ಕಾಖಂಡಕಿ ಶ್ರೀಕೃಷ್ಣದಾಸರು – Page 6 – ಸಮಗ್ರ ದಾಸ ಸಾಹಿತ್ಯ

೨೭೯
ಬಂದನಮ್ಮಾ ಬಂದನಮ್ಮಾ ನಮ್ಮ ರಂಗನು|
ಇಂದು ನಮ್ಮ ಪೂರ್ವಾರ್ಜಿತಫಲ ವದಗಿ ಬಂದಿತೆಂದು ಪ
ಬಿಸಜಾಸಖ ಶತಕೋಟಕಿ ಸಮತೇಜ ದೊಪ್ಪತಿಹನಖವು|
ಯೆಶೆವ ಅಂದುಗೆ ಗೆಜ್ಜೆಯಿಂದ ಘಲುಘಲುಕೆನುತಾ ೧
ಉಟ್ಟ ಪೀತಾಂಬರದ ಮ್ಯಾಲ ವಡ್ಯಾಣವನಿಟ್ಟುಕೊಂಡು|
ಕಟ್ಟಿದ ಸು ಕಿಂಕಿಣಿಗಳಿಂದ ಝಣ ಝಣ ಕೆನುತಾ೨
ಕರ ಕಡಿಗ ವಂಕಿ ತೋಳ ತಾಯಿತ ಕೇಯೂರವನು|
ಕೊರಳ ಕೌಸ್ತುಭ ವನಮಾಲೆಯಿಂದ ಪೊಳವುತಾ ೩
ಥಳ ಥಳ ಹೊಳೆವಾ ಕುಂಡಲ ಕದಪು ಚಲ್ವಿನಿಂದಾ|
ದಾಳಿಂಬ ದಶನಾ ಸುನಶಿಕದೆಸಳು ಕಣ್ಣಿಂದಾ ೪
ಸ್ಮರನಾಥನು ಸೋಲಿಪ ಭ್ರೂಲತೆಯು ಫಣಿಯಲ್ಲಿಕ|
ಸ್ತೂರಿಯನಿಟ್ಟು ಹರಿಮಯ ಕಿರೀಟಕಾವಳಿಮ್ಯಾಲಿರಿಸಿಕೊಂಡು೫
ಬೆರಳುಂಗುರ ಕೈಯಿಂದಾ ಕೊಳಲ
ಪಿಡಿದು ಬಿಂಬಾಧರಕತಂದು|
ಪರಿ ಪರಿಯಲೂದುತಾ ಮಹಿಪತಿ ನಂದನ್ನ ಪ್ರೀಯನಾ ೬

೨೮೧
ಬಂದನೇಳೆ ದೇವಿ ರಂಗ ಮನೆಗೇ|
ಇಂದು ಮುಖಿ ನಿನ್ನ ಮನದಾ ನಂದ ಕೊಡಲು ಪ
ಮುಕ್ತಿ ಮಂಟಪದಲ್ಲಿ ಭಾಗವತ ರೊಡಗೂಡಿ|
ಭಕ್ತಿರಂಗದೊಳಾಡಿ ಸುಖವ ಸೂರ್ಯಾಡಿ ೧
ಗರುಡವಾಹನ ಪರಾಕೆಂಬ ಶೃತಿ ಭಟರು|
ಮೂರಾರು ಸಾಲ ಪಂಜಿನ ಬೆಳಗಿನಿಂದ ೨
ಸಕಲ ಸುಂದರ ರಾಶಿಯೆ ಎನಿಪ ಮೋಹನರೂಪ|
ಅಕಳಂತಕ ಬ್ರಹ್ಮಾದಿ ಸುರರೊಡೆಯಾ ೩
ಶರಣ ವತ್ಸಲ ದಯಾನಿಧಿ ದುರಿತ ಹರನೆಂಬ|
ಬಿರದ ಜಾಂಗಟೆ ಶಂಖ ಕೌಸಾಳರವದಿ ೪
ತನ್ನ ಭೃತ್ಯರ, ಭೃತ ಭೃತ್ಯನ ಕರೆದು|
ಮನ್ನಿಸುವ ಮಹಿಪತಿ ಸುತಪ್ರಾಣ ಪದಕಾ ೫

೬೪೪
ಬಂದು ಬಾರದಾಯಿತು ನೋಡಿ |
ಇಂದು ನರದೇಹ ಸಂಗವ ಮಾಡಿ ಪ
ಮುತ್ತಿನಂಥಾ ಜನುಮದಿ ಬಂದು |
ಚಿತ್ತ ಬೆರಿಯನು ವಿಷಯದಲಿಂದು ೧
ಸಾಧು ಸಂತರ ಮೊರೆ ಹೋಗಲಿಲ್ಲಾ |
ಹಾದಿ ತಪ್ಪಿ ಮುಕ್ತಿಯು ಹೋಯಿತಲ್ಲಾ ೨
ಆಹಾರ ನಿದ್ರೆ ಭಯ ರತಿಸಂದಾ |
ಅಹರ್ನಿಶಿಯಲಿದೇ ಮನದಂಗಾ ೩
ನಾನಾ ಶಾಸ್ತ್ರದ ಮಾರ್ಗಕ ಹೋದೀ |
ಗಾಣದೆತ್ತಿನಂದದಿ ಕುರುಡಾದಿ ೪
ತಂದೆ ಮಹಿಪತಿ ಸ್ವಾಮಿಯ ನೆನೆದು |
ಬಂದದ್ದು ಸಾರ್ಥಕ ಮಾಡದೆ ಬೆರೆದು ೫

೫೯
ಬಣ್ಣಿಸಲಳವಲ್ಲ ನಿಮ್ಮ ಪ್ರ
ಸನ್ನ ಮೂರುತಿ ಯಲಗೂರ ವಾಸ ಹನುಮಾ ಪ
ಅಂಜನಿಯುದರದಲಿ ಜನಿಸೀ ತೇಜ
ಪುಂಜ ರಾಮನ ಸೇವೆಯಲಿ ಮನನಿಲಿಸಿ
ಕಂಜ ಛವನ ಪಟ್ಟ ಧರಿಸಿ ಬಲು
ರಂಜನೆ ಮೆರೆದ ಭಕ್ತಾಗ್ರಣಿಯೆನಿಸಿ ೧
ಜ್ಞಾನ ಭಕುತ ವೈರಾಗ್ಯದಲಿ ಸರಿ
ಗಾಣಿನೋ ಸುರನರ ಉರಗ ಲೋಕದಲಿ
ಮಾನನಿಧಿಯೇ ವಿಕ್ರಮದಲಿ ಚರ
ಣಾಗತೆ ರಕ್ಷಕ ನೇಮ ಬರದಿರಲಿ೨
ಮೂರವ ತಾರದಿ ಬಂದು ದೀನೋ
ದ್ಧಾರಣ ಮಾಡಿದೆ ಸದ್ಬೋಧ ಗರದು
ಕಾರುಣಿ ಗುರುವಾಗೆಂದೆಂದು ಸಹ
ಕಾರದಿ ಮಹಿಪತಿ ಸುತಗೊಲಿದಿಂದು ೩

೨೬೯
ಬರದು ಬಂದು ದೂರಬ್ಯಾಡರೇ ನೀವೆಲ್ಲಾ
ಧರಿಯೊಳಾಡುವ ನುಡಿಗಳೊಪ್ಪುವದಿಲ್ಲಾ
ಹರಿಯಾ ನೆಲೆ ತಿಳಿಯಲು ಅಳವಲ್ಲಾ
ದುರಳತನ ನಡಿಗೆಂದು ಇವಸಲ್ಲಾ ೧
ಮುನಿನೆಂದು ಗುರುತ ವಿಡ ಬ್ಯಾಡಿರಮ್ಮಾ
ಮನುಜರಂತೆ ಲೀಲೆ ದೋರುವ ರೀಗಮ್ಮಾ
ಮುನಿಮನೋಹರ ದಾಯಕ ಪರಬೊಮ್ಮ
ಘನ ಪುಣ್ಯದಿಂದ ಶಿಶು ವಾದನಮ್ಮ ೨
ಹುಟ್ಟುತಲಿ ಸ್ವಹಿತದ ನುಡಿಯಾಡಿ
ನೆಟ್ಟ ನೆವೆಯ ಮುನಿಗೆ ಹಾದಿಬೇಡಿ
ಮುಟ್ಟಿ ಗೋಕುಲಕ ಬಂದದಯ ಮಾಡಿ
ಇಷ್ಟರೊಳು ತಿಳಿಯ ಬಾರದಿನ್ನು ನೋಡಿ ೩
ಚಿಕ್ಕತನದಲಿ ಮೊಲೆಗುಡ ಬಂದಾ
ರಕ್ಕಸಿಯ ಅಸು ಹೀರಿದಾವ ಕೊಂದಾ
ಕಕ್ಕಸದ ಕಾಳಿಂಗ ನೆಳೆದು ತಂದಾ
ಮಕ್ಕೂಳಾಟಿಕೆ ಇದೇನು ನೋಡಿಛಂದಾ೪
ನಿರುತ ತಮ್ಮಾ ತಮ್ಮ ಮನಿಯೊಳಿಹನೆಂದು
ಹರಿಯಗುಣ ಹೇಳುವಿರಿ ಎಲ್ಲ ಬಂದು
ಅರಿತು ನೋಡಲು ಒಬ್ಬ ಬಹುರೂಪ ವಿಡಿದು
ಚರಿಪಗುರು ಮಹಿಪತಿಸ್ವಾಮಿಯಿಂದ೫

