕೊಂಬಾ ಫಲಕಾಮ ಸನ್ನಿಧಾ೩
ಹನುಮಬಲ್ಲಾ ಹರಬಲ್ಲಾ ಋಷಿನಾರದ ಬಲ್ಲಾ
ನೆನವನಾಮ ಸವಿಯಲೋ ಹೇಳಲಿಕೆ ಅಳವಲ್ಲಾ ೪
ಮರಳು ಮಾನವರಂತಾ ಎನ್ನ ನೋಡಬ್ಯಾಡ ಡೊಂಕಾ
ಗುರುಮಹಿಪತಿ ಸ್ವಾಮಿ ನಾಮ ವೆನೆವ ನಿ:ಶಂಕಾ ೫

೭೩೭
ಕಂಜ ಬಿಂಬಾನನೆ ಕಂಜ ಸತ್ಕೂಲಪರ ಕಂಜ ಸಾಸಿರ ಶಿರನಾ |
ಕಂಜ ಶರನಪಿತ ಕಂಜ ಚರಣನ ಕಂಜಾಕ್ಷಿ
ತಂದು ತೋರೇ ಪ
ಮೊತ್ತ ವೆನಿಪ ಹಿಮಧಿಪ ತನುಜಯ
ಕೂಡಾ ನಿತ್ಯದಿ ಕ್ರೀಡಿಪನಾ |
ನೆತ್ತಿಯೊಳನುಹಾನೆ ಇಪ್ಪಳ ಸಂಗಡ ಅತ್ತಿತ್ತಗಲ ದವನಾ |
ಹತ್ತೆರನೆಯಾ ಅರಸಿಯಾ ಪೆಸರ್ಪಡೆದಳ
ಚಿತ್ತೆದೊಲ್ಲಭ ನೈಯನಾ |
ಹೆತ್ತ ತಾಯಿಯಣ್ಣ ನರಸಿ ಉದರದಲಿ
ಬಂದ ಸತ್ಯ ಶಾಶ್ವತನ ತೋರೆ ೧
ಘನ ಗುರುವಿನ ಶರೀರವ ತನ್ನ ಶರದಿಂದ
ಚಿನಿಗಡಿದ ಕುವರನಾ |
ತ್ರಿನಯನ ವರದಿಂದ ಪಡೆದನ
ಹಿರಿಯಳಿಯನಾ ತಂದೆಯಾ ಪಿತನಾ |
ಜನಕನ ಸುತನಾಗಿ ತ್ರಿಭುವನ ಮಾಡಿ ಪಾ |
ವನವ ಶರಭಿ ಧಾನ |
ಜನ ವರವಿತ್ತು ಭಕ್ತನೆನಿಸಿದ
ಶ್ರೀ ವನಜನಾಭನಾ ತಂದು ತೋರೆ ೨
ಸುರನದಿ ಮೊಮ್ಮ ಸುತನ ಹರಿಬಕ ಬಂದ
ಸರಸಿಜ ಸಖ ಸುತನಾ |
ಶರದಿಂದ ಇರಲೊಳು ಅಸುವನದೋರದ
ಅಸುರನ ಮಾತೆಯರಸನಾ |
ಕರದಿಂದ ಸಂದಿದ್ದ ದೇಹಿಯ ಕೊಳೆ ಭಕ್ತರ ದುರಿತರ್ಹಿಸಿದನಾ |
ಗುರುವರ ಮಹಿಪತಿ ಸುತನ ಅಭಯವಿತ್ತು
ಪೊರೆವನ ತಂದು ತೋರೆ ೩

೧೯೦
ಕಂಡಿರೇನೇ ರಂಗನಾ ನಿಮ್ಮ ಮನೆಗಳಲ್ಲಿ
ಕಂಡರೆ ಹೇಳಿರಮ್ಮಾ ಒಂದು ಮಾತಿನಲಿ
ಬೆಂಡಾದೆನೇ ಅರಸುತ ನಾನಾದಾರಿಗಳಲ್ಲಿ
ಪುಂಡರೀಕಾಕ್ಷನು ದೋರನು ಎಲ್ಲಿ ಮಣಿ
ಕುಂಡಲ ಮಂಡಿತ ಗಂಡ ಕಪೊಲ ಪ್ರಚಂಡನ ಲೀಲೆ ೧
ಒಮ್ಮೆ ಭಾವಿಕ ಗೋವಳರಾ ಆಟ ಪಾಟದಲಿರುವಾ
ಒಮ್ಮೇ ಕಾಮುಖ ಗೊಲ್ಲತೇರಾ ಚಿತ್ತಕಾನಂದ ನೀವಾ
ಒಮ್ಮೆ ಯಜ್ಞ ಪತ್ನಿಯರಾ ಸವಿಯಾಟ ಕವಲಿವಾ
ಅಮ್ಮ ಒಂದೇ ಠಾರ್ವೆನೇ ಹೇಳುವಾ ಅವ ನಿಮ್ಮವನೇ
ತಮ್ಮನೇ ಸುಮ್ಮನೇ ತಿರುಗುತ ಘಮ್ಮನೇ ಝುಮ್ಮನೇ ಹೊಳೆವಾ ೨
ಪುಲ್ಲ ನಾಭನ ಕಾಣದಿರೇ ಕಣ್ಣು ಕುರುಡವು ನಮ್ಮ
ಸೊಲ್ಲ ವಾಲಿಸದಿಹ ಹರಿಯಾ ಕಿವಿಬಧಿರವು ನಮ್ಮ
ಅಲ್ಲಿ ಮನುಜ ಮಹಿಪತಿಸುತ ಪ್ರಭು ಪರಬೊಮ್ಮ
ನಿಲದಪ್ಪಿ ಕೊಳಲು ಸಂಭ್ರಮಾ ಅವನೆಲ್ಲೆಲ್ಲ ನೋಡಲು
ಅಲ್ಲಲ್ಲಿ ನಿಂದಿಹ ಇಲ್ಲದ ಸ್ಥಳವಿಲ್ಲವಮ್ಮಾ ೩

೪೫೭
ಕಂಡೆನಮ್ಮಾ ಕೌತುಕದಾ ಗಾರುಡಿಗನಾ |
ಕೊಂಡಾಡಲಳವಲ್ಲ ಹೇಳಲೇ ನಾ ಪ
ಶುದ್ಧ ಸತ್ವದಾ ಗಿರಿಶಿಖರದಲಿಹದೊಂದು |
ಬೋಧದನಾಗರ ನೂದುವನಾ ೧
ಭಕ್ತಿ ಮುಕ್ತಿಯಂಬಾ ಗೆಜ್ಜೆ ಲೊಪ್ಪುತಿಹ ಪದದಿ |
ಭಕ್ತರುದ್ದೇಶಕ ಬಂದ ಜವದಿ ೨
ಸಕಲ ತೇಜದ ಬಬ್ಬುಳಿಯೋ ರೂಪ ನೆಲಿಯಾ |
ಪ್ರಕಟ ತಿಳಿಯದು ನಿಜ ಕಳಿಯನಾ ೩
ಅರಿಶಿಕ್ಷಾ ಭಕುತರ ಪಕ್ಷಾವೆಂಬ ನಾನಾ |
ಬಿರುದು ಕಟ್ಟಿಹ ಮಹಿಮನಾ ೪
ಕಾಳ ಸರ್ಪದ ನಿಜ ಮುಖ ಬಂಧವನ ಮಾಡಿ |
ಜಾಳಿಸಿದನು ಭಯ ಈಡ್ಯಾಡಿ ೫
ಹಮ್ಮಿನ ಗಾವ ಗುಂಡ ಗಜದಂತ ಶರಣರಿಗೆ |
ವಮ್ಮಿಲೆ ಕಲೆಗಳ ದೋರುದೀಗನಾ ೬
ತಂದೆ ಮಹಿಪತಿ ಸುತ ಸ್ವಾಂಮಿ ದುರ್ಲಭದಾ |
ನಂದವ ತೋರಿದಾ ದಯದಿಂದಾ ೭

೧೧೩
ಕಂಡೇವಮ್ಮ ರಂಗನಾ |ಕಂಡೇವಮ್ಮಾ ಕೃಷ್ಣನಾ ಪ
ಹೃದಯದೊಳಗಿನ ಸದಮಲ ಬ್ರಹ್ಮನಾ ೧
ಬಿಡದೆವೆ ಗೋಕುಲದಿ ಸಂಚರಿಪನಾ ೨
ಗುರುಮಹಿಪತಿ ಪ್ರಭು ಕರುಣ ಕಟಾಕ್ಷದಿ ೩

೧೬೮
ಕಮಲಂಶಂಖಗದಾರಿಪಾಣಿಕಮಲಂ
ರಾಜೀಸುವದು ನಾಭಿಯಾ
ಕಮಲಂವತ್ಸದ ಬ್ರಹ್ಮನಂಘ್ರಿ ಕಮಲಂ
ಸುರಗಂಗೆಯಂ ಶೇಧೀಭಿಯಾ ಪ
ಕಮಲಂ ದ್ವೇಷಿಯ ಕೋಟಿ ಕಾಂತಿ ಕಮಲಂ
ನೇತ್ರನ್ನದಯ ಪೂರ್ಣದಾ
ಕಮಲಂ ಹಾರಿಸಿ ನೀಡುವ ಬುದ್ದಿ ವಿಮಲಂ ನೇ
ಶ್ರೀ ವೆಂಕಟೇಶಂ ಸದಾ೧
ಸಿರಿಯಂ ಮೋಹನದೇವ ನಿನ್ನ ಮಹಿಯಂ
ಪೊಗಳಲಿಲ್ಲ ಮತಿ ಸಲ್ಲದೇ
ಬರಿಯಂ ಮಾಯಕೆ ಶಿಲ್ಕಾ ಸಾಧುವನೆರಿಯಂ
ಆಶ್ರಯಸಿ ನೆಲೆಗೊಳ್ಳದೇ
ಸೋರೆಯಂತಾ ನೆರೆಮೂಢನಾಗಿ ಗುರಿಯಂ
ಭವಕಾದೆ ಪರಿಹಾರ ದಾ
ಪರಿಯಂ ಕಾಣದೆ ಬೇಡಿ ಕೊಂಬೆ ಧೋರಿಯಂ
ಶ್ರೀ ವೆಂಕಟೇಶಂ ಸದಾ ೨
ಒಡಲಂ ಪೋಷಣ ಮಾಡಿ ಕಾಮ ದೃಢಲಂ
ಪಟನಾದೆ ನೆರೆ ಭಾಗ್ಯದೀ
ನಡಲಂ ದೀಗಳಿ ಪಶ್ಚಾತ್ತಾಪ ಒಡಲಂ ಮನವಿಲ್ಲ ವೈರಾಗ್ಯ ದೀ
ಬಿಡಲಿನ್ನಾಧೀ ನವೇ ಅವಿದ್ಯಪಡಲಂ
ಮುಸುಕಿಷ್ಟು ದನಿವಾರ ದಾ
ಕಡಲಂ ಮನಿಯೆ ಕಾಯೋ ಸಾಖರದಿಡಲಂ
ಶ್ರೀ ವೆಂಕಟೇಶಂ ಸದಾ೩
ತರಳಂ ಕರಿಯಾಲಾಗಿಸ್ತಂಭ ಸರಳಂ
ಬಿದಿರೀಸಿ ವಢ ಮಾಡಿದೇ
ದುರುಳಂದಾನವನಂಗ ನಿನ್ನ ಬೆರಳಂ
ಕೊನಿಯಿಂದ ಕಲಕ್ಯಾಡಿದೆ
ಕರಳಂ ಮಾಲೆಯ ಹಾಕಿಕೊಂಡು ವಿರಳಂ
ಮುದವಿತ್ತೆ ಭಕ್ತಂಗದಾ
ಮರಳಂ ಕಾವದು ಭಕ್ತಿಗಿಲ್ಲ ಹುರಳಂ
ಶ್ರೀ ವೆಂಕಟೇಶಂ ಸದಾ ೪
ಕಿರಣಂ ಸೂರ್ಯರ ಕೋಟಿ
ಕಾಂತಿಚರಣಾಂಬುಜಭಾವ ಭಕ್ತಿಂದಲಿ
ಶರಣಂ ಪೊಕ್ಕವರಿಂಗೆ ಜನ್ಮಮರಣಂ ಹರಿಸೂವದಯದಿಂದಲಿ
ಸ್ಮರಣಂ ಮಾಡಲು ಪಾಪಹರಣಂ ಸಲೆ ಸಾಧ್ಯಸುರ ಸಂಪದಾ
ಕರುಣ ಬೀರುತ ಕಾಯೋಯನ್ನಹರಣಂ
ಶ್ರೀವೆಂಕಟೇಶಂ ಸದಾ ೫
ರತನಂ ಜೋಲುವದೀಗ ಮಾನವ ತನುಂಪಡದೀಗ ಸದ್ಗತಿಯಾ
ಯತನಂ ಮಾಡದೆ ಅಂಧಕೂಪ ಪತನಂ
ಗಡ ಹೊಂದಿ ವಿಷಯೇಚ್ಛೆಯಾ
ಜತನಂ ಭೋಧವ ಗೈಯಲ್ಲಿಲ್ಲ ಸುತನಂ
ಅಪರಾಧವನು ಗಣಿ ಸದಾ
ಪಿತನಂ ತನ್ನಯ ಕಾಯೋ ಜ್ಞಾನ ಚ್ಯುತ ನಂ
ಶ್ರೀ ವೆಂಕಟೇಶಂ ಸದಾ ೬
ಯಜನಂ ಯಾಜನ ಮುಖ್ಯ ಕರ್ಮದಜನಂ
ಮೆಚ್ಚಿ ಸುಮನ ನರಿಯೆನು
ಸುಜನಂ ಮಾಡುವ ದಿವ್ಯ ನಿನ್ನಭಜನಂ
ಯಂತ್ರಿಪ್ಪ ದಾಂನರಿಯೆನು
ಗಜವಂ ತಾರಿಸಿದಂತೆಯನ್ನ ವೃಜಿನಂ ದಾಟೀ ಸುವಾ ಬಿರದಾ
ಕುಜನಂ ಸೇರಿದಂತೆ ಯನ್ನಂ ಕಾಯೋದ್ವಿಜನಂ
ಶ್ರೀ ವೆಂಕಟೇಶಂ ಸದಾ ೭
ಸದನಂ ಸುದ್ಗುಣ ಗಾಣದಬ್ಜವದನಂ ಸ್ಪರ್ಧಿಸುತಿದನುಜರಾ
ಕದನಂ ಕರ್ಕಶವಾಗಿ ಸೌಖ್ಯ ಪ್ರದನಂ ಭಾವಿಸುತಿಹ ಮನುಜರಾ
ಮದನಂ ನಿರ್ಜಿತ ರೂಪ ಕುಂದರದನಂ
ಸುಕುಮಾರ ಘನ ಶಾಮದಾ
ಇದನಂ ಬಣ್ಣಿಪರಾರು ವೇದವಿದಿನಂ
ಶ್ರೀ ವೆಂಕಟೇಶಂ ಸದಾ೮
ಸಿರಿ ಕಾಂತಂ ಬಲಿಯಾ ಚ ಕಂದುದಯಸಾಗರನೆಂದು
ಶಿಖಿ ಕೇತನಾ
ದೊರದಂ ನೋಡದೆ ಕಾಯ ಬ್ರಹ್ಮ ನುತ
ಭಂಡಿಯವಾಧನು ಪ್ರಾರ್ಥನಾ
ಪರಬ್ರಹ್ಮ ತುರುಗಾಯ್ವನೆಂದು ಪೊಗಳ್ವಾರಿಂತರಿವರೈ ಚರಿತದಾ
ಗುರು ಮಹಿಪತಿ ಕಂದಸಲಹೋ ಸ್ಮರಿಸಲು ಅಷ್ಟಕವಾ ೯

೧೬೯
ಕರುಣಾಕರಾ ಕಮಲಾರಮಣ
ಕರಿರಾಜ ಬಂಧನ ಹರಣಾ
ಸುರ ಬ್ರಹ್ಮ ಮುಖಾರ್ಚಿತ ಚರಣಾ
ಶರಣಾಗೆಲೋ ದೀನೋದ್ಧರಣಾ ಪ
ಅತಿಸುಂದರ ನಂದ ಕುಮಾರಾ
ಸುತ ನಾಗೈ ತಂದನು ಮಾರಾ
ಅತನೇ ಕುಸುಮದ ಶರೀರಾ
ಸುತ ಸದ್ಗುಣ ಗಣ ಮಂದಾರಾ
ಪ್ರತಿಯುಗದಲಿ ಧರಿಸೈವತಾರಾ
ಕ್ಷಿತಿಯೊಳು ಪಾಲಿಪ ಸುರನಿಕರಾ ೧
ಜಲಧಿ ಯೊಳಗೆರಡು ರೂಪಾದೆ
ಸಲೆ ವೇದಾಮೃತವನು ತಂದೆ
ಬಲಿದೀ ಕ್ರೂರಾಂಗವ ವಿಡಿದೆ
ಇಳೆಸಲೆ ಪ್ರಲ್ಹಾದರ ಹೊರೆದೆ
ನೆಲೆ ಪ್ರಥಮಾಶ್ರಮದಲಿ ನಿಂದೇ
ಬಲಿ ಜಮದಗ್ನ್ಯರ ತೋಷಿಸಿದೆ ೨
ಎರಡನೆ ವರ್ಣದೊಳಗೆ ಜನಿಸಿ
ಸುರ ಪಾಂಡವರೇಳಿಗೆ ಬಲಿಸಿ
ನೆರೆ ಅಂತ್ಯಯುಗದಿ ಅವತರಿಸಿ
ಪುರಹರ ದ್ವಿಜರಭಿಮತ ಸಲಿಸಿ
ಗುರು ಮಹಿಪತಿ ಪ್ರಭು ಕರುಣಿಸಿ
ಹೊರಿಯೋ ನಿನ್ನೆಚ್ಚರ ನಿಲಿಸಿ ೩

೧೭೦
ಕರುಣಿಸು ಶ್ರೀ ರಾಮಾ ಪ
ವಾರಿರುಹನಯನ ಜೀಮೂತ ಶ್ಯಾಮಾ |
ಪೂರಿತ ಮನೋಕಾಮಾ ೧
ದೀನೋದ್ದರಣಾ ಸದ್ಗುಣ ಧಾಮಾ |
ಶ್ರೀನಿಧೀ ಸಾರ್ವಭೌಮಾ೨
ಗುರುಮಹಿಪತಿ ಸುತ ಪ್ರಭು ಸರ್ವಾತ್ಮಾ |
ಸುರಮುನಿ ವಿಶ್ರಾಮಾ ೩

ಮಹತ್ವದ ಜಾಲತಾಣಗಳು

ಇ ಆಡಳಿತ ಜಾಲತಾಣ

ಇ-ಸೇವೆಗಳು

ಸಾಮಾನ್ಯ ಅಂಕಿ ಅಂಶ

ಸರ್ಕಾರದ ಆ್ಯಪ್ ಗಳು

ಕೇಂದ್ರ ಸರ್ಕಾರದ ಜಾಲತಾಣಗಳು

ತಾಂತ್ರಿಕ‌ ಜಾಲತಾಣಗಳು

ಕನ್ನಡ ಸಂಬಂಧಿ ಜಾಲತಾಣಗಳು

ಆಯೋಗಗಳು

ನ್ಯಾಯಾಲಯಗಳು

ಡೌನ್‌ಲೋಡ್‌ಗಳು