Category: ರಾಜ್ಯೋತ್ಸವ 2015

೨೧ರ ಹರೆಯದ ನಿರಂಜನ್ ಮುಕುಂದನ್ ಅವರು ಅಂತರರಾಷ್ಟ್ರೀಯ ಅಂಗವಿಕಲ ಈಜು ಸ್ಪರ್ಧೆಗಳಲ್ಲಿ ಅದ್ವಿತೀಯ ಸಾಧನೆ ಮಾಡಿದ ಈಜು ಪಟು, ಅಂಗವೈಕಲ್ಯದಿಂದ ಹಲವಾರು ಬಾರಿ ಶಸ್ತ್ರಚಿಕಿತ್ಸೆಗೆ ಒಳಗಾದ ನಿರಂಜನ್ ವೈದ್ಯರ ಸಲಹೆಯಂತೆ ಈಜಿನ ಕೊಳಕ್ಕೆ ಇಳಿದವರು. ಈಜುಗಾರಿಕೆಯಲ್ಲಿ ಪ್ರಾವೀಣ್ಯತೆ ಸಂಪಾದಿಸಿದರು.
ಅಂಗವೈಕಲ್ಯವನ್ನು ಮರೆತು ಛಲದಿಂದ ಈಜು ಸ್ಪರ್ಧೆಗಳಲ್ಲಿ ಭಾಗಿಯಾಗತೊಡಗಿದ ನಿರಂಜನ್ ಅವರು ಅಂತರರಾಷ್ಟ್ರೀಯ ಸ್ಪರ್ಧೆಗಳಲ್ಲಿ ಭಾಗವಹಿಸಿ ಪದಕಗಳನ್ನು ಪಡೆಯಲಾರಂಭಿಸಿದರು. ಕಳೆದ ನಾಲ್ಕು ವರ್ಷಗಳಿಂದ ಅನೇಕ ಜಾಗತಿಕ ಪ್ಯಾರಾ ಒಲಂಪಿಕ್ಸ್ ಸ್ಪರ್ಧೆಗಳಲ್ಲಿ ಪಾಲುಗೊಂಡ ನಿರಂಜನ್ ೨೦೧೪ರಲ್ಲಿ ಲಂಡನಿನಲ್ಲಿ ನಡೆದ ಪ್ಯಾರಾ ಒಲಂಪಿಕ್ ಕ್ರೀಡಾಕೂಟದಲ್ಲಿ ಮೂರು ಚಿನ್ನವೂ ಸೇರಿದಂತೆ ಎಂಟು ಪದಕಗಳನ್ನು ಗಳಿಸಿ ಭಾರತಕ್ಕೆ ಕೀರ್ತಿ ತಂದಿದ್ದಾರೆ.

ಕರ್ನಾಟಕದ ಕ್ರಿಕೆಟ್ ತಂಡದ ನಾಯಕರಾಗಿ, ಎರಡು ಬಾರಿ ರಣಜಿ ಪ್ರಶಸ್ತಿಗಳನ್ನು ಒಂದೇ ವರ್ಷದಲ್ಲಿ ಭಾರತದ ಎಲ್ಲ ಪ್ರಮುಖ ಕ್ರಿಕೆಟ್ ವಲಯ ಹಾಗೂ ಅಂತರರಾಜ್ಯ ಕ್ರಿಕೆಟ್ ಟೂರ್ನಿಗಳನ್ನು ಗೆದ್ದುಕೊಟ್ಟ ವಿನಯಕುಮಾರ್ ಮಧ್ಯಮವೇಗದ ಬೌಲರ್. ಭಾರತ ತಂಡದಲ್ಲಿಯೂ ಅವಕಾಶ ಪಡೆದಿದ್ದು, ಪ್ರಸ್ತುತ ದೇಶೀಯ ಕ್ರಿಕೆಟ್ಟಿನಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿರುವ ವಿನಯಕುಮಾರ್ ಭವಿಷ್ಯದಲ್ಲಿಯೂ ಭಾರತ ತಂಡವನ್ನು ಪ್ರತಿನಿಧಿಸುವ ಲಕ್ಷಣಗಳನ್ನು ತೋರುತ್ತಿದ್ದಾರೆ.
“ದಾವಣಗೆರೆ ಎಕ್ಸ್ ಪ್ರೆಸ್” ಎಂದೇ ಖ್ಯಾತರಾದ ವಿನಯಕುಮಾರ್ ಭಾರತ ತಂಡದ ಭರವಸೆಯ ಮಧ್ಯಮವೇಗಿ ಬೌಲರ್.

ದೇಶದ ಹಾಕಿ ಕ್ರೀಡಾರಂಗಕ್ಕೆ ಗಣನೀಯ ಕೊಡುಗೆ ನೀಡಿರುವ ಕೊಡಗು ಪ್ರದೇಶದಲ್ಲಿ ಕೌಟುಂಬಿಕ ಹಾಕಿ ಉತ್ಸವವನ್ನು ಹುಟ್ಟು ಹಾಕಿದ ವ್ಯಕ್ತಿ ಪಾಂಡಂಡ.ಎಂ.ಕುಟ್ಟಪ್ಪ ಅವರು.
ಶಾಲಾ ಶಿಕ್ಷಕರಾಗಿದ್ದು, ನಂತರ ಬ್ಯಾಂಕ್ ನೌಕರಿಗೆ ಸೇರಿದ ಕುಟ್ಟಪ್ಪ, ನಿವೃತ್ತಿಯ ನಂತರ ತಮ್ಮ ಸ್ವಂತ ಸ್ಥಳವಾದ ಕೊಡಗಿಗೆ ವಾಪಸಾಗಿ ಹಾಕಿ ಕ್ರೀಡೆಯ ಬಗ್ಗೆ ಹೆಚ್ಚಿನ ಆಸಕ್ತಿ ತಾಳಿ ಕೌಟುಂಬಿಕ ಹಾಕಿ ಪಂದ್ಯಾಟಗಳನ್ನು ಆರಂಭಿಸಲು ಶ್ರಮಿಸಿದರು.
ಕಳೆದ ಹದಿನೇಳು ವರ್ಷಗಳಿಂದ ಯಶಸ್ವಿಯಾಗಿ ಕೊಡವ ಕೌಟುಂಬಿಕ ಹಾಕಿ ಉತ್ಸವವನ್ನು ನಡೆಸಿಕೊಂಡು ಬರುತ್ತಿರುವ ಕುಟ್ಟಪ್ಪನವರು ಕ್ರೀಡಾ ಮನೋಭಾವನೆಯನ್ನು ಹೆಚ್ಚಿಸುವಲ್ಲಿ ಸಹಕರಿಸಿದ್ದಾರೆ. ಲಿಮ್ಯಾ ಬುಕ್ ಆಫ್ ರೆಕಾರ್ಡ್ಗೆ ಸೇರ್ಪಡೆ ಆಗುವ ಮೂಲಕ ದೇಶ-ವಿದೇಶ ಗಮನ ಸೆಳೆದಿರುವ ಈ ಹಾಕಿ ಉತ್ಸವದಲ್ಲಿ ಪ್ರಸ್ತುತ ಎರಡು ನೂರ ಇಪ್ಪತ್ತೈದು ತಂಡಗಳು ಪಾಲುಗೊಳ್ಳುತ್ತಿದ್ದು, ಇದನ್ನು ವೀಕ್ಷಿಸಲು ದೇಶ ವಿದೇಶಗಳಿಂದ ಪ್ರತಿ ವರ್ಷ ಸುಮಾರು ೨೫,೦೦೦ ಜನ ಆಗಮಿಸುತ್ತಿದ್ದಾರೆ.
ಫೀಲ್ಡ್ ಮಾರ್ಷಲ್ ಕೆ.ಎಂ.ಕಾರ್ಯಪ್ಪ, ಜನರಲ್ ತಿಮ್ಮಯ್ಯ ಫೋರಂನ ಚಿನ್ನದ ಪದಕವೂ ಸೇರಿದಂತೆ ಅನೇಕ ಗೌರವಗಳು ಪಾಂಡಂಡ.ಎಂ.ಕುಟ್ಟಪ್ಪನವರಿಗೆ ಸಂದಿವೆ.

ತುಮಕೂರು ಜಿಲ್ಲೆಯವರಾದ ನಾಗಣ್ಣ ಅವರು ಶಿಕ್ಷಕರಾಗಿದ್ದು ನಂತರ ಪತ್ರಿಕೋದ್ಯಮದತ್ತ ಬಂದವರು. ತುಮಕೂರಿನಲ್ಲಿ ಪ್ರಜಾಪ್ರಗತಿ ವಾರ ಪತ್ರಿಕೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದ ನಾಗಣ್ಣ ನಂತರ ಪ್ರಜಾಪ್ರಗತಿ ಪತ್ರಿಕೆಯನ್ನು ದೈನಿಕವಾಗಿ ಪರಿವರ್ತಿಸಿದರು.
ಮೊಳೆಯಚ್ಚಿನಲ್ಲಿ ಮುದ್ರಣವಾಗುತ್ತಿದ್ದ ಪ್ರಜಾಪ್ರಗತಿ ಅತ್ಯಾಧುನಿಕ ಮುದ್ರಣ ವ್ಯವಸ್ಥೆಯನ್ನು ಅಳವಡಿಸಿಕೊಂಡು ಈಗ ಮುನ್ನಡೆಯುತ್ತಿದೆ. ಇದರ ಸಂಪಾದಕರಾಗಿ ವೃತ್ತಿಪರತೆ ಪಡೆದುಕೊಂಡ ನಾಗಣ್ಣ ಅವರು ಪ್ರಜಾಪ್ರಗತಿ ದಿನಪತ್ರಿಕೆಯನ್ನು ಚಿತ್ರದುರ್ಗ ಹಾಗೂ ದಾವಣಗೆರೆ ಆವೃತ್ತಿಗಳನ್ನಾಗಿ ಪ್ರಕಟಿಸಲು ಕಾರಣರಾದರು.
ಪ್ರಜಾಪ್ರಗತಿ ದೈನಿಕದ ರುವಾರಿಗಳಾದ ನಾಗಣ್ಣ ಅವರಿಗೆ ಕರ್ನಾಟಕ ಮಾಧ್ಯಮ ಅಕಾಡೆಮಿ ವಾರ್ಷಿಕ ಪ್ರಶಸ್ತಿ ನೀಡಿ ಗೌರವಿಸಿದೆ.