೭೪೫
ಬರಲು ಹಾರುವ ಮನೆಗೆ ಮೊರೆವರಯ್ಯಾ ಭವಿಯಂದು
ಅರಿಯರು ಭವಿಯಾರೆಂಬುದನು | ಶರೀರದೊಳು
ಖೋಯಂದು ಕೂಗುತ ಇರುವ ಲಿಂಗ ಕಾಣದವ ಭವಿ |
ಹರದೊಡ್ಡವನೆಂದು ಹರಿಯ ನಿಂದಿಸುವನೇ ಭವಿ |
ಧರಿಯೊಳು ಭವಿಗಳು ತಾವಾಗಿ | ಪರರಿಗೆ ಭವಿಯಂಬವಗ
ನರಕ ತಪ್ಪದಯ್ಯಾ ಮಹಾಗುರು
ಮಹಿಪತಿರಾಯ ನಂದನ ಪ್ರಭುವೆ ೭

ನುಡಿ-೩: ತ್ರಿವಿಧ ಪೂಜೆ
೬೫
ಬಲವಂತರೋಳಗೆ ಬಲವಂತ ಹನುಮಾ |
ನಳಿನಸಂಭವ ಕರ್ತನಾದ ಮಹಿಮಾ ಪ
ಗಾವುದೈದತ್ತು ಸಾವಿರದಲಿಹ ಪರ್ವತವ |
ಝಾವ ಮೂರಕೆ ತಂದ ನೋಡಿನೇಮಾ೧
ಪೋಗಲಾಗಮ್ಯವಾಗಿದ್ದ ಸ್ಥಳವನೇ ಪೊಕ್ಕು |
ಸೌಗಂಧಿಕಾ ಪುಷ್ಪ ತಂದ ಭೀಮಾ೨
ವೇದಾಂತ ಸಾಗರದಿ ಖಳನಬಳಿಪ ಹಲವು | ದು-
ರ್ವಾದಿ ಜಲಚರರ ಬಾಯಿಬಿಗಿದ ಮಹಿಮಾ ೩
ಗುರು ಮಹೀಪತಿ ಸ್ವಾಮಿ ರಾಮಚಂದ್ರ ಪ್ರೀಯ |
ದುರಿತೌಘದ್ಯುಮಣಿ ಎನಿಪ ನಾಮಾ ೪

ವಚನಗಳು
೭೪೪
ಬಲ್ಲೆ ಬಲ್ಲೆನೆಂಬರು ಬಲ್ಲವಿಕಿ ಕೀಲು ಮರೆವರು |
ಬಲ್ಲವಿಕಿ ಮಾರ್ಗವ ಮೆಚ್ಚಿ ಬಲ್ಲರಕೂಡ ಶಣಸುವರು |
ಮಂಡೆಗೆ ಬೂದಿ ರುದ್ರಾಕ್ಷವನಿಟ್ಟು
ದಿಂಡೇರು ಶಿವಭಕ್ತರೆಂದು ಹೆಮ್ಮಿಲಿ | ಕಂಡ ಜಾತಿಗಳಲಿ
ಕೊಳವಮೆದ್ದು | ಜೊಂಡು ಗಡ್ಡವ ಬಿಟ್ಟು | ಮಿಂಡೇರ
ಘಲ್ಲಿಸುವ ತುಂಡವರೆತ್ತ ಶಿವಶÀರಣರೆತ್ತ | ಆ ಮೊಂಡ
ರೆಳೆದೊಯ್ದು ತುಂಡಿಸಿ ಮೂಗನು ಭಂಡ ಸಾಸಿವೆಯ ತುಂಬಿ
ದಂಡಿಸುವಾ ಯಮನೇ ಗುರುಜಂಗ ಮನಯ್ಯಾ ಮಹಾಗುರು
ಮಹಿಪತಿರಾಯ ನಂದನ ಪ್ರಭುವೇ

೭೧
ಬಾರವ್ವ ಜಗದಂಬೆ ಶರಣೆಂದು ಬಲಗೊಂಬೆ |
ದೋರಿ ನಿನ್ನ ಪಾದ ಪದ್ಮ ಪೂಜೆಗೊಳೆ ಸುಖದಿಂಬೆ ಪ
ಕೈವಲ್ಯ – ಗತಿ – ದಾಯಿ ಮೂರು ಲೋಕದಾ ತಾಯೀ
ಆವಾಗ ನೆನೆವೆ ನಿಮ್ಮ ಅರ್ಥಿಯಿಂದಾತುಕೊ ಬಾಯೀ ೧
ಅಷ್ಟದಳ ಗದ್ದುಗೆಯಲಿ ಭಕ್ತಿರಂಗ ಹಾಕಿರಲೀ
ಇಷ್ಟೇನು ಜ್ಞಾನದೀಪಾ ಕಟ್ಟಿ ನಿಜದ್ಯಾಸ ಮಾಲೀ೨
ವೇದಶಾಸ್ತ್ರಗಳಿಗೆ ಮುನ್ನೆ ಮಹಿಮೆ ತಿಳಿಯದು ಪ್ರಸನ್ನೆ
ಆದಿ ಶಕ್ತಿ ಅಪ್ರಮೇಯೇ ಎಂದು ಸುರರು ನಮೋ ಎನ್ನೆ೩
ಅನಾಹತ ಗರ್ಜನದಾ ತಾಳ ಮದ್ದಲೆಗಳಿಂದಾ
ಅನುವಾಗಿ ನಾಮ ಪಾಡಿ ಗೊಂದಲ್ಹಾ ಕುವೆನುಛಂಧಾ೪
ಕೊಂಡಾಡುತಿಹೆ ನಿನ್ನ ಗುರು ಮಹಿಪತಿಜನಾ ಮಂಡಿಮ್ಯಾಲ ಕೈಯನಿಟ್ಟು ಪಾಲಿಸೇ ಅನುದಿನಾ೫

೨೭೩
ಬಾರೆನ್ನ ಸಖಿಯೇ ಕರೆದು ತೋರಿಸೇ ಪ
ಕರೆದು ತೋರಿಸೇ ಕಂಜನಯ್ಯಾನಾ|
ಕರಿವರ ದಾಯಕ ಕರುಣಾ ಸಾಗರನಾ ೧
ಸರಸಿಜ ಲೋಚನ ಮುಕುಟ ಕುಂಡಲನಾ|
ಸಿರಿವತ್ಸ ಕೌಸ್ತುಭ ಕೇಯೂರ ಧರನಾ ೨
ಮದನ ಶರಕ ಗುರು ಮಾಡುವರೇನೇ|
ಮಧುಹರ ಮುನಿವದು ಉಚಿತ ವೇನೇ ೩
ಒಂದರಗಳಿಗೆಯ ಮರೆದಿರ ಲಾರೆ|
ಇಂದು ನೀ ಧನ್ಯಳ ಮಾಡಲೆ ನೀರೆ೪
ಬೆರೆದು ಬಿಡುವನಲ್ಲಾ ಸಕಲಂತರ್ಯಾಮಿ|
ನೆರೆದನು ಗುರು ಮಹಿಪತಿ ಸುತಸ್ವಾಮಿ೫

೯೨
ಬಾರೈಯ್ಯಾ ಗೋವಿಂದಾ | ಕೀರ್ತನೆಗೆ ಮುಕುಂದಾ |
ಬೀರುತ ನಿಮ್ಮ ಮಹಿಮೆ ಸ್ವಾನಂದ ಪುರದಿಂದಾ ಪ
ಕೋಂಡಾಡುವಂತೆ ಕೀರ್ತಿ ನೀಡಬೇಕು ನಿಜಸ್ಪೂರ್ತಿ |
ಮಂಡೀಸಿ ಭಕ್ತರಂಗಾ ಹೇಳುವೆ ನಿಮ್ಮ ವಾರ್ತೆ ೧
ವೈಕುಂಠ ಯೋಗಿವರಿಯಾ ಸ್ಥಳಸುರ ಮುನಿರಾಯಾ |
ನೀ ಕರಿಸಿ ಪಾಡುವಲ್ಲಿ ಇಹನೆಂದೆ ನಿಶ್ಚಯಾ ೨
ಕಂದನ ತೊದಲು ಮಾತಾ ಕೇಳಿ ಹಿಗ್ಗುವಂತೆ ಮಾತಾ |
ತಂದೆ ಮಹಿಪತಿ – ಸ್ವಾಮಿ ಬಲವಾಗೋ ಶ್ರೀ ಕಾಂತಾ೩

೯೮
ಬಾರೈಯ್ಯಾ ಗೋವಿಂದಾ ನಂದಾ |
ಶ್ರೀವಧು ಲೋಲಾ ಸುರಜನ ಪಾಲಾ |
ಸುಮನಾಮಾಲಧರ ಘನ ನೀಲಾ ೧
ಭುವನಾಧಾರ ಭೂಬಯ ಹಾರಾ |
ಭಾವಿಕ ಜನರಾ ದುರಿತ ನಿವಾರಾ ೨
ದಾನವ ಮಥನಾ ಕೌಸ್ತು ಭಾಭರಣಾ |
ಘನಗುರು ಮಹಿಪತಿ ನಂದನ ಪ್ರಾಣ ೩

೨೭೪
ಬಾರೋ ಬಾರೋ ಕೋಪವಿನ್ಯಾತಕೆನ್ನ ಕೂಡಾ ರಂಗರಾಯಾ|
ಸಾರಿದ ನಿನ್ನರಸಿಯ ತಪ್ಪನೊಳ್ಪರೇ ರಂಗರಾಯಾ ಪ
ಚಲ್ವ ಕಣ್ದೆರೆವುತ ಮೊಗವತಿರಹುವರೇ ರಂಗರಾಯಾ|
ಹಲ್ಲವ ಮಸೆಯುತ ಘುಡುಘುಡಿಸುವರೇ ರಂಗರಾಯಾ ೧
ಭೀಕರಾಕೃತಿಯಾಗಿ ಕೊಡಲಿಯ ಪಿಡವರೇ ರಂಗರಾಯಾ|
ಏಕಾಂಕಿಯಾಗಿ ಕದ್ದು ತಿರುಗುವರೇ ರಂಗರಾಯಾ ೨
ಆಗೋಚರವಾಗದೇ ತುರಗೇರಿ ತ್ವರಿತದಿ ರಂಗರಾಯಾ|
ಸುಮದಿ ಬಾ ಮಹಿಪತಿ ಸುತ ಜೀವನ ರಂಗರಾಯಾ ೩

೯೭
ಬಾರೋ ಬಾರೋ ಮೋಹನಾ | ಶ್ರೀದೇವಾ ಪ
ವೃಷಭಾನು ಜಾನನ ಸರಸಿಜ ಬೃಂಗಾ |
ಶಶಿಧರ ವಂಶಾಭರಣಾ೧
ಮುನಿಜನ ವಂದಿತ ನಿರ್ಜರ ತುಂಗಾ |
ದನು ಚಾವಳಿ ಮದಹರಣಾ೨
ಮಹಿಪತಿ ಸುತ ಪ್ರಭು ಜಗದಂತರಂಗಾ |
ಇಹಪರದಾಯಕ ಕರುಣಾ ೩

೨೭೨
ಬಾಲನೇ ಗೋಪಿ ಬಾಲನೇ ಪ
ಮುದ್ದು ಕುಂಡಲಧರ ಮಿದ್ದು ಚಪ್ಪಿರವನು೧
ಎತ್ತಿಕೊಳಲು ಉಗುರೊತ್ತುವ ನೆದಿಯಲಿ ೨
ಗುರುಮಹಿಪತಿ ಪ್ರಭು ಚರಿತವ ತಿಳಿಯದು ೩

೨೭೫
ಬಾಲಲೀಲ ಲೋಲ ಕೃಷ್ಣನ|ನೆನೆವೆನಾ|
ಬಾಲಲೀಲ ಲೋಲ ಕೃಷ್ಣ ಈ ಲೋಕಾಳಿ ಪಾಲಿಪಾ|ವಿ-
ಶಾಲ ಬಾಲ ನೀಲಗಾತ್ರನಾ|ನೆನೆವೆನಾ ಪ
ಪಡುಲ ಕರಿಯಕಣ್ಣಲಿಟ್ಟರು|ಒಡನೆ ಕೇಳಿ ಕರ್ತನೃಪನ|
ಮಡದಿ ಜನಕನಹಿತ ಸರಿಕನಾ|ವೈರಿಯ
ಒಡಲಲುದಿಸಿದಾತ್ಮಭವನ|ಸಡಗರದಿ ಕಿರಿಯ ತಮ್ಮನ
ಪಡೆದ ಜನನಿಯಣ್ಣ ಕಂದನಾ||ನೆನೆವನಾ ೧
ಮುದದಲಿಂದ ಮಸುಧೆಯನ್ನು|ಎದೆಯಲೊತ್ತಿ ನಡೆವನಿಂದ|
ಒದಗಿ ತನ್ನ ಶರೀರ ತೊರೆದನಾ|ತಂದೆಯಾ
ವಿದಿತ ಮುತೈಯ್ಯನ ಮಗನ|ಚದುರತಮ್ಮನರಸಿ ಪಡೆದ
ಉರದಿ ಮಗಳ ಪ್ರಾಣದರಸನಾ||ನೆನೆವೆನಾ ೨
ನೃಪನಬಿಂಕ ಶಿಷ್ಯರಿಂದ|ಅಪಹರಿಸಿದವನ ಮಗನ|
ಚಪಲ ಬಾಣ ಬರಲು ಸ್ಥಳವನು|ತಪ್ಪಿಸಿ
ವಿಷದ ಹರಿಸಿ ಕಾಯ್ದೆನೈವರ|ನಿಪುಣ ಮಹೀಪತಿನಂದನ|
ಕೃಪೆಲಿ ಪೊರೆವ ಉತ್ತುಮೊತ್ಮನಾ||ನೆನೆವೆನಾ ೩

೬೩೮
ಬಿಡು ಬಿಡು ಆತ್ಮ ಸ್ತುತಿಯನು ಪರನಿಂದೆಯನು ಪ
ತನ್ನ ಗುಣವ ತಾನೇ ಹೊಗಳುತಲಿ |
ಅನ್ಯರ ದೂಷಿಸಲೇನು ೧
ತಾ ಕೋಡಗ ಮರಿ ಬನ ಹಳಿವಂತೆ |
ವ್ಯಾಕುಳ ಹಿಡಿದರೆ ತಾನು ೨
ಮಹಿಪತಿ ಸುತ ಪ್ರಭು ಬೋಧವ ಕೇಳುತ |
ಸ್ವಹಿತವ ಪಡಿಯೋ ನೀನು ೩

೬೪೧
ಬಿಡು ಬಿಡು ಮನವೇ ನಿನ್ನಾ ದುರ್ಗುಣದಾ ಸಂಗಾ |
ಪಿಡಿಯೋ ಸಾಧುಜನರಾ ನೆರಿಯಾ ಕಾವಾ ಶ್ರೀರಂಗಾ ಪ
ನೆನೆಯಲಿಕ್ಕೆ ವಿಷಯ ಸಂಗದಿಂದ ಕಾಮ ಕ್ರೋಧ |
ಜನಿಸಿ ಮೋಹ ಸ್ಮತಿಯಗೆಟ್ಟು ಕೆಡುವಿ ಮತಿಮಂದ ೧
ಗರಳ ವೇರಿದವಗ ಬೇವು ಸಿಹಿ ದೋರುವಂತೆ |
ನಿರುತ ಇಂದ್ರಿಯ ವಿಷಯ ಸುಖವು ಅದರಂತೆ ೨
ಪಿತ್ತವಡರಿದಾಗ ಎಂತು ಲೋಕ ತಿರುಗಿಹುದು |
ಮತ್ತ ಗುರು ಹಿರಿಯರ ಬಗೆವೀ ಮನುಜರಿವರೆಂದು ೩
ಎಂತು ಹೇಳಲಿ ನಿನಗ ಹರಿನಾಮ ನಂಬುಗೆಯಿಲ್ಲಾ |
ಪಂಥದರವ ಜ್ಞಾನದ ದೃಷ್ಟಿ ತೆರೆಯದಾಯಿತಲ್ಲಾ ೪
ತಂದೆ ಮಹಿಪತಿ ಸ್ವಾಮಿ ನಮಿಸಿ ಕೇಳು ಹಿತವಾ |
ಮಂದಭವದಿ ತೊಳಲ ಬ್ಯಾಡಾ ಹೊಂದು ನಿಜಪಥವಾ ೫

೨೭೬
ಬಿಡೆ ಬಿಡೆನೋ ನಿನ್ನಾ|ಅಡಿಗಳ ಯುಗಳನ್ನಾ ಪ
ಬಿಡೆ ಬಿಡೆನೋ ನಿನ್ನಾ|ಅಡಿಗಳ ಯುಗಳನ್ನಾ
ಬಿಡದಿಹ ಪಾವನ್ನಾ|
ಪೊಡವಿಯೊಳಗೆ|ಮೃಡ ಅಜರಿಗೆ ವಡಿಯ ನೀನೀಗ|
ಒಡಲ ಹೊಕ್ಕೆನು ಕರುಣಾ ನಿನಗ ೧
ಹಲವು ಜನ್ಮಂಗಳನು|ಬಲುತೆರ ಸೂಸಿದೆನು|
ನೆಲೆಗಾಆಣದೆ ನಾನು||
ಕೆಲವು ಮಾಡಿದಾ ಸಲೆ ಸುಕೃತವಾ|ಫಳದಿ ಶ್ರೀಪಾದಾ
ಸುಲಭದಿ ದೊರೆಕಿತು ದೀನೊದ್ದರನೆ ೨
ಮುನ್ನ ಮಾಡಿದ ಪರಿ|ಬನ್ನ ಬಡಿಸದೆ ಸಾರಿ|
ಚನ್ನಾಗೊಲಿಹರಿ|
ಯನ್ನ ಹೃದಯದಲಿ ಇನ್ನು ನಿಶಿದಿನಲಿ|ನೆನೆವ ಭಕುತಿಲಿ|
ಸನ್ನುತ ಮಹಿಪತಿ ನಂದನ ಪ್ರಭುವೇ೩

೧೪
ಬೆಳಗಾಯಿ ತೇಳಿರಯ್ಯಾ ಪ
ಬೆಳಗಾಯಿತೇಳೀ ರೈ ಇಳೆಯೊಳಭಿನವಮುನಿ |
ತಿಲಕ ಕರ ಪುಷ್ಕರದ ನೆಲೆಯ ಲೊಗದು |
ಬಲಿದ ವೈರಾಗ್ಯ ವೈರಾಗ್ಯ ಮುಂಬೆಳಗ ಸುಖ ತಂಗಾಳಿ |
ತಳಿಯೆ ಸತ್ಯ ಪೂರ್ಣರೆಂಬ ಹೊಳೆವ
ರವಿ ಉದಯಿಸಿದ ೧
ಮೊತ್ತವಾದ – ಜ್ಞಾನ ಕತ್ತಲೆಯನೊತ್ತಲು |
ನ್ಮತ್ತದುರ್ವಾದಿ ನಕ್ಷತ್ರದೆಡೆಗೆ |
ಮತ್ತ ಭವ ಚಂದ್ರ ಸರಿದತ್ತ ವೈಷ್ಣವರೆಂಬೊ | ಉತ್ತಮದ
ದ್ವಿಜ ರಿಂದ ಸುತ್ತುಗಟ್ಟಿ ಭಜಿಸುತಿದೆ ೨
ನೆರೆಭಾವ ಭಕುತಿ ರಥ ಚಕ್ರನೆರೆಯೆ |
ದುರಿತೌಘ ಮಂಜು ಮುಸುಕು ದೆರಿಯೇ |
ನೆರೆಯ ಭೂಸುರರಘ್ರ್ಯ ವೆರಿಯೆ ಸಂಚಿತ ಮೊದಲ |
ದುರುಳರ ಕುಮುದಸೊಕ್ಕುಮುರಿಯೆ
ಹಂಸನು ಮೆರಿಯೆ ೩
ಸಾಲ ಸ-ಚ್ಚಾಸ್ತ್ರಾ ದೇಳಿಗೆಗೆವಿದ್ವಜ್ಜ |
ನಾಳಿ ಝೇಂಕರಿಸುತಲಿ ಮ್ಯಾಲನಲಿಯಿ |
ಮೂಲ ರಘು ಪತಿಯ ದೇವಾಲಯದ ವಾದ್ಯಗಳು |
ಘೇಳೆನಿಪ ನಿಜ ವೇದ ಘೋಷ ಕೇಳ ಬರುತಿದೆ ಜನಕೆ೪
ಘನ ಪುಣ್ಯ ಪೂರ್ವಾದ್ರಿ ಕೊನಿಗೆ ಅರುಣಾಂಬರದಿ |
ವಿನುತ ಜ್ಞಾನದ ಕಿರಣವನೆ ಪಸರಿಸಿ |
ಜನದ ವಿದ್ಯದ ನಿದ್ರೆಯನೇ – ಜಾರಿಸಿ ಹೋದ |
ಮಹಿಪತಿ ನಂದನ ನುಭಿವದಿ ಕೀರ್ತಿ ಪಾಡಿದನು ೫

೨೭೭
ಬೆಳಗುವಾರತಿ ಬನ್ನಿ ಲಲನೆಯರೆಲ್ಲರು|
ಸುಲಭಾ ಭಕ್ತರಿಗಾದಾ ಚೆಲುವ ಶ್ರೀಕೃಷ್ಣಗ ಪ
ಮಲ್ಲಯುದ್ದವನೆ ಮಾಡಿ ಮಾವ ಕಂಸನ ಕೊಂದು
ಇಳೆಯೊಳು ಜಯವರಿಸಲು ನಡೆತಂಡನು ೧
ದುಷ್ಟಬುದ್ದಿಯನ್ನುಳ್ಳ ಜಟ್ಟೇರ ಮಡಹಿಸಿ|
ಸೃಷ್ಟಿಯ ಭಾರನಿಳಹಿಸಿ ಶಿಷ್ಟರ ಕಾಯ್ದನು ೨
ಗಂಡರ ಗಂಡ ಪ್ರಚಂಡನಾಗಿ ಮೆರೆದನು|
ಕುಂಡಲ ಭೂಷಿತ ಗಂಡ ಕಪೋಲಾ ೩
ವರ ಉಗ್ರಸೇನಗ ಅರಸುತನವನಿತ್ತಾ|
ಗುರು ಮಹಿಪತಿ ಸುತ ಪೊರೆವ ಶ್ರೀ ಅರಸಗೆ೪

೬೪೩
ಬೆಳಿಯೋ ಬೆಳಿ ಮನವೇ
ಬೆಳಿಕಂಡ್ಯಾ ಬೆಳಿ ಮನವೇ ಬೆಳಿ ನಿನ್ನ ಹೊಲವನು |
ಇಳೆಯೊಳು ಯಣಿಗಾಣದ್ಹಾಂಗೆ ೧
ಗುರುವಿನಭಯ ಕೊಂಡು ಸತ್ವದಾ ಹೊಲ ಹಿಡಿದು |
ಜರಿದು ಸಂಗಿಗಳನ್ನೆಲ್ಲಾ ೨
ವಿವೇಕವೇಯಂಬಾ ನೇಗಿಲ ಎಂಟು |
ಭಾವವೆಂಬೆತ್ತುಗಳಿಂದ ೩
ದೃಢಪಾಶದಿಂದಲಿ ಕಟ್ಟಿ ಯಚ್ಚರವೆಂಬಾ |
ಒಡನೆ ಶಿಕ್ಷದಿ ನಡೆಸುತಾ ೪
ಜ್ಞಾನ ಭಕ್ತಿ ವೈರಾಗ್ಯ ತಾಳದ ಬಲದಿ |
ಅನನ್ಯ ಭಾವ ಕೂರಿಗೆಯಿಂದಾ ೫
ಗುರು ಕರುಣ ಮಳೆ ಗರೆಯೆ ವೇದಾಂತ ಬೀಜ |
ಭರದಿ ಬಿತ್ತಿ ನಾದುವಂತೆ ೬
ಅನುಮಾನ ಕಸ ತೆಗೆದು ಬೋಧವ ಯಡಿಹಾಯ್ದು|
ಧನಗಾಳ ತುಂಬಿಡುವಂತೆ ೭
ವರಕ್ಷೋಭ ಯಂಬಾ ನುಡಿ ಹಕ್ಕಿ ಬರಗುಡದೆ |
ಪರಮ ಜಾಗೃತಿಯ ಕವಣಿಯಿಂದಾ ೮
ಬೇರೆ ಬೇರೆ ದೋರ್ವುದೆಲ್ಲಾ ವಬ್ಬುಳಿ ಮಾಡಿ |
ಸಾರಿಹ ಶೃತಿ ವಾಕ್ಯದಿಂದ ೯
ದೋರುವಾ ದೃಶ್ಯ ಹೆಕ್ಕಲ ಬಿಟ್ಟು ವಳಗಿರುವ |
ತೂರಿ ಅಹಂಭಾವ ಹೊಟ್ಟವನು ೧೦
ದೈನ್ಯವನು ಹಿಂಗಿ ಬಳಕೊಂಡು
ಅನ್ಯರಾ ಮರೆ ಹೋಗದಂತೆ ೧೧
ಪರಿಪೂರ್ಣಾದ ಬಳಿಕ ಒಕ್ಕಲು ತನಕ |
ಮರುಳೆ ನೀ ಸಿಕ್ಕದಿರು ಕಂಡ್ಯಾ ೧೨
ತಿರುಗಿ ಸಂಚಿತ ಸರ್ವ ಬಿಡಿಸಿಕೊ ಸುತ ಪ್ರಭು
ಗುರು ಮಹಿಪತಿ ವಲುಮೆಯಿಂದಾ ೧೩

೨೮೩
ಭಕುತಿಯಲಿ ಭಜಿಸಿ ಹರಿಯ ಸುಖಿಸಬಾರದೇ ಪ
ಪ್ರಕಟದಿ ಸಜ್ಜನ ನಿಕಟದಿ ತಾಮಸ|
ಶಕಟ ಮುರಿದ ಸುರ ಮುಕುಟ ಮಣಿಯಾ ಅ.ಪ
ತರಣೀಯಾ ಕೋಟಿ ಪ್ರಕಾಶದಿ ಧರಣಿಯಾ ರಮಣನ ನಾಮ|
ಸ್ಮರಣೀಯಾ ಮಾಡಲು ಕರುಣೀಯಾ ಕರಿ ಕಿರಿಯನೆ ಶಿರಿ|
ಗರುಡಗರಿಯದೇ ಭರದಿ ತಾ ಬರುತದೆ ಶರಣರಾ ಹೊರೆದ ೧
ಮರುವಿನ ಕತ್ತಲೆ ನೂಕುವ ಚರಣವ ಅರವಿನ ದೀಪವ ಹಚ್ಚಿ|
ಕುರುವಿನಾ ಚಿನ್ಮಯ ನೊಡಲು ಗುರುವಿನಾ|
ಚರಣವ ಪೂಜಿಸಿ ಕರುಣವ ಸಾಧಿಸಿ
ತರುಣೋಪಾಯದ ಚರಣವ ಬಲಿಯೋ ೨
ಮನವಧಾನದಿ ನಿಲಿಸಿ ತನುವನಾ ಸೇವೆಗರ್ಪಿಸಿ|
ಘನವನು ಮಾಡುತಾ ಸುಜನರಾ ಅನುವನು ಕನಸಿಲೇ|
ಘನ ಗುರು ಮಹಿಪತಿ-ಜನ ಪ್ರಭುವಿನ ಅನುದಿನದಲಿ ಪಾಡಿ೩

೨೮೪
ಭಜಿಸು ಮನವೆ ಶ್ರೀ ರಂಗಯ್ಯನಾ ಪ
ಇಂದಿರಾ ನನರವಿಂದ ಭ್ರಮರನಾ|
ಮಂದರ ನಗಧರ ನಂದ ನಂದನನಾ೧
ಫುಲ್ಲನಯನ ಸಿರಿವಲ್ಲಭ ದೇವನಾ|
ಮಲ್ಲ ಚಾಣೂರರಿಪು ಸಲ್ಲಲಿತಾಂಗನಾ ೨
ರನ್ನ ಕೇಯೂರಧರ ಪನ್ನಗ ಶಯನಾ|
ಸನ್ನುತ ಮಹಿಪತಿ ಚಿನ್ನನೊಡೆಯನಾ ೩

೭೫೫
ಭಜೆ ಮುಕುಂದಂ ಗೋವಿದಂ ಪ
ರಾಧಾನಯನ ಚಕೋರ ನಿರಶೇಷಂ |
ಗಾಧಿ ತನಯ ಸತ್ರ‍ಕತು ಪರಿತೋಷಂ ೧
ಶಂಭರ ಸಂಭವ ಜಿತಶುಭನಯನಂ |
ಶಂಭರ ನಿಧಿ ಕಮಲಾಯುತ ಶಯನಂ ೨
ಘನ ಶ್ರೀ ಗಿರಿಧರ ಸುತ ಪರಿಪೋಷಂ |
ಕನಕಲಸತ್ಸೋದಾಮಿನಿ ಜೈಲಂ ೩
ಅಂಕಿತ-ಗಿರಿಧರಸುತ

೬೪೬
ಭವತ್ಕರುಣಿ | ಗುರುಹಿರಿಯರ ಅನುಸರಣಿ ಪ
ಜ್ಞಾನ ಭಕುತಿ ಕಲೆ ತಾನರಹಿಸುವ |
ಸ್ವಾನುಭವದ ಸುಖಭರಣಿ ೧
ಮಂಗಳ ಘನಸುಖ ಇಂಗಿತ ದೋರುವಾ |
ಕಂಗಳ ಸಿರಿಸುಖ ಕರಣಿ ೨
ತಂದೆ ಮಹಿಪತಿ ನಂದನು ಸಾರಿದಾ |
ನಂದ ಸರಸಿರುಹ ತರಣಿ ೩

೬೪೮
ಭಾವನೆ ಬಲಿದನಕಾ ಒಣಭಕ್ತಿಯ ಮಾಡಿದರೇನು |
ದೇವದೇವೋತ್ತಮನಾಪಾದ ಸುಮ್ಮನೆ ಸಿಲ್ಕುವದೇನು ಪ
ಸಂಜಿವನಿಲ್ಲದಲೇ ಸಾವಿರ ಗಿಡ ಮೂಲಿಕಿದ್ದೇನು |
ರಂಜಕ ತಾನಿಡದೇ ಯಂತ್ರದಿಗುರಿವಡ್ಡಿರಲೇನು ೧
ಸೂರಿಯನುದಯಿಸದೇ ಕನ್ನಡಿ ಕಣ್ಣುಗಳಿದ್ದೇನು |
ಗುರುರಾಯನ ಕರುಣಾ ಪಡಿಯದೆ ಮಂತ್ರ ಕಲಿತೇನು ೨
ಅನುಭವಿಸದೇ ಸುಖವಾ ಜ್ಞಾನದ ಮಾತಾಡಿದರೇನು |
ಘನಗುರು ಮಹಿಪತಿ ಸ್ವಾಮಿಯ ನೆನಯದೆ ಜನುಮವೇನು ೩

೩೯೨
ಮಂಗಳ ಜಯ ಜಯ ಮಂಗಳಾ | ಶುಭ |
ಮಂಗಳ ಶ್ರೀ ಲಕ್ಷ್ಮೀ ನರಸಿಂಹಗೇ | ಸಹಸ್ರ |
ಮಂಗಳ ಭಕ್ತರ ಸಲಹುವಗೆ ಪ
ಶರಣ ಪ್ರಲ್ಹಾದಗೆ ಪಟ್ಟಾಭಿಷೇಚನ |
ಕರುಣದಿಮಾಡಿಸಿಸುರದಿಂದಲಿ |
ಅರಸುತನವಕೊಟ್ಟು ಭಕ್ತಾಗ್ರಣಿ ಮಾಡಿ
ವರಮುಕ್ತಿಗಳ ಸೂರಾಡಿದವಗೆ | ಮಂಗಳ …. ೧
ಎನ್ನನು ನೆನೆಯಲಿ ನೆನೆಯದವರಿರಲಿ ಒಮ್ಮೆ |
ನಿನ್ನ ನೆನೆದು ಘನ ಚರಿತೆಯನು ||
ಮನ್ನಿಸಿ ಒದುವ ಕೇಳುವ ಮನುಜರ |
ಚೆನ್ನಾಗಿ ಕಾಯ್ವೆನೆಂದಭಯ ವಿತ್ತವಗೆ ಮಂಗಳ ….. ೨
ಅಂದಿಗಿಂದಿಗೆ ತನ್ನ ದಾಸರಾದಾಸನಾ |
ಮಂದಿರ ಸಾರಿದವಗೆ ದಯದೀ ||
ಚಂದಾಗಿ ತನ್ನ ಭಕುತಿ ಎಚ್ಚರವ ನೀವ |
ತಂದೆ ಮಹೀಪತಿ ಸುತ ಪ್ರೀಯಗೆ ೩

೩೮೯
ಮಂಗಳ ಮಹಿಮ ಶುಭಾಂಗಗ ಮಂಗಳ
ಅಂಗಜ ಜನಕ ಶ್ರೀರಂಗಗ ಮಂಗಳ ಪ
ಸಿರಿದೇವಿ ಮುಖಪದ್ಮ ಭಂಗಗ ಮಂಗಳ
ಸುರ ಮುನಿಜನ ರಂಗ ಸಂಗಗ ಮಂಗಳ
ಶರಣಾಗತರ ಭವಭಂಗಗ ಮಂಗಳ
ದುರಿತಾಳಿವ್ಯಾಳ ವಿಹಂಗಗ ಮಂಗಳ ೧
ಯಾದವ ಕುಲಾಂಬುದಿ ಚಂದ್ರಗ ಮಂಗಳ
ಮಧು ಕೈಟಭಾರಿ ಮಹೀಂದ್ರಗ ಮಂಗಳ
ವಿಧಿಭವ ವಂದ್ಯ ನಾದುಪೇಂದ್ರಗ ಮಂಗಳ
ಸದಮಲಸದ್ಗುಣಸಾಂದ್ರಗ ಮಂಗಳ ೨
ನಾರದಗಾಯನ ಪ್ರೇಮಿಗೆ ಮಂಗಳ
ಸುರಸಾದಾಸಾಸಿರ ನಾಮಿಗೆ ಮಂಗಳ
ಗುರುವರ ಮಹಿಪತಿಸ್ವಾಮಿಗೆ ಮಂಗಳ
ಕರುಣಾಳು ಜಗದಂತ್ರಯಾಮಿಗೆ ಮಂಗಳ ೩

೩೮೮
ಮಂಗಳಂ ಜಯ ಮಂಗಳಂ ಶುಭಮಂಗಳೆನ್ನಿರೇ
ಹಿಂಗದಂತರಂಗಲಿಪ್ಪಾ ನಂಗನಯ್ಯಗೆ ಪ
ಹೆಣ್ಣ ಮಾಡಿತಮನ್ನ ವಿಕ್ರಮ ಹೆಣ್ಣವೆನಿಸಿ ಹೆಣ್ಣಿಗೊಲಿದು
ಹೆಣ್ಣು ತೊ ಡಿಯೊಳಿನ್ನು ತಾಳಿ ಹೆಣ್ಣ ಮಡ ದಂಗೆ
ಹೆಣ್ಣಿನಳಿದು ಹೆಣ್ಣೆ ನೆಬ್ಬಿಸಿ ಹೆಣ್ಣ ಹಲವರೊಡನೆ ಆಡಿದ
ಹೆಣ್ಣ ವೃತಗೆಡಿಸಿ ಕುದುರೆ ಯಾರೋಹಣ ಗೈದಂಗೆ ೧
ನಿಗಮ ತಂದು ನಗವನೆತ್ತಿ ಜಗವನುಳಹಿ ಮಗುವಿಗೊಲಿದು
ಅಗಲ ತುಂಬಿ ಮಿಗಿಲ ಭೂಸುರಗಳ ಹೊರದಂಗೆ
ಬಿಗಿದು ಬಿಲ್ಲವ ದೃಗವ ಮೂರನೆ
ಬಿಗಡಗೊಲಿಸಿದ ಸಗಟನೊತ್ತಿ
ಗಗನ ಪುರವಾಸಿಗಳಗೆಡಹಿದ ವಿಗಡ ಕಲ್ಕಿಗೆ ೨
ಮತ್ಸ್ಯರೂಪದಿ ಕಚ್ಚಪಾಗಿ ಸ್ವಚ್ಛಕೋಡದಿ ಬೆಚ್ಚ ನರಹರಿ
ಅಚ್ಚ ವಾಮನ ನಿಚ್ಛ ಕೊಡಲಿಯ ಮಚ್ಚು ಜನ ಕಂಗೆ
ಇಚ್ಛ ನಡೆಸಿದ ಮೆಚ್ಚಿ ಗೋಕುಲ ಹುಚ್ಚು ಮಾಡಿದ ಬಾಲನೆನಿಸಿ
ಸಚ್ಚರಿತ ಕಲಿನಾಶ ಮಹಿಪತಿ ನಂದ ನೊಡಿಯಂಗೆ ೩

೩೯೦
ಮಂಗಳಂ ಶ್ರೀರಂಗಗ ಮಂಗಳಂ
ಇಂಗಿತ ಭಕ್ತರ ಅಂಗಸಂಗಾದವಗ ಪ
ಸಿರಿತಳಕ ಮಂಗಳ ಕಾಲಿಯ ವರದನಾ
ವರನಖಮಂಗಳ ಗಂಗೆ ಪಡಿದನಾ
ಚರಣ ಕಮಂಗಳ ಅಹಿಲ್ಯ ಉದ್ಧಾರಗ
ನೆರೆಜಂಘಗೆ ಮಂಗಳೆ ಶೊದಾನಂದನಾ ೧
ತೊಡೆಗಳಿಗೆ ಮಂಗಳ ಗರುಡ ವಾಹನನಾ
ನಡುವಿಗೆ ಮಂಗಳ ಧೃವ ಗೊಲಿದನ
ಒಡಲ ಕಮಂಗಳ ಜಗವಳ ಕೊಂಬನಾ
ಧೃಡ ನಾಭಿಗೆ ಮಂಗಳ ಬ್ರಹ್ಮ ಪಿತನಾ ೨
ಉರ ಸಕ ಮಂಗಳ ಉಪಮನ್ಯು ಪ್ರೀಯನಾ
ಸಿರಿವಕ್ಷಕ ಮಂಗಳ ಭೃಗು ರಕ್ಷನಾ
ಕರಗಳಿಗೆ ಮಂಗಳ ಕರಿರಾಜ ವರದನಾ
ಕೊರಳಿಗೆ ಮಂಗಳ ತುಳಸಿ ಧರನಾ ೩
ಇದು ಶೃತಿಗೆ ಮಂಗಳ ಹನುಮನೇ ಕಾಂತನಾ
ವದನಕ ಮಂಗಳ ವಿದುರ ಗೊಲಿದನಾ
ಅದೇ ಫ್ರಾಣಕೆ ಮಂಗಳ ಪ್ರಲ್ಹಾದ ವತ್ಸಲನಾ
ಪದುಮಾಕ್ಷಗ ಮಂಗಳ ಮದನ ಮೋಹನನಾ ೪
ಸಿರಸಕ ಮಂಗಳ ಫಣಿರಾಜಶಯನನಾ
ದೊರೆತನಕ ಮಂಗಳ ಶ್ರೀ ಭೂರಮಣನಾ
ಗುರುತನಕ ಮಂಗಳ ಉದ್ಬವತಾರಕನಾ
ಕರುಣಿಗೆ ಮಂಗಳಾರ್ಜುನ ಬೋಧನಾ ೫
ಪ್ರಭುಗೆ ಮಂಗಳ ಬಲಿ ವಿಭೀಷಣರ ಸ್ಥಾಪನಾ
ಅಭಯಕ ಮಂಗಳಾಜಮೀಳ ಪಾಲನಾ
ಅಭಿಮಾನಿಗೆ ಮಂಗಳಾ ಪಾಂಚಾಲಿಕಾಯಿದನಾ
ಪ್ರಭೆಗೆ ಮಂಗಳಾ ರವಿ ಸೋಮಾತ್ಮಕನಾ ೬
ಸಿರಿನಾಮಕ ಮಂಗಳ ನಾರದ ಪ್ರೀಯನಾ
ಪರತಕ ಕ ಮಂಗಲ ಶಿವ ವಂದ್ಯನಾ
ಗುರುವರ ಮಹಿಪತಿ ನಂದನಸಾರಥಿ
ಬಿರದಿಗೆ ಮಂಗಳಾಂಬರೀಷ ನೊಡಿಯನಾ ೭

೩೯೧
ಮಂಗಳಾರತಿಯಾ ತಂದೆತ್ತಿರೇ
ಮಂಗಳವದನೆಯರೆಲ್ಲಾ
ಅಮಂಗಜನಪಡದಾ ಮಂಗಳಾತ್ಮಗ ಪ
ಪೊಂಬ್ಹರಿವಾಣದೊಳಗ | ಕೆಂಬ್ಹವಳದಾರತಿ ನಿಲಿಸಿ
ಮುಂಬ್ಹರಿವರನ್ನ ಜ್ಯೋತಿಯಲಿ ಬೆಳಗಿರೆ ೧
ಉತ್ತಮ ಪುರುಷ ಶ್ರೀ ಹರಿಗೆ
ಮತ್ತ ಜಗನ್ಮಾತೆ ಸಿರಿಗೆ | ಮುತ್ತಿನ ಶಾಶೆಯನಿಟ್ಟು ಬೆಳಗಿರೆ ೨
ಜಯ ಜಯ ಶಿಷ್ಟ ರಕ್ಷಕನೇ
ಜಯ ಜಯ ದುಷ್ಟಶಿಕ್ಷಕನೇ | ಜಯವೆಂದು ಬೆಳಗಿ
ಮಹಿಪತಿ ಸುತಪ್ರೀಯಗೆ ೩

೬೫೦
ಮತ್ತಾರು ತಿಳಿಯರಲ್ಲಾ ಸದ್ಭಕ್ತಿಯ ಪ
ತಂತ್ರಸಾರದಿಂದ ಪೂಜೆ ಮಂತ್ರದಿಂದ ಮಾಡಿ ಡಂಭ |
ಯಂತ್ರದೊಳಗ ಸಿಲ್ಕ ಸಿಂತ್ರ ಹೋದರಲ್ಲದೇ ೧
ಶಾಸ್ತ್ರವನೋದಿ ಹೇಳಿ ನಿಸ್ತರಿಸಿ ವಾದದಿಂದ |
ದುಸ್ತರ ಹಮ್ಮಿನೊಳಗಸ್ತ ವಾದರಲ್ಲದೇ ೨
ಇದ್ದು ಉಪವಾಸದಿಂದ ಉಗ್ರತಪವ ಮಾಡಿ |
ಸಿದ್ಧಿಗಳ ತೋರಿ ಮೆರೆದು ಬಿದ್ದು ಹೋದರಲ್ಲದೇ ೩
ಹಲವು ಕರ್ಮಗಳ ಮಾಡಿ ಫಲವ ಬೇಡಿಕೊಂಡು ತನ್ನ |
ಘಳಿಕೆಯ ಸಂಸಾರದಿ ಕಳೆದುಕೊಂಡರಲ್ಲದೇ ೪
ಇಂದಿರೆಪತಿಯ ಮನದಿಂದ ಅರಿತು ಪೂಜಿಸುವ |
ತಂದೆ ಮಹಿಪತಿ ಪ್ರಭು ಹೊಂದಿದವರಲ್ಲದೇ ೫

೨೮೭
ಮದ್ದಾನೆ ಗತಿ ಸಖಿ ಬಾರಮ್ಮಾ||
ಮುದ್ದು ಮೊಗದ ರಂಗನ ತಂದು ತೋರಮ್ಮಾ ೧
ಇಂದು ಎನ್ನ ಚಿತ್ತ ಸ್ವಸ್ಥವಾಗದೇ|
ಒಂದುಗಳಿಗಿ ಕ್ರಮಣವಾಗಿ ಹೋಗದೇ ೨
ಬಿಗಿದವೇನೆ ಮಾಯಿ ಫಣಿಗಳು|
ವೇಗದಿಂದ ಬರುತಿದೇ ತಂಗಾಳಿಗಳು ೩
ಮಂದರಧರನು ಯಾಕೆ ಬಾರನೇ|
ಚಂದ್ರ ಕಿರಣ ಝಳಕ ನಿಲ್ಲಲಾರೆನೇ ೪
ಮುನಿದನ್ಯಾತಕ ತಾನು ಹೇಳಮ್ಮಾ
ಮೊದಲೆನ್ನ ಬಿನ್ನಹವ ಹೋಗಿ ನೀನು ಹೇಳಮ್ಮಾ ೫
ಮೊದಲೆನ್ನ ಕೈಯ್ಯಾ ತಾ ಹಿಡುವರೇ|
ತದನಂತರದಿ ತಪ್ಪ ನೋಡುವರೇ ೬
ಆರಿಸಿಬ್ಯಾಡೆಂದು ಹೇಳಿ ಕುಂದೆನ್ನಾ|
ಕರೆತಾರೆ ಮಹಿಪತಿ ಸುತ ಜೀವನಾ ೭

೬೫೭
ಮನಿ ಮನಿಗೆಲ್ಲಾ | ಸಂತರು ಲಕ್ಷ ಕೊಬ್ಬರಿಹರಲ್ಲಾ ಪ
ಹಲವು ಗಿಡದಿ ಸಂಜೀವಿನಿ ಸಸಿಯಂತೆ |
ಕೆಲವು ವಿರಕ್ತರಲಿ ರಸಕ್ರಿಯನಂತೆ ೧
ಮೃಗತತಿಯಲಿ ಕೃಷ್ಣಾಮೃಗ ದೋರುವಂತೆ
ಮುಗುದೆಯರಲಿ ಪತಿವೃತೆ ನಲಿವಂತೆ ೨
ಗುರು ಮಹಿಪತಿಸುತ ಪ್ರಭು ಪದ ಕಂಡು
ವಿರಳಾಗತಲಿಹನು ಸವಿ | ಸುಖನುಂಡು ೩

೪೮೫
ಮನ್ನೆಲೆನಾ ಪುಣ್ಯವ ಮಾಡಿದೆನೋ |
ಧನ್ಯಗೈಸಿದೆನಗ ಗುರು ಮಹಿಪತಿ ತಾನು ಪ
ವಿಜಯಗ್ಹೇಳಿದ ಹರಿಗೀತೆಯಲಿ | ಸುಜನ್ಮಾಹುದು
ಸಂತರಲ್ಲಿ ದುರ್ಭರದ ೧
ಎನ್ನ ಸಿರದಲಭಯಕರವಿಟ್ಟು | ಚನ್ನಾಗ್ಹೇಳಿದ
ಕಿವಿಯೊಳು ಸುಜ್ಞಾನ ಗುಟ್ಟು ೨
ಕಣ್ಣದೆರಸಿದ ಭಕ್ತಿ ಮಾರ್ಗದಲ್ಲಿ | ಸಣ್ಣ
ದೊಡ್ಡದರೊಳಿಹ ಚಿದ್ಘನ ವಾ ದೋರಲಿ ೩
ಇನ್ನೊಬ್ಬರಾಶೆಯೇಕೆ ಎನಗಿನ್ನು | ಎನ್ನ
ಇಂಬಾಗಿರಲು ಗುರುದಯ ಕಾಮಧೇನು ೪
ತಂದೆ ತಾಯಿ ಗುರು ಬಂಧುಗಳಾಗಿ |
ಕಂದಗೊಲಿದನು ಇಹಪರಗತಿಯಾ ಹೊಣೆಯಾಗಿ ೫

೨೮೮
ಮರುಳು ಮಾಡಿದನಲ್ಲೇ ಏಣಾಕ್ಷಿ ಪ
ಘವ ಘವಿಸುವಾಯವಿಯಾ ನೋಟದಿ ನೋಡಿ||
ಸವಿಸವಿಯಾದಾ ಮಾತನಾಡೀ ೧
ಚಿತ್ತರ ಮಿಸುವಂತೆ ರೂಪವ ದೋರಿ|
ಅತ್ತಿತ್ತಗಲದ್ಹಾಂಗ ನಿಜ ಬೀರಿ ೨
ಗುರುವರ ಮಹಿಪತಿ ನಂದ ನೊಡೆಯನಾ|
ಅರಫಳಿಗಿರಲಾರೆ ಅಗಲಿನಾ ೩

೬೬೦
ಮರ್ಯಾದಿ ಗುಣ ವಳ್ಹದೋ |
ಗುರುವರ್ಯರ ಸೇವೆಲಿ ಬಾಳ್ವೆನೆಂಬನಿಗೆ ಪ
ಅರಸುವಲಿದು ಅತಿ ಪ್ರೀತಿ ಮಾಡಿದರೇನು ?
ಕರಗಳ ಮುಗಿದು ನಿಂದಿರಬೇಕು ಚರನು ೧
ಹಿಂಗದೆ ಭಕುತಿಗೆ ಬೆಜ್ಜರ ವಿಡಿದರ |
ಬಂಗಾರಕ ಸುವಾಸನೆಯು ಬಂದಂತೆ ೨
ಕುದುರೆಗೆ ಉತ್ತತ್ತಿ ತುಸು ಕೊಟ್ಟರಾರೋಗ್ಯ |
ಅದೇ ವಿಶೇಷ ಕೊಡಲು ವಿಪರೀತವೋ ೩
ಯೋಗ್ಯವಲ್ಲದ ಅಲಂಕಾರಿಸಿಕೊಂಡರೆ ತನ್ನ |
ಶ್ಲಾಘ್ಯವೇ ಜಗದೊಳು ಉಪಹಾಸ್ಯ ಮೂಲಾ ೪
ತರಳತನವ ಬಿಟ್ಟೆಚರದಲಿ ನಡಿಬೇಕು |
ಗುರು ಮಹಿಪತಿಸುತ ಪ್ರಭು ನೊಲುವಂತೆ ೫

೬೬೬
ಮಾಡು ಮನವೇ ಹರಿ ಚರಣದ ಭಜನೀ ಪ
ಆವನು ಭಕುತಿಗೆ ಬೆರೆದವನಿಂದು |
ದೇವ ಸಮಾನಹ ಧರಿಯ ಮನುಜ ನೀ ೧
ವಿಷಯ ಸುಖೇಚ್ಛೆ ಬರ್ಬುರ ಧ್ರುಮಸಾರಿ |
ವಸುಧಿಲಿ ತ್ಯಜಿಸುವೆಸುರಕುಜನೀ ೨
ಗುರು ಮಹಿಪತಿ ಪ್ರಭು ದಯದೊಲವಿಂದಾ |
ಹಾರಿಸುವದೀ ಮಾಯಾ ಮೋಹದ ರಜನೀ ೩

೨೮೯
ಮಾಡು ಸಂತರ ಬಳಿಕೀ ಏ ಮಾನವಾ ಪ
ದೊರಕಿಸು ವಿಶ್ರಾಂತಿಯ ಪಡೆವಂತೆ|
ಹರಿನಾಮದ ಘಳಕೀ ೧
ಕೇಳಲು ಸ್ವಾನುಭವದ ನುಡಿಗಳನ್ನು|
ಬೀಳದು ಯಮ ಮಲಕೀ ೨
ತಂದೆ ಮಹಿಪತಿ ಪ್ರಭು ದಯದಿಂದಲಿ|
ಮುಂದ ನೀ ಭವಕಳು ಕೀ ೩

೬೬೭
ಮಾಡು ಹರಿಪದ ಧ್ಯಾನ ಮನವೇ ಪ
ಸಕಲೇಂದ್ರಿಗಳ ಚೇಲಿಸಿ ನೋಡುತ |
ಪ್ರಕಟದಿ ನಿನ್ನೊಳಗ್ಹಾನೇ ಮನವೇ ೧
ನಾ ನನ್ನದು ಯಂದು ಮೈಯವ ಮರೆದು |
ಸ್ವಾನಂದ ಸುಖಗಳೆದೇ ಮನವೇ ೨
ದೃಢ ಭಾವದಿ ಗುರು ಮಹಿಪತಿ ಸ್ವಾಮಿಯ |
ವಡಲ್ಹೊಕ್ಕು ಸಾಧಿಸಿ ಜ್ಞಾನ ಮನವೇ ೩

೨೯೨
ಮಾಧವಾ ನಿಮ್ಮ ನಾಮ ಸಾಲದೇ ಪ
ಪರಗತಿ ಸುಖವನು ಸ್ಮರಿಸಲು ನಿನ್ನನಾ||
ಪರಿಪರಿ ತಪದಿಂದಾ ಚರಿಸುವ ದ್ಯಾತಕೆ ನಾ ೧
ಕರಿಕಿರಿಯನ್ನಲು ಶರೆಯನು ಬಿಡಿಸಿದ|
ಶರಣ ಪ್ರಹ್ಲಾದನ ದುರಿತದಿ ಕಾಯ್ದ೨
ದ್ರೌಪದಿ ಸ್ಮರಿಸಲು ಆಪತ್ತ ಹರಿಸಿದ|
ಆ ಪತಿತ-ಜಮಿಳ ಪಾಪದಿ ತರಿಸಿದ ೩
ನೆನೆಯಲು ಪಿಂಗಳಾ ಕ್ಷಣದಿ ಗತಿಯ ಕೊಟ್ಟಾ|
ಬಿನುಗು ಮಂಡೂಕನ ವಿಮಾನದಿ ಮೆರೆಸಿದಾ೪
ದುರುಳನ ಕೈಯಿಂದ ಹರಣಿಯ ಕಾಯಿದಾ|
ಗುರಿಯಾ ತಪ್ಪಿಸಿ ಸೆರೆ ಹೊರೆದ ಕಪೋತಕ೫
ಹಲವು ಸಾಧನದಿಂದ ಬಳಲುವ-ದ್ಯಾತಕ|
ತಿಳಿದವ ಬೇಡಿದ ಫಲವನೇ ಕೊಡುತಿಹ ೬
ತಂದೆ ಮಹಿಪತಿ ನಂದನ ಸಾರಥಿ|
ಎಂದೆಂದು ನನಗಿದೆ ಛಂರದಿ ಕುಡು ಕಂಡ್ಯಾ ೭

೨೯೫
ಮುಕುತಿಗೆ ಹೊಣಿಯಿದಕೋ ಭಕುತಿ ಪ
ಹರಿಭಕುತಿಯ ಗುರು ಮೂರ್ತಿಲಿ ತಂದು |
ಬೆರೆವದು ತನುಮನವಚನದಲೀ ೧
ಆಚಾರ್ಯಮಾಂವಿಧಿ ಎಂದುದ್ದವಗೇ |
ಸೂಚಿಸಿ ಹೇಳಿದ ಯದುವರನೀಗ೨
ಸರ್ವಂ ವಾಸುದೇವೆನುತಿರಲಿಕ್ಕೆ |
ಗುರ್ವಿನೊಳಗ ಅನುಮಾನವು ಬೇಕ೩
ಬಲ್ಲವ ಬಲ್ಲವನೀ ಮಾತಿನ ಖೂನಾ |
ಎಲ್ಲರಿಗಿದು ಅಗಮ್ಯದ ಸ್ಥಾನಾ೪
ತಂದೆ ಮಹೀಪತಿ ಪ್ರಭು ದಯದಿಂದಾ |
ಕಂದಗೆಚ್ಚರಿಸಿದ ಸುಖಸ್ವಾನಂದ೫

೨೯೬
ಮುದ್ದು ತಾರೋ ರಂಗಾ ಮುದ್ದು ತಾರೋ ಕೃಷ್ಣಾ
ಸಿದ್ಧ ವೇದಾ ಗಮಾ ಭೇದ್ಯ ಮೋಹನ್ನಾ ಪ
ಕಾಣಲಿಕ್ಕೆ ಹಸಿವೆ ತೃಷೆಗಳೇ ಮರೆವದು
ಏಣಾಂಕ ಬಿಂಬ ಮೊದಾ ಬಾಯಿಂದಾ ೧
ಕರ್ಪುರವಾ ಕರಡಿಗಿಯಂತೆ ಹೊಳೆವುತಾ
ವಪ್ಪುತಿಹ ಚಲ್ವ ಪುಟ್ಟ ಬಾಯಿಂದಾ೨
ಅಮ್ಮ ತಾರಮ್ಮ ನಾನುಂಡೆನೆಂದು ಕೈಯ ಬೀಸಿ
ಝಮ್ಮನೇ ತೊಡಲು ನುಡಿ ಬಾಯಿಂದಾ ೩
ತಪ್ಪ ಹೆಜ್ಜೆಯನಿಟ್ಟು ಘಲಘಲನೆ ನಡೆವುತ
ಧಪ್ಪನೆ ಬೀಳುತ್ತಾ ಬಿರಿವ ಬಾಯಿಂದಾ೪
ಹಣೆಯ ಅರಳೆಲೆ ಮಾಗಾಯಿಗಳಲ್ಲಾ ಆಡಿಸುತಾ
ಕುಣಿದು ಬೆಣ್ಣೆಯ ಬೇಡುವ ಬಾಯಿಂದಾ೫
ಕೋರಳಿಗೆ ಅಂಟಹಾಕಿ ಕೈಗಳಿಂದಾ ಬಿಗಿದಪ್ಪಿ
ಗುರು ಮಹಿಪತಿ ನಂದನ ಜೀವನ್ನಾ ೬

೬೬೮
ಮೂರ್ಖರ ವಡಂಬಡಿಸಲಾಗವದೆಂದೆಂದು ಪ
ಮಳಲ ತಂದಿಕ್ಕಿ ಗಾಣದೊಳಗ ಸಾಯಸದಿಂದ |
ಬಲಿದು ಎಣ್ಣೆಯ ತೆಗೆಯಲಿಬಹುದು ೧
ಗಿರಿಗಳಂದದಿ ಬಹಥೆರೆಗಳ ಕಡಿಯುತ |
ಶರಧಿಯದಾಟಿ ಹೋಗಲು ಬಹುದು ೨
ಇಳೆಯೊಳು ತಿರುಗುತ ದೇಶ ದೇಶಗಳನು |
ಮೊಲದಾ ಕೋಡವ ದೊರಕಿಸಬಹುದು ೩
ತೋರುವ ಮೃಗಜಲ ಹಿಡಿದು ಪ್ರಾಶನ ಮಾಡಿ |
ನೀರಡಕಿ ಶಾಂತ ಮಾಡಿಲಿಬಹುದು ೪
ಮೊಸಳಿದಾಡಿಯೊಳಿಹ ಅಮೌಲಿಕ ರತ್ನ ತನ್ನ |
ವಶವನೆ ಮಾಡಿಕೊಳ್ಳಲಿಬಹುದು ೫
ಮೊರೆದು ಭೋರಿಡುತಿಹ ಸರ್ಪ ಹೂವಿನ ಪರಿ |
ಶಿರಸದಿ ಬೇಗ ಧರಿಸಲಿಬಹುದು ೬
ಗುರುಮಹಿಪತಿಸುತ ಪ್ರಭು ಗುರುತಿಲ್ಲವರಾ |
ನೆರಳಿಗೆ ದೂರ ಕೈ ಮುಗಿವನು ೭

೭೫೯
ಮೊದಲು ನಡು ಕಡಿ ಬರಲು ಲಘುತಾ
ಇದನುಯರತಾ ಗಣಗಳಂದದಿ
ವದಗಿ ಗುರುವಿರಮಧ್ಯವಸಾನದಲಿ ಭಜಸಾ
ಸದರ ಗಣ ತಿಳಿಮೂರು ಗುರುಲಘು
ವದಗಿರಲು ಮನಗಣಗಳಾದವು
ಮುದದಿ ಗಣ ವೆಂಟೆಂದು ಮಹಿಪತಿ ಕಂದಸಾರಿದನು ೧

೨೯೮
ಮೊರೆಯ ಹೊಕ್ಕೆನು ನಿನ್ನಾ | ಚರಣ ಕಮಲಕ
ಸಿರಿಪತಿ ಭವರೋಗ ವೈದ್ಯ ನೆಂಬದು ಕೇಳಿ ಪ
ಅನ್ಯವಾರ್ತೆಯ ಕೇಳಿ ಕಿವಿಬಧಿರಾಗದೆ
ನಿನ್ನ ಕಥಾಶ್ರವಣದ ರಸದೀ
ಇನ್ನು ಕೇಳುವ ಪರಿಮಾಡೋ ಅವಿದ್ಯದಾ
ಕಣ್ಣಿನ ಪರಿಗೆ ಜ್ಞಾನಾಂಜನವಿಡೋದೇವಾ ೧
ವಿಷಯನಂಜಲಿ ತಾಪವೆಡಗೋಂಡದೇಹಕೆ
ಅಸಮಸತ್ಸಂಗ ಕಷಾಯಕೊಟ್ಟು
ಹುಸಿ ನುಡಿ ಪರನಿಂದೆಯಾಡಿದ ರೋಗದಿ
ಹಸಗೆಟ್ಟ ನಾಲಿಗೆ ನಾಮಾಮೃತವ ನೀಡೋ ೨
ನಾಸಿಕ ಕೊರಡಾಯಿತಿಭೋಗ ದ್ರವ್ಯದಿ
ವಾಸನೆ ಕೊಡು ತುಳಸಿಯಾರ್ಪಿತವಾ
ಧ್ಯಾಸತೈಲದಿ ಮನಸಿನ ಕರ್ಮವಾತವಾ
ದೋಷಬಿಡಿಸಿ ಕಾಯೋ ಗುರು ಮಹಿಪತಿ ಸ್ವಾಮಿ ೩

ಮಹತ್ವದ ಜಾಲತಾಣಗಳು

ಇ ಆಡಳಿತ ಜಾಲತಾಣ

ಇ-ಸೇವೆಗಳು

ಸಾಮಾನ್ಯ ಅಂಕಿ ಅಂಶ

ಸರ್ಕಾರದ ಆ್ಯಪ್ ಗಳು

ಕೇಂದ್ರ ಸರ್ಕಾರದ ಜಾಲತಾಣಗಳು

ತಾಂತ್ರಿಕ‌ ಜಾಲತಾಣಗಳು

ಕನ್ನಡ ಸಂಬಂಧಿ ಜಾಲತಾಣಗಳು

ಆಯೋಗಗಳು

ನ್ಯಾಯಾಲಯಗಳು

ಡೌನ್‌ಲೋಡ್‌ಗಳು