ಕಾಖಂಡಕಿ ಶ್ರೀಕೃಷ್ಣದಾಸರು – Page 5 – ಸಮಗ್ರ ದಾಸ ಸಾಹಿತ್ಯ

೨೫೯
ನಂಬು ಮನವೆ ರಾಮಚಂದ್ರನಾ ದ |
ಯಾಂಬು ನಿಧಿ ಸದ್ಗುಣ ಸಾಂದ್ರನಾ||
ನಂಬಿದ ಭಕ್ತ ಕುಟುಂಬಿಯೆನಿಸುವ|
ಅಂಬುಜನಾಭನ ಹಂಬಲವಿಡಿದು ಪ
ದಶರಥ ಕೌಸಲ್ಯ ಬಸುರಿಲಿ ಬಂದು|
ಋಷಿಮಖ ರಕ್ಷಿಸಿ ಶರದಿ||
ಅಸುರೆಯ ಭಂಗಿರಿಸಿ ನಡೆಯಲಿ|ಮುನಿ|
ಅಸಿಯಳುದ್ದರಿಸಿ ಉಂಗುಟದಲಿ|
ಅಸಮ ಧನುವೆತ್ತಿ ವಸುಧಿಯ ಮಗಳ ವ
ರಿಸಿಕೊಂಡು ಬಂದನು ಕುಶಲವಿಕ್ರಮನಾ೧
ಜನಕನ ವಚನಕ ಮನ್ನಿಸಿ|ಸತಿ|
ಅನುಜನೊಡನೆ ವಿಹರಿಸಿ|
ವನಚರ ಭೂಚರ ನೆರಹಿಸಿ|ದಾಟಿ|
ವನಧಿಯೊಳಗ ಗಿರಿಬಂಧಿಸಿ||
ಮುನಿದು ಮರ್ದಿಸಿ ದಶಾನನ ಮುಖ್ಯ|
ದನುಜರಾ ವನಸಿರಿ ಪದವಿ ವಿಭೀಷಣಗ ನೀಡಿದಾ೨
ಸುರರಿಗೆ ನೀಡಿದಾನಂದನು|ಸೀತೆ|
ವರಿಸಿ ಅಯೋಧ್ಯಕ ಬಂದನು|
ಧರಿಸಿ ಸಾಮ್ರಾಜ್ಯದಿ ಹೊರೆದನು|ಗುರು|
ವರ ಮಹಿಪತಿ ನಂದನೊಡೆಯನು||
ಅರಿತು ಸದ್ಬಾವತಿ ಸರಿಸಲಿ ಸದ್ಗತಿ|
ಶೆರೆವಿಡಿದೆಳೆತಹದರಿಯಲೋ ನಾಮಾ೩

೨೬೦
ನಂಬು ಹರಿಯ ಎನ್ನ ಮನವೇ ಪ
ಸುರಪತಿ ಮುಳಿಯಲು ಸಕಲ ಗೋವಳರನು|
ಹೊರೆದನು ಕರದೆತ್ತಿ ಗಿರಿಯಾ ೧
ಭಕುತಿಲಿ ಶರಣು ಬರಲು ಸುದಾಮನು|
ಸಕಲ ಸುಖವನಿತ್ತಾ ದೊರೆಯಾ೨
ಗುರುಮಹಿಪತಿ ದೀನೋದ್ಧಾರನು|
ಕರುಣಾಸಾಗರ ಮುರ ಅರಿಯಾ೩

೨೫೫
ನಂಬುಗೆ ಪಡಿಯಿರೋ ದೇವರ ದೇವನಾ ಪ
ರಾಮಸಾಸಿರ ನಾಮ ಸದ್ಗುಣ ಧಾಮ ಸಾರ್ವಭೌಮ
ತಾಮರಸ ಸಖ ಆ ಮಹಾಕುಲೋದ್ದಾಮ ಆಹವ ಭೀಮ|
ಸ್ವಾಮಿ ಸಕಲರ ಕಾಮಿತಾರ್ಥವ ನೇನಿ ಮುನಿಜನ ಪ್ರೇಮಿ|
ಭೂಮಿ ಅಹಿತಳ ವ್ಯೊಮ ಜಗದಂತರ್ಯಾಮಿ
ಚರಿತ ನಿಸ್ಸೀಮಿಯಾ೧
ಧಾಟಿಯಲಿ ನರನಾಟಕ ವಿಡಿದ ಆಟವಾಡಲು ನೀಟಾ|
ಕೋಟಿ ಕೋಟಿ ನಿಶಾಟ ದರ್ಪೋಚ್ಚಾಟ ಮಾಡಿದ ಸ್ಪೋಟಾ|
ನೀಟ ಶರಣ ಮುಕುಟಿಗಿತ್ತನು ಪೀಠಾ|
ಧೀಟ ಶ್ರೀ ಜಟೆ ಜೂಟ ವಂದಿತ ಪಾಟರಹಿತ ಸ್ಪರಾಟನಾ ೨
ಅಂದು ಇಂದೇ-ನೆಂದಿಗಾದರ ವಂದೇ ದಯದಿಂದ|
ಛಂದ ಛಂದದ-ಲಿಂದ ಭೋಕ್ತರ ಬಂಧು ಭಕ್ತರ ವೃಂದ|
ಸುಂದರಾನನ ಕುಂದರದನ ಸುಮಂದ ಹಾಸಾನಂದ|
ಇಂದಿರೈರಸ ತಂದೆ ಮಹಿಪತಿ ಕಂದ ಪ್ರೀಯ ಮುಕುಂದನಾ ೩

ಪಲ್ಲವಿ: ದಶಮತಿ ಗುರುಗಳು
೨೯
ನಕ್ಷತ್ರ ರಮಣ ನಯ್ಯನಿಗೊಲಿದು ಶರವನಿತ್ತೆ |
ನಕ್ಷತ್ರ ದೊಲ್ಲಭನ ತಮ್ಮನ ಸುತನ ಸುಟ್ಟೆ |
ನಕ್ಷತ್ರ ಇಲ್ಲದವನ ವೈರಿಗಮನನ ತಾತ |
ನಕ್ಷತ್ರ ಕಾಂತಧರನೇ ||
ನಕ್ಷತ್ರ ಜಾತ – ನಗ್ರಜನ ಮಸ್ತಕವ ತರಿದೇ |
ನಕ್ಷತ್ರ ಸಹಸ್ರ ಉಳ್ಳವನ ದ್ವಾರವನು ಕಾಯ್ದೆ |
ನಕ್ಷತ್ರ ನೀನೇ ಇಂದ್ರಾದಿ ದೇವತೆಗಳಿಗೆ ಗುರುಮಹಿಪತಿಸ್ವಾಮಿ |
ನಕ್ಷತ್ರ ಭೂಷಸಲಹೋ ೧

೭೦
ನಮೊ ಶ್ರೀ ರಮಣಿ ಜಯ ತ್ರಿಭುವನ ಜನನೀ ಪ
ಅಂಬುಜ ನಾಭ ಪ್ರೀಯೇ ಗುಣ ಸದನೀ |
ಜಾಂಬೂನದಾಂಬರ ವರಣೀ | ೧
ಸುರಮನಿ ವಂದ್ಯ ಪದದ್ವಯ ಪಾವನೀ
ನರಸೀರುಹದಳ ನಯನೀ೨
ಗುರುವರ ಮಹಿಪತಿ ನಂದನೋದ್ದರಣೀ
ಶರಣ ರಕ್ಷಕ ಘನ ಕರುಣೀ ೩

೨೧೮
ನಮೋ ನಮೋ ನಮೋ ಎಂಬೆ ನಿನಗೆ ಸ್ವಾಮಿ ರಘುರಾಮಾ|
ಶಮಲ ಹಾರಿಸಿ ವಿಮಲ ಮತಿಯ ಕೊಡುವ ಪುಣ್ಯ ನಾಮ ಪ
ಮುನ್ನ ಮಾಡಿದ ಕೋಟಿ ಜನುಮದ ಪುಣ್ಯ ಒದಗಿತೆಂದು|
ನಿನ್ನ ಚರಣ ಕಮಲ ಕಂಡೆ ಧನ್ಯನಾದೆನಿಂದು ೧
ಪರಮ ಪುರುಷನೆಂಬುದರಿಯ ಮಾಡಿದಪರಾಧವ
ಕರುಣದಿಂದ ಕ್ಷಮಿಸಿ ಹೊರಿಯಬೇಕು ಪೂರ್ಣಬೋಧಾ ೨
ತಂದೆ ಮಹಿಪತಿ ಪ್ರಭು ಭಕ್ತವತ್ಸಲನೆಂದು
ಇಂದು ಮೊರೆಯಹೊಕ್ಕೆ ಸಲಹು ನಿಮ್ಮ ಸೇವೆಯಿಂದು ೩

೫೭
ನಮೋ ನಮೋ ಮುಖ್ಯ ಪ್ರಾಣ ನಾಥನೇ
ನಮೋ ಜಗದೊಳು ಪ್ರಖ್ಯಾತನೇ ಪ
ಧರಣಿ ಸುತೆಯ ಮುಖ ಚಂದ್ರಚಕೋರನಾ
ಸಿರಿ ಚರಣಾಂಬುಜ ಭೃಂಗಾ
ಸುರವರರಿಯ ತಂದೆಯ ಮಾವನ ಸಂ
ಹರಿಸದೆ ವಾನರ ತುಂಗಾ೧
ದುರ್ಯೋಧನಾದಿ ನೂರೊಂದು ಮಂದಿಯ ತನು
ಪರ್ವತ ವಜ್ರದಂಡಾ
ಕರಿ ಏರಿ ಬಹ ಭಗದತ್ತನ ಗದೆಯಿಂದ
ಹರಿಸದೆ ಭೀಮ ಪ್ರಚಂಡಾ೨
ಧರಿಯೊಳುತಾನವ ಗುಣ ಕರಿಯಾವಳ
ನರಸಿಂಹನು ಮಧ್ವರೇಯ
ಪರಮರೂಪವ ಮೂರಾಗಿ ದೊರಿದೆ
ಗುರು ಮಹಿಪತಿ ಪ್ರಭು ಪ್ರೀಯಾ || ೩

೨೧೯
ನಮೋ ನಮೋ ವೆಂಕಟೇಶ ಪ
ವೈಕುಂಠ ಮಂದಿರವನು ಬಿಟ್ಟು ಶೇಷಾಚಲದಲಿ
ಬೇಕೆಂದು ಮಾಡಿದೆ ನೆಲೆವಾಸಾ ೧
ಶ್ರೀದೇವಿ ಸಂಗಡಸ್ವಾಮಿ ಪುಷ್ಕರಣಿ ತೀರದಲಿ
ಮೋದದಿ ಕ್ರೀಡಿಸುವ ವಿಲಾಸ ೨
ಗುರು ಮಹಿಪತಿಪ್ರಭು ಚರಣವ ನಂಬಿದವರ
ಧರೆಯೊಳು ಪೂರಿಪೆ ಮನದಾಶಾ ೩

೨೧೭
ನಮ್ಮ ರಂಗನ ಕಂಡಿರ್ಯಾ ಹೇಳಿರಿ ನೀವಮ್ಮಾ ಪ
ಅರಳೆಲೆ ಮಾಗಾಯಿ ಕಿರಿಗೂದಲು ಮುತ್ತಿನ|
ವರಮಕುಟ ಪದಕ ಕೊರಳಿನಾ ೧
ಹೊಳೆವ ಕುಂಡಲ ಕುಡಿ-ಗಂಗಳ ಬೆಳಗಿನ|
ಚೆಲುವ ಕದವು ಮುದ್ದು ಸೊಬಗಿನಾ ೨
ಬರಿಮುಗುಳ ನೆಗೆಯಾ ಸುದಂತ ಸಾಲಿನ
ಸಿರಿವತ್ಸಧರ ಹೇಮಚಸನನಾ೩
ಧರೆಯೊಳು ಭಕ್ತರ ಮಾಡುವ ಪಾವನ|
ಮಿರುಪರನ್ನದಂಗುರ ಬೆರಳಿನಾ ೪
ಕೊಳಲನೂದಿ ಗೋಪ್ಯಾರ ಮೋಹಿಪ ಮನಸಿನಾ|
ಒಲಿದು ಪಾಲಿಪ ಮಹಿಪತಿಜನ ೫

೬೧೩
ನರಜನ್ಮ ವ್ಯರ್ಥವಲ್ಲವೇ | ಈ ಮೂಢರ |
ನರಜನ್ಮ ವ್ಯರ್ಥವಲ್ಲವೇ ಪ
ಗುರುಗಳ ಶರಣ್ಹೊಕ್ಕು ದಯ ಪಡಿಲಿಲ್ಲಾ |
ತರಣೋಪಾಯದ ನಿಜ ತಿಳಿದವನಲ್ಲಾ ೧
ಘಟ್ಟಿಸಿ ಒಬ್ಬರ ಮನಿಯ ಮುಣಗಿಸಿ |
ಹೊಟ್ಟೆಯ ಬಿಟ್ಟನು ಅನ್ಯಾಯ ಘಳಿಸಿ ೨
ಉತ್ತಮರಲ್ಲಿ ಅರಕ್ಷಣವಕ್ಕುಳ್ಳಿರನು |
ಲೆತ್ತ ಪಗಡಿಯಾಡಿ ಹೊತ್ತು ಗಳೆವನು ೩
ವಾಸುದೇವನ ಸೇವೆಗಾಲಸ್ಯ ಹಿಡಿದಾ |
ಕಾಸಿನ ಆಶೆಗೆ ಎತ್ತಾಗಿ ದುಡಿವಾ ೪
ಮಹಿಪತಿ ನಂದನ ಪ್ರಭುವಿನ ಮರತಾ |
ಸ್ವಹಿತದ ಹಾದಿಗೆ ಅವನು ಹೊರತಾ ೫

೧೦೮
ನರಹರಿ ತಾರಿಸೊಎನ್ನಾ ದುರಿತಾರಿ
ಮುಕ್ತಿ ದಾರಿ ಸಾರಿ ದೋರಿ ದಯಬೀರಿ ಪ
ಕಮಲಾಯ ತಾಂಬಕ ಕರುಣ ಜಲನಿಧಿಸಿರಿ
ಕಮನೀಯ ಲಾವಣ್ಯ ರೂಪ ಶಂಖಾರಿ
ವಿಮಲಗದಾಂಭುಜಧಾರೀ
ಸುಮನಸಾಧುಜನ ಹೃದಯ ವಿಹಾರಿ ೧
ಎಲೆ ದೇವ ದೇವ ಎಂದ್ಯ ಜೀವ ಕಾವ ಮುರ ಅರಿ
ಚೆಲುವಕಸ್ತೂರಿ ಶ್ರೀಹರೀ
ವಲಿದು ಮಹಿಪತಿ ಜನಪರೋಪರಿಯಲಿ
ಸಲಹುತಿಹ ಮಾಮನೋ ಹಾರಿ೨

೧೦೯
ನರಹರಿ ಬಂದು ಮೂಡಿದಾ
ಶರಣಗದಯವಾ ಮಾಡಿದಾ ಪ
ತಟತಟ ಬಿರಿಯಲು ಕುಂಭವವಳಗಿನ
ಛಟ ಛಟ ಶಬ್ಧವ ತೋರುತಾ
ಕಟ ಕಟ ಬ್ರಹ್ಮಾಂಡೊಡೆಯಿತೋ ನೋಡಲು
ಪಟ ಪಟ ತಾರೆಗಳಾರಲು ತಾ ೧
ಗುಡ ಗುಡ ಗುಟ್ಟಿಬಾಯಾಳಗಗ್ನಿಯ
ಧಡ ಧಡ ಕಿಡಿಗಳನುಗುಳುತಾ
ಗಡ ಬಡಿಸಲು ಸಮುದ್ರಗಳೆಲ್ಲವು
ಬುಡು ಬುಡು ಗುಳ್ಳೆಗಳೇಳಲು ತಾ೨
ಫಳ ಫಳ ಭೂಮಿಯು ಬಿಚ್ಚಿತು ಗಿರಿಗಳು
ಹಳ ಹಳ ಕಲ್ಲುಗಳುದುರಿದವು
ಭಳ ಭಳ ಭಾಸಮ ಗಡಿಶತ ತೇಜನ
ಥಳ ಥಳ ಮಿಂಚುಗಳಾಡಿದವು ೩
ಮಾಗ್ಗಿತು ಧನಿಯನು ಕೇಳುತ ಕೇಳವು
ಮುಗ್ಗಿತು ಕಂಗಾಣದೆ ಹಲವು
ಅಗ್ಗಳ ದೈತ್ಯರು ದೂರದಿ ಬಿಸುಟರು
ನುಗ್ಗಾದವು ಅವರಾಯುಧವು ೪
ಸರಸಿಜ ಭವ ಭವ ಸುರಮುನಿ ಇಂದ್ರರು
ಇರದೆವೆ ಮುರಿಯನು ಸಾರಿದಿರು
ಗುರುವರ ಮಹಿಪತಿ ನಂದನಸಾರಥಿ
ಶರಣಿಂದೆನುತಲಿ ಹೊಗಳಿದನು೫

೪೬
ನವ ಸುವರ್ಣದಾ ಪರಿಯ ಹೊಳೆವ ಕೆಂಜೆಡೆಯಲೀ
ದಿವಿಜ ನದಿಯ ನಿರುತ ಧರಿಸೀ ಮುಂದಲಿಯ ಲೀ
ತವ ಶೀತಾಂಶೂನಾ ಕಳೆಯ ತಿಲಕಾ ಮಾಡಿ ಮೆರೆವಾ
ಶಿವ ಧ್ಯಾನಮಾಡೀ ಭವ ಭಯ ನಿವಾರಿಸಿ ಹೊರೆವಾ ೧
ಕುವಿದ್ಯವಿಬಂದಾ ಮದನ ನಳಿದಾ ಭಾಲನಯನಾ
ಸುವಿಧ್ಯದಿ ಮೊರೆಹುಗಲು ವಲುವಾನಂದನಯನಾ
ಅವಯವದಲ್ಲಿ ಫಣಿ ಭೂಷಣ ಮಾರಿ ಮೆರೆ ವಾ
ಶಿವಧ್ಯಾನಾ ಮಾರಿ ಭವ ಭಯ ನಿವಾರಿಸಿ ಹೊರೆ ವಾ ೨
ಠವ ಠವಿಸುವ ಮುನಿಯ ಮನೋಹರ ಪಂಚ ವದನಾ
ರವಿ ಕೋಟಿ ತೇಜದಿರುವಾಘನ ಕಾರುಣ್ಯ ಸದನಾ
ಭವಾನೀ ಯಡದ ತೋಡಿಯಲಿರಿಸೀ ಕೊಂಡು ಮೆರೆವಾ
ಶಿವ ದ್ಯಾನಾ ಮಾಡೀ ಭವ ಭಯ ನಿವಾರಿಸಿ ಹೊರೆವಾ ೩
ಧವಲೀಸುತಿಹ ತನು ರೂಚಯ ಕರ್ಪೂರ ಪರಿಯಾ
ತವಕದಿಂದುಟ್ಟಾ ಉಡುಗಿ ಹರನಾ ಚರ್ಮ ಕರಿಯಾ
ಸವಿಭೂತಿಯ ಸುಧರಿಸಿ ತಪವೇಷದಿ ಮೆರೆ ವಾ
ಶಿವಧ್ಯಾನಾ ಮಾಡೀ ಭವ ಭಯ ನಿವಾರಿಸಿ ಹೊರೆವಾ ೪
ಭುವನತೃಯದಾ ಸುರನರೋರಗ ಪೂಜಿಸುತಿಹಾ
ಅವನೀಲ್ಬಾವನಾ ಪರಮ ಪಾವನ ಪಾದ ದ್ವಿತೀಯಾ
ಅವಿನಾವಾ ದೇವರ ಜನಗಿರಿ ವಾಸವಿ ಮೆರೆ ವಾ
ಶಿವಧ್ಯಾನಾ ಮಾಡೀ ಭವ ಭಯ ನಿವಾರಿಸಿ ಹೊರೆ ವಾ ೫
ತ್ರಿವಿಧ ತಾಪವಾಹರಿಸುವದು ಹರಯಂದ ಭರವಿದೀ
ಭವಯನ್ನ ಲಾಗಾ ಸುಖಗರೆವ ಸಾನಂದ ವರದೀ
ಶಿವಾಯೋಂ ನಮಾಯಂದೆನಲು ಸುಗತಿ ನೀಡಿ ಮೆರೆ ವಾ
ಶಿವಧ್ಯಾನಾ ಮಾಡೀ ಭವ ಭಯ ನಿವಾರಿಸಿ ಹೊರೆ ವಾ ೬
ಸವಾರೀಧರನಾವರಣದಿರುವಾ ಕಪ್ಪುಗೋರಳಾ
ತ್ರಿವಿಷ್ಟಾಪರಿಯಾ ಪದವ ಮುನಿವಾ ತ್ರಿಶೂಲ ಸರಳಾ
ಕವಿಬೋಧಿಸುವಾ ಡುವರ ಸೂತ್ರದ ಕೈಯ್ಯಾ ಮೆರೆ ವಾ
ಶಿವಧ್ಯಾನಾ ಮಾಡೀ ಭವ ಭಯ ನಿವಾರಿಸಿ ಹೊರೆ ವಾ ೭
ಶಿವಷ್ಟಕವನು ಹೃದಯ ಪತ್ರ ಮ್ಯಾಲ ಬರವಾ
ಅವನಿಷ್ಟಾರ್ಥವಾ ಕುಡುತ ದುಷ್ರ‍ಕತ ಮೂಲಹರಿವಾ
ಅವಿದ್ಯೋಡಿ ಸುವಾ ಗುರು ಮಹಿಪತಿಯಾಗಿ ಮೆರೆ ವಾ
ಶಿವಧ್ಯಾನಾ ಮಾಡೀ ಭವ ಭಯ ನಿವಾರಿಸಿ ಹೊರೆ ವಾ ೮

೨೨೨
ನಾಮ ನೆನಯೋ ನೀಲಾಂಗನಾ ಪ
ನಾನಾ ಸಾಧನವ ಮಾಡಿ ಸಾಧಿಸುವದೇನು ಹೇಳಾ|
ಜ್ಞಾನ ಗುರುವಿನ ಕೇಳೋ ಕೀಲಾ ೧
ಕಾಶಿ ರಾಮೇಶ್ವರವಾದಾ ತೀರ್ಥದಲಿ ಮಿಂದ ಫಲಾ|
ಭಾಸುವದಾನಂದ ಘನ ನೀಲಾ ೨
ಗುರು ಮಹಿಪತಿ ಪ್ರಭು ಭಕ್ತಿಗೆ ಸುಲಭನಲಾ|
ಕರುಣದಲಿ ತಾರಿಸುವ ದಯಾಳು ೩

೨೨೩
ನಾರಾಯಣ ನರಹರಿ ಮಾಧವ ನಿಮ್ಮ ಪಾದಾ ದೋರೋ|
ಸಾರಭಕುತಜನ ಸುರತರುವಾಗಿಹ ಪಾದಾದೋರೋ ಪ
ಸಿರಿದೇವಿನಯನ ಚಕೋರ ಚಂದಿರವಾದ ಪಾದಾದೋರೋ|
ಗರುಡನಕರದ್ವಯ ಪಾವುಡ ಮಾಡಿದ ಪಾದ ದೋರೊ ೧
ಗೋಪಿಯ ಮುಂದೋಡಿಯಲಿ
ಕುಣಿದಾಡಿದ ಪಾದಾ ದೋರೋ|
ಆಫಣಿಯಂಗವ ನಿರ್ವಿಷ ಮಾಡಿದ ಪಾದಾ ದೋರೊ೨
ಸರಸಿಜ ಭವಭವರೊಂದಿತ ಪಾವನ ಪಾದಾ ದೋರೋ|
ಗುರುಮಹಿಪತಿ ಪ್ರಭು ಕಂದಗೊಲಿದು ಬಂದು ಪಾದಾದೋರು ೩

೭೩೩
ನಿಂತು ಫುಗಡಿ ಹಾಕ ಭ್ರಾಂತತನವ್ಯಾಕ
ಸಂತ ಜನನಿಯರು ನೋಡಿ ತಲೆಯ ದೂಗಬೇಕ ಪ
ಆಶೆಯಲಿ ತಾನು ಕುಳಿತು ಹಾಕುದೇನು |
ಘಾಸಿಯಾಗುವ ಆರುಮಂದಿಯಾ ಕೂಡಿದರೇ ನೀನು ೧
ಗರುವ ತನ ಬಿಟ್ಟು ತಿರುಗಣೆಯಾ ನುಟ್ಟು |
ಆರಹು ಶರಗಿನಿಂದ ಬಿಗಿದು ಹಾಕ ಮಲಕ ಗಂಟು ೨
ಲಜ್ಜೆ ವಳಿದು ನೋಡೇ ಹರಿಯಸ್ತುತಿ ಮಾಡಿ |
ಘಜ್ಜಿಗೆ ಬಂಡಮ್ಯಾಲ ಯಚ್ಚರ ಮೈಯ್ಯ ಮರೆಯಿಬ್ಯಾಡೇ ೩
ಎರಡು ಸವೆ ನಿನೆಹಾ ಜ್ಞಾನ ಸಖೀ ಕೈಯ್ಯಾ |
ಜರಿಯದಂತೆ ಹಿಡಿದು ತಿರುಗು ನಡವಿಧ ಪರಿಯಾ ೪
ಫುಗಡಿ ಇದೇ ಆಡೀ ಪ್ರೇಮಭಾವ ಕೂಡೀ |
ಮುಗುತಿ ಕೊಡುವ ತಂದೆ ಮಹಿಪತಿ ಸ್ವಾಮಿ ದಯಮಾಡಿ ೫

೬೧೫
ನಿಧಾನವೆ ಕೇಳಿ ಸಜ್ಜನವೇ
ಇಂದು ಜಿನ ಶಕ್ತಿಯಾನಂದದಾರಾಧನ ಪ
ಒಂದು ಮನದಲಿ ವದಗಿನ್ನು
ಒಂದು ಮನದಲಿ ವದಗಿನ್ನು ನೀವೆಲ್ಲಾ
ವಂದದಾರುತಿಯಾ ಬೆಳಗುವಾ ೧
ಒಂದು ಮಾರ್ಗವಿಡಿದು ಬಂದು ಗುರುಮುಖದಿಂದ
ಒಂದನೆ ಭಕ್ತಿ ತಿಳಿದಿನ್ನು
ಒಂದನೆ ಭಕ್ತಿ ತಿಳಿದು ಪರೀಕ್ಷಿತಿಯಂತೆ
ವಂದನಾರುತಿಯಾ ಬೆಳಗುವಾ ೨
ಎರಡಕ ಮೀರದಾ ಎರಡಕ್ಷರದಿಂದ
ಎರಡನೆ ಭಕ್ತಿ ತಿಳಿದಿನ್ನು
ಎರಡನೇ ಭಕ್ತಿ ತಿಳಿದು ನಾರದರಂತೆ
ಎರಡನಾರತಿಯಾ ಬೆಳಗೀರೇ ೩
ಮೂರು ಬಲಿಯನೆದಾಟಿ ಮೂರು ರತ್ನವಗಂಡು
ಮೂರನೇ ಭಕ್ತಿ ತಿಳಿದಿನ್ನು
ಮೂರನೇ ಭಕ್ತಿ ತಿಳಿದು ಪ್ರಲ್ಲಾದನಂತೆ
ಮೂರನಾರತಿಯಾ ಬೆಳಗೀರೇ ೪
ನಾಕುಸ್ಥಾನವ ಮುಟ್ಟಿ ನಾಕರಂತವ ನೋಡಿ
ನಾಕನೇ ಭಕ್ತಿ ತಿಳಿದಿನ್ನು
ನಾಕನೇ ಭಕ್ತಿ ತಿಳಿದು ಜನಕನಂತೆ
ನಾಕನಾರತಿಯಾ ಬೆಳಗೀರೇ ೫
ಐದುಕ್ಲೇಶಗಳ್ಹಿಂಗಿ ಐದರೊಂದನೆ ಮಾಡಿ
ಐದನೇ ಭಕ್ತಿ ತಿಳಿದಿನ್ನು
ಐದನೇ ಭಕ್ತಿ ತಿಳಿದು ಗರುಡನಂತೆ
ಐದನಾರತೀಯ ಬೆಳಗೀರೆ ೬
ಆರನೇ ಭಕ್ತಿ ಆರು ಸಂಗವ ಮೀರಿ ಆರು ಪರಿಯಾಗದೇ
ಆರನೇ ಭಕ್ತಿ ತಿಳಿದಿನ್ನು
ಆರನೇ ಭಕ್ತಿ ತಿಳಿದು ಪುಂಡಲೀಕನಂತೆ
ಆರನಾರತಿಯಾ ಬೆಳಗೀರೆ ೭
ಏಳು ವ್ಯಸನವ ಬಿಟ್ಟು ಏಳು ಧಾತುವ ಕಂಡು
ಏಳನೇ ಭಕ್ತಿ ತಿಳಿದಿನ್ನು
ಏಳನೇ ಭಕ್ತಿ ತಿಳಿದು ಹನುಮಂತನಂತೆ
ಏಳನಾರತಿಯಾ ಬೆಳಗೀರೆ ೮
ಎಂಟು ಮದಗಳ ಜರಿದು ಎಂಟು ಸಿದ್ಧಿಯ ತೊರೆದು
ಎಂಟನೆ ಭಕ್ತಿ ತಿಳಿದಿನ್ನು
ಎಂಟನೇ ಭಕ್ತಿ ತಿಳಿದು ಅರ್ಜುನ ನಂತೆ
ಎಂಟನೇ ಭಕ್ತಿ ಯಾರತಿಯಾ ಬೆಳಗೀರೆ ೯
ಒಂಭತ್ತರನೇ ಬಲಿದು ಒಂಭತ್ತರ ನೆಗೆಲಿದು
ಒಂಭತ್ತರನೇ ಭಕ್ತಿ ತಿಳಿದಿನ್ನು
ಒಂಭತ್ತರನೇ ಭಕ್ತಿ ತಿಳಿದು ಬಲಿಯಂದದಿ
ಒಂಭತ್ತನಾರತಿಯಾ ಬೆಳಗೀರೆ ೧೦
ಗುರು ಮಹಿಪತಿ ಸುತಬ ಹೊರವ ದೇವಿಗೆ
ಧರಿಯೊಳೀಪರಿಯಲಿ ನೀವು
ಧರಿಯೊಳೀಪರಿ ನೀವು ಮಾಡಲಿಕೀಗ
ಪರಮ ಆನಂದಾದೋರುವದು ೧೧

೩೦
ನಿನ್ನ ನಾನೇನೆಂದೆ ನಿರ್ಮಲ ರೂಪನೆ |
ಪನ್ನಗ ಭೂಷಣ ಪರಮ ಸದಾಶಿವ ಪ
ಸುರರು ಮೊರೆಯಿಡೆ ವಿಷವ ಧರಿಸಿ ಜಗ |
ಉರಿಯಹದೆನುತ ಕಂಠದಿರಿಸಿದನು ||
ದುರಳ ದೈತ್ಯನ ಕೊಲ್ಲಲಾಗಿ ಅರ್ಧಾಂಗವ |
ಹರಿಗೆ ನೀಡಿದ ದೇವ ಶರಣೆಂದೆನಲ್ಲದೇ ||
ಉರಗಣ್ಣಿನವನೆಂದೇನೇ | ಪರಹೆಣ್ಣವ |
ಶಿರದೊಳಿಟ್ಟವನೆಂದೆನೇ | ಜಗದೊಳು ||
ಅರೆ ಮೈಯ್ಯವನೆಂದೆನೇ | ನಿಜಪದ |
ಶರಣರಿಷ್ಟಾರ್ಥವ ನೀವನೇ ಬಾಯಂದೆ ೧
ಸದ್ಗತಿ ನೀಡಿದ ಬ್ಯಾಡಗ ಮರ ದೊಪ್ಪ |
ಲುದುರಿಸವಗ ನಿಜವ ದೋರಿದ ||
ಮುದದಿಂದ ಪಾಶುಪತವಾನಿತ್ತ |
ಸದಮಲಾ ನಂದನೇ ಶರಣೆಂದೇ ಕಾಲಿಲಿಂ ||
ದ್ವೋದಿಸಿ ಕೋಂಡವನೆಂದೆನೇ | ಬಾಯಿಂದುಗು |
ಳಿದರೆ ತಾಳ್ದದವನೆಂದೆನೇ | ನರಕಾಳ ||
ಗದಿ ಸೋತವನೆಂದೆನೇ | ವರಮುನಿ |
ತ್ರದಶಾಧಿಪತಿ ಮುಖ್ಯ ಸೇವಿತ ಬಾಯಂದೆ ೨
ಸರಸಿಜ ಭವನ ತಲೆಯ ನೊಂದು ಶಳದುಸಾ |
ವಿರಭುಜ ನೀಡಿದ ಬಲಿಸುತಗ ||
ಸಿರಿಯೊಳನ ಕುಟುಂಬಕ್ಕೆ ಕೈವಲ್ಯವ |
ಕರುಣಿಸಿದರಸನೆ ಬಾಯಂದೆ ಕಪಾಲ ||
ಕರದಿ ಪಡಿದವನೆಂದೆನೇ | ನರಮಾಂಸಕ |
ಹರಿದು ಪೋದವನೆಂದೆನೇ | ಬಾಗಿಲಕಾವಾ ||
ಸುರನ ಬಂಟನೆಂದೆನೇ | ಸಲಹುವಾ |
ಗುರು ಮಹಿಪತಿ ಪ್ರಭು ನಮೋ ನಮೋ ನಿನಗೆಂದೇ ೩

೬೧೮
ನಿನ್ನ ನೀ ತಿಳಿದು ನೋಡೋ ಕೇಳಲೋ ಪ್ರಾಣಿ ಪ
ನಿನ್ನ ನೀ ತಿಳಿದು ನೋಡೋ ಪನ್ನಗಾದ್ರೀಶನ ಕೂಡೋ
ಬನ್ನ ಭವಣೆ ಈಡ್ಯಾಡೋ ಕೇಳೆಲೋ ಪ್ರಾಣಿ ೧
ನಾನಾರು ತನುವಾರು ತನುವಿ ನೊಡೆಯನಾರು
ನಾನೀ ನೆಂಬುದರೊಳಾರು ಕೇಳೆಲೋ ಪ್ರಾಣಿ ೨
ಹಿಂದಿನ ಪುಣ್ಯಗಳಿಂದ ಬಂದು ನರ ದೇಹದಿಂದ
ಬಂದೇನಾ ಘಳಿಸಿನಿಂದೇ ಕೇಳೆಲೋ ಪ್ರಾಣಿ ೩
ವಿದ್ಯಾ ವಿತ್ಪತ್ತಿ ತೋರಿ ಗದ್ಯ ಪದ್ಯಗಳ ಬೀರಿ
ಬಿದ್ದಿ ಗರ್ವಾರಣ್ಯದಾರೀ ಕೇಳೆಲೋ ಪ್ರಾಣಿ ೪
ತಂದೆ ಮಹಿಪತಿ ದಯದಿಂದ ಪಡೆಯೋ ವಿಜಯ
ಮುಂದ ಬಾರದು ಈ ಕಾಯ ಕೇಳೆಲೋ ಪ್ರಾಣಿ ೫

೨೨೯
ನಿನ್ನ ಹಿತವಾ ಪಡಿಯೋ ಹರಿಯ ಭಜಿಸಿ ಪ
ಸನಕ ಸನಂದನ ಮುನಿಜನರಾಡುವ |
ಘನ ಸುಖ ಮಾರ್ಗದಿನಡಿಯೋ ಹರಿಯ ಭಜಿಸಿ೧
ಕುಂಟಿಣಿ ಗಣಿಕಾ ಜ ಮೇಳ ರುದ್ಧರಿಸಿದಾ |
ಕಂಠದಿ ನಾಮವ ಜಡಿಯೋ ಹರಿಯ ಭಜಿಸಿ೨
ಗುರುವರ ಮಹಿಪತಿ ನಂದನು ಸಾರಿದಾ |
ಶರಣರ ಸಂಗವ ವಿಡಿಯೋ ಹರಿಯ ಭಜಿಸಿ ೩

೨೨೮
ನಿನ್ನವನೆನಿಸಿದಾ ಮಾನವನಿಂಗೆ ಇನ್ನು ಭವಭಯ ಉಂಟೇ
ಭಕುತ ವತ್ಸಲ ಕೃಷ್ಣಾ ಪ
ಶ್ರವಣ ದರಹು ಇಲ್ಲಾ ನವವಿಧ ಭಜನಿಲ್ಲಾ
ಕವಿತದನುಡಿಯ ಚಾತುಯ್ರ್ಯವಿಲ್ಲಾ
ತವಚರಣವನಂಬಿ ಅವನಿಯೋಳಗನಿಶಿ
ದಿವಸದಿ ಅಚ್ಯುತಾನಂತ ಗೋವಿಂದ ಯನುತಲಿ ೧
ಘನ್ನ ವಿರಕ್ತಿಯಿಲ್ಲಾ ಮನ್ನಣೆಯ ತಪವಿಲ್ಲಾ
ಉನ್ನತ ದ ವ್ಯತಶೀಲ ಕರ್ಮವಿಲ್ಲಾ
ಅನ್ಯದೈವ ಕೆರಗದೆ ನಿನ್ನ ನಾಮ ನಿನ್ನ ಮುದ್ರೆ
ನಿನ್ನವರಪರಿಚಾರ ತನದಲ್ಲಿ ರಮಿಸುತಾ ೨
ಮರೆದೊಮ್ಮೆನೆನೆದರೆ ಸರಿವದಘರಾಶಿ
ಅರಿದೊಮ್ಮೆನೆನೆಯಲು ಗತಿಸಂಪದಾ
ದೊರೆವುದೆನುತಶೃತಿ ನಿರುತ ಸಾರುತಲಿದೆ
ಗುರುಮಹಿಪತಿ ಪ್ರಭು ಎನ್ನನುದ್ದರಿಸುದೈಯ್ಯಾ ೩

೨೩೮
ನೀ ಯನ್ನ ಸಲಹುತಿಹೆ ಜನುಮ ಜನುಮಗಳಲ್ಲಿ|
ದಾನವಾರಿಯೆ ಉರಗಶಯನ ಸಿರಿರಂಗರೇಯಾ ಪ
ಮುದದಿಂದ ತನ್ನ ಮಕ್ಕಳನು ತಾ ನೆನಿಯಲಿಕೆ|
ಅದರಿಂದ ಪದಳಿಸುವ ಕಮಠದಂತೆ|
ಉದರದಲಿ ನವಮಾಸ ವಾಸಾಗಿ ಬೆಳೆಯುತಿರೆ|
ಪದುನಾಭನೆ ನಿಮ್ಮದಯದಿ ವರ್ಧಿಸಿದೆನಯ್ಯಾ ೧
ಜಲಧಿಯೊಳಗ ತನ್ನ ನೋಟದಿ ನೋಡಲಾಕ್ಷಣ ದಿ|
ಎಳೆಮೀನಗಳು ಬಹಳ ಸುಖಿಸುವಂತೆ|
ಇಳೆಯೊಳಗ ಜನಿಸಿದ ಬಳಿಕ ಕರುಣ ನೋಟದಾ|
ಒಲುಮಿಂದ ಸಕಲ ಸೌಖ್ಯದಲಿರುತಿಹೆನಯ್ಯಾ ೨
ನಂದನನು ಪೋಷಿಸುವ ಮಾತೆಯಂದದದಿ ದುರಿತ|
ಬಂದಡರೆ ಅಡಿಗಡಿಗೆ ಪರಿಹರಿಸುತಾ|
ಕುಂದ ದಾವಾಗ ರಕ್ಷಿಪೆ ತಂದೆ ಮಹಿಪತಿ ಕಂದ ನೊಡಿಯನೇ
ಚಿದಾನಂದ ಮೂರುತಿ ದೇವಾ೩

೬೨೩
ನೀ ಯಾಕ ಮನವೇ ಚಿಂತಿಸಿ ಬಳಲುವೆ ಬರಿದೇ |
ಶ್ರೀಯರಸನ ಮೊರೆ ಹೋಗದೇ ಪ
ಸಾಧುರಾ ಸಂಗ ಜರಿದು ಕುಜನರ ನೆರೆವಿಡಿದು |
ಮೇದಿನಿಯೊಳು ನಿನ್ನ ನೀ ಮರೆದು ೧
ಇರಲು ಮುಳ್ಳಿನಾಗ್ರದಲಿ ಹೀನ ಕೀಟಕಾವಳಿ |
ಪೊರೆವಾನಿತ್ತು ಆಹಾರದಯಲೀ ೨
ಮನುಜರಿಗೆ ತಲೆವಾಗಿ ಗೇಣು ವಡಕಲಾಗಿ |
ಮನಸಾ ಹಿಡಿವರೇ ಪರರು ಹೋಗಿ ೩
ಹುಟ್ಟಿಸಿದಾ ದೇವನು ಹುಲ್ಲು ಮೇಯಿಸುವನೇನು |
ಅಷ್ಟಾಸಾಯಸ ಬಡದಿರು ನೀನು ೪
ಹೊಂದಿರು ಅನುದಿನ ಗುರುಮಹಿಪತಿ ಚರಣಾ |
ತಂದಿದಿರುಡುವ ನಿಧಾನಾ ೫

೨೩೨
ನೀಡೆಲೋ ಶ್ರೀರಂಗಾ ನಿನ್ನ ದಾಸರ ಸಂಗಾ ಪ
ಕೂಡಿಸಿ ತವ ಚರಿತಾಮರ ಗಂಗಾ |
ಮಾಡುವದು ಭವಭಂಗಾ೧
ಮೂಡಲುದಯದಲಿ ಜ್ಞಾನಪತಂಗಾ |
ಓಡುದು ತಮ ಅಂತರಂಗಾ ೨
ಸುಗಮದಿ ಗುರುಮಹಿಪತಿ ಪ್ರಭು |
ಕಂಗಳಿಗೆ ದೋರುವುದು ಸುಖದಂಗಾ೩

೬೨೨
ನೀನೇ ನಿನ್ನ ಮರೆದಿಹುದೇನು ಮನವೇ |
ಸುಜ್ಞಾನದಿಂದ ನಿಜವನೀ ನರಿಯಲಿಲ್ಲವೇ ಪ
ಶ್ವಾನ ಸೂಕರಾದಿ ಅತಿ ಹೀನ ಯೋನಿಯಲಿ ಸುಖದೊಳು |
ನಾನಾ ಪರಿಯಲಿ ಬಾಹುದೇನು ಅನುವೇ ೧
ಹರಿವ ಮೃಗಜಲಕ ಬೆಂಬತ್ತಿ ಪೋಪಾ ಹರಿಣನಂತೆ |
ಹರಿದು ವಿಷಯ ಕೂಡಾ ಕೆಡುದೇನು ಗುಣವೇ ೨
ನಿನ್ನ ಬಯಕೆಯಂತಾದಡೆ ಮನ್ನಿಸುವ ಅಲ್ಲದಡೆ |
ಘನ್ನ ಚಿಂತೆಯೊಳು ಬೀಳುತಿಹುದೇನು ಸುಖವೇ ೪
ನೆನೆದು ತರಿಸು ಮಹಿಪತಿ ಚರಣಾ ಚಿನ್ನ ಕೃಷ್ಣ ನಾ |
ತನುವಿನೊಳಗಾಡುತಿಹ ನಿಜ ಮನವೇ ೫

೨೩೭
ನೀರೆ ತೋರೆಲೆ ಜಗಪಾಲ ಮುಕುಂದನಾ|
ಶೂಲಧರನ ಮಿತ್ರನಾ ಪ
ಪಾಂಡವರಕ್ಷಕನಾ|ಪುಂಡಲೀಕಾಕ್ಷನಾ|
ಚಂಡಕೋಟಿ ಪ್ರಕಾಶನಾ||
ಕುಂಡಲ ವಿಭೂಷಿತ ಗಂಡಸತ್ಕಪೋಲನಾ|
ಪುಂಡಲೀಕಗತಿವರದನ ನಂದಕಿಶೋರನ೧
ಪರಮ ವರಪುರಾಣ ಪುರುಷೋತ್ತಮನಾ|
ಕಂಸಾಸುರ ಮರ್ದನ ಗೋಪಾಲನಾ||
ಉರಗಾರಿ ಗಮನನಾ ನಿರುಪಮ ಚರಿತನಾ|
ಸುರವರಾಗ್ರಜನಾದ ವಾಸುದೇವ ಮುಕುಂದನಾ೨
ಸನಕ ಸನಂದನಮುನಿ ಮಾನಸ ಹಂಸನಾ|
ಅನುಪಮ್ಯನಂತ ಮಹಿಮಾ||
ವನರುಹ ಯೋನಿವಂದ್ಯನ ಮಧು ಸೂಧನ|
ಘನಗುರು ಮಹಿಪತಿ ಸುತಪ್ರಭು ಶ್ರೀ ಕೃಷ್ಣನಾ೩

೮೧
ನೀರೇ ದÉೂೀರೆ ದೋರೆ ರಂಗನಾ|
ಕರೆ ತಾರೇ ಮುನಿಜನ ಸಂಗನಾ ಪ
ಶರಣ ರಕ್ಷಕ ನೆಂಬೋ ಬಿರುದವ ಸಾರಲು |
ಮೊರೆಯಾ ಹೊಕ್ಕೆನು ಕೇಳಿ ಬಂದುನಾ೧
ಜ್ಞಾನ ಭಕುತಿಗಳ ಏನೇನರಿಯದ |
ಮಾನಿನಿ ನೋಡುವರೇ ಅವಗುಣಾ ೨
ಗುರುಮಹಿಪತಿ ಸುತ ಪ್ರಭು ಕರುಣಾಕರ |
ನೆನದನು ಮೊರೆಕೇಳಿ ಇಂದಿನಾ ೩

೬೨೪
ನೀವು ಬರಿದೆ ಸಾಯಸ ಬಡ ಬ್ಯಾಡಿ ಪ
ಗುರುವಿಗೆ ಬಾಗದೆ ಗುರುರತವ ಕೇಳದೆ |
ಬರಡ ಸಾಧನವನೇ ಕೂಡಿ ೧
ತನ್ನೊಳು ಕಸ್ತೂರಿ ಮುನ್ನರಿಯದೆ ಮೃಗ |
ಕಣ್ಣಗೆಟ್ಟಂತೆ ತಿರುಗಾಡಿ ೨
ತಂದೆ ಮಹಿಪತಿ ನಂದನು ಸಾರಿದಾ |
ಮಂಧರ ಧರನ ಕೊಂಡಾಡಿ ೩

೨೩೯
ನುಡಿ ಎನ್ನಪ್ರಿಯನಾ ನೀತಂದು ತೋರೆ ಸುಜ್ಞಾನೇ ಪ
ಕನಸಿನೊಳಗ ಕಂಡ ಪರಿಯಾ ರೂಪವ ದೋರಿ|
ನೆನವಿನೊಳಗಿಟ್ಟು ಮಯವಾದನೇ ೧
ಅಂಗಯ್ಯ ಲಿಂಗದಂತೆ ಸುಲಭವಾಗಿ ನಮ್ಮ|
ಸಂಗ ಸುಖವ ಬೀರಿದನೇನೇ ೨
ಗುರುಮಹೀಪತಿ ಸುತಪ್ರಭು ಕರುಣಾಮೂರ್ತಿ|
ತರಳೆಯ ತಪ್ಪ ನೋಡಬಹುದೇನೇ ೩

೪೨೭
ನೆನೆದು ಸುಖಿಸಿ ನಮ್ಮ ಆದಿ ಶರಣರಾ
ಅನುದಿನ ಹರಿ ಮೆಚ್ಚಿದ ಪ್ರಿಯರಾ ಪ
ಪ್ರಲ್ಹಾದ ನಾರದ ಪರಾಶರ ಮುನಿ
ವಲ್ಲಭ ರುಕ್ಮಾಂಗದಾ ಧ್ರುವರಾ
ಉಲ್ಹಾಸದಿಂದಲಿ ಅಂಬರೀಷ ಗಜೇಂದ್ರನಾ
ಬಲ್ಲಿದ ಬಲಿ ಗುಣ ಸಾಗರರಾ
ಹನುಮ ವಿಭೀಷಣ ಜಾಂಬವ ಅಜಮಿಳ
ಮುನಿ ಮುಚಕುಂದಾರ್ಜುನ ಮುಖ್ಯರಾ ೧
ಅನುಭವಿಯಾದಾ ಉದ್ಧವ ಉಪಮಾನ್ಯನು
ಜನÀದೋಳಧಿಕರಾದಾ ಪುಂಡಲೀಕ ಭೀಷ್ಮರಾ
ಭಕುತಿ ವನಧಿಯೊಳು ಮೆರೆವರ ತನವಾದಾ ೨
ಶುಕಶೌನಕ ಮುಖ್ಯ ಸಜ್ಜನರಾ |
ಪ್ರಕಟದಿ ಮಹಿಪತಿ ನಂದನು ಸ್ತುತಿಸಿದ |
ಮುಕುತಿಗೆ ಯೋಗ್ಯ-ನಾ ಮಾಡುವರಾ ೩

೨೪೨
ನೆನೆವೆನಾ ನೆನೆವರಿಗೊಲಿವನಾ ಅನುದಿನಾ ನೆನೆವನಾ|
ಕಾವನಾ ಪಾವನಾ ದೇವನಾ ಪ
ಗಜರಾಜ ಧ್ರವ ಪ್ರಲ್ಹಾದಂಬರೀಷನ|
ಅಜಮಿಳ ವಿಭೀಷಣ ರುಕ್ಮಾಂಗದರ್ಜುನ|
ಸುಜನ ಭೀಷ್ಮ ವಿದುರನ|
ನಿಜವ ದೋರಿಧನ್ಯ ಗೈಸಿದವನಾ೧
ಮುರಾರಿ ವಾರಿಜಾರಿ ವಂಶ ವೀರಧೀರನಾ
ಪಾರ ವಾರನಾ ಸುರ ಸಹಕಾರನಾ
ಕರುಣಾಳು ಮೂರುತಿ ಪರಮೋದಾರನ
ಗುರು ಮಹಿಪತಿಜ ಮನೋಹರನಾ೨

೬೨೭
ನೆಲಿಗೆ ಬಾರದು ಗುರುವೇ ಮನವಿದು ಪ
ಒಳ್ಳೆಯವರಾ ನಡೆ ಕಂಡು | ಎಳ್ಳನಿತು ನಾಚದು |
ಖುಳ್ಳರ ಮನದಲ್ಲಿ ಬೆರೆಸುವದು ೧
ಚರಟ ಮಾತುಗಳಲ್ಲಿ ಹರುಷವ ಬಡುವರು |
ಪರಮ ಸದ್ಭೋಧದಲ್ಲಿ ತೊಳಗುವದು ೨
ಏನ ಹೇಳಿದರೇನು ಜ್ಞಾನವ ಕೊಳ್ಳದು |
ತಾನೆ ತನ್ನಿಚ್ಛೆಯಲಿ ತಿರುಗುವದು ೩
ಸ್ಥಿರವಾಗುವ ಪರಿಯಲಿ ಕರುಣವ ಮಾಡುವುದು |
ಸರಣೆ ಸರಪಳಿ ನಿಕ್ಕಿ ನಿಲಿಸುವುದು ೪
ಸನ್ನುತ ಮಹಿಪತಿ ಚಿನ್ನನ ಹೊರೆವದು |
ಧನ್ಯಗೈಸಲು ಮನವ ತಿದ್ದುವದು ೫

೨೪೪
ನೋಡಮ್ಮಾ ಶ್ರೀ ವಾಸುದೇವನಾ ನಮ್ಮ
ಬೇಡಿದಿಷ್ಟಾರ್ಧವ ನೀವನಾ ಪ
ಗೂಢಪರಾತ್ಪರ ಗೂಢನಾ ಪರ ಬ್ರಹ್ಮ
ರೂಢಿಗೆ ನರಲೀಲೆಯಾಡುವ ಬಗೆಯಾಅ.ಪ
ದೇವರ ಅನುಮತ ನೋಡಿದಾ ಅಂವ
ದೇವಕಿ ಉದರದಿ ಮೂಡಿದಾ
ಪಾವನ ಗೋಕುಲ ಮಾಡಿದಾ ಸುಖ
ದೇವಿ ಯಶೋದೆಗೆ ನೀಡಿದಾ
ಆವಾವ ಪರಿಯಲಿ ನೋವ ಬಗೆಯ ಬಂದು
ಗಾಲಿಲ ಅಸುರರ ಜೀವನ ವಳಿದಾ ೧
ಗೊಲ್ಲತೆಯರ ಮನಮೋಹಿಸಿ ಕದ್ದು
ಅಲ್ಲಿಹ ಪಾಲ್ಬಣ್ಣೆ ಸೇವಿಸಿ
ಬಿಲ್ಲ ಹಬ್ಬದ ನೆವತೋರಿಸಿ ಪೋಗಿ
ಮಲ್ಲಚಾಣರರಾ ಭಂಗಿಸೀ
ಬಲ್ಲಿದ ಕಂಸನ ಮಲ್ಲಯದ್ಧಗಳಿಂದ
ಘಲ್ಲಿಸಿದನು ಜನಚಲ್ಲಿ ಬಡಿದನಾ ೨
ನೀರೊಳು ಕಟ್ಟಿಸಿ ಮನೆಯನು
ಬಂಗಾರದ ದ್ವಾರಕಾ ಪುರವನು
ಸೇರಿಸಿ ಯದುಕುಲದವರನು ರುಕ್ಮಿ
ಣೀ ರಮಣಲ್ಲಿಗೆ ಮರೆದನು
ಸಾರಿದ ಶರಣರಾ ತಾರಿಸಿ
ಹೋದನು ಮಹಿಪತಿ ನಂದನ ಪ್ರೀಯನಾ ೩

೨೪೫
ನೋಡಿರೇ ನಂದ ಕಂದನಾ
ನೋಡಲು ಕಣ್ಣಿನ ಪಾರಣಿ ಮಾಡುವಾ ಪ
ಸೂರಿಯಾ ನಿಳಿಯಲು ಅಪರದ ಜಾವಕ
ಸಾರಿಸಿ ಗೋಧನ ತಿರುಗಿಸುತಾ
ವಾರಿಗ ರೆಲ್ಲರು ವಂದಾಗಿ ಹರುಷದಿ
ಧೀರನು ದಾರನು ಆಡೂತ ಬರುವಾ ೧
ಚಂಡು ಬಗರಿ ಚಿಣಿ ಕೋಲು ಚಪ್ಪಳಿಕೈಯ್ಯಾ
ಹಿಂಡ ನೆರೆದು ಹಂಬಲಿ ಹಾಕುತಾ
ಮಂಡಳದೊಳಗುಳ್ಳ ಆಟವ ನಾಡುತ
ಪಂಡರಿ ಕಾಕ್ಷನು ಲೀಲೆಯ ನಲುವಾ ೨
ಗೋಧೂಳಿ ತುಂಬಿದ ಗುಂಗುರ ಗೂದಲು
ಉದಿಸಿದ ಹಣೆಯಲಿ ಕಿರಿ ಬೆವರು
ಬೆರಿಸಿ ಪರಿಪರಿ ಸ್ವರದಲ್ಲಿ ಕೊಳಲವ
ನೂದುತ ಕುಣಿಯುತ ನಗೆವುತ ಬರುವಾ೩
ಅಲವುತ ಕುಂಡಲ ಹೊಳೆಯುತ ಕಣ್ಣಿನ
ಚಲುವಿನ ಕಸ್ತೂರಿ ರೇಖೆಯಲಿ
ನೌಲಗರಿಯ ವಾರಿ ದುರುಬವ ಕಟ್ಟಿಸಿ
ನೀಲಮಣಿಯ ಮ್ಯಾಲ ಪುತ್ಥಳಿ ಬರುವಾ೪
ಪೇಂದ್ಯ ಉದ್ದದ ಬಲರಾಯ ಸುಧಾಮರ
ವೃಂದದಿ ಮಹಿಪತಿ ಸುತ ಪ್ರೀಯನು
ಇಂದು ವದನೆಯರು ಆರುತಿ ಕೊಳುತಲಿ
ವಂದದಿ ಮಧ್ಯ ನಾಯಕನಾಗಿ ಬರುವಾ೫

೧೦೭
ನೋಡಿರೇ ನೋಡಿರಮ್ಮಾ ಚೆಲುವನಾ ನೋಡಿರೇ || ಇವ||
ರೂಢಿಗೆ ಆವನಿಜೆಯಾ ತಕ್ಕುವರನೇ ಮುದ್ದುಸ್ಮರನೇ ಪ
ಕೆಂದಳಿರ ಹೋಲುವ ಪಾದ ತಳವೇ
ಜಂಘಯಿಂದ ಜಾನೂರುಮಾರಾ
ಪೊಂಬಾಳವೆ ಕಟ ಛಂದದಂಬರ ಉದರ
ತ್ರಿವಳವೇ| ಹಾರ ದಿಯ
ವಪ್ಪುವಯದೆ ಕಂಬುಗಳವೇ ಕರ ಸರಳವೇ ೧
ನಗೆ ಮೊಗದಂತಾಧರ ಹೊಳೆವಾ ಕಡ ಪುಗಳು
ಮಂಡಿತದ ಕುಂಡಲವಾ|
ನಯನಗಳು ಹೋಲುತಿವೇ ಕಮಲವಾ| ಪಣಿ|
ಮೃಗಮದ ಕಿರೀಟ ೨
ಆವರಾಯನಮಗನೋತಾನರಿಯೇ|ಭೂಸು|
ರಾವಳಿಯೊಳಿಂದ್ಧಾರೇನು |ಅಂಗ|
ದಾವ ತೇಜಮುಸುಕಿತು ಧರಿಯೇ|ತ್ರ್ಯೆಭುವನವರಕ್ಷಿಸ
ಬಂದಾಹರಿಯೇ | ಮುಜ್ಜಿಮರಿಯೇ ೩
ಮುಟ್ಟಿಲೀ ತಗಧನುಏಳಲಿ ಝಮ್ಮೆನೇ
ನಾವು ನೆಟ್ಟನೆಪೂಜಿಪೆವು ಗೌರಮ್ಮನೇ ಎಂದು
ಬಿಟ್ಟ ಮಗಳು ಬೇಡಿಕೊಂಡರು ಸುಮ್ಮನೇ
ಆಡಿಯಿಟ್ಟುನಲಿದು ಬರುವ ರಾಮೊ ಘಮ್ಮನೇ ಪರಬೊಮ್ಮನೆ ೪
ಬಂದು ನೋಡಿಬಿಲ್ಲನೆತ್ತಿದ್ದಾಚಕ್ಕನೇ
ಅರುವಿಂದ ಲೋಚನೆ ಮಾಲಿ ಹಾಕಲು ಘಕ್ಕನೇ
ವೃಂದ ಕಾಣುತ ಹೆದರಿತುಧಕ್ಕನೇ
ನಮ್ಮ ತಂದೆ ಮಹಿಪತಿ ನಂದನ ಪ್ರಭು ಠಕ್ಕನೇ ಪಾಲಕ್ಕುನೇ ೫

೩೧
ನೋಡುವ ಬನ್ನಿ ಪೂಜೆ ಮಾಡುವ ಬನ್ನಿ |
ಪಾಡಿ ನಲಿದಾಡುತಲಿ ಎನ್ನೊಡೆಯಾ ಲಿಂಗಗ ಪ
ದೇಹ ದೇವಾಲಯದಲ್ಲಿ ಹೃದಯ ಜಲ ಹರಿಯಲಿ |
ಊಹಿಸಿ ನೆಲೆಯಾಗಿ ಹೊಳೆವ ಆತ್ಮಲಿಂಗಗ ೧
ಜ್ಞಾನದಭಿಷೇಕ ಸಮ್ಯಕ್ ಜ್ಞಾನದಾ ವಸ್ತ್ರ ನೀಡಿ |
ಧ್ಯಾನದೀಪಾ ಸಂಚಿತದ ಧೂಪಾರತಿಯಾ ಲಿಂಗಗ ೨
ಭಾವಭಕ್ತಿ ಗಂಧಾಕ್ಷತೆ ಸುಮನ ಪುಪ್ಪದಲಿಂದು
ಅವಗು ಸುವಾಸನೆಯು ಪರಿಮಳ ಲಿಂಗಗ ೩
ಅನುಭವ ನೈವೇದ್ಯವು ಅನುದಿನಾನಂದ ಸೇವೆ
ಘನ ಗುರು ಮಹಿಪತಿ ಸುತ ಪ್ರಭುಲಿಂಗಗ ೪

೬೩೨
ನೋಡೊ ನೋಡೋ ನಿನ್ನೊಳು ನಿಜಾ ಪ
ಮೂಢತನವ ಬಿಟ್ಟು ಕೂಡಿ ಭಾವ ಭಕ್ತಿಯಾ |
ಪಾಡಿ ಕೊಂಡಾಡಿ ಸೂರ್ಯಾಡೆಲೋ ಹರಿನಾಮಾ ಅ.ಪ
ನಾನು ನನ್ನದು ಯಂದು ಹೀನ ವೃತ್ತಿಗೆ ಬಿದ್ದು |
ನಾನಾ ಬವಣೆಯಲ್ಲಿ ತೊಳಲುತ ತೊಳಲುತ |
ಗಳೆವರೇ ದಿನವನು ೧
ಸನ್ನುತ ಗುರುಪಾದ ಮನ್ನಿಸಿ ಪಡೆಯಲೋ ಬೋಧಾ |
ಬನ್ನ ಬಡುವದೇನು ಕಣ್ಣದೆರೆನ್ನಾರೆ ತನ್ನತಾ ಮರೆವರೆ ೨
ಗುರುಮಹಿಪತಿ ಸ್ವಾಮಿ ಸುರಮುನಿಜನ ಪ್ರೇಮಿ |
ಮೊರೆ ಹೊಕ್ಕವರ ಕೈಯ್ಯಾ ಜರಿಯೂತಾ ಮರಿಯಾ |
ನೀ ನರಿಯದೆ ಕೆಡಬ್ಯಾಡಾ ೩

೨೬೧
ಪಾದಾನಂಬು ಮನವೇ|ಶ್ರೀರಂಗಯ್ಯನ|
ಪಾದಾನಂಬು ಮನವೇ ವೇದಕಗೋಚರವಾದಾ ಪ
ಹೆಜ್ಜೆಯರಡರೊಳು ಮೂಜಗವಡಗಿಸಿ|
ಸಜ್ಜನರಿಗೊಸುಗ ನಿರ್ಜರ ನದಿಯ ಪಡೆದಾ ೧
ಬಿಸಜಾಸಖಾ-ತನುಜ ಎಸಿಯೇ ವಾಸು ಕೀಶರಾ|
ವಸುಧೆಯನ್ನು ತೆಗ್ಗಿಸಿ ವಾಸವ ಜನ ಕಾಯ್ದಾ೨
ಪಲವು ಕಾಲದಿ ಮುನಿ ಮುಳಿದ ಕಾರಣದಿಂದ
ನೆಲದೊಳು ಶಿಲೆಯಾದ ಲಲನೆಯ ನುದ್ದರಿಸಿದ ೩
ಮದವೇರಿ ಕುರುರಾಯ ಮೊದಲೇ ತಾಏಳದಿರೆ|
ಬುಧಜನ ನೋಡಲಾಗ ವದಗ ದುರುಳಿಸಿದಾ ೪
ಇಂದು ಧರಜರಕೈಯ್ಯಾ ಮದನೆಯನು ಕೊಳುವಾ|
ತಂದೆ ಮಹಿಪತಿ ಸ್ವಾಮಿ ನಂದನ ಜೀವನವಾದಾ ೫

೪೭೯
ಪಾದುಕವೇ ಗುರು ಪಾದುಕವೇ |
ಪಾದುಕವೇ ಗತಿ ದಾಯಕವೇ ಪ
ಕಲ್ಪತರು ಬೇಡಿದಲ್ಪವ ಕೊಡುವದು |
ಕಲ್ಪಿಸದೀವುದ ಕಲ್ಪಿತ ಫಲಗಳ ೧
ದಾರುಶಿಲೆಯ ವಂದವಾರಿಸ ಲರಿಯದು |
ತೋರುವಫಾದ್ರಿ ವಿದಾರಿಸಿ ನೂಕುವಾ ೨
ತಂದೆ ಮಹೀಪತಿ ದ್ವಂದ್ವ ಪಾದಕ ಹೊಂದಿ |
ವಂದ್ಯ ಸರ್ವರಿಗಾಗಿ ನಂದನ ಸಲಹುವ ೩

೫೩
ಪಾರ್ವತಿಪತಿ ಆರ್ವರಾಭಿಷ್ಟಿಯ
ಸರ್ವಪೂರಿಸಿ ತನ್ನಿಜಪದ ಸೇವಕನಿಗೆ
ಕರುಣವ ಬೀರ್ವನಿಗೆ
ಚರಿತ ಆ ಪೂರ್ವನಿಗಾರತಿಯಾ ಬೆಳಗಿರೇ ಸೋ ೧
ತಾರ್ಕು ಪದೇಶಿತಾ ಸರ್ಕನೆ
ಕರ್ಕಶ ಮಾರ್ಗವ ಬಿಡಿಸುವ ಅತಕ್ರ್ಯನಿಗೆ
ಅಘತಮರ್ಕನಿಗೆ ಸುರಸ
ಪರ್ಕನಿಗಾರತಿಯಾ ಬೆಳಗೀರೇ ಸೋ ೨
ಅಂಬುಶಶಿಬಿಂಬಾಂಕಿತ ಜಟೆ
ಅಂಬಕತ್ರಯ ಶಾಂಭವ ವಾಸೆ ಚಿದಂಬರಗೆ
ಗಜಚರ್ಮಾಂಬರಗೆ ಹರಸಿ
ಶ್ವಂಭರಗಾರತಿಯ ಬೆಳಗಿರೇ ಸೋ೩
ಕರ್ಪುರ ಗೌರವತನು
ತೋರ್ಪುವ ಸರ್ಪಾಭರಣಗಳಲಿ ಶೋಭಿಸುತಿರ್ಪನಿಗೆ
ಹತ ಕಂರ್ದಪನಿಗೆ
ಸುಜ್ಞಾನ ದರ್ಪಣೆಗಾರತಿಯಾ ಬೆಳಗೀರೆ ಸೋ ೪
ಕುಂದದಿ ಆನಂದದಿ ಮಹೀಪತಿ
ನಂದನ ಸಲಹುವ ಘನ ಅಶಿತ
ಕಂದರಿಗೆ ಪೂಜಿತ ಇಂದರಗೆ
ಸದ್ಗುಣ ಸಾಂದರ ಗಾರತಿಯಾಬೆಳಗೀರೆ ಸೋ ೫

೨೬೩
ಪಾಲಿಸಯ್ಯ ಎನ್ನ ಪಾದಪದ್ಮದೋರಿ ನೀ|
ಬಾಲಲೀಲೆ ದೋರ್ವೆ ಗೋಪಾಲ ಬಾಲರನ್ನನೇ ಪ
ನಂದ ನಂದ ನಂದು ಓಡಿ ನಂದನೆಯಾ ಭಾವಕಾಗಿ|
ಬಂದ ಬಂದು ದುರಿತವನು ಬಂದು ಬಂದು ಹರಿಸಿ|
ಛಂದ ಛಂದದಿಂದ ಭಕ್ತರೈವರನು ಕಾಯ್ವೆ ಮು
ಕುಂದ ಕುಂದರದನ ದಯಸಿಂಧು ಸಿಂಧು ವಾಸನೆ ೧
ನಾಗನಾಗ ಶಯನ ಯನ್ನ ರಕ್ಷಿಸೆಂದು ಕರೆಯ ಕೇಳಿ|
ನಾಗ ನಾಗದವನ ಬಿಟ್ಟು ಓರ್ವನೇ ಮಾರುತಿಯಾ|
ವೇಗ ವೇಗದಿಂದ ಬಂದು ಪ್ರಾಣನುಳಹಿದೇ ನಿಗ|
ಮಾಗ-ಮಾಗೋಚರ ಭೋಗ ಭೋಗಗನ ವ್ಯಾಪ್ತನೇ೨
ಸುಂದ್ರ ಇಂದ್ರ ಚಾಪದಂತೆ ಪೊಳೆವ ಭ್ರೂಲತೆಯು||
ಪೇಂದ್ರ ಚಂದ್ರ ಧರನುತ ಮಂದ್ರಗಿರಿಧರ ಗುಣ|
ಸಾಂದ್ರ ಚಂದ್ರಕುಲ ಸಿರೋಮಣೀ ವಾರಜಾಕ್ಷಯಾದ|
ವೇಂದ್ರ ಇಂದ್ರನುತ ಮಹಿಪತಿ ನಂದ ನೋಡೆಯನೇ೩

೨೬೪
ಪಾಲಿಸೆನ್ನಾ ದೀನ ದಯಾಳಾಪ
ಪಾಲಿಸೆನ್ನ ಸಂವಿಶಾಲ ನಯನಾ|
ಶ್ರೀಲತಾಂಗಿಯ ಲೋಲ ಮುಕುಂದಾ ೧
ಅಂಬುರುಹ ಪಾಣ್ಯಾಂಬುಜ ಭವನುತ|
ಕುಂಭಿನಿ ಭಯಹರ ಅಂಬುಧಿವಾಸ೨
ನಂದ ನಂದನಾನಂದ ಸ್ವರೂಪಾ|
ನಂದಿವಾಹನಾ ವಂದ್ಯನೆ ಕೃಷ್ಣಾ೩

೪೮೦
ಪಾಲಿಸೋ ಶ್ರೀ ಗುರುವೇ ಯನ್ನ ನೀ ಪ
ಮರವಿನ ಕತ್ತಲಿ ಮನೆಯೊಳಗಿರುವೇ |
ಅರವಿನ ಬೆಳಗಿಗೆ ಯಂತು ನಾ ಬರುವೆ ೧
ವಿಷಯದ ಸುಖದಲಿ ಅನುದಿನ ಬೆರೆವೇ |
ಕುಸುಮನಾಭನ ಸೇವೆಯಲಿ ಜರೆವೇ ೨
ತಂದೆ ಮಹಿಪತಿ ಸುತ ಸುರ ತರುವೇ |
ಛಂದದಿಯಚ್ಚರಿಸೈ ಸುಖ ತರುವೇ ೩

೩೩
ಪಾಹಿಮಾಂ ಪಾಹಿ | ಶಿವಹರ ಮೃಡ ಶಂಭೋ | ಪ
ಅದ್ರಿಧರ ಪ್ರಿಯ ಅದ್ರಿ ಕೃತಾಲಯ |
ಅದ್ರಿಜಾಮಾತಾದ್ರಿ ರಿಪುನುತ |
ಅದ್ರಿಜೆ ಪತಿ ಪಾಪಾದ್ರಿ ಕುಲಿಶಕನ |
ಕಾದ್ರಿಶರಾಸನ ಮುದ್ರಿತ ಪಾಣೇ೧
ಉನ್ನತದಿಂದಲಿ ಮನ್ಮಥ ಬರಲುದ |
ಹನ್ಮಾಡಿದ ಷಣ್ಮುಖ ಜನಕನೆ |
ಉನ್ಮನಯೊಗಿ ಸನ್ನುತ ಲೀಲಾ |
ಜನ್ಮರಹಿತ ಘನ ಚಿನ್ಮಯ ರೂಪಾ || ೨
ಬರಿಸಿದೆ ಗಂಗೆಯ ನಿರಿಸಿದೆ ಜಡೆಯೊಳು |
ಧರಿಸಿದೆ ಚಂದ್ರನ ಮೆರೆಸಿದೆ ಭಕ್ತರ |
ಗುರುಮಹೀಪತಿ ಯಂಕುರಿಸಿದ ಬಾಲನ |
ಸಿರಸದಲಿಡು ನಿಜ ಪರಸದ ಕೈಯಾ | ೩

೨೬೭
ಪೂಜೆಯ ನಾನೇನ ಮಾಡುವೆ|ವಇಹಾ
ರಾಜರಾಜ ಕುರುಣಾನಂದ ಮೂರುತಿ ಹರಿಯೇ ಪ
ಧ್ಯಾನಧಾರಣ ಮಂಗಳ ಮೂರ್ತಿಯ ಮಾಡುವೆನೆಂದರೆ|
ನಿನ್ನ ಸುಖದ ನೆಲೆಯ ಇಂದಿರಾ ದೇವಿಯರಿಯಳು ಹರಿಯೇ ೧
ಶಂಖೋದಕದಿ ಅಭಿಷೇಕ ಮಾಡುವನೆಂದರೆ|ನಿನ್ನಪದ
ಪಂಕಜದಲಿ ಭಾಗಿರಥಿ ಬಂದಳೂ ಹರಿಯೇ೨
ವಸ್ತ್ರವನುಡಿಸುವೆನೆಂದರೆ ದ್ರೌಪದಿಯವಸರದಿ|ನಿನ್ನಯ
ವಸ್ತ್ರದಿಂಡಿನ ಎಣಿಕೆಯ ದೋರದೆನಗೆ ಹರಿಯೇ೩
ಗಂಧಪುಷ್ಪವನೀವೆನೆಂದರೆ ನಿನ್ನ ಚರಣಾಬ್ಜದಾ|ಮಕ
ರಂದಕೆ ಭ್ರಮರ ಅಜಭವರಾದರು ಹರಿಯೇ ೪
ಆರೋಗಣೆಯ ಮಾಡಿಸುವೆನೆಂದರೆ ನಿನ್ನಕೈಯದಿ|ಸುರರು
ಆರೋಗಣೆಯ ಮಾಡಿ ಅಮರರಾದರು ಹರಿಯೇ ೫
ನೀರಾಂಜನ ಮಾಡುವನೆಂದರೆ ಕೋಟಿ ಸೂರ್ಯಪ್ರಭೆಯತೇಜ|
ಮೀರಿತು ಸ್ತುತಿಗಿನ್ನು ಶ್ರುತಿಗಳು ನಿಂತವು ಹರಿಯೇ೬
ಗುರುವರ ಮಹೀಪತಿನಂದನ ಸಾರಥಿ|ನಿನ್ನ
ಸ್ಮರಣೆಯ ಕೊಟ್ಟನುದಿನದಿ ರಕ್ಷಿಸುಹರಿಯೇ೭

೫೮
ಪ್ರಾಣನ್ನೋಡೀರೇ ಮುಖ್ಯ ಪ್ರಾಣನ್ನೋಡಿರೇ ಪ
ಕ್ಷೋಣಿಯೊಳಗ ಸುಖ ಬೀರುವ ಪಾದನ
ಚರಿತಾ ಸದ್ಗುಣ ಭರಿತಾ ಅ.ಪ.
ನರಲೀಲೆಯಲವ – ತರಿಸದ
ಅಂಜನಿ ಸುತ-ನೊ ಮಹಾದ್ಬುತನೋ
ತರಣಿಯ ಮುಟ್ಟಲು ಹಾರಿದ ಬಾಲಕ
ಮಲೆಯೊ ವಿಕ್ರಮ ಸ್ಥಿತಿಯೋ ೧
ಸುರರಾಯುಧವನೆ ಲೆಕ್ಕಿಸ ಕಪಿ
ಯಾಗ್ರಣಿಯೊ ವಜ್ರದ ಖಣಿಯೋ
ಶರಣರ ವಾಂಛಿತ ಪೂರಿಪ ಮೂಲೋಕ
ಗುರುವೋ ಕಲ್ಪ ತರುವೋ೨
ರಾಮ ಪದಾಂಬುಜ ಕೊಂಬ ಪರಾಗ
ಮಧುಪನೋ ದೇವಾಧಿ ಪನೋ
ಪ್ರೇಮದಿ ರಣದಲಿ ಹರಿರಥವಾದ
ಮೂರುತಿಯೋ ಪುಣ್ಯ ಮೂರುತಿಯೋ೩
ತಾಮಸ ರಾವಣ ನೆದಿಗೊತ್ತದ
ಕರಮೋ ಸಿಡಿಲದ ಧರಮೋ
ಮ್ಯೋಮಕ ಮೀರುವ ಹನುಮನ ಬಾಲದ
ಸರುಳೋ ದೈತ್ಯರ ಉರುಳೋ೪
ಕ್ಷಣದಲಿ ಸಂಜೀವನ ಗಿರಿ ತಂದಿಹ
ಪದವೋ ಸಾಧುರ ಮುದಮೋ
ವನಜ ಭವನ ಪದವಿಯ ಪಡಕೊಂಡಾ
ತಪಮೋ ತಾ ಅಪರೂಪಮೋ ೫
ನೆನಿಯಲು ದುರಿತ ನಿವಾರಿಪ ಕರುಣಾ
ನಿಧಿಯೋ ಭಕ್ತರ ಸುಧೆಯೋ
ಅನುದಿನ ಮಹಿಪತಿ ನಂದನ ಸಲಹುವ
ದಯಮೋ ಗತಿ ಆಶ್ರಯಮೋ ||೬

೨೬೮
ಫಲಹಾರವ ಮಾಡೋ ಪದುಮಲೋಚನನೆ|
ಒಲಿದು ಶ್ರೀ ಭೂದೇವಿ ಅರಸಿಯರೊಡನೆ ಪ
ಕದಳೀ ಕಪಿಥ್ಥಶರ್ಕರ ಮೋದದಿಂದಲೀ|
ಒದಗಿ ಬೆಂಡುಖರ್ಜೂರಿ ಘೃತಮೋಪ್ತದಿಂದಲಿ೧
ಕಳೆದ ಸಿಗುರಿಯಾ ಕಬ್ಬಿನ ಪೇರು ಬದರಿಯಾ|
ಬಲಿದ ಪರಿಮಳ ರುಚಿಗಳ ಒಪ್ಪನಿಂದಾ ೨
ವಸುಧೆಯೊಳುಳ್ಳ ಸಕಲ ಫಲಸಾರವಾ|
ಬಿಸಿಯಾದ ಪಲ್ಗೆನೆಯ ಮಧುಸಹಿತಾ ೩
ಗುರುಮಹೀಪತಿಸ್ವಾಮಿ ಶರಣ ರಕ್ಷಕನೇಮಿ|
ಸುರರಿಗಮೃತವೆರೆದಾನಂದ ಕರದಲಿ೪

೨೭೮
ಬಂದ ಜನ್ಮ ಬರಲಂಜಲ್ಯಾತ ಕಗೋ
ವಿಂದ ನಿನ್ನೆಚ್ಚೆರ ವೆನಗಿದ್ದರ ಸಾಕು ಗೋವಿಂದ ಗೋವಿಂದ ಪ
ಒಂದೆರಡಲ್ಲಾ ಶತ ಸಹಸ್ರವಾಗಲಿ
ಛಂದದಿನಿನ್ನ ನಾಮಾ ಜಿವ್ಹೆಯ ಲಿರಲಿ೧
ಹರಿಪರಂದೈವೆಂದು ಅರುಹಿನಾ ಮನೆಲಿದ್ದು
ಹರಿಯದಿರಲಿ ಮನ ವಿಷಯಕ ಬಿದ್ದು ೨
ಮುಕುತಿಗಿ ಕುತಿಯಂಬಾ ಹಂಗಿನ ನೆಲೆಯಾಕ
ಭಕುತಿ-ಯನಿ ಪನಿಜ ಸುಖವಿರಲಿಕ್ಕೆ ೩
ಗುರುಮಹಿಪತಿ ಸ್ವಾಮಿ ನಿನ್ನ ಶರಣರಾ
ಕರದೊಳಾಡುವ ಬಗೆ ಮೃಗ ಪಶುವಾ೪

ಮಹತ್ವದ ಜಾಲತಾಣಗಳು

ಇ ಆಡಳಿತ ಜಾಲತಾಣ

ಇ-ಸೇವೆಗಳು

ಸಾಮಾನ್ಯ ಅಂಕಿ ಅಂಶ

ಸರ್ಕಾರದ ಆ್ಯಪ್ ಗಳು

ಕೇಂದ್ರ ಸರ್ಕಾರದ ಜಾಲತಾಣಗಳು

ತಾಂತ್ರಿಕ‌ ಜಾಲತಾಣಗಳು

ಕನ್ನಡ ಸಂಬಂಧಿ ಜಾಲತಾಣಗಳು

ಆಯೋಗಗಳು

ನ್ಯಾಯಾಲಯಗಳು

ಡೌನ್‌ಲೋಡ್‌ಗಳು