ನಾಲ್ಕು ದಶಕಗಳ ಕಾಲ ಪತ್ರಿಕೆಗಳಲ್ಲಿ ವಿವಿಧ ಹುದ್ದೆಗಳನ್ನು ನಿರ್ವಹಿಸಿ ಸಹಾಯಕ ಸಂಪಾದಕರಾಗಿ ನಿವೃತ್ತರಾದ ಹಿರಿಯ ಪತ್ರಿಕೋದ್ಯಮಿಗಳು. ಹನುಮಂತ ಭೀಮಪ್ಪ
ಹೂಗಾರ ಅವರು.
ಹುಬ್ಬಳ್ಳಿಯವರಾದ ಹನುಮಂತ ಹೂಗಾರ್ ಅವರು ವಿಶ್ವವಾಣಿ, ವಿಶಾಲ ಕರ್ನಾಟಕ, ನೇತಾಜಿ, ಲೋಕವಾಣಿ ಪತ್ರಿಕೆಗಳಲ್ಲಿ ಸಹಾಯಕ ಸಂಪಾದಕ, ಮುಖ್ಯವರದಿಗಾರ, ವಿಶೇಷ ಬಾತ್ಮೀದಾರರಾಗಿ ಕಾರ್ಯ ನಿರ್ವಹಿಸಿದರು.
ಹುಬ್ಬಳ್ಳಿ ಹಾಗೂ ಬೆಂಗಳೂರಿನಲ್ಲಿ ಪತ್ರಕರ್ತರಾಗಿ ಕಾರ್ಯನಿರ್ವಹಿಸಿರುವ ಹನುಮಂತ ಹೂಗಾರ್ ಪತ್ರಿಕೋದ್ಯಮದ ಎಲ್ಲಾ ಒಳಹೊರಗುಗಳನ್ನು ಬಲ್ಲವರು.

ಮುದ್ರಣ ಹಾಗೂ ವಿದ್ಯುನ್ಮಾನ ಎರಡೂ ಕ್ಷೇತ್ರಗಳಲ್ಲೂ ಕಾರ್ಯನಿರತ ಪತ್ರಕರ್ತರು ಎನಿಸಿಕೊಂಡ ಮೊದಲ ಮಹಿಳೆ ಶ್ರೀಮತಿ ನಾಗಮಣಿ.ಎಸ್.ರಾವ್ ಅವರು. ತಾಯಿನಾಡು ಪತ್ರಿಕೆಯಲ್ಲಿ ಕೆಲಸ ಮಾಡುವುದರ ಮೂಲಕ ಪತ್ರಿಕೋದ್ಯಮಕ್ಕೆ ಕಾಲಿರಿಸಿದ ನಾಗಮಣಿ ಎಸ್.ರಾವ್ ಅವರು ಹೆಸರು ಮಾಡಿದ್ದು ಆಕಾಶವಾಣಿಯ ಸುದ್ದಿ ವಿಭಾಗದ ಭಾತೀದಾರರು ಹಾಗೂ ವಾರ್ತಾ ವಾಚಕರಾಗಿ, ಪ್ರಾದೇಶಿಕ ಭಾಷೆಗಳಲ್ಲಿ ಹೆಚ್ಚು ಹೆಚ್ಚು ಕಾರ್ಯಕ್ರಮಗಳನ್ನು ನೀಡುವ ಆಕಾಶವಾಣಿಯಲ್ಲಿ ಕನ್ನಡ ವಾರ್ತಾ ವಿಭಾಗವನ್ನು ಸಮರ್ಥವಾಗಿ ಕಟ್ಟುವಲ್ಲಿ ಶ್ರಮಿಸಿದವರಲ್ಲಿ ನಾಗಮಣಿ.ಎಸ್.ರಾವ್ ಅವರು ಪ್ರಮುಖರು.
ಕರ್ನಾಟಕ ಲೇಖಕಿಯರ ಸಂಘದಲ್ಲಿ ಸಕ್ರಿಯವಾಗಿ ಪಾಲ್ಗೊಂಡ ನಾಗಮಣಿ ಎಸ್.ರಾವ್ ಅವರು ಪ್ರದೇಶ ಸಮಾಚಾರ ಓದುವುದರಲ್ಲಿ ಪಂಡಿತ ಪಾಮರರಿಬ್ಬರ ಮೆಚ್ಚುಗೆ ಪಡೆದವರು. ಸಾಹಿತ್ಯ ಕೃತಿಗಳನ್ನೂ ರಚಿಸಿರುವ ಇವರು ಟಿಎಸ್ಸಾರ್ ಪ್ರಶಸ್ತಿಯೂ ಸೇರಿದಂತೆ ಹಲವಾರು ವೃತ್ತಿ ಗೌರವ ಪುರಸ್ಕಾರಗಳಿಗೆ ಪಾತ್ರರಾಗಿದ್ದಾರೆ.

ಮಲೆನಾಡಿನಲ್ಲಿ ಹುಟ್ಟಿ ದೇಶ ವಿದೇಶಗಳಲ್ಲಿಯೂ ಮಾಧ್ಯಮ ಕ್ಷೇತ್ರದಲ್ಲಿ ಹೆಸರು ಮಾಡಿದ ಡಾ|| ಎಚ್.ಎಸ್.ಈಶ್ವರ್ ಅವರು ಮೈಸೂರು ಹಾಗೂ ಬೆಂಗಳೂರು ವಿಶ್ವವಿದ್ಯಾನಿಲಯಗಳ ಸಂವಹನ ವಿಭಾಗದಲ್ಲಿ ಕಾರ್ಯ ನಿರ್ವಹಿಸಿದವರು. ಪತ್ರಿಕೋದ್ಯಮ ಬೋಧಕರಾಗಿ ಶೈಕ್ಷಣಿಕ ವಲಯದಲ್ಲಿ ಜನಪ್ರಿಯರಾದ ಡಾ|| ಎಚ್.ಎಸ್.ಈಶ್ವರ್ ಮೂಲಭೂತವಾಗಿ ಮನಶಾಸ್ತ್ರಜ್ಞರು.
ವಿದೇಶಗಳಲ್ಲಿ ಪ್ರಾಧ್ಯಾಪಕರಾಗಿದ್ದ ಇವರು ಮೈಸೂರು ವಿಶ್ವವಿದ್ಯಾನಿಲಯದಲ್ಲಿ ಪತ್ರಿಕೋದ್ಯಮ ವಿಭಾಗದಲ್ಲಿ ಕಾರ್ಯ ನಿರ್ವಹಿಸಿದ್ದು, ನಂತರ ಬೆಂಗಳೂರು ವಿಶ್ವವಿದ್ಯಾನಿಲಯ ಸಂವಹನ ವಿಭಾಗದ ಮುಖ್ಯಸ್ಥರಾಗಿ ನಿವೃತ್ತರಾದರು.
ಮಾಧ್ಯಮ ಶೈಕ್ಷಣಿಕ ಕಾರ್ಯಕ್ರಮಗಳನ್ನು ರೂಪಿಸುವಲ್ಲಿ ಬಹಳ ಕೆಲಸ ಮಾಡಿರುವ ಡಾ|| ಎಚ್.ಎಸ್.ಈಶ್ವರ್ ಅವರು ಅನೇಕ ವಿಶ್ವವಿದ್ಯಾಲಯಗಳ ಪಠ್ಯಕ್ರಮಗಳನ್ನು ಸಿದ್ಧಪಡಿಸಿಕೊಟ್ಟಿದ್ದಾರೆ. ಮಾಧ್ಯಮ ಕುರಿತಂತೆ ಹಲವಾರು ಮೌಲ್ಯಯುತ ಬರವಣಿಗೆ ಮಾಡಿರುವ ಇವರು ಶ್ರೇಷ್ಠ ವಾಗಿ ಕೂಡ ಹೌದು. ಇವರಿಗೆ ಕರ್ನಾಟಕ ಮಾಧ್ಯಮ ಅಕಾಡೆಮಿ ಪ್ರಶಸ್ತಿಯೂ ಸೇರಿದಂತೆ ಹಲವು ಗೌರವಗಳು ಲಭಿಸಿವೆ.

ನಾಡಿನ ಹಿರಿಯ ಪತ್ರಕರ್ತರಲ್ಲಿ ಒಬ್ಬರಾಗಿರುವ ಕಲ್ಲೇ ಶಿವೋತ್ತಮರಾವ್ ಅವರು ಪ್ರಜಾವಾಣಿ ಸಂಯುಕ್ತ ಕರ್ನಾಟಕ ವಿಶಾಲ ಕರ್ನಾಟಕ ಪತ್ರಿಕೆಗಳ ಸಂಪಾದಕ ವರ್ಗದ ನೇತೃತ್ವ ವಹಿಸಿ ಕಾರ್ಯ ನಿರ್ವಹಿಸಿದ್ದಾರೆ.
ಹಿಂದೂ ದೈನಿಕದ ಹಂಗಾಮಿ ವರದಿಗಾರರಾಗಿ ಹಾಗೂ ಎನ್ಲೈಟ್ ಇಂಗ್ಲಿಷ್ ವಾರಪತ್ರಿಕೆಯ ಕರ್ನಾಟಕ ಬ್ಯೂರೋ ಚೀಫ್ ಆಗಿ ಕೆಲಸ ಮಾಡಿದ ಅನುಭವ ಇರುವ ಕಲ್ಲೇ ಶಿವೋತ್ತಮರಾವ್ ಅವರು ಪತ್ರಿಕಾ ಲೋಕದ ದಿಗ್ಗಜರಲ್ಲೊಬ್ಬರಾದ ಬಿ.ಎನ್.ಗುಪ್ತಾ ಅವರ ಸಂಪಾದಕತ್ವದ ಜನಪ್ರಗತಿ ಪತ್ರಿಕೆಯ ಕಾರ್ಯನಿರ್ವಾಹಕ ಸಂಪಾದಕರಾಗಿ ನಂತರ ಸಂಪಾದಕ ಹಾಗೂ ಮುದ್ರಕರಾಗಿ ಒಟ್ಟು ಹದಿನಾಲ್ಕು ವರ್ಷಗಳ ಕಾಲ ಸೇವೆ ಸಲ್ಲಿಸಿದರು.
ಸಾಹಿತ್ಯದ ವಿವಿಧ ಪ್ರಾಕಾರಗಳಲ್ಲಿ ಕೈ ಆಡಿಸಿರುವ ಕಲ್ಲೇ ಶಿವೋತ್ತಮರಾವ್ ಪ್ರಜಾವಾಣಿ ಪತ್ರಿಕೆಯ ಅಂಕಣಕಾರರಾಗಿ ವಿಶ್ವದ ವಿದ್ಯಮಾನಗಳನ್ನು ವಿಶ್ಲೇಷಿಸುವ ಕಾರ್ಯವನ್ನು ಹೊತ್ತುಕೊಂಡಿದ್ದರು. ಕನ್ನಡ ಹಾಗೂ ಆಂಗ್ಲ ಭಾಷೆಗಳಲ್ಲಿ ಪ್ರೌಢ ಪ್ರಭುತ್ವ ಹೊಂದಿರುವ ಕಲ್ಲೇ ಶಿವೋತ್ತಮ ರಾವ್ ತಮ್ಮ ಹದಿನಾಲ್ಕನೆಯ ವಯಸ್ಸಿನಿಂದ ಪತ್ರಿಕೋದ್ಯಮದ ಒಡನಾಟದಲ್ಲಿರುವವರು.

ಪುರಾಣ ಪುಣ್ಯಕಥೆಗಳನ್ನು ಹಾಗೂ ಐತಿಹಾಸಿಕ ಮಹತ್ವದ ಪ್ರಜಾನಾಯಕರ ಬದುಕಿನ ಕಥೆಗಳನ್ನು ಶಕ್ತಿಶಾಲಿ ಜನಪದ ಮಾಧ್ಯಮವಾದ ಬುರಕಥಾ ಮೂಲಕ ಪ್ರಸ್ತುತ ಪಡಿಸುತ್ತ ಐದು ದಶಕಗಳನ್ನು ಸವೆಸಿರುವ ಮರೆಮ್ಮ ಬಸಣ್ಣ ಶಿರವಾಟಿ ಅವರು ಪ್ರಸಿದ್ಧ ಬುರಕಥಾ
ಕಲಾವಿದರು.
ಕನ್ನಡ ಮತ್ತು ತೆಲುಗು ಭಾಷೆಗಳಲ್ಲಿ ಜನದನಿಯಾದ ಬುರಕಥೆಯನ್ನು ಜನತೆಯ ನಡುವೆ ಹರಡಿಸುತ್ತ, ಜನಸ್ತೋಮವನ್ನು ಸೆಳೆದಿರುವ ಮಾರಿಯಮ್ಮನವರು, ಕರ್ನಾಟಕ ಹಾಗೂ ತೆಲಂಗಾಣ ಪ್ರಾಂತ್ಯಗಳಲ್ಲಿ ಬಹು ಜನಪ್ರಿಯ ಹಾಡುಗಾರ್ತಿ.
ನೆನಪಿನ ಶಕ್ತಿಯಿಂದಲೇ ೭೦ಕ್ಕೂ ಹೆಚ್ಚು ಪ್ರಸಂಗಗಳನ್ನು ಹಾಡುವ ಮರೆಮ್ಮ ಅವರ ಸಿರಿಕಂಠದಿಂದ ಕಥೆಗಳನ್ನು ಜನರಿಗೆ ಮುಟ್ಟಿಸುವ ಪ್ರತಿಭಾವಂತೆ. ಈಕೆ ಇಳಿವಯಸ್ಸಿನಲ್ಲಿಯೂ ಶಿಷ್ಯ ಪರಂಪರೆಯ ಮೂಲಕ ತನ್ನ ತಂಡದೊಡನೆ ಬುರಕಥಾ ಪ್ರಕಾರವನ್ನು ಜೀವಂತವಾಗಿಟ್ಟಿರುವ ಕಲಾವಿದೆಯಾಗಿದ್ದು, ಈಕೆಯ ಬಗ್ಗೆ ಪಿ.ಎಚ್.ಡಿ. ಸಂಶೋಧನೆ ಸಹ ನಡೆದಿರುವುದು ಉಲ್ಲೇಖನಾರ್ಹ.

೧೫ನೇ ವಯಸ್ಸಿಗೆ ಕರಡಿ ಮಜಲು ಕಲಾಕ್ಷೇತ್ರಕ್ಕೆ ಕಾಲಿಟ್ಟ ಗುರುಲಿಂಗಪ್ಪ ವೀರಸಂಗಪ್ಪ ಕರಡಿ ಅವರು ನಿರಂತರವಾಗಿ ಆರು ದಶಕಗಳಿಂದ ಕರಡಿ ಮಜಲು ಕಲೆಯನ್ನು ಪ್ರದರ್ಶಿಸುತ್ತ ಬದುಕು ಸಾಗಿಸುತ್ತಿದ್ದಾರೆ. ಮಲ್ಲಿಕಾರ್ಜುನ ಅಸುಂಡಿಯವರಿಂದ ಸಂಗೀತ ದೀಕ್ಷೆ ಪಡೆದ ವೀರಸಂಗಪ್ಪನವರು ಇದನ್ನು ಕಲೆ ಹಾಗೂ ದೈವಿಕ ಕಾರ್ಯವೆಂದು ಭಾವಿಸಿ ಅದರೊಂದು ಅವಿನಾಭಾವ ಅನುಸಂಧಾನ ಕೈಗೊಂಡಿದ್ದಾರೆ.
ಕರಡಿ ಮಜಲು ಕಲೆಯಲ್ಲಿ ಪೂರ್ಣವಾಗಿ ತಮ್ಮನ್ನು ತೊಡಗಿಸಿಕೊಂಡ ವೀರಸಂಗಪ್ಪ ಕರಡಿ ಅವರು ಕರ್ನಾಟಕದ ಬಹುತೇಕ ಕಲಾ ಮಹೋತ್ಸವಗಳಲ್ಲಿ ಕರಡಿ ಮಜಲು ಕಲೆಯನ್ನು ಪ್ರದರ್ಶಿಸುವ ಮೂಲಕ ಮೆಚ್ಚುಗೆ ಪಡೆದುಕೊಂಡಿದ್ದಾರೆ. ಕರಡಿ ಮಜಲು ಕಲೆಯನ್ನು ಮುಂದಿನ ಪೀಳಿಗೆಗೂ ಕರೆದೊಯ್ಯುವ ನಿಟ್ಟಿನಲ್ಲಿ ಯುವಕರಿಗೆ ಮಾರ್ಗದರ್ಶನ ನೀಡುತ್ತಿರುವ ಗುರುಲಿಂಗಪ್ಪ ವೀರಸಂಗಪ್ಪನವರು ಕರ್ನಾಟಕ ಜಾನಪದ ಅಕಾಡೆಮಿ, ಜಾನಪದ ಲೋಕ ಪ್ರಶಸ್ತಿ, ಲೋಕೋತ್ಸವ ಪ್ರಶಸ್ತಿ ಹೀಗೆ ಹಲವಾರು ಗೌರವಗಳನ್ನು ಪಡೆದಿದ್ದು, ಸಾರ್ಕ್, ದಕ್ಷಿಣ ವಲಯ ಸಾಂಸ್ಕೃತಿಕ ಉತ್ಸವ, ಭಾರತ ಅಂತರರಾಷ್ಟ್ರೀಯ ಸಂಗೀತ ಮಹೋತ್ಸವ ಸೇರಿದಂತೆ ಅನೇಕ ಪ್ರತಿಷ್ಟಿತ ಕಲಾ ಮಹೋತ್ಸವಗಳಲ್ಲಿ ಕರಡಿ ಮಜಲು ಪ್ರದರ್ಶಿಸಿದ ಹೆಗ್ಗಳಿಕೆ ಇವರದು.

ರಾಮನಗರ ಜಿಲ್ಲೆಯ ಸಣ್ಣ ಹಳ್ಳಿಯಲ್ಲಿ ದಲಿತ ಕುಟುಂಬದಲ್ಲಿ ಜನಿಸಿದ ಇವರು ಬಾಲ್ಯದಿಂದಲೇ ಅಜ್ಜಿಯ ಜನಪದ ಹಾಡಿನ ಮೋಡಿಗೆ ಒಳಗಾಗಿ ಮುಂದೆ ಗಾಯಕರಾಗಿ ಬಹು ಎತ್ತರಕ್ಕೆ ಬೆಳೆದವರು. ಇವರು ತತ್ವಪದಗಳ ಬಗ್ಗೆ ಡಿ.ಲಿಟ್ ಸಂಶೋಧನೆಯನ್ನು ಕೈಗೊಂಡಿದ್ದಾರೆ.
ಮೂಲಧಾಟಿಯ ಜನಪದ ಗೀತೆಗಳಿಗೆ ಜೀವಂತಿಕೆ ತುಂಬಿದ ಅಪರೂಪದ ಗಾಯಕರಲ್ಲಿ ಒಬ್ಬರಾದ ಅಪ್ಪಗೆರೆ ತಿಮ್ಮರಾಜು ಗ್ರಾಮೀಣ ಭಾಗಗಳಲ್ಲಿ ಈಗಲೂ ಹಾಡುವ ಅನೇಕ ಗೀತೆಗಳನ್ನು ಸಂಗ್ರಹಿಸಿ ಅದಕ್ಕೊಂದು ಹೊಸ ರೂಪವನ್ನು ಕೊಟ್ಟಿದ್ದಾರೆ.
ದೇಶದ ತುಂಬ ತಮ್ಮ ಸಿರಿಕಂಠದಿಂದ ಮೋಡಿ ಮಾಡಿರುವ ಇವರು ವಿದೇಶಗಳಲ್ಲಿಯೂ ಅನೇಕ ಕಾರ್ಯಕ್ರಮಗಳನ್ನು ನೀಡಿ ಜನಮನ ಸೂರೆಗೊಂಡಿದ್ದಾರೆ.

ಎ.ಜೆ. ಸದಾಶಿವ ಅವರು ಗ್ರಾಮೀಣ ಪ್ರತಿಭೆ. ಯಶಸ್ವಿ ವಕೀಲರಾಗಿ ನ್ಯಾಯಾಧೀಶರಾಗಿ ನಿವೃತ್ತಿ ನಂತರ ಹಲವು ತನಿಖಾ ಆಯೋಗಗಳ ಮೂಲಕ ಕಾರ್ಯ ನಿರ್ವಹಿಸಿದ್ದಾರೆ. ತಮ್ಮ ಕಾರ್ಯಾನುಭವದ ಹಿನ್ನೆಲೆಯಲ್ಲಿ ಹಲವು ಸಾಮಾಜಿಕ ಸಮಸ್ಯೆಗಳಿಗೆ ಪರಿಹಾರೋಪಾಯಗಳನ್ನು ಸೂಚಿಸಿದ್ದಾರೆ.
ಒಳಮೀಸಲಾತಿ ಆಯೋಗದ ಅಧ್ಯಕ್ಷರಾಗಿಯೂ ಕಾರ್ಯ ನಿರ್ವಹಿಸಿದ ಸದಾಶಿವ ಅವರು ನ್ಯಾಯಾಂಗ ಕುರಿತ ಹಲವು ರಾಷ್ಟ್ರೀಯ ಅಂತಾರಾಷ್ಟ್ರೀಯ ಸಮ್ಮೇಳನಗಳಲ್ಲಿ ಭಾಗವಹಿಸಿದ್ದಾರೆ. ಜೊತೆಗೆ ಹವ್ಯಾಸಿ ರಂಗಭೂಮಿಯ ಕಲಾವಿದರಾಗಿಯೂ ದುಡಿದಿದ್ದಾರೆ.
ಹಲವು ಸಮಾಜಸೇವಾ ಸಂಸ್ಥೆಗಳೊಂದಿಗೆ ಸಕ್ರಿಯರಾಗಿರುವ ಸದಾಶಿವ ಅವರು ಅರ್ಥಪೂರ್ಣ ಚಟುವಟಿಕೆಗಳಲ್ಲಿ ತೊಡಗಿದ್ದಾರೆ.

ಗಂಡಾಗಿದ್ದು ನಂತರ ಹೆಣ್ಣಾದ ಅಕೈ ಪದ್ಮಶಾಲಿ ಇಂದು ತೃತೀಯ ಲಿಂಗಿಗಳ ಹಕ್ಕುಗಳ ಹೋರಾಟದ ಮುಂಚೂಣಿಯಲ್ಲಿರುವ ಸಂಗಮ ಸಂಸ್ಥೆಯ ಪದಾಧಿಕಾರಿಗಳಲ್ಲೊಬ್ಬರು. ಸಮಾಜ ತೃತೀಯ ಲಿಂಗಿಗಳ ಬಗ್ಗೆ ತೋರುತ್ತಿರುವ ಅನಾದರಣೆಯನ್ನು ಹೋಗಲಾಡಿಸುವ ನಿಟ್ಟಿನಲ್ಲಿ ಅನೇಕ ಕಾರ್ಯಕ್ರಮಗಳನ್ನು ಅನುಷ್ಠಾನಗೊಳಿಸುತ್ತಿರುವ ಸಂಗಮ ಸಂಸ್ಥೆಯಿಂದ ತೃತೀಯ ಲಿಂಗಿಗಳ ಸಂಘಟನೆ ಮಾಡುವ ಹೊಣೆ ಹೊತ್ತುಕೊಂಡಿರುವ ಅಕೈ ಪದ್ಮಶಾಲಿ ರಾಜ್ಯ ಹಾಗೂ ರಾಷ್ಟ್ರದ ತೃತೀಯ ಲಿಂಗಿಗಳ ಸಂಘಟನೆಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ.
ದೇಶದಲ್ಲಿಯೇ ಮೊಟ್ಟಮೊದಲ ಮೋಟಾರು ಚಾಲನಾ ಪರವಾನಗಿಯನ್ನು ಹೆಣ್ಣೆಂದು ಪಡೆದುಕೊಂಡ ಅಕೈ ಪದ್ಮಶಾಲಿ ಸಾಂಸ್ಕೃತಿಕ ಚಟುವಟಿಕೆಗಳಲ್ಲಿಯೂ ಭಾಗವಹಿಸಿ ಉತ್ತಮ ಗಾಯಕಿ ಎನಿಸಿಕೊಂಡಿದ್ದಾರೆ.

ಶ್ರೀಮತಿ ಮೀರಾ ಶ್ರೀನಿವಾಸ ಶಾನಭಾಗ ಅವರು ವೃತ್ತಿಜೀವನದ ಒತ್ತಡಗಳ ನಡುವೆಯೂ ಸಾಮಾಜಿಕ ಸೇವಾ ಕಾರ್ಯವನ್ನು ಪ್ರವೃತ್ತಿಯಾಗಿ ಕೈಗೊಂಡವರು. ನಿವೃತ್ತಿಯ ನಂತರ ಪೂರ್ಣ ವೇಳೆಯನ್ನು ಸಮಾಜದ ಕೈಂಕರ್ಯದಲ್ಲಿ ತೊಡಗಿಸಿದ್ದಾರೆ.
ಸ್ವಂತ ಜಮೀನನ್ನು ಸಾರ್ವಜನಿಕ ಕಾರ್ಯಗಳಿಗೆ ದಾನ ನೀಡಿರುವುದೇ ಅಲ್ಲದೆ ಜನರಲ್ಲಿ ಧಾರ್ಮಿಕ ಚಿಂತನೆಗಳನ್ನು ರೂಢಿಸುವ ಸಲುವಾಗಿ ಮಠ, ಮಂದಿರಗಳನ್ನು ಸ್ಥಾಪಿಸಿದ್ದಾರೆ.
ಬಡ ಪ್ರತಿಭಾವಂತ ವಿದ್ಯಾರ್ಥಿಗಳ ವಿದ್ಯಾರ್ಜನೆಗೆ ವಿದ್ಯಾರ್ಥಿ ವೇತನ ನೀಡುವ ಮೂಲಕ ನೆರವಾಗುತ್ತಿರುವ ಮೀರಾ ಶಾನಭಾಗ ಜೀವನ ಸಂಧ್ಯಾಕಾಲದಲ್ಲಿ ಗೌರವದ ಬದುಕನ್ನು ಬಾಳಲು ಅನುವಾಗುವಂತೆ ವೃದ್ಧಾಶ್ರಮಗಳನ್ನು ಸ್ಥಾಪಿಸಿದ್ದಾರೆ.
ಶ್ರೀನಿವಾಸ ಚಾರಿಟಬಲ್ ಟ್ರಸ್ಟ್ ಮೂಲಕ ಹಲವು ಸಮಾಜಮುಖಿ ಕಾರ್ಯಗಳನ್ನು ಕೈಗೊಳ್ಳುತ್ತಿರುವ ಮೀರಾ ಅವರು ಸಮಾಜದ ಮೂಲ ಅವಶ್ಯಕತೆಗಳಾದ ಆರೋಗ್ಯ ಮತ್ತು ಶಿಕ್ಷಣಕ್ಕೆ ಹೆಚ್ಚಿನ ಒತ್ತು ನೀಡಿದ್ದಾರೆ.

ಅಲೆಮಾರಿ ಜನಾಂಗಕ್ಕೆ ಸೇರಿದ ಹೆಳವ ಪಿಚ್ಚಗುಂಟಲು ಸಮುದಾಯಕ್ಕೆ ಸೇರಿದ ಎಂ.ಎಸ್.ಹೆಳವ ಈ ಜನಾಂಗದಲ್ಲಿ ಮೊದಲ ಪದವೀಧರ ಹಾಗೂ ಮೊಟ್ಟಮೊದಲ ವಕೀಲರು. ವಿಜಯಪುರ ಜಿಲ್ಲೆಗೆ ಸೇರಿದವರಾದ ಎಂ.ಎಸ್.ಹೆಳವ ಸ್ವಂತ ಪರಿಶ್ರಮದಿಂದ ಉಚಿತ ವಿದ್ಯಾರ್ಥಿ ನಿಲಯಗಳಲ್ಲಿ ವಾಸ ಮಾಡುತ್ತ, ವಿಜ್ಞಾನ ಪದವಿಯನ್ನು ಹಾಗೂ ಕಾನೂನು ಪದವಿಯನ್ನು ಪಡೆದವರು.
ಕೇವಲ ೫೩,೦೦೦ ಜನಸಂಖ್ಯೆ ಉಳ್ಳ ಪಿಚ್ಚಗುಂಟಲು ಜನಾಂಗದ ಎಂ.ಎಸ್.ಹೆಳವರ್ ಅವರು ನಂತರ ವಕೀಲಿಕೆ ಕೈಗೊಂಡರು. ಡಿ.ದೇವರಾಜ ಅರಸು ಅವರ ಮಾರ್ಗದರ್ಶನದಲ್ಲಿ ಸಮಾಜಸೇವೆಗೆ ಕಾಲಿಟ್ಟ ಹೆಳವರ್, ಮೈಸೂರು ವಿಶ್ವವಿದ್ಯಾನಿಲಯದ ಸೆನೆಟ್ ಸದಸ್ಯರಾಗಿ ಜಿಲ್ಲಾ ಹಾಗೂ ತಾಲೂಕು ನ್ಯಾಯ ಮಂಡಳಿಗಳ ಸದಸ್ಯರಾಗಿ ಕಾರ್ಯ ನಿರ್ವಹಿಸಿದರು.
ರಾಜ್ಯ ಹಿಂದುಳಿದ ವರ್ಗಗಳ ಆಯೋಗದ ಸದಸ್ಯರಾಗಿಯೂ ಕೆಲಸ ಮಾಡಿರುವ ಎಂ.ಎಸ್. ಹೆಳವರ್ ಚಿಕ್ಕಮಗಳೂರು ಹಾಗೂ ಚಾಮರಾಜನಗರ ಜಿಲ್ಲೆಯ ಅಲೆಮಾರಿ ಜನಾಂಗಕ್ಕಾಗಿ ಪುಟ್ಟ ಗ್ರಾಮಗಳನ್ನು ಸರ್ಕಾರದ ನೆರವಿನಿಂದ ಅಸ್ಥಿತ್ವಕ್ಕೆ ತಂದರು. ಅಲೆಮಾರಿ ಜನಾಂಗದ ಶೈಕ್ಷಣಿಕ ಮತ್ತು ಸಾಮಾಜಿಕ ಅಭಿವೃದ್ಧಿಗಾಗಿ ಹಲವು ಬಗೆಯ ಕಾರ್ಯಕ್ರಮಗಳನ್ನು ಅನುಷ್ಠಾನಗೊಳಿಸುವಲ್ಲಿ ಸಕ್ರಿಯರಾಗಿರುವ ಹೆಳವರ್ ಅವರು ಅಲೆಮಾರಿ ಜನಾಂಗಗಳಿಗೆ ಸಂವಿಧಾನದ ಸವಲತ್ತುಗಳನ್ನು ಕೊಡಿಸುವಲ್ಲಿ ಈಗಲೂ ಶ್ರಮಿಸುತ್ತಿದ್ದಾರೆ.

ರಾಮನಗರ ಜಿಲ್ಲೆಯಲ್ಲಿ ಹುಟ್ಟಿ ಪ್ರಸ್ತುತ ಅಮೆರಿಕದಲ್ಲಿ ವಾಸವಾಗಿರುವ ಪದವೀಧರೆ ಶ್ರೀಮತಿ ಶಾರದಾ ರಾಜಣ್ಣ ಅವರು ವೃತ್ತಿಯಿಂದ ಕಂಪ್ಯೂಟರ್ ತಜ್ಞರು, ಅಮೆರಿಕದಲ್ಲಿ ಕೆ.ಆರ್.ಎಸ್. ಎಂಬ ಸಮಾಜಸೇವಾ ಸಂಸ್ಥೆಯನ್ನು ರಚಿಸಿಕೊಂಡು, ಹಲವಾರು ಸಾಮಾಜಿಕ ಸಮಸ್ಯೆಗಳಿಗೆ ಪರಿಹಾರ ರೂಪವಾಗಿ ಅನೇಕ ಕಾರ್ಯಕ್ರಮಗಳನ್ನು ರೂಪಿಸಿ ಅನುಷ್ಠಾನಗೊಳಿಸಿದವರು.
ಕೆ.ಆರ್.ಎಸ್.ಸಂಸ್ಥೆಯ ಮೂಲಕ ಭಾರತದ ಗಾಮೀಣ ಭಾಗಗಳಲ್ಲಿ ಮೂಲಭೂತ ಅವಶ್ಯಕತೆಗಳಾದ ವಿದ್ಯಾಭ್ಯಾಸ, ಆರೋಗ್ಯ, ಆಹಾರಗಳನ್ನು ಒದಗಿಸಲು ಪ್ರತ್ಯೇಕ ಕಾರ್ಯಕ್ರಮಗಳನ್ನು ಇವರು ಅನುಷ್ಠಾನಗೊಳಿಸುತ್ತಿದ್ದು, ಇದಕ್ಕಾಗಿ ಅನೇಕ ಗ್ರಾಮಗಳನ್ನು ದತ್ತುಸ್ವೀಕಾರ ಮಾಡಿದ್ದಾರೆ. ಶಾಲಾ ಕಟ್ಟಡಗಳ ನಿರ್ಮಾಣ, ಆಸ್ಪತ್ರೆ ಮೂಲ ಸೌಕರ್ಯಗಳ ಅಭಿವೃದ್ಧಿ, ಮಹಿಳೆಯರಿಗೆ ಕಿರು ಸಾಲಗಳ ವಿತರಣೆ, ಗ್ರಂಥಾಲಯಗಳ ಸ್ಥಾಪನೆ, ವಿದ್ಯಾರ್ಥಿ ನಿಲಯಗಳ ನಿರ್ವಹಣೆ ಮೊದಲಾದ ಕಾರ್ಯಕ್ರಮಗಳನ್ನು ಶಾರದಾ ರಾಜಣ್ಣ ಅವರು ತಮ್ಮ ಟ್ರಸ್ಟ್ ಮೂಲಕ ನಿರ್ವಹಿಸುತ್ತಿದ್ದಾರೆ.
ಯುವ ಪೀಳಿಗೆಗೆ ಉತ್ತಮ ವಿದ್ಯಾಭ್ಯಾಸ ದೊರಕಿಸುವ ನಿಟ್ಟಿನಲ್ಲಿ ವಿದ್ಯಾರ್ಥಿ ವೇತನವನ್ನು ಸಾವಿರಾರು ವಿದ್ಯಾರ್ಥಿಗಳಿಗೆ ನೀಡುತ್ತಿರುವ ಇವರು ವಿದ್ಯಾರ್ಥಿ ನಿಲಯಗಳನ್ನು ಬೆಂಗಳೂರು, ತುಮಕೂರು, ಮೊದಲಾದ ಜಿಲ್ಲೆಗಳಲ್ಲಿ ಸ್ಥಾಪಿಸಿದ್ದಾರೆ. ಪ್ರಾಥಮಿಕ ಆರೋಗ್ಯ ಕೇಂದ್ರಗಳ ಅಭಿವೃದ್ಧಿಗಾಗಿಯೂ ಶ್ರಮಿಸಿರುವ ಅನಿವಾಸಿ ಭಾರತೀಯ ಶಾರದಾ ರಾಜಣ್ಣ ನೆರವು ನೀಡಿದ್ದಾರೆ.

ನಾಡಿನ ಅನೇಕ ವೃತ್ತಿ ನಾಟಕ ಸಂಸ್ಥೆಗಳು ಹಾಗೂ ಹವ್ಯಾಸಿ ನಾಟಕ ಸಂಘಗಳಲ್ಲಿ ಪಾತ್ರಗಳನ್ನು ನಿರ್ವಹಿಸಿರುವ ಮಹದೇವಪ್ಪ ‘ರಾಜ ವಿಕ್ರಮ’ ನಾಟಕದಲ್ಲಿ ಶನಿದೇವರ ಪಾತ್ರವನ್ನು ಹೆಚ್ಚು ಬಾರಿ ಮಾಡಿದರಿಂದ ಶನಿಮಹದೇವಪ್ಪ ಎಂದೇ ಹೆಸರಾದರು. ಮಂಡ್ಯ ಜಿಲ್ಲೆಯ ಬೆಳಕವಾಡಿಯವರಾದ ಶನಿಮಹದೇವಪ್ಪ ಧರ್ಮಸ್ಥಳ ಮಹಾತ್ಮ ಚಿತ್ರದ ಮೂಲಕ ಚಿತ್ರರಂಗವನ್ನು ಪ್ರವೇಶಿಸಿ ೩೫೦ ಕ್ಕೂ ಹೆಚ್ಚು ಚಿತ್ರಗಳಲ್ಲಿ ಪೋಷಕ ಪಾತ್ರಗಳಲ್ಲಿ ಹಾಗೂ ಖಳನ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ಭಕ್ತ ಕುಂಬಾರ, ಬಡವರ ಬಂಧು, ದೇವತಾ ಮನುಷ್ಯ, ಭಕ್ತ ಪ್ರಹ್ಲಾದ, ನನ್ನ ಶಪಥ ಈ ಚಿತ್ರಗಳಲ್ಲಿ ಶನಿಮಹದೇವಪ್ಪನವರು ನೆನಪಿನಲ್ಲಿ ಉಳಿಯುವಂತಹ ಪಾತ್ರಗಳಲ್ಲಿ ನಿರ್ವಹಿಸಿದ್ದಾರೆ.

ಕನ್ನಡ ಚಿತ್ರರಂಗದ ಮೂಲಕ ಚಲನಚಿತ್ರ ಜಗತ್ತಿಗೆ ಕಾಲಿಟ್ಟ ಸಾಹುಕಾರ್ ಜಾನಕಿ ೧೯೫೦ ಹಾಗೂ ೬೦ ನೇ ದಶಕಗಳಲ್ಲಿ ಕನ್ನಡದ ಅನೇಕ ಚಿತ್ರಗಳ ನಾಯಕ ನಟಿಯಾಗಿದ್ದವರು. ಮದರಾಸ್ ನಲ್ಲಿ ದಕ್ಷಿಣ ಭಾರತದ ಚಲನಚಿತ್ರ ಉದ್ಯಮ ನೆಲೆನಿಂತಿದ್ದ ಸಂದರ್ಭದಲ್ಲಿ ಸಾಹುಕಾರ್ ಜಾನಕಿ ತಮಿಳು ಹಾಗೂ ತೆಲುಗು ಚಿತ್ರಗಳ ಜನಪ್ರಿಯ ಕಲಾವಿದೆಯಾಗಿ ಹೊರಹೊಮ್ಮಿದರು.
ಕನ್ನಡದ ಡಾ|| ರಾಜ್ಕುಮಾರ್, ತಮಿಳಿನ ಎಮ್.ಜಿ. ರಾಮಚಂದ್ರನ್, ಶಿವಾಜಿ ಗಣೇಶನ್ ತೆಲುಗಿನ ಎನ್. ಟಿ. ರಾಮರಾವ್, ಆರ್. ನಾಗೇಶ್ವರರಾವ್. ಸೇರಿದಂತೆ ಎಲ್ಲಾ ದಕ್ಷಿಣ ಭಾಷೆಗಳ ಪ್ರಮುಖ ನಾಯಕನಟರೊಂದಿಗೆ ಅಭಿನಯಿಸಿರುವ ಖ್ಯಾತಿ ಸಾಹುಕಾರ್ ಜಾನಕಿಯವರದು.
ಮುನ್ನೂರಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ಪೋಷಕ ನಟಿಯಾಗಿ ಪಾತ್ರನಿರ್ವಹಿಸಿರುವ ಸಾಹುಕಾರ್ ಜಾನಕಿಯವರು ಚಲನಚಿತ್ರ ಉದ್ಯಮದಿಂದ ಪಡೆದಿರುವ ಪ್ರಶಸ್ತಿ ಪುರಸ್ಕಾರಗಳು ಹಲವಾರು.

ಇಸ್ರೋ ವಿಜ್ಞಾನಿಯಾಗಿದ್ದು ಎ.ಎಸ್. ಕಿರಣ್ ಕುಮಾರ್ ಅವರು ಬಾಹ್ಯಾಕಾಶ ವಿಜ್ಞಾನ ಕ್ಷೇತ್ರದಲ್ಲಿ ಹಲವಾರು ಜವಾಬ್ದಾರಿಗಳನ್ನು ನಿರ್ವಹಿಸಿ ದೇಶವಿದೇಶಗಳಲ್ಲಿ ಹೆಸರು ಮಾಡಿದ್ದು, ಪ್ರಸ್ಥುತ ಪ್ರತಿಷ್ಠಿತ ಇಸ್ರೋ ಸಂಸ್ಥೆಯ ಅಧ್ಯಕ್ಷರಾಗಿ ಕಾರ್ಯ ನಿರ್ವಹಿಸುತ್ತಿದ್ದಾರೆ.
ಇವರ ಕಾರ್ಯಾವಧಿಯಲ್ಲಿ ಅನ್ನೋ ಸ್ಯಾಟ್ ಎಂಬ ಉಪಗ್ರಹವೂ ಸೇರಿದಂತೆ ಹತ್ತು ಹಲವು ಆರೋಗ್ಯ, ಶಿಕ್ಷಣ ಸಂಬಂಧಿ ಉಪಗ್ರಹಗಳನ್ನು ಯಶಸ್ವಿಯಾಗಿ ಉಡಾಯಿಸುವಲ್ಲಿ ಇಸ್ರೋ ಸಫಲವಾಗಿದೆ. MOM ಮಿಷನ್ ನೊಂದಿಗೂ ಕಿರಣಕುಮಾರ್ ಅವರ ಸಕ್ರಿಯವಾಗಿ ಪಾಲ್ಗೊಂಡಿದ್ದಾರೆ.

ಕುರಿ ಹಿಂಡಿನೊಂದಿಗೆ ಊರೂರು ಸುತ್ತುವ ಪ್ರವೃತ್ತಿಯ ಮುತ್ತಣ್ಣ ಪೂಜಾರ್ ಕೆಲದಿನಗಳ ನಂತರ ಒಂದೇ ಕಡೆ ನೆಲೆ ನಿಂತು ಜಮೀನು ಖರೀದಿಸಿ ಬೇಸಾಯ ಆರಂಭಿಸಿ ಯಶಸ್ಸು ಗಳಿಸಿದವರು.
ಸತತ ಪರಿಶ್ರಮ ಹಾಗೂ ಹೊಸ ದಾರಿಗಳನ್ನು ಅರಿತುಕೊಂಡ ಮುತ್ತಣ್ಣ ಪೂಜಾ ಈಗ ಮುವ್ವತ್ತಾರು ಎಕರೆ ಭೂಮಿಯನ್ನು ನಂದನವನವನ್ನಾಗಿ ಮಾಡಿದ್ದು, ಸಾವಯವ ಕೃಷಿಯನ್ನು ಅಳವಡಿಸಿಕೊಂಡು ಭತ್ತ, ಕಬ್ಬು, ತೋಟಗಾರಿಕೆ ಬೆಳೆಗಳು ಹಾಗೂ ಜೇನು,ಮೀನು ಸಾಕಾಣಿಕೆಯನ್ನು ಕೈಗೊಂಡಿದ್ದಾರೆ.
ರಸಗೊಬ್ಬರಗಳ ಬಳಕೆಯಿಂದ ದೂರವಿರುವ ಮುತ್ತಣ್ಣ, ತಮ್ಮ ಜಮೀನಿನಲ್ಲಿ ಎರೆಹುಳು ಗೊಬ್ಬರ ತಯಾರಿಕೆ, ಮಾಡುವುದೇ ಅಲ್ಲದೆ, ನೂರಾರು ಕುರಿಗಳನ್ನು ಮೇಯಿಸಿ, ಅದರ ಹಿಕ್ಕೆಯನ್ನು ಬೇಸಾಯಕ್ಕಾಗಿ ಉಪಯೋಗಿಸುತ್ತಿದ್ದಾರೆ.

ನೀರಿನ ಕೊರತೆಯನ್ನು ನೀಗಿಸಿ, ಲಭ್ಯ ನೀರನ್ನು ಸದುಪಯೋಗ ಪಡಿಸಿಕೊಂಡು ಉತ್ತಮ ಬೇಸಾಯ ಮಾಡುವ ಪದ್ಧತಿಗಳನ್ನು ರೂಢಿಗೆ ತರುವಲ್ಲಿ ಯಶ ಸಾಧಿಸಿದ ತಜ್ಞರಾದ ಹುನಗುಂದದ ಡಾ|| ಮಲ್ಲಣ್ಣ ನಾಗರಾಳ ಅವರಿಗೆ ಗೌರವ ಡಾಕ್ಟರೇಟ್ ಸಂದಿದೆ.
ಮಣ್ಣು ಹಾಗೂ ನೀರನ್ನು ಜತನದಿಂದ ಕಾಪಾಡುವುದರ ಮೂಲಕ ಉತ್ತಮವಾದ ಗುಣಮಟ್ಟದ ಬಿತ್ತನೆ ಬೀಜಗಳನ್ನು ಉಪಯೋಗಿಸುವ ಪರಿಪಾಠವನ್ನು ನಮ್ಮ ಪೂರ್ವಜರು ಇಟ್ಟುಕೊಂಡಿದ್ದರಿಂದ ಬೇಸಾಯವೊಂದೇ ಮೂಲಾಧಾರವಾಗಿತ್ತು. ಇದನ್ನು ನಿರ್ಲಕ್ಷಿಸಿದ್ದರಿಂದ ಕೃಷಿ ವಲಯ ಸಾಕಷ್ಟು ಪೆಟ್ಟು ತಿಂದಿದೆ ಎನ್ನುವ ಮಲ್ಲಣ್ಣ ನಾಗರಾಳ ಹಳೆಯ ವಿಧಾನಗಳಿಂದಲೇ ಕೃಷಿ ಮಾಡುವ ಮೂಲಕ ಹಳೆಯ ಯಶಸ್ಸನ್ನು ಇಂದಿನ ಕಾಲಕ್ಕೆ ನಿಜ ಮಾಡಿ ತೋರಿದ್ದಾರೆ.

ಯಕ್ಷಗಾನದಲ್ಲಿ ಮಹಿಳಾ ಪಾತ್ರಗಳಿಗೆ ಮಹತ್ವ ದೊರಕಿಸಿಕೊಟ್ಟ ಮೊದಲ ದೇವಿ ಪಾತ್ರಧಾರಿಗಳಾದ ಮಾರ್ಗೋಳಿ ಗೋವಿಂದ ಸೇರೆಗಾರ್ ಅವರು ನಿರಂತರವಾಗಿ ಐದು ದಶಕಗಳ ಕಾಲ ತೆಂಕುತಿಟ್ಟು ಯಕ್ಷಗಾನದಲ್ಲಿ ಜನಪ್ರಿಯ ಕಲಾವಿದರಾಗಿದ್ದವರು.
ಬಡಗು ತಿಟ್ಟಿನಲ್ಲಿಯೂ ಹೆಸರು ಮಾಡಿದ ಅವರು ನಿರಂತರವಾಗಿ ಪ್ರಸಿದ್ಧ ಯಕ್ಷಗಾನ ಮೇಳಗಳು ಹಾಗೂ ನುರಿತ ಕಲಾವಿದರೊಂದಿಗೆ ವೇಷ ಕಟ್ಟಿದ ಗೋವಿಂದ ಶೇರೆಗಾರ್ ಪ್ರತಿಭಾವಂತ ಯಕ್ಷಗಾನ ಕಲಾವಿದರಲ್ಲೊಬ್ಬರು.

ಶಿಲ್ಪಕಲಾ ಶಿಕ್ಷಣವನ್ನು ಮೈಸೂರಿನ ಜಯಚಾಮರಾಜೇಂದ್ರ ತಾಂತ್ರಿಕ ಸಂಸ್ಥೆಯಲ್ಲಿ ಪಡೆದುಕೊಂಡ ಎಸ್. ಮರಿಸ್ವಾಮಿ ಯವರು ವಿವಿಧ ಬಗೆಯ ವೈವಿಧ್ಯಮಯ ಶಿಲ್ಪಗಳನ್ನು ರೂಪಿಸುವ ಮೂಲಕ ಪ್ರಸಿದ್ಧರಾಗಿದ್ದಾರೆ.
ಈ ವರೆಗೂ ೧೨೦ ಕ್ಕೂ ಹೆಚ್ಚು ದೇವಾನುದೇವತೆಗಳ ಹಾಗೂ ಸಾಮಾಜಿಕ ಪರಿವರ್ತಕರ ಶಿಲ್ಪಗಳನ್ನು ಕೆತ್ತಿದ್ದು ಇದಕ್ಕಾಗಿ ಅನೇಕ ಬಹುಮಾನ ಹಾಗೂ ಗೌರವ ಪುರಸ್ಕಾರಗಳನ್ನು ಎಸ್. ಮರಿಸ್ವಾಮಿ ಪಡೆದಿದ್ದಾರೆ.
ವೈವಿಧ್ಯಮಯವಾದ ಶಿಲ್ಪಗಳನ್ನು ಸೃಷ್ಟಿಸುವಲ್ಲಿ ಕೌಶಲ್ಯ ಪಡೆದಿರುವ ಸಾತನೂರಿನ ಶಿಲ್ಪಿ ಎಸ್.ಮರಿಸ್ವಾಮಿಯವರಿಗೆ ಶಿಲ್ಪಕಲಾ ಅಕಾಡೆಮಿ ಗೌರವ ಪ್ರಶಸ್ತಿ, ಡಾ|| ಬಿ. ಆರ್. ಅಂಬೇಡ್ಕರ್ ಪುರಸ್ಕಾರ ಸೇರಿದಂತೆ ಹಲವು ಪ್ರಶಸ್ತಿಗಳು ಲಭಿಸಿವೆ.

ಪರಂಪರಾನುಗತವಾಗಿ ಬಂದ ಕಾಷ್ಟಶಿಲ್ಪವನ್ನು ಮುಂದುವರೆಸಿರುವ ಮಲ್ಲಪ್ಪ ಮಳೆಯಪ್ಪ ಬಡಿಗೇರ ಅವರು ರಾಜ್ಯದ ಹೆಸರಾಂತ ರಥಶಿಲ್ಪಿಗಳಲ್ಲೊಬ್ಬರು. ದಕ್ಷಿಣ ಭಾರತದಾದ್ಯಂತ ವಿಭಿನ್ನ ಬಗೆಯ ಮತ್ತು ವಿವಿಧ ಅಳತೆಗಳ ರಥಗಳನ್ನು ಸೂಕ್ಷ್ಮ ಕುಸುರಿ ಕೆಲಸದೊಂದಿಗೆ ನಿರ್ಮಿಸಿಕೊಟ್ಟಿರುವ ಮಲ್ಲಪ್ಪ ರಥ ನಿರ್ಮಾಣದಲ್ಲಿ ಹೊಸ ಪ್ರಯೋಗಗಳನ್ನು ಕೈಗೊಳ್ಳುತ್ತ
ಬಂದವರು.
ಅನೇಕ ವಿಶಿಷ್ಟ ಬಗೆಯ ವಿಭಿನ್ನ ವಿನ್ಯಾಸಗಳ ರಥಗಳನ್ನು ತಯಾರಿಸಿರುವ ಮಲ್ಲಪ್ಪ ಬಾಗಲಕೋಟೆ ಜಿಲ್ಲೆಯ ಬಾದಾಮಿ ತಾಲೂಕಿಗೆ ಸೇರಿದವರು. ಕಟ್ಟಿಗೆ ಕೆತ್ತನೆಯ ಕೆಲಸದಲ್ಲಿ ಹೆಚ್ಚು ಮಂದಿ ಆಸಕ್ತಿ ವಹಿಸಬೇಕೆಂಬ ಉದ್ದೇಶದಿಂದ ೨೫ಕ್ಕೂ ಹೆಚ್ಚು ಕೆತ್ತನೆಯ ಉಚಿತ ಶಿಬಿರಗಳನ್ನು ನಡೆಸಿಕೊಟ್ಟಿರುವ ಮಲ್ಲಪ್ಪನವರು ಶಿಷ್ಯ ಪರಂಪರೆಯನ್ನು ಮುಂದುವರೆಸುತ್ತಿದ್ದಾರೆ.
ರಥಶಿಲ್ಪದಲ್ಲಿ ನೈಪುಣ್ಯತೆ ಪಡೆದಿರುವ ಮಲ್ಲಪ್ಪ ಬಡಿಗೇರ ವಿಗ್ರಹ ಹಾಗೂ ಕಲಾಮೂರ್ತಿಗಳನ್ನು ತಯಾರಿಸುವಲ್ಲಿಯೂ ಪ್ರತಿಭಾವಂತರು. ಅನೇಕ ಉತ್ಸವಮೂರ್ತಿಗಳನ್ನು ನಿರ್ಮಿಸಿಕೊಟ್ಟ ಹೆಗ್ಗಳಿಕೆ ಅವರದು.

ಪೌರಾಣಿಕ ನಾಟಕಗಳಲ್ಲಿ ಪ್ರಮುಖ ಪಾತ್ರಗಳನ್ನು ಮಾಡುತ್ತಿದ್ದ ತಮ್ಮ ತಾಯಿ ಉಳೇಬೀಡು ರಂಗಮ್ಮನವರ ಪ್ರೇರಣೆಯಿಂದ ರಂಗಭೂಮಿ ಪ್ರವೇಶ ಮಾಡಿದ ವೀಣಾ ಆದವಾನಿ ಕರ್ನಾಟಕ ಹಾಗೂ ಆಂಧ್ರ ಗಡಿನಾಡಿನಲ್ಲಿ ಹೆಸರಾಂತ ನಟಿ.
ಬಾಲ್ಯದಿಂದಲೇ ನಾಟಕಗಳಲ್ಲಿ ಪಾತ್ರವಹಿಸಲು ಆರಂಭಿಸಿದ ವೀಣಾ ಅವರು ಭರತನಾಟ್ಯದಲ್ಲಿಯೂ ಶಿಕ್ಷಣ ಪಡೆದುಕೊಂಡಿದ್ದರಿಂದ ನಾಟ್ಯ ಹಾಗೂ ನಟನೆಯ ಹೊಸ ಅಭಿನಯ ಶೈಲಿಯನ್ನು ರೂಢಿಸಿಕೊಂಡು ಜನಪ್ರಿಯತೆ ಪಡೆದರು.
ವೀರ ಅಭಿಮನ್ಯು, ರಕ್ತರಾತ್ರಿ, ಉಳವಿ ಚನ್ನಬಸವೇಶ್ವರ, ಮೌನೇಶ್ವರ ಮಹಾತ್ಮ, ನಾಟ್ಯ ರಾಣಿ ಹೀಗೆ ನೂರಾರು ನಾಟಕಗಳಲ್ಲಿ ಮುಖ್ಯ ಪಾತ್ರಧಾರಿಯಾಗಿ ಅಸಂಖ್ಯ ಪ್ರದರ್ಶನಗಳನ್ನು ನೀಡಿದ ಇವರು ನೃತ್ಯ ಶಿಕ್ಷಣದ ಜೊತೆಗೆ ಗ್ರಾಮೀಣ ನಾಟಕಗಳಲ್ಲಿ ಬಿಡುವಿಲ್ಲದ ನಟಿ ಎನ್ನಿಸಿಕೊಂಡರು. ವೀಣಾ ಅವರಿಗೆ ಕರ್ನಾಟಕ ನಾಟಕ ಅಕಾಡೆಮಿ ವಾರ್ಷಿಕ ಪ್ರಶಸ್ತಿ ನೀಡಿ ಗೌರವಿಸಿದೆ.

ಗುಡಿಗೇರಿ ನಾಟಕ ಕಂಪೆನಿ, ಸೂಡಿ ನಾಟಕ ಕಂಪೆನಿ ಸೇರಿದಂತೆ ಹಲವಾರು ವೃತ್ತಿ ನಾಟಕ ಕಂಪೆನಿಗಳಲ್ಲಿ ನಲವತ್ತು ವರ್ಷಗಳ ಕಾಲ ಕಲಾವಿದೆಯಾಗಿ ಸೇವೆ ಸಲ್ಲಿಸಿರುವ ಮುಮ್ರಾಜ್ ಬೇಗಂ ಅವರ ಮೊದಲ ಹೆಸರು ಲಲಿತಾ. ಆರಂಭದಿಂದಲೂ ನಾಟಕಗಳಲ್ಲಿ ಪ್ರಮುಖ ಪಾತ್ರಗಳನ್ನು ನಿರ್ವಹಿಸಿದ್ದು, ಮಮ್ರಾಜ್ ಬೇಗಂ ಅವರ ಹಿರಿಮೆ.

ಹಿಂದೂಸ್ಥಾನಿ, ಸುಗಮ ಸಂಗೀತಗಳಲ್ಲಿ ನಿಪುಣರಾದ ಕೆ.ಕರಿಯಪ್ಪ ಮಾಸ್ತರ್ ಉತ್ತಮವಾದ ಹಾರ್ಮೋನಿಯಂ ವಾದಕರೂ ಕೂಡ. ತಮ್ಮ ಕಲಾನಿಕೇತನ ಸಂಗೀತ ವಿದ್ಯಾಲಯದ ಮೂಲಕ ಸಂಗೀತ ಶಿಕ್ಷಣ ನೀಡುತ್ತಿರುವ ಕರಿಯಪ್ಪ ‘ಸಂಗೀತ ಸಿಂಚನ ಎಂಬ ತಂಡದ ಮುಖೇನ ಸಂಗೀತ ಕಾರ್ಯಕ್ರಮಗಳನ್ನು ನೀಡುತ್ತಿದ್ದಾರೆ.
ಸಂಗೀತ ಶಿಕ್ಷಣದ ಜೊತೆಗೆ ನಾಟಕಗಳಿಗೆ ಸಂಗೀತ ನಿರ್ದೇಶನ ಮಾಡಿರುವ ಇವರು ಅನೇಕ ಧ್ವನಿಸುರುಳಿಗಳಿಗೆ ಸ್ವರ ಸಂಯೋಜನೆ ಮಾಡಿದ್ದಾರೆ. ತತ್ವಪದ, ದಾಸರಪದ, ಹಾಗೂ ವಚನ ಗಾಯನಗಳಲ್ಲಿಯೂ ನೈಪುಣ್ಯತೆ ಪಡೆದಿರುವ ಕರಿಯಪ್ಪ ಮಾಸ್ತ ಆಕಾಶವಾಣಿ, ದೂರದರ್ಶನ ಕೇಂದ್ರಗಳಲ್ಲಿ ಕಾರ್ಯಕ್ರಮ ನೀಡಿದ್ದಾರೆ.
ಕರ್ನಾಟಕ ಸಂಗೀತ ನೃತ್ಯ ಅಕಾಡೆಮಿ ಹಾಗೂ ಮೈಸೂರಿನ ರಂಗಾಯಣದ ಸದಸ್ಯರಾಗಿಯೂ ಕಾರ್ಯ ನಿರ್ವಹಿಸಿರುವ ಕರಿಯಪ್ಪ ಮಾಸ್ಟರ್ ಅವರಿಗೆ ಕರ್ನಾಟಕ ಕಲಾಶ್ರೀ ವಾರ್ಷಿಕ ಪ್ರಶಸ್ತಿ ಸಂದಿದೆ.

ರಂಗಭೂಮಿ ಹಾಗೂ ಚಲನಚಿತ್ರ ಕ್ಷೇತ್ರದಲ್ಲಿ ಕಲಾವಿದರಾಗಿ ಅನುಭವವಿರುವ ಎಚ್.ಜಿ.ಸೋಮಶೇಖರರಾವ್ ಬಾಲನಟನಾಗಿ ರಂಗಭೂಮಿಗೆ ಕಾಲಿಟ್ಟರು. ವಿದ್ಯಾರ್ಥಿ ಜೀವನದಲ್ಲಿಯೇ ಅಭಿನಯ ಹಾಗೂ ನಿರ್ದೇಶನದಿಂದ ನಾಟಕ ಕ್ಷೇತ್ರದೊಂದಿಗೆ ಸಂಬಂಧವಿರಿಸಿಕೊಂಡ ಅವರು ನಂತರದ ದಿನಗಳಲ್ಲಿ ಚಲನಚಿತ್ರ ಕ್ಷೇತ್ರದಲ್ಲೂ ತಮ್ಮದೇ ಆದ ಛಾಪು ಮೂಡಿಸಿದ್ದಾರೆ.
ಕನ್ನಡದ ಹವ್ಯಾಸಿ ರಂಗಭೂಮಿಯಲ್ಲಿ ನಿರಂತರವಾಗಿ ಕೆಲಸ ಮಾಡುತ್ತಿರುವ ಇವರು ಆರೂವರೆ ದಶಕಗಳಿಂದ ಬಣ್ಣದ ಬದುಕಿನೊಡನೆ ಸಂಬಂಧ ಇಟ್ಟುಕೊಂಡಿದ್ದಾರೆ. ರಂಗಭೂಮಿಯ ಪ್ರಸಿದ್ಧ ನಿರ್ದೇಶಕರ ನಾಟಕಗಳಲ್ಲಿ ಪ್ರಮುಖ ಪಾತ್ರ ನಿರ್ವಹಿಸಿರುವ ಸೋಮಣ್ಣ ೫೦ಕ್ಕೂ ಹೆಚ್ಚು ಚಲನಚಿತ್ರಗಳಲ್ಲಿ ಗಮನಾರ್ಹವಾದ ಪಾತ್ರಗಳನ್ನು ನಿರ್ವಹಿಸಿದ್ದಾರೆ.
ನಟನೆಯೇ ಅಲ್ಲದೆ, ಚಿತ್ರ ಕಥಾರಚನೆಯಲ್ಲಿಯೂ ಕೈಯಾಡಿಸಿರುವ ಸೋಮಶೇಖರರಾವ್ ಕಿರುತೆರೆಯಲ್ಲಿಯೂ ತಮ್ಮದೇ ಆದ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ಸೋಮಣ್ಣನ ಸ್ಟಾಕ್ ಎಂಬ ಆತ್ಮ ಕಥನವನ್ನು ಬರೆದಿರುವ ಇವರು ಅನೇಕ ಅಭಿನಂದನಾ ಗ್ರಂಥಗಳನ್ನು ಸಂಪಾದಿಸಿದ್ದಾರೆ. ಕರ್ನಾಟಕ ನಾಟಕ ಅಕಾಡೆಮಿ ಪ್ರಶಸ್ತಿ, ಸರ್ಕಾರದ ಶ್ರೇಷ್ಠ ಪೋಷಕ ನಟ ಪ್ರಶಸ್ತಿಯೂ ಸೇರಿದೆ.

ಲಲಿತ ಪ್ರಬಂಧಗಳ ಮೂಲಕ ನಾಡಿನ ಗಮನ ಸೆಳೆದಿರುವ ವೀರೇಂದ್ರ ಸಿಂಪಿ ಅವರು ವೃತ್ತಿಯಿಂದ ಇಂಗ್ಲಿಷ್ ಪ್ರಾಧ್ಯಾಪಕರು. ಕಾಲೇಜು ದಿನಗಳಲ್ಲಿಯೇ ಕಥೆ, ಅನುವಾದಗಳಲ್ಲಿ ಆಸಕ್ತಿ ಹೊಂದಿದ್ದ ಇವರು ನಂತರ ಲಲಿತ ಪ್ರಬಂಧ ರಚನೆಯಲ್ಲಿ ಹೆಚ್ಚಿನ ಆಸಕ್ತಿ ವಹಿಸಿದರು.
ಅನೇಕ ಪ್ರಬಂಧ ಕೃತಿಗಳನ್ನು ಬರೆದಿರುವ ವೀರೇಂದ್ರ ಸಿಂಪಿ ಅವರು ಸ್ವಾತಂತ್ರ್ಯ ಹೋರಾಟಗಾರರ ಬಗ್ಗೆ ಕೃತಿಗಳನ್ನು ರಚಿಸಿದ್ದಾರೆ. ಹಲವು ಇಂಗ್ಲಿಷ್ ಗ್ರಂಥಗಳನ್ನು ಕನ್ನಡಕ್ಕೆ ಅನುವಾದ ಮಾಡಿರುವ ಇವರು ಅನೇಕ ಜಿಲ್ಲಾ ದರ್ಶನಗಳನ್ನು ರಚಿಸಿದ್ದಾರೆ.
ಹಿರಿಯ ಸಾಹಿತಿಗಳ ಜೀವನಚರಿತ್ರೆಯನ್ನು ಬರೆದಿರುವ ಸಿಂಪಿಯವರು ರಚಿಸಿದ ಕೃತಿಗಳು ವಿಶ್ವವಿದ್ಯಾಲಯದ ಪಠ್ಯ ಪುಸ್ತಕಗಳಾಗಿವೆ. ಇವರಿಗೆ ಜಿಲ್ಲಾ ಸಾಹಿತ್ಯ ಪರಿಷತ್ತು ಹಾಗೂ ವಿಶ್ವವಿದ್ಯಾಲಯಗಳು ಗೌರವ ಪ್ರಶಸ್ತಿಗಳನ್ನು ನೀಡಿ ಗೌರವಿಸಿದೆ.

ಕನ್ನಡದ ಹಿರಿಯ ಬರಹಗಾರ್ತಿಯರಲ್ಲಿ ಒಬ್ಬರಾದ ಆಲ್ಯಾಂಬ ಪಟ್ಟಾಭಿ ಮೈಸೂರು ವಿಶ್ವವಿದ್ಯಾಲಯದ ಸ್ನಾತಕ ಪದವೀಧರರು. ಸಾಹಿತ್ಯದಲ್ಲಿ ಬೃಹತ್ ಕಾದಂಬರಿಯೊಂದಿಗೆ ಕಾಲಿಟ್ಟ ಆರಾಂಬ ಅವರು ಈವರೆಗೆ ೩೪ ಕಾದಂಬರಿಗಳನ್ನು ರಚಿಸಿದ್ದಾರೆ.
ಜನಪ್ರಿಯ ಕಾದಂಬರಿಗಳನ್ನು ನೀಡುವುದರ ಜೊತೆಗೆ ನೂರಾರು ಸಣ್ಣ ಕತೆಗಳನ್ನು ರಚಿಸಿದ ಹಿರಿಮೆ ಆರಾಂಬ ಅವರದು. ಶಿಶು ಸಾಹಿತ್ಯದಲ್ಲಿಯೂ ಕೆಲಸ ಮಾಡಿರುವ ಇವರು ಹನ್ನೆರಡು ಶಿಶು ಸಾಹಿತ್ಯಕೃತಿಗಳನ್ನು ರಚಿಸಿದ್ದಾರೆ. ಇವರು ಬರೆದ ಅನೇಕ ಕಾದಂಬರಿಗಳು ಕನ್ನಡವೇ ಅಲ್ಲದೆ ದಕ್ಷಿಣದ ಎಲ್ಲ ಭಾಷೆಗಳಲ್ಲಿಯೂ ಚಲನಚಿತ್ರಗಳಾಗಿ ಮೂಡಿ ಬಂದಿವೆ.
ಸ್ವತಃ ಟೆನ್ನಿಸ್ ಸೇರಿದಂತೆ ಅನೇಕ ಕ್ರೀಡೆಗಳ ನಿಪುಣೆಯಾದ ಆಲ್ಯಾಂಬ ಪಟ್ಟಾಭಿಯವರು ಟೆನ್ನಿಸಿನಲ್ಲಿ ಮೈಸೂರು ವಿಶ್ವವಿದ್ಯಾಲಯವನ್ನು ಪ್ರತಿನಿಧಿಸಿದ್ದಾರಲ್ಲದೆ ಟೆನಿಸ್ ಕುರಿತಂತೆ ಮಾಹಿತಿ ಪೂರ್ಣ ಕೃತಿಯೊಂದನ್ನು ಅವರು ಬರೆದಿದ್ದಾರೆ. ಕರ್ನಾಟಕ ಸಾಹಿತ್ಯ ಅಕಾಡೆಮಿ ಗೌರವ ಸೇರಿದಂತೆ ಹಲವು ಪ್ರಶಸ್ತಿ ಪುರಸ್ಕಾರಗಳು ಇವರಿಗೆ ಸಂದಿವೆ